Milágro, Anhelkuéra ha Sacerdocio Pu’aka

Ára ko’ag̃aguápe oĩ heta he’íva milagro-kuéra ndaiporiveimaha, anhelkuéra ha’eha tekove oñeimo’ãva ha umi yvága oñembotyha. Atestifika milagro-kuéra ndopaiha, anhelkuéra oikoha ñande apytépe, ha umi yvága añetehápe ojepe’aha.

Ñande Salvador, Jesucristo, oĩrõguare yvy ári, Ha’e ome’ẽ sacerdocio llavekuéra Ijapóstol tuichavévape, Pedro. Ko’ã lláve rupive, Pedro ha ambue Apostolkuéra oisãmbyhy Salvador Tupao. Ha katu ko’ã Apóstol omano rire, sacerdocio llavekuéra ojeipe’ákuri yvy árigui.

Atestifika umi sacerdocio lláve ymaguare oñemoĩjeyhague. Pedro, Santiago ha Juan, ha ambue proféta ymaguare ojehechauka tekove oikovejeyva’ekue ramo, ome’ẽvo Proféta José Smith-pe upe Ñandejára ohenóiva “che rréino llavekuéra ha peteĩ evanhélio dispensasiõ”.

Ko’ã lláve oñembohasáva peteĩ profétagui ambue profétape ko ára peve. Umi 15 kuimba’e ñasostenéva proféta, vidénte ha rrevelador ramo, oiporu umíva oisãmbyhy hag̃ua Salvador Tupao. Ára ymaguaréichape, oĩ peteĩ Apóstol mayor oguerekóva ha oĩva autorisádo oiporu hag̃ua opa sacerdocio llavekuéra. Ha’e Presidente Russell M. Nelson, ñande áragua proféta ha Presidente Cristo Tupao oñemoĩjeyva’ekuépe: Jesucristo Tupao Santokuéra Ára Pahapegua.

Salvador Tupao rupive, ñande jahupyty sacerdocio jehovasakuéra—oikévape Tupã pokatu ñanepytyvõ hag̃ua ñande rekovépe. Sacerdocio llavekuéra autorisádo guýpe, jajapo Tupãme umi promésa sagráda ha jahupyty umi ordenánsa marangatu ñanembosako’íva jaiko hag̃ua Hendive. Ñañepyrũvo ñemongarai ha konfirmasiõ reheve ha upéi témplope, ñañemotenonde peteĩ konveniokuéra rapére ñande gueraha jeýva Hendápe.

Po ñemoĩ reheve ñane akã ári, jahupyty avei sacerdocio jehovasakuéra, oikévape ñemboguata, ñemoangapyhy, ñemonguera, ha pu’aka Jesucristo-pe jasegi hag̃ua. Che rekove puku aja ajehovasákuri ko tuicha pu’aka rupive. Ojerrevela haguéicha escritura-kuérape, ñañe’ẽ hese Melquisedec Sacerdocio marangatu pu’aka ramo.

Che mitãrusúpe ahupytýkuri tuicha respeto ko pu’aka rehe, ko’ýte ojehechauka jave sacerdocio jehovasakuérape. Aservi aja misionero mitã ramo Chile-pe, che kompañéro ha che rojearresta ha rojeseparákuri. Araka’eve ndoje’éi oréve mba’érepa. Ha’ékuri tuicha movimiento polítiko ára. Umi policia militar ojagarra miles tapichápe ha araka’eve ndojeikuaavéiva chuguikuéra mba’eve.

Añeinterroga rire, aguapy cheaño peteĩ kársel kotýpe, ndaikuaáivo ahecha jeýnepa umi ahayhúvape. Aha che Ru Yvagaguápe, ajerure asývo: “Túva, akói añehekombo’éva Nde reñangarekoha Ne misionero-kuérare. Túva, chéngo ndaha’éi avave espesial, ha katu cheñe’ẽrendúva ha ko pyharépe aikotevẽmi Ne pytyvõ”.

Umi iñepytyvõ semilla, oñeñotỹmava’ekue heta ary upe mboyve. Che ñemongarai rire, añekonfirmákuri Tupao miembro-háicha ha oñeme’ẽ chéve pe Espíritu Santo don. Añembo’e aja, cheaño, umi rréha pa’ũme, pe Espíritu Santo pya’e oúkuri che rendápe ha chekonsola. Ogueru che akãme peteĩ ñe’ẽ ijespesialva che bendición patriarcal-pegua, ha’éva ambue sacerdocio jahovasa. Upévape, Tupã oprometékuri chéve chejeroviareko rupi ajesellataha témplope tiémpo ha eternidad-rehe peteĩ kuña ndive henyhẽva porã, virtu ha mborayhúgui, oikotaha orehegui mitãkuña ha mitãkuimba’e porãite sy ha ru, ha che ajehovasa ha añemagnifikataha peteĩ túva ramo Israel-pe.

Ko’ã ñe’ẽ inspirádo che futuro rehegua omyanyhẽkuri che ánga py’aguapy reheve. Aikuaákuri umíva ouha che Ru Yvagagua cherayhuetévagui, akói okumplíva Ipromesakuéra. Upe aravópe, aikuaaporãkuri añemosãsotaha ha aikovetaha ahecha hag̃ua ko’ã promésa oñekumpli.

Peteĩ ary rupi uperire, Túva Yvagagua cherovasákuri peteĩ tembireko reheve henyhẽva porã ha virtu ha mborayhúgui. Lynette ha che rojesellákuri témplope. Rojehovasákuri mbohapy mitãkuimba’e ha irundy mitãkuña porãite reheve. Oiko chehegui túva, opa Tupã promésape he’iháicha bendición patriarcal oñeme’ẽva’ekuépe chéve mitãkuimba’e de 17 áño ramo.

“Upévare, che hermano [ha hermana-kuéra] ahayhuetéva, opáma piko milagro-kuéra Cristo ojupi haguére yvágape? …

“… Nahániri; ni anhelkuéra ndohejái yvypóra raʼykuéra ñeministra”.

Atestifika milagro-kuéra ha umi ministrasiõ ojehu memeha ñande rekovépe, py’ỹi pe sacerdocio pu’aka resultado directo ramo. Oĩ sacerdocio jehovasakuéra pya’ete oñekumplíva, jahecha ha ñaikũmbykuaa hag̃uáicha. Ambuéva katu ojeikuaauka sa’isa’i ha noñekumplipamo’ãi ko tekovépe. Ha katu Tupã okumpli opaite Ipromesakuéra, akói, ojehechaukaháicha ko ore familia rembiasakue ñemombe’úpe:

Che abuelo paterno, Grant Reese Bowen, ha’ékuri kuimba’e ijerovia tuicháva. Chemandu’a porãite ahendúvo he’i jeyjey mba’éicha ha’e ohupytyva’ekue i-bendición patriarcal. Idiáriope, ha’e ohai: “Pe patriarca oprometékuri chéve ñemonguera don. Ha’e he’íkuri, ‘Umi hasýva okueráta. Héẽ, umi omanóva oikovejeýta nde po guýpe.’”

Heta ary uperire, abuelo ombojo’ákuri hína kapi’i oñandúrõguare ñemomýi ojevy hag̃ua ógape. Ojevývo ohecha itúvape oúva ha’e oĩha gotyo. “Grant, nde sy angete omano”, he’i chupe.

Ha’e jey abuelo ñe’ẽngue diáriogui: “Ndapytái ha katu aike ñaníme ógape ha aha pe óga jeikehápe ha’e oñenoháme peteĩ tupa ári. Ama’ẽ hese ha ahechakuaa ndaiporiveimaha mba’evéichagua tekove ipype. Chemandu’ákuri che bendición patriarcal rehe ha promésa chejeroviarekóramo, che jerovia rupive umi hasýva okuerataha; ha umi omanóva oikovejeytaha. Amoĩ che po iñakã ári, ha ha’e Ñandejárape añetéramo pe promésa Ha’e ojapova’ekue chéve upe patriarca rupive, tohechauka upe araite ha tomoingovejey che sýpe. Aprometékuri Chupe péva Ha’e ojapóramo, araka’eve ndadudamo’ãiha ajapo hag̃ua opa mba’e ikatúva amopu’ã hag̃ua Irréino. Añembo’e aja, ha’e oipe’a hesa ha he’i, ‘Grant, chemopu’ã. Aimékuri espiritukuéra múndope, ha katu nde cherenói jey. Akói taha’e kóva peteĩ testimónio ndéve g̃uarã ha opaite ñane familiakuérape g̃uarã’”.

Presidente Russell M. Nelson ñanembo’ékuri jaheka ha ñaha’arõ hag̃ua milagro-kuéra. Atestifika pe sacerdocio ojerrestaurahague rupi, Tupã pokatu ha autorida oĩha yvy ape ári. Umi llamamiénto ha konsého rupive, kuimba’e ha kuñanguéra, imitã ha ijedáva, opartisipakuaa sacerdocio rembiapópe. Ha’e peteĩ milagro rehegua tembiapo, anhelkuéra oñangarekóvare. Ha’e yvagagua rembiapo, ha ohovasa opa Tupã ra’ykuérape.

Ary 1989-pe, ore família roiméva entre siéte rojevýkuri peteĩ barrio-gua excursión-gui. Tardetékuri. Lynette hyeguasúkuri seiha ore mitãgui. Ha’e oñandu impresiõ mbarete omoĩ hag̃ua i-cinturón de seguridad, hesaráivakuri omoĩ hag̃ua. Uperiremi rog̃uahẽ peteĩ tape karẽme; peteĩ kamiõ ohasa pe línea ore karríl gotyo. Ahávo 112 Km por hora (70 mílla), ajehekýi ani hag̃ua achoka kamiõ oúvare sentido contrario-pe. Ore kamiõ ojere, osyryry pe tape guasúre, osẽ upe tapégui ipahápe opara peve, opytávo pasahéro ládo yvýre.

Ambue mba’e chemandu’áva ha’ékuri Lynette ñe’ẽ he’ívo: “Shayne, rosẽva’erã ne rokẽ rupi”. Asãingókuri hína che cinturón de segurida rehe. Ha atarda segundo’imi añe’orienta jey hag̃ua. Roñepyrũ roguenohẽ peteĩteĩ umi mitã pe kamiõ ventána rupive, ko’ág̃a ha’éva kamionéta técho. Hasẽjoa hikuái, oñeporandúvo mba’épa oikóra’e.

Pya’ete rohechakuaa ore mitã de diez áño, Emily, ndaiporiha. Rosapukái héra, ha katu ndaipóri mbohovái. Barrio-gua miembro-kuéra, ohóva avei hógape, oĩkuri upépe ha oheka mbarete hikuái chupe. Pytũetékuri. Amaña jey pe kamiõ ryepýre peteĩ linterna reheve, ha cheñemondyirã, ahecha Emily rete michĩ ojejopýva pe kamiõnéta guýpe. Ahenói py’aropúpe, “Ñamopu’ãva’erã pe kamiõ ñaguenohẽ hag̃ua Emily-pe”. Ajagarra pe técho ha amyaña tapykuépe. Sa’imínte umi romopu’ãva, ha katu milagrosamente pe kamiõ ojere irruédare, ojehechaukávo Emily rete manombyre.

Emily ndorrespiráikuri. Hova sa’y ha’ete ciruela pytãũ. Che ha’ékuri, “Tekotevẽ ñame’ẽ chupe peteĩ jehovasa”. Peteĩ angirũ ha barrio-gua miembro oñesũ chendive, ha Melquisedec Sacerdocio autorida rupi, Jesucristo rérape, romanda chupe toikove. Upe javete, Emily ipytuhẽ pararã puku.

Uperire, ha’etéva hetaiterei hora, ipahápe pe ambulancia og̃uahẽ. Emily pya’e ojegueraha hospital-pe. Ipulmón henyhẽ yvytúgui ha tendón henymy’ãmegua oñeikytĩ. Oĩkuri jepy’apy iñapytu’ũ oñembyaírõ ára ha’e oĩhague rupi oxígeno ỹre. Emily oĩkuri en coma un día y medio. Roñembo’e meme ha roajuna hese. Ojehovasákuri rrekuperasiõ total reheve. Ko árape, Emily ha iména, Kevin, ha’e séi mitãkuña sy ha ru.

Milagrosamente, opavave rosẽ porãmba upévagui. Mitãra’y, Lynette oguerahava’ekue hyépe ha’ékuri Tyson. Chupe avei ndojehúi mba’eve ivaíva ha onasékuri Febrero uperiregua. Ocho mése uperire, ojapyhy rire hete yvy arigua, Tyson ohojey hógape Túva Yvagagua rendápe. Ha’e pe ánhel orerehe oñangarekóva. Roñandu iñinfluénsia ore famíliape ha roha’arõ roime jey hag̃ua hendive.

Umi omopu’ãva’ekuépe kamiõ Emily árigui ohechakuaa pe kamiõ ha’etehague ipohyi’ỹva. Che aikuaákuri yvagagua anhelkuéra ojoajuhague yvy arigua anhelkuéra ndive omopu’ã hag̃ua pe kamiõ Emily rete árigui. Che avei aikuaa Emily rekove ojegueru jeyhague sacerdocio marangatu pu’aka rupive.

Ñandejára oikuaaukava’ekue ko añetegua Hembiguaikuérape: “Che aháta pene renonderã. Aiméta pende akatúa ha pende asúpe, ha che Espíritu oĩta pene korasõme, ha che anhelkuéra pende jerére, pendejoko hag̃ua”.

Che atestifika pe “Santo Sacerdocio, según el Orden del Hijo de Dios”—Melquisedec Sacerdocio—illavekuéra, autorida ha pu’aka reheve oñemoĩjeyhague yvy ári ko’ã ára pahápe. Aikuaa ndahe’éiramo jepe opa mba’e osẽ ñaha’arõ ha ñañembo’eháicha, Tupã milagro-kuéra akói outaha Hembipota, Hi’ára ha Iplan ñandéve g̃uarãme oĩháicha.

Peipotáramo sacerdocio jehovasakuéra, oikévape umi milagro ha anhelkuéra ñeministra, poinvita peguata hag̃ua konveniokuéra rapére Tupã omoĩva peteĩteĩ jahupyty hag̃ua. Tupao miembro ha liderkuéra penderayhúva penepytyvõta pejapyhy hag̃ua páso oúva.

Atestifika Jesucristo, pe Tupã Ra’y, oikove ha oisãmbyhyha Itupao profetakuéra oikovéva rupive oguereko ha oiporúva sacerdocio llavekuéra. Pe Espíritu Santo añetegua. Pe Salvador ome’ẽva’ekue hekove ñanemonguera hag̃ua, ojerure ñanderehe, ha ñandegueru jey hag̃ua ógape

Atestifika milagro-kuéra ndopaiha, anhelkuéra oikoha ñande apytépe, ha umi yvága ojepe’a. Ha O, mba’eichaitépa ojepe’a! Jesucristo rérape, amén.