Heñói korasõme

Hermano ha hermana-kuéra, a’aprende peteĩ mbo’epy hasýva upe aipuru pahaite guive ko púlpito octubre 2022-pe. Upe mbo’epy ha’e: nereme’ẽiramo peteĩ diskúrso ojeaceptáva, ikatu ejeproivi umi conferencia oúvape. Pehechakuaaháicha che añeasigna ko sesiõ peteĩha ñepyrũme voi pyhareve. Pe ndaikatúiva pehecha ha’e añembo’yha peteĩ okẽ ñuhãme peteĩ tranka’imi idelikadoitereíva reheve. Ko diskúrso ndohoporãiramo, ndapohechamo’ãi umi conferencia oúvape.

Upe himno parãite espíritupe ko kóro porãite reheve, nda’aréi a’aprende umi mbo’epy, Ñandejára pytyvõ reheve, akompartiséva penendive ko árape. Upéva ojapóta kóvagui peteĩ diskúrso ipersonal-etereíva.

Pe ipersonal ha hasyvéva opa ko’ã experiencia nda’aréi oikova’ekuégui ha’e che rembireko ahayhuetéva, Pat, ñemano. Ha’e ha’eva’ekue pe kuña tuichavéva aikuaáva—peteĩ sy ha tembireko perfecta, ha’e’ỹre mba’eve ipotĩngue, iñexpresiõ don, ijespiritualidáre. Peteĩ jey ha’e ome’ẽ peteĩ diskúrso ojeheróva “Pekumpli pene kreasiõ medída rehe”. Chéve g̃uarã ha’e okumpli porãite hague pe ikreasiõmedída rehe oimeraẽva ikatuva’ekuégui oimo’ã ikatuha. Ha’ékuri peteĩ Tupã rajy orekopáva, peteĩ Cristo-gua kuña ehemplar. Che kuimba’e chepo’avéva ahasa haguére hendive sesenta ary aja che rekovépe. Ajehechauka ramo digno, ore sellamiénto he’iséta ikatuha ahasa hendive pe eternida.

Ambue experiencia oñepyrũkuri 48 óra che rembireko oñeñotỹ rire. Upe árape añemoinge hospital-pe peteĩ mbaʼasy ivaietereíva reheve. Upéi ahasa umi cuatro semana ñepyrũrã peteĩ seis semana ñeime aja aike ha asẽvo cuidado intensivo-gui ha aike ha asẽvo che conciencia-gui.

Haimete opa che experiencia hospital-pe upe ára ñepyrũrãgua okañymba che akãgui. Pe nokañyiva’ekue chemandu’águi ha’e peteĩ viáhe hospital okára gotyogua, osẽva ha’etévaicha eternida rembe’y rehe. Ndaikatúi añe’ẽmbaite upe experiencia rehe ko’ápe, ha katu ikatu ha’e pe arresiviva’ekue pehẽngue ha’eha peteĩ ñemoñe’ẽ ajevy hag̃ua che ministériope pya’etereive reheve, konsagrasiõve reheve, jehesarekove rehe Salvador-re, jeroviave rehe Iñe’ẽre.

Ndaikatúi añeñandu arresiviha hína che versiõ personal tee peteĩ revelasiõ oñeme’ẽva’ekuégui umi Doce-pe ojapo haimete 200 áño:

“Retestifikáta che réragui … [ha] remboúta che ñe’ẽ yvy paha peve. …

“… Koʼẽ koʼẽre; ha ára ha ára toñehenduka ne ñemomarandu ñeʼẽpu; ha pyharévo ne ñeʼẽnguéra ani oheja oke umi yvy ári oikóvape. …

“Epu’ã[,] … ejagarra nde kurusu, [ha] chesegi”.

Che hermana ha hermano-kuéra ahayhuetéva, upe experiencia guive, añeha’ãve ajagarra che kurusu, aheka moõpa ikatu amopu’ã peteĩ ñe’ẽpu apostóliko hakuvy ha ñemomarandu rehegua pyhareve, ára pukukue aja ha oñepyrũ meve pyhare.

Upéva chegueru peteĩ mbohapyha añeteguápe ouva’ekue umi mes ojeperdeha, mba’asy ha jepy’apýpe. Ha’ékuri peteĩ testimonio oñembopyahúva ha aguyje opave’ỹva ko Tupao ñembo’e mbarete rupi—pene ñembo’e—che ha’éva upe ohupytyva’ekue. Aaguijeme’ẽta tapiate g̃uarã umi miles tapicha jerure’asýre, pe viuda oporomyangekóivaicha, ojerure jey jeyýva yvága intervensiõ che favor-pe. Arresivi sacerdocio jehovasa, ha ahecha che angirũnguéra che clase de secundaria-gua oajunárõ cherehe, ojapoháicha avei heta barrio Tupaogua. Ha che réra oiméne oĩ haimete káda Tupaogua templo lista de oración-pe.

Che aguyje pypuku opa ko’ã mba’ére, amoirũ G. K. Chesterton, he’iva’ekue peteĩ jey “aguyje ha’eha pe pensamiento fórma ijyvatevéva; ha … aguyjeme’ẽ ha’e pe vy’a oñemomokõiva py’andýi rupive.” Che korasõ mbytete guive ha “vy’a oñemomokõiva py’andýi rupive”, aaguyjeme’ẽ opavave peẽme ha aaguyjeme’ẽ che Ru Yvagaguápe, ohendu haguére pene ñembo’e ha ohovasáva che rekove.

Hermano ha hermana-kuéra, atestifika Tupã ohenduha opa ñembo’e ñaikuave’ẽva ha ombohovái peteĩteĩme pe tape ñane perfecsiõrã Ha’e omoĩva’ekuépe he´iháicha. Ahechakuaa haimete hetaite tapicha upe oñembo’e javete cheresãi jey hag̃ua, peteĩ número upéichaite jey—che avei—oñembo’ékuri che rembireko hesãi jey hag̃ua. Atestifika mokõive umi ñembo’e oñehendu hague haoñembohovái hague peteĩ Túva Yvagagua iporiahuverekóva divinamente, umi ñembo’e Pat-pe g̃uarã noñembohováiramo jepe che aipotaháicha. Ha’e Tupã añoiténte oikuaáva mba’érepa umi ñembo’e oñembohovái ambuéicha ñande ñaha’arõvagui—ha katu apromete peẽme umíva oñehendu ha umíva oñembohovái Imborayhu ndopytu’úiva ha ikalendáriope oĩháicha.

“Ndajajerurevaíriramo”, ndorekói límite araka’épa, moõpa térã mba’érepa ñañembo’eva’erã. Umi revelasiõme he’iháicha, “ñañembo’eva’erã tapiaite”. Ñañembo’eva’erã, he’i Amulek, “umi pende jerére oĩva”, rehe ojeguerovíavo “peteĩ [tavayguakuéra] hekojojáva ñembo’e kyre’ỹ ikatuha ojapo heta mba’e”. Ñane ñembo’e oje’eva’erã ñaime jave ñemiháme upéicha ñaikuave’ẽ hag̃ua. Upéva ndaikatúiramo oiko, ojeguerahava’erã ñane korasõme ñe’ẽ kirirĩháme. Japurahéi ñembo’ekuéra “heñoiha ñane korasõme”, oñeikuave’ẽ hag̃ua tapiaite g̃uarã, según pe Salvador ete, Tupã pe Túva Apyra’ỹme Ita’ýra Unihénito rérape.

Che angirũnguéra pohayhuetéva, umi ñane ñembo’e ha’e ñane momento he’ẽvéva, ñande “potapy añetevéva” ñane ñetupãitũ hasy’ỹvéva, ipotĩveháicha. Ñañembo’eva’erã peteĩteĩ, ñane familiape ha kongregasiõme taha’e tuichakue opáichagua. Jaiporuva’erã ñembo’e peteĩ escudo ramo tentasiõ kóntrape, ha sapy’arei ñañandúramo nañañembo’eseiha, ikatu ñaime seguro pe py’amokõi ndouiha Tupãgui, máva oñe’ẽsetereíva Ita’yrakuéra ndive oimeraẽ ha opa ára jave. Añetehápe, oĩ ñeha’ã ani hag̃ua ñañembo’e oúva pe ñande rehe ija’e’ỹvaguiete. Ha ndajaikuaái jave añetehápe mba’éichapa térã mba’érepa ñañembo’éta, ñañepyrũva’erã, ha jasegi, Espíritu Santo ñandegueraha peve pe ñembo’e ñaikuave’ẽva’erãvame. Ko enfóke ha’e pe ikatúva ñainvoka ñañembo’e jave umi ñande rayhu’ỹva rehe ha umi ñande despresíava rehe.

Ipahápe, ikatu ñamaña Salvador ehémplo rehe, oñembo’eva’ekue py’ỹi, py’ỹietereive. Ha katu ymaite guive aikuaasemi mba’ére Jesús oñanduva’ekue tekotevẽha oñemboʼévo oimeháicharamo. Ndaiperfectoipiko raka’e Ha’e? Mba’érehepa Ha’e oikotevẽ oñembo’e? Péicha, che ahechakuaa Ha’e avei, ñandéicha, “ohechase [pe Túva] rova, ogueroviase iñe’ẽ ha ojeroviase igrásiare.” Jey jey, Ha’e oñemomombyry sociedágui oĩ hag̃ua ha’eño opoko mboyve yvága Iñembo’ekuéra reheve. Ambue jave katu, Haʼe oñemboʼe mbovymi iñirũnguéra ndive. Upéi, Ha’e ohekáta yvága pytyvõ umi multitud-pe g̃uarã ojeipysótava peteĩ yvyty’i ykére. Sapy’ánte pe ñembo’e ombovera Ijaokuéra. Sapy’ánte ombovera Hova. Sapy’ánte Ha’e oñembo’y oñembo’e hag̃ua, sapy’ánte Ha’e oñesũ oñembo’e hag̃ua, ha oiméne peteĩ jey Ha’e ojeity Hova ári ñembo’épe.

Lucas omombe’u Jesús jeguejy Ijexpiasiõme ojerurehague Chupe oñembo’e “kyre’ỹve” hag̃ua. Mbaʼéichapiko peteĩ iperfectovaʼekue oñemboʼe kyreʼỹvéta? Ñaimo’ã opa Iñembo’e ikereʼỹ hague, jepeve okumplívo Isacrificio expiatorio ha pe mba’e’asy omoirũva’ekue ijehupyty universal rupive, Ha’e oñandu oñembo’eseveha ohóvo hese ojerure’asykuévo, Iñofrenda pohyikue reheve ombopororo tuguy opa ipirekuágui.

Upe escenario Cristo victoria ñemano ári ha I-don nda’aréi ome’ẽva’ekue cheve g̃uarã mbovymi semána térã mése ko tekove mortal-pe, ame’ẽ testimonio solemne añeteguaha pe tekove opave’ỹva ha tekotevẽha jagueraha añete ñane planifikasiõ upévarã.

Ame’ẽ testimonio Cristo ou vove, Ha’e ñanderechakuaava’erã, ndaha’éi peteĩ téraicha peteĩ lista de miembro peteĩ registro de bautismo je’okuépe, ha katu discípulo oñekomprometepaitéva ramo, jeroviarekópe oguerovia ha oñongatúva ikonveniokuéra. Kóva ha’e peteĩ mba’e urgente opavave ñandéve g̃uarã, ani hag̃ua ñahendu peteĩ pyahẽ vai reheve: “Araka’eve ndaporoikuaáiva”, térã, otradusi haguéicha José Smith upe frase, “[Peẽ] araka’eve ndapecheikuaáiva”

Po’arã, jareko pytyvõ upe tembiaporã, heta pytyvõ. Jagueroviava’erã anhelkuéra ha milagrokuéra ha santo sacerdocio promesakuérape. Jagueroviava’erã Espíritu Santo don-pe, familia ha angirũnguéra porã influencia ha Cristo mborayhu potĩ pu’akápe. Tekotevẽ jaguerovia rrevelasiõ ha umi proféta, vidénte ha revelador, ha Presidente Russell M. Nelson-pe. Tekotevẽ jaguerovia ñembo’e ha jerure’asy ha tekojoja personal reheve, añetehápe ikatuha jajupi “Yvyty Sion-pe, … Tupã oikovéva táva, upe yvagagua tenda, imarangatuvéva opaitégui”.

Hermano ha hermana-kuéra, ñañearrepentívo ñane angaipakuéragui ha ñañemo’ag̃uívo jeroviápe upe “trono de gracia” rehe, jahejávo Henondépe ñande ofrenda ha jerure’asy añetéva, jajuhúta misericordia ha poriahuvereko ha perdón ñande Ru Ijapyra’ỹva po porãme ha Ita’ýra iñe’ẽrendúva ha ipotĩ porãmbaitévape. Upérõ, Job ha opaite umi ijeroviarekóva oñerrefináva ndive, jahecháta peteĩ múndo “hechapyrãitereíva” ñantende hag̃ua. Jesucristo rérape, amén.