Peteĩ vy’apavẽ ijyvatevéva

Hasy jaguerovia ohasa haguénte 120 ary Wilbur ha Orville Wright peteĩha jave opu’ã ha ovevehague Kitty Hawk yvyku’i ári, Carolina del Norte-pe. Irundy vuelo mbyky upe Diciembre árape omoambue ko yvóra ha oipe’a pe okẽ upe invensiõ tuichavévape g̃uarã ko yvóra rembiasakuépe.

Ojeveve hasýkuri umi ára pyahúpe. Umi joyke’y oikuaákuri upéva. Ha avei ituvakuéra, Milton. Añetehápe, ha’e okyhyjetereíkuri operdérõ g̃uarã mokõivéva ita’ýra peteĩ aviasiõ accidente-pe, upévare opromete hikuái chupe araka’eve ndovevemo’ãiha oñondive.

Ha ha’ékuéra araka’eve ndojapóikuri—ỹrõ peteĩete jave. Siete áño upe ára historico rire Kitty Hawk-pe, ipahápe Milton Wright ome’ẽ ikonsentimiento ha oma’ẽ mba’éichapa Wilbur ha Orville oveve oñondive peteĩha jave. Oaterrisa rire, Orville okonvense itúvape ojapo hag̃ua ivuelo peteĩha ha peteĩeténte ha’e ohecha hag̃ua ijeheguiete mba’éichapakuri.

Pe avión opu’ãvo yvýgui, karai Milton 82 áño orekóva oñanduete pe vuelo mokyre’ỹ ha opaichagua kyhyje oho chugui. Orville ovy’a itúva osapukái aja vy’apópe, “¡Yvateve, Orville, yvateve!”

¡Kóva ha’ékuri peteĩ kuimba’e che korasõichagua!

Ikatu upévare añe’ẽha sapy’ánte aviasiõgui, aikuaágui michĩmi umi Wrights oñanduva’ekue. Che avei “ajejora umi yvy’arigua sã ñandejokuávagui ha ajeroky yvága rupi pepo pukápe ojeplateáva reheve”.

Umi Wright joyke’y jeveve peteĩha, oikova’ekue ojapo 37 ary rupínte che chereñói mboyve, oipe’a aventura, techapyrã ha vy’apavẽ potĩ rokẽ che rekovépe.

Upevére, hechapyrãitérõ jepe upe vy’apavẽ, oĩ peteĩ vy’apavẽ ijyvatevéva. Ko árape, asegívo pe Milton Wright espíritu vy’águi osapukáiva “Yvateve, Orville, Yvateve”, añe’ẽsemi pe vy’a ijyvatevévagui, moõgui ou, mba’éicha oike ñane korasõme ha mba’éicha ñañandukuaa mbareteve.

Ikatu natekotevẽi ni oje’e opavave ohupytyseha vy’apavẽ. Upéicha avei natekotevẽ ni oje’e ndaopavavéi ohupyty vy’apavẽ. Ñembyasyrã, ojogua heta tapichápe g̃uarã, hasyeterei ojuhu hag̃ua vy’apavẽ.

¿Mba’ére piko upéva? Ha’érõ vy’apavẽ upe mba’e ñande yvyporakuéra jaipotavéva, mba’ére hasyeterei jajuhu hag̃ua? Japarafraseávo peteĩ música country, ikatu jajavy hína tenda jahekahápe upéva.

Ñahesa’ỹijo mboyve mba’éicha jajuhukuaa vy’apavẽ, pehejami tahechakuaa pe depresión ha ambue desafio mental ha emocional ha’eha añetegua ha pe mbohovái ndaha’éi “Eñeha’ã revy’ave”. Che propósito ko árape ndaha’éi amomichĩ umi akãmegua mba’asy. Pembohovakérõ umichagua desafio, añembyasy penendive, ha aime pende ykére. Oĩ tapicha, ojuhu hag̃ua vy’apavẽ ohekava’erã pytyvõ umi salud mental rehegua profesional ikatupyrýva odedikáva hekove opractika hag̃ua hi’arte imba’eguasuetéva. Ha ja’aguijeme’ẽva’erã upe pytyvõre.

Tekove niko ndaha’éi peteĩ jejupi ha jeguejy emocional opa’ỹva. “Oĩmantevaʼerã niko, pe jejoavy opaite mbaʼépe”. Ha Tupã voi hasérõ, he’iháicha escritura-kuéra, upéicharõ peẽ ha che ñanerasẽtante avei. Ñañembyasýrõ ndaha’éi peteĩ jefrakasa séña. Ko tekovépe al menos pe vy’apavẽ ha ñembyasy oñoirũ ojueja’ỹva. Peẽicha, che avei añandu che pehẽ decepsiõ, ñembyasy, vy’a’ỹ ha rremordimiéntogui.

Upevére avei ahasa chejehegui pe ko’ẽ glorioso omyanyhẽva pe ánga vy’apavẽ ipypukuetéva ndaikatúiva ojejoko. Ahechakuaa chejeheguiete ko py’aguapy jerovia ouha jasegívo pe Salvador-pe ha jaguatávo Hapére.

Pe py’aguapy Ha’e ome’ẽva ndaha’éi upe yvóra ome’ẽháicha. Iporãve. Ijyvateve ha imarangatuve. Jesús he’i: “Che aju oguereko hag̃ua hikuái tekove, ha oguereko hag̃ua hetarasa.”

Jesucristo evanhélio ha’e añetehápe pe “marandu pyahu tuicha vyʼa rehegua”! Ha’e peteĩ esperanza rehegua mensáhe ijojaha’ỹva! Peteĩ mensáhe ojegueraha pe yugo ha oñembovevýi umi mba’epohýi rehegua. Oñembyaty tesape rehegua. Po’a celestial, ñentende ijyvatevéva, konvénio imarangatuvéva, segurida ijapyra’ỹva ha gloria opave’ỹva rehegua!

Vy’apavẽ ha’e pe Tupã plan propositoite Yta’yrakuérape g̃uarã. Upevarã peẽ pejejapókuri—“peguereko hag̃ua vy’apavẽ”! Peẽ pejejapo upevarã!

Ñande Ru Yvagagua nomokañýi pe tape vy’apavẽrã. Ndaha’éi peteĩ mba’e ñemimby. Oĩ opavave ohupyty hag̃uáicha!

Oñepromete umi oguatávape upe discipulado rapére, umi osegíva pe Salvador rekombo’e ha ehémplo, umi oñongatúva Hembiapoukapykuéra, ha omomorãva umi konvénio ojapóva hikuái Tupã ndive. Iporãitéva promesa!

Opavave ñande jaikuaa tapichápe he’íva noikotevẽiha Tupãre ovy’a hag̃ua, ha’ekuéra ovy’a porãha religiõ’ỹre.

Ahechakuaa ha arrespeta umi temiandu. Ñande Ru Yvagagua jahayhuetéva oipota opavave Ita’yrakuéra tohupyty hetave vy’apavẽ ikatuháicha, upévare Ha’e omyanyhẽ ko yvóra umi placer ha deleite iporã ha hesãiva, “ombohory hag̃ua tesa ha ombovyʼa hag̃ua korasõ.” Chéve, jeveve ogueru tuicha vy’apavẽ. Ambuekuéra ojuhu vy’apavẽ música-pe, arte-pe, pasatiempo-pe térã naturaleza-pe.

Ñainvitávo opavavépe ha nakomparti Salvador marandu porã tuicha vy’apavẽ rehegua, nañamboykéi ni peteĩ ko’ã vy’apavẽ ykua. Ñande ja’énte Tupã oguerekoveha peteĩ mba’e ome’ẽ hag̃ua. Peteĩ vy’apavẽ ijyvateve ha ipypukuvéva, peteĩ vy’apavẽ ohasáva oimeraẽ mba’e ko yvóra oikuave’ẽva. Ha’e peteĩ vy’apavẽ ogueropu’akáva py’arasy, ojapyharáva umi ñembyasy, ha omboguéva teko’año.

Upéva rangue, pe yvóra vy’apavẽ ndodurái. Ndaikatúi. Opa mba’e ko yvy arigua naturaleza ha’e taituja, toñembyai, toje’o térã tojeiporukuaave’ỹ. Ha katu pe vy’apavẽ divíno ijapyra’ỹ, Tupã Ijapyra’ỹvagui. Jesucristo ou ñanemopu’ã hag̃ua umi mba’e temporal ári ha ñamyengovia hag̃ua corrupción incororrupción reheve. Ha’e añónte oreko upe pu’aka ha Ivy’apavẽ añónte ijapyra’ỹ.

Peñandúrõ ikatuha oĩve koichagua vy’apavẽ pende rekovépe, poinvita pemoñepyrũ hag̃ua pe je’ói pesegívo Jesucristo ha Hape. Ha’e peteĩ je’ói opa tekove pukukuegua—ha mboypýri. Pehejami tasuheri pokã jeguata ñepyrũ ko je’ói ovaléva la pena jajuhu hag̃ua vy’apavẽ añetéva.

Penemandu’ápa upe kuñáre Nuevo Testamento-pe orekova’ekue hemorragia 12 ary aja? Ha’e ogastapaitékuri oguerekomíva doctor-kuérape, ha katu oho vaivénte. Ha’e ohenduva’ekue Jesús-gui; Ipu’aka oporomonguera hag̃ua ojekuaa porã. Ha katu ikatúnepa Ha’e omonguera chupe? Ha mba’éicha oñemo’ag̃uíta Hese? Imba’asy ojapo chugui “potĩ’ỹ“ asegún Moisés ley, ha upévare ojejerure chupe topyta mombyry ambuekuéragui.

Toñemo’ag̃ui Hese ha tojerure tomonguera chupe ndaikatuietevoi vaicha.

Upevére, opensa, “Apokórõnte ijao, akueráne”.

Ipahápe, ijerovia ipu’aka ikyhyjére. Ombohovái ambuekuéra censura ha oñemboja ohóvo pe Salvador rehe.

Ipahápe, ohupyty pota Chupe. Ha’e oipyso ipo.

Ha ha’e oñemonguerákuri.

¿Ndaha’éi piko opavave ñande upe kuñáicha?

Ikatu jaguereko heta mba’érepa jaduda ñañemo’ag̃ui hag̃ua pe Salvador rehe. Ikatu ñambohovake ñembohory térã kondenasiõ ambuekuéra rupi. Ñande orgullo-pe, ikatu ndajahechakuaái peteĩ mba’e michĩetéva heta ovalekuaa. Ikatu ñapensa ñane kondisiõ oimeháicha ñandedeskalifikaha Iñemonguerarã, ñanemombyryetereiha térã ñane angaipa hetaitereiha.

Upe kuñáicha, aikuaákuri ñañemo’ag̃uivérõ Tupãre ha jaipysórõ ñande po ha japoko Hese, añetehápe jajuhukuaa ñemonguera, py’aguapy ha vy’apavẽ.

Jesús ombo’e: “Peheka, ha pejuhúta”.

Arovia ko frase isensíllova ndaha’éi peteĩ promesa espiritual añónte, ha katu peteĩ ñemoañete oikóvagui.

Jahekárõ ñandepochy hag̃ua, jaduda, ñandepy’aro térã ñane’año hag̃ua jajuhúta avei umíva.

Upevére, jahekárõ vy’apavẽ—jahekárõ mba’érepa ñandepy’arory ha vy’ápe jasegi hag̃ua pe Salvador-pe, jajuhúta umíva.

Napy’ỹi jajuhu peteĩ mba’e ndajahekáiva.

¿Pehekápa vy’apavẽ?

Peheka, ha pejuhúta.

Jesús ombo’e: “Ojehovasave ñeme’ẽ jerresivi rangue”.

Ikatúpa jahekávo vy’apavẽ, jahupyty porãveháicha upéva ha’éne jaguerahávo vy’apavẽ ambuekuérape?

Hermano ha hermana-kuéra, pẽe peikuaa ha che aikuaa kóva añeteguaha! Vy’apavẽ ha’e peteĩ “tinaja de harina” térã peteĩ “vasija de aceite” araka’eve ndopáiva. Vy’apavẽ añetéva okakuaa oñekompartívo.

Natekotevẽi peteĩ mba’e tuicha ni hasýva.

Ikatu jajapo umi mba’e isensíllova.

Ñañembo’erõguáicha peteĩ tapicháre opa ñanekorasõ reheve.

Ikatu ñame’ẽ ñemomorã añetéva.

Ikatu ñaipytyvõ tapichápe oñeñandu hag̃ua bienvenido, respetado, valorado ha ojehayhuha.

Ikatu ñakomparti peteĩ escritura ñandegustavéva ha mba’épa he’ise ñandéve g̃uarã.

Térã ikatúnte ñahendukuaa.

“Peime jave pende rapicha pytyvõme, peimehánte pende Tupã pytyvõme”. ha Tupã pojerápe omyengovia pende py’aporã. Pe vy’apavẽ peme’ẽva ambuekuérape ou jeýta peẽme “medida porã, ojejopy porãva, ojeityvyróva ha ohasapávape”.

Umi ára, semana ha mése oúvape, poinvita:

• Peiporu tiempo, peteĩ ñeha’ã añetépe ha opa pene korasõ reheve, peñemo’ag̃ui hag̃ua Tupãre.

• Peheka meme umi ára ha aragua momento esperanza, py’aguapy ha vy’apavẽ rehegua.

• Pegueru vy’apavẽ tapichakuéra oĩva pende jerérepe.

Che hermano ha hermana-kuéra, che angirũnguéra pohayhuetéva, pestudiávo Tupã ñe’ẽ pehekávo peikuaa porãve Iplan ijapyra’ỹva, peaseptávo ko’ã invitasiõ ha peñeha’ãvo peguata hag̃ua Hapére, peñandúta “Tupã py’aguapy, ohasáva opa entendimiento”. jepe pende jehasa’asy mbytépe. Peñandúta peteĩ medida tuichavéva Tupã mborayhu ijojaha’ỹvagui omyanyhẽvo pene korasõ. Pe tesape celestial ko’ẽ ojapyharáta umi pende py’ara’ã ypytũ ha peñepyrũta petantea pe esfera celestial ojehecha’ỹva ha iporãmbáva gloria ha techapyrãnguéra. Peñandúta pende espíritu opu’ãvo ha oñemomombyrývo ko yvóra gravedágui.

Ha Milton Wright ojapo haguéicha, ikatu pehupi pene ñe’ẽpu vy’apópe ha pesapukái: “Yvateve, Túva, Yvateve!”

Opavave tajaheka ha tajajuhu pe vy’a ijyvatevéva oúva jadedikágui ñande rekove ñande Ru Yvagagua ha Ita’ýra Ohayhuetévape. Kóva che ñembo’e’asy ha jehovasa Jesucristo réra sagrado-pe. Amén.