Eñemopeteĩ Cristo ndive

Añandu pypuku Jesucristo Expiasiõre che mitãrusu guie, ha katu pe Salvador Expiasiõ añetekue ou ógape chéve arekóvo 25 áño. Ajegradua ramoitékuri Stanford Facultad de Derecho-gui ha aestudia hína California examen de abogacía-rã. Che sy ohenói ha he’i che taita Crozier Kimball, oikóva Utah-pe, omanoha hína. He’i ahechasérõ chupe, ahava’erãha ógape. Che taita oreko 86 áño ha hasykatueterei. Arekókuri peteĩ visita hechapyrãitéva hendie. Ha’e ovy’aiterei cherechávo ha okomparti chendive itestimónio.

Crozier orekórõguare mbohapy áñonte, itúva, David Patten Kimball omano orekóvo 44 áño.Crozier oha’arõkuri itúva ha itaita Heber C. Kimball, oaprovataha hekove ha toñandu hikuái ha’e ijeroviarekohague ilegádope.

Che taita konsého imba’eguasuvéva chéve g̃uarã ha’ékuri ajehekýi hag̃ua oimeraẽichagua temiandu arekoha derecho térã priviléhio umi ypykue ijeroviarekóva rupi. He’i chéve añenfokava’erã pe Salvador ha Iñexpiasiõre. He’i opavave ñande ha’eha peteĩ Túva Yvagagua oporohayhúva ta’ýra ha rajykuéra. Taha’e ha’éva ñande ykykuéra ko yvy arigua, peteĩteĩ ñande ñainformava’erã Salvador-pe ñaneñe’ẽrendu porãpara’e Hembiapoukapykuérare.

Che taita ojerreferi pe Salvador-re “Pe okẽ ñongatuhára” ramo, peteĩ referencia 2 Nefi 9:41 rehe. He’i chéve oha’arõha oñearrepentihague oiporãma hag̃uáicha ohupyty hag̃ua pe Salavador poriahuvereko.

Opoko pypuku cherehe. Che aikuaa ha’e ha’ehague peteĩ kuimba’e hekojojáva. Ha’ékuri patriarca ha oservi heta misiõme. Chembo’e avave ndaikatuiha oho jey Tupãme hembiapo porã rupi añónte pe Salvador Expiasiõ pytyvõ’ỹre. Chemandu’a ko’ág̃aite peve pe tuichaite mborayhu ha momba’eguasu che taita orekóva pe Salvador ha Iñexpiasiõre.

2019-pe, peteĩ asignasiõ aja Jerusalén-pe, avisitákuri peteĩ aposento yvate ikatúvakuri hi’ag̃ui pe tendágui pe Salvador ojohéi haguépe ipy Ijapostolkuérape Iñemongurusu mboyve. Opoko cherehe espiritualmente ha apensa mba’éichapa omanda Ijapostolkuérape ojohayhu hag̃ua ojupe.

Chemandu’a pe Salvador ñembo’e ojapova’ekue ñanderehe. Upe ñembo’e oikókuri literalmente Hekove ára paha yvy arigua aja omombe’uháicha Juan evanhélio.

Ko ñembo’e ohókuri umi Cristo seguidor-kuérape, jepe opavave ñandévepe. Pe Salvador ojerurévape Itúvape, Ha’e ojerure’asy “toñemopeteĩ hikuái; nde, Túva ha’eháicha chendive, ha Che nendive, ha’ekuéra avei toñemopeteĩ ñanendive”. Upéi pe Salvador he’ive: “Ha pe gloria nde reme’ẽva’ekue chéve, ame’ẽkuri chupekuéra; ha’ekuéra oñemopeteĩ hag̃ua, jepe ñande ñanepeteĩháicha.” Ñemopeteĩ ha‘e pe mba‘e Cristo oñembo‘e haguére oñetraiciona ha ojehupi mboyve Kurusúre. Ñemopeteĩ Cristo ha ñande Ru Yvagagua ndive jahupytykuaa pe Salvador Expiasiõ rupive.

Pe Ñandejára poriahuvereko oporosalváva ndohói lináhe, jeikuaa, mba’erepy jeguereko térã rása rehe. Ojevasa ñemopeteĩme Cristo ndive ha Hembiapoukapykuéra rehe.

Proféta José Smith ha Oliver Cowdery ohupytýkuri pe rrevelasiõ Tupao ñemohenda ha ñeisãmbyhy rehegua 1830-pe, Tupao oñemohenda rireminte. Upe ko’ág̃a ha’éva sección 20 oñemoñe’ẽkuri Proféta José Smith rupive pe Tupao conferencia peteĩháme ha ha’ékuri pe rrevelasiõ peteĩha oñemoneĩva’ekue común acuerdo rupive.

Ko rrevelasiõ contenido hechapyrãiterei. Ñanembo’e pe Salvador Expiasiõ mba’eguasu ha funsiõgui ha mba’éicha jahupytykuaa Ipu’aka ha jehovasakuéra Igrásia expiatorio rupive. Proféta José Smith orekókuri 24 áño ha ohupytýmakuri heta rrevelasiõ ha ojapopa pe Mormón Kuataiañe’ẽ ñembohasa Tupã don ha pu’aka rupi. José ha Oliver oñeidentifika Apóstol oñeordenapyréva ramo, orekóvo upéicha autorida opresidi hag̃ua Tupao ári.

Umi versículo 17 guive 36 peve oreko peteĩ pe Tupao doctrina esencial ñemombyky, oikehápe pe Tupã añetegua, pe yvyporakuéra Je’apo, pe Je’a, ha Tupã Yvagagua plan salvasiõ rehegua Jesucristo Expiasiõ rupive. Pe versículo 37 oreko umi mba’eguasu oñeikotevẽva oñemongarai hag̃ua Jesucristo Tupaópe. Umi versículo 75 guive 79 peve omoĩ umi ñembo’e sacramental jaiporúva káda Pytu’u’ára.

Umi doctrina, principio, sacramento ha práctica-kuéra Ñandejára omoĩva’ekue José Smith, upe Restauración Proféta rupive, añetehápe imba’eguasueterei.

Umi mba’e oñeikotevẽva ñemongarairã, pypukurõ jepe, isensillo oñeimo’ã’ỹháicha. Oinklui ñepyrũháme humilda Tupã renondépe, peteĩ korasõ oñembyasýva ha peteĩ espíritu imirĩva, arrepentimiento opa angaipakuéragui, jajagarra ñande ári Jesucristo réra, ñañeha’ãmbaite ipahaite peve ha jahechauka ñane rembiapokuéra rupi jahupytyhague Cristo Espíritu.

Tuicha mba’e opa umi oñeikotevẽva ñemongarairã ha’eha espiritual. Natekotevẽi jareko logros económicos térã social. Umi imboriahu ha umi irríkova oreko peteĩchagua umi requisito espiritual.

Noñeikotevẽi rrása, sexo ni origen étnico. Mormón Kuatiañe’ẽ omohesakãporã oñeinvitaha opavavépe opartisipa hag̃ua Ñandejára py’aporãgui, “hũ ha morotĩva, oñeñapytĩ ha isãsóva, kuimba’e ha kuña; … opavave peteĩchante Tupã renondépe”. “opa yvypóra oñemombaʼe peteĩcha, ha avavépe noñembotovéi.”

Ha’évo ñande “peteĩcha” Tupã renondépe, ndorekói sentido ñamomba’eguasu umi mba’e iñambuéva ñande apytépe. Oĩ tapicha ñanemokyre’ỹva’ekue jejavýpe “ñaimo’ã hag̃ua tapichakuéra iñambueveha ñandehegui ha ojuehegui añetehápe iñambuehágui. [Oĩ umi] ojagarráva umi mba’e iñambue añetéva ha katu michĩetereíva, ha ombotuichaiterei.”

Avei, oĩ umi jejavýpe oimo’ãva, opavave tapichápe oñeinvita haguére ohupyty hag̃ua Ipy’aporã ha tekove opave’ỹvagui, ndaiporiha tekolaja ojejeruréva.

Upevére, escritura-kuéra otestifika opaite tekove responsable-pe ojejerureha toñearrepenti angaipakuéragui ha taiñe’ẽrendu Hembiapoukapykuérare. Ñandejára omohesakãporã opavave orekoha sãso moral oiporavo hag̃ua ha “isãso oiporavo hag̃ua tekosãso ha tekove opaveʼỹva, pe opavave yvyporakuéra Mediador guasu rupive … ha pehendu umi hembiapoukapy tuicháva; ha pendejeroviareko iñeʼẽre, ha peiporavo pe tekove opaveʼỹva” Ojehupyty hag̃ua pe Salvador Expiasiõ jehovasakuéra, ñamomba’apo añeteva’erã ñane sãso moral jaiporavo hag̃ua Cristo-pe ha ñaneñe’ẽrendu hag̃ua Hembiapoukapykuérare.

Che rekove aja, pe “albedrío” ha “sãso ojeiporavo hag̃ua” ojehesa’ỹijo ha oñeñemongeta umívare. Oĩva’ekue ha oĩ gueteri heta argumento intelectual umi téma rehe.

Ramoite peteĩ universidagua exalumno-kuéra publicación imba’eguasúva portada-pe, peteĩ prominente mbo’ehára biólogo omoañete: “Ndaipóri tenda Libre Albredio-pe g̃uarã.” Ndaha’éi sorpresa upe profesor ojesita pe artículo-pe he’ívo: “Ndaipóri aipo mba’e ojeikuaáva Tupã ramo, … ha ndaipóri libre albedrio, … ha kóva peteĩ universo tuicha, iñindiferente ha nandíva.” Ndaikatúi aimeve en desacuerdo.

Peteĩ doctrina fundamental ñande jeroviápe ha’e jaguerekoha albedrío moral oinkluía pe sãso jaiporavo hag̃ua. Albedrío ha’e katupyry jaiporavo ha ñamba’e’apo hag̃ua. Upéva esencial Salvasiõ Plan-pe g̃uarã. Albedrio moral-ỹre, ndaikatumo’ãi ñañemoarandu, jakakuaa, térã jaiporavo ñañemopeteĩ hag̃ua Cristo ndive. Albedrío moral rupive “ñanesãso jaiporavo hag̃ua sãso ha tekove ijapyra’ỹva” Pe Concilio Premortal yvágape, pe Túva plan-pe oikékuri pe “albedrío” peteĩ mba’e esencial ramo. Lucifer ojerrevela ha “oñeha’ã ohundi yvyporakuéra albedrío” Upévare, pe priviléhio ojeguereko hag̃ua peteĩ tete mortal oñembotove Satana ha umi chupe osegívagui.

Ambue espíritu-kuéra premortal omomba’apókuri isãso oiporavo hag̃ua osegívo ñande Ru Yvagagua plan. Umi espíritu ojehovasáva ñerenõi reheve ko tekove mortal-pe oreko meme guateri upe albedrío. Ñande ñanesãso jaiporavo ha ñamba’e’apo hag̃ua, ha katu nañakontrolái umíva oguerúva. “Umi mba’e porã ha tekojoja jeiporavo oporogueraha vy’apavẽ, py’aguapy ha tekove ijapyra’ỹvape, ha katu angaipa ha aña jeiporavo ára ohasávo oporogueraha py’arasy ha ñembyasýpe.” Alma he’i haguéicha: “Tekoñaña ndahaʼeivaʼekue arakaʼeve vyʼapavẽ.”

Ko yvóra ikompetitivoitereívape, oĩ ñeha’ã meme ojejapoporãve hag̃ua. Ñañeha’ã ñanemehorve hag̃ua ikatuháicha ha’e peteĩ ñeha’ã hekojojáva ha ovaléva la pena. Oho porã Ñandejára doctrina reheve. Umi ñeha’ã ñambo’apo’i térã jadespresia hag̃ua ambuekuérape térã ñamoĩ jokoha ijekakuaápe oñemoĩ Ñandejára doctrina rehe. Ndaikatúi jakulpa umi circunstancia térã ambuekuérape jaiporavórõ ñamba’e’apo Tupã rembiapoukapykuéra kóntrape.

Ko’ág̃agua yvórape, ndahasýi ñañesentra éxito material ha tembiapo reheguápe. Oĩ umi operdéva de vista umi principio ijapyra’ỹva ha umi desisiõ orekóva consecuencia eterno. Iñarandúne jasegi Presidente Russell M. Nelson konsého “Ñapensa hag̃ua Celestial-háicha.”

Umi desisiõ imba’eguasuvéva ikatu ojapo haimete opavave tapicha taha’eha’éva italénto, ikatupyrykue, umi oportunidad térã cincunstacia económico. Pe énfasis ñamoĩvo umi desisiõ familiaguáva peteĩhápe iñesensiál. Kóva hesakãporã escritura-kuérape. Pepensami 1 Nefi ñemombe’úre Lehi “oje’oihápe tave’ỹme. Ha oheja hóga, ha pe ijyvy ñeʼẽmeʼẽngue, ha hiʼóro, ha ipláta, ha imbaʼekuéra iporãva, ha ndoguerahái mbaʼeve hendive, hogayguakuéra añónte, ha hiʼupyrã, ha ogaaokuéra, ha osẽ taveʼỹme.”

Ñambohovakévo umi jehasa’asy ko tekove rehegua, oiko heta evento jaguerekoha ári pokãiterei térã ni peteĩ control. Umi mba’asy rehegua problema ha accidente-kuéra ikatu oike ko categoría-pe. Upe ramoitegua Covid-19 pandemia oafecta vaieterei tapichakuérape ojapoporãmbáva. Ha katu hetave umi desisiõ imba’eguasuvévarã ñande jareko control. Aha jeývo umi che ára misional gotyo, élder Marion D. Hanks, ore misiõgua presidente, oremomandu’auka de memoria peteĩ ñe’ẽpoty pehẽ ohaiva’ekue Ella Wheeler Wilcox:

Umi mba’e ohóva umi principio, mba’e’apo, observancia religioso ha tekojoja reko rehe ñande jareko pe control. Ñande jerovia ha tupãitũ Tupã pe Túva ha Ita’ýra Jesucristo-pe, ha’e peteĩ poravo ñande jajapóva.

Pentendemi, nda’eiha hína peguerekova’erãha pokãve interés educación térã tembiapo rehe. Pe ha’éva hína niko umi ñeha’ã ohóva educación ha tembiapóre ijyvatevérõ umi familia térã ñemopeteĩ Cristo ndive rehegua ári, umi consecuencia oúva ojeipota’ỹre ikatu ivaieterei.

Pe doctrina hesakã ha isensíllova oñemoĩva Doctrina ha Konveniokuéra 20-pe opoko ñande py’áre ha ñanemokyre’ỹ oipyso ha omohesakãvo umi concepto espiritual isagrádova. Ombo’e pe salvasiõ ouha Jesucristo ohustifika ha omomarangatúvo umi ánga oñearrentívape pe Salvador grásia rupive. Omoĩ pe escenario Iñexpiasiõ imba’eguasúva funsiõrã.

Ñañeha’ãva’erã ñainklui hag̃ua ambue tapichakuérape ñane ñemopeteĩ korápe. Jasegítarõ Presidente Russell M. Nelson konsého ñambyatyva’erãha Israel isarambívape mokõive vélo lado gotyope, ñaikluiva’erã ambue tapichakuérape ñane ñemopeteĩ korápe. Presidente Nelson ombo’e porãite haguéicha: Umi diferencia oĩva cultura, ñe’ẽme, sexo, raza ha nacionalida namba’eguasúi umi hekojojáva oikeháicha pe konvénio rapépe ha ou ñande Redentor jahayhuetévape”

Jajojau ñane mborayhu ha jerovia Jesucristo-re rupi ha peteĩ Túva Yvagagua oporohayhúva ta’ýra ha rajykuéra ramo. Pe ñepertenese esencia oĩ ñemopeteĩme Cristo ndive. Pe ñemongarai ha Santa Cena ordenansakuéra oñemoĩva Doctrina ha Konveniokuéra 20-pe,ñande templo-gua konveniokuéra reheve, ñanembojoaju iporãveháicha ha oheja tañanepeteĩ opa mba’épe imba’eguasúva tapiaiterã ha tajaiko py’aguapy ha armonía-pe.

Ame’ẽ che testimonio seguro ha añetéva Jesucristo oikoveha, ha Iñexpiasiõ rupi ikatuha ñañemopeteĩ Cristo ndive. Jesucristo réra sagrádope, Amén.