Oñembojoajúvo umi mokõi mandamiento guasu

Che rembireko Lesa ha che roviaha aja opa yvóra jerére rokumplívo umi asignasiõ, orerory priviléhio reheve roñembyatývo penendive aty michĩ ha tuichávape. Pene devosiõ Ñandejára rembiapópe oremokyre’ỹ ha opu’ã Jesucristo evanhélio testimonio ramo. Káda viáhe rire roho jey ógape roñeporandúvo ikatúpa ra’e rome’ẽve rorresivi haguéicha.

Roviahávo, roguereko pokã rojapo hag̃ua turismo. Upevére, oĩrõ posibilida, adedika’imi tiempo peteĩ mba’e ahayhuetévape. Cheinteresa pe arquitectura ha diseño ha areko especial interés umi puente rehe. Umi puente osaingóva chesorprendeiterei. Taha’e pe puente Árco Iris Tokio-pe, puente Tsing Ma Hong Kong-pe, puente La Torre Londres-pe térã ambue puente ahechava’ekue, añemaravilla upe genio de la ingeniería rehe opu’ãva umi mokõi estructura guasu mbytépe. Umi puente ñandegueraha tenda ndaikatuichénepe jaha ambuéicha. Akontinua mboyve, ahechakuaa ojeprepara guive ko mensáhe, oikohague peteĩ accidente trágico peteĩ Puente Baltimore-pe. Rombyasy umi tekove ojeperdeva’ekue ha roikuave’ẽ pésame umi familia ojeafectava’ekuépe.

Ramoite, peteĩ asignasiõ conferencia-rã chegueraha California-pe, ahasahápe pe icónico Puente Golden Gate rupi, oñekonsideráva peteĩ maravilla ingeniería-gua ko múndope. Ko monumental estructura ombojoapy peteĩ forma porãite, peteĩ propósito funcional ha peteĩ ingeniería magistral. Ha’e peteĩ puente clásico, orekóva umi torre sujetalibro, oñesostenéva umi tuicha pilar rupive. Umi tuichaite ha mahestuósa torre gemelas opu’ãva yguasu ári ha’ékuri umi peteĩha elemento oñemopu’ãva’ekue. Oñondie ogueropu’aka umi cable de suspensión principal ha umi cable de suspensión vertical pohyikue, ojokóva pe carretera ojehasaha rupi. Pe torre potencia ha capacidad estabilizadora ha’e pe magia oĩva pe puente ingeniería kupépe.

Puente Golden Gate Distrito

Pe puente ñemopu’ã ra’angakuéra peteĩha ome’ẽ testimonio upe principio de ingeniería-gui. Peteĩteĩ umi puente-gua elemento ojuhu peteĩ soporte de peso umi torre simétrica-pe, mokõivéva oñekonectáva interdependientemente oñondive.

Getty Images/Underwood Archives

Oñekompletávo pe puente, umi mokõi torre reheve oñemoĩ hatãva ha umi pilar oñeankláva peteĩ itaguigua cimiento ári, ha’e peteĩ mbaretekue ha porãngue ra’anga.

Ko árape poinvita pemaña hag̃ua ko puente mahestuóso, itorre gemelas ijyvatetéva reheve oñemopu’ãva peteĩ cimiento atã ári, pe evanhélio lente rupive.

Jesucristo ministerio ka’arupytũme, upe ko’ág̃a ñahenóiva Semana Santa aja, peteĩ fariseo ha’éva peteĩ abogadoojapo Salvador-pe peteĩ porandu ha’e oikuaáva haimete ndaikatuiha oñembohovái:Maestro, mba’évapa ha’e pe mandamiento tuichavéva upe léipe?” Pe abogado, “oipy’ara’ãvo chupe” ha ohekávo peteĩ mbohovái legalista, peteĩ intención japu reheve, ha katu orresivi peteĩ mbohovái añete, isagrádo, ha idivínova.

“Jesús he’i chupe: Ehayhúta Ñandejára nde Tupãme opa ne korasõ, opa ne ánga, ha opa ne apytu’ũ reheve.

“Kóva ha´e tembiapoukapy peteĩha ha tuichavéva.” Ñahendúvo ñane puente analogía, ha’e pe torre peteĩha!

“Ha pe mokoĩha péicha avei: Ehayhúta nde prójimo-pe nde rejehayhúháicha”. ¡Kóva ha’e torre mokõiha!

“Ko’ã mokõi tembiapoukapy ári oñemoĩ opa pe léi ha profetakuéra”. Umíva ha’e umi puente elemento hembýva!

Ñahesa’ỹijo peteĩteĩ umi mokõi mandamiento guasu, ojerrevela ha oje’éva Jesucristo mbohováipe. Jajapóvo upéva, peheja pe puente osaingóva hechapyrãitéva topyta pene akãme.

Pe peteĩha, ehayhu Ñandejárape opa ne korasõ, opa ne ánga ha opa ne apytu’ũ reheve.

Ko mbohováipe Jesucristo omoĩ pe Ley esencia oĩva umi Antiguo Testamento-gua tekombo’e sagrádo-pe. Jehayhu Ñandejárape oñesentra raẽ pene korasõme, pende naturalesaite. Ñandejára ojerure tapehayhu opa pene ánga reheve—opa pende ser consagrado—ha ipahápe, tapehayhu opa pene apytu’ũ reheve—pene inteligencia ha intelecto. Pe mborayhu Tupãre ndaha’éi limitado ni finito. Ha’e infinito ha eterno.

Chéve g̃uarã, pe peteĩha mandamiento guasu ikatu ojogua sapy’ánte abstracto , desalentador jepe. Afortunadamente, ñakonsiderávo umi Jesucristo ñe’ẽ, ko mandamiento ikatu oñentende porãve: “Pecherayhúrõ, pekumpli che mandamiento-kuéra”. Kóva ajapokuaa. Ahayhukuaa Túva Yvagagua ha Jesucristo-pe, oporogueraháva ñembo’e, estudio de las escrituras ha templo-pe ñetupãitũme. Jahayhu Túva ha Ta’ýrape japaga rupi umi diezmo, ñamomarangatúvo día de reposo, jaguerahávo peteĩ tekove ivirtuóso ha ipotĩva ha ñaneñe’ẽrendúvo.

Jahayhu Ñandejárape py’ỹi oñemedi umi michĩ mba’e jajapóva ára ha ára, jeguata konveniokuéra rapére: huventúpe g̃uarã, oiporúvo umi redes sociales omopu’ã hag̃ua ombyai rangue; toheja pe fiesta, película térã activida ikatuhápe ojedesafia umi norma; ohechaukávo reverencia umi mba’e isagrádovare.

Pekonsiderami ko ehémplo kyrỹi. Ha’ékuri domingo de ayuno Vance ha che rombotárõguare peteĩ hóga’imi rokẽ. Ore ha ambue cuórum-gua Diácono-kuéra roha’arõ umi ñe’ẽ “Peikemína”, oje’éva kunu’ũme peteĩ acento alemán reheve hatã porãva oñehendu haĝua pe okẽ kupe guive. Hermana Muellar ha’e peteĩ umi heta viuda inmigrante Barrio-pe. Ndaikatúi oipe’a pya’e pe okẽ, iciegagui. Roikéramo upe hóga tesape pokã reheve, ha’e oremomaitei oporandúvo: Mba’éichapa pende réra? “¿Mba’éichapa peime?” Pehayhúpa Ñandejárape? Rombohovái ha ro’e rojuhague rorresivi haĝua ij-ofrenda de ayuno. Jepe ore pokã edápe, rohechakuaa imboriahukue, ha imbohovái henyhẽva jeroviágui opoko ore rehe: “Ko pyharevépe amoĩkuri peteĩ moneda de diez centavos mostrador ári. Cheaguyjeterei aikuave’ẽ haĝua che ofrenda de ayuno. Ikatu piko pemoĩmi pe sobre-pe ha pemyenyhẽ pe recibo de ofrenda de ayuno?” Imborayhu Ñandejárare omopu’ã ore jerovia káda rosẽ hógagui.

Rey Benjamín opromete pu’aka ijojaha’ỹva umi iñe’ẽrendúvape upe peteĩha mandamiento guasúre. “Ha avei, aipota pehecha pe vyʼapavẽ ha jehovasápe ñeime ohupytýva umi iñeʼẽrendúva Tupã rembiapoukapykuérare. … Ha péina ápe, haʼekuéra ojehovasa opa mbaʼépe, … ha opytáramo hikuái jeroviarekópe ipahaite peve oñemoinge chupekuéra yvágape … peteĩ vyʼapavẽ opaveʼỹvape”.

Jehayhu Ñandejárape ñandegueraha vy’apavẽ ijapyra’ỹvape!

Upéi Jesús he’i: “Ha pe mokoĩha péicha avei: Ehayhúta nde prójimo-pe nde rejehayhuháicha”. Kóva ha’e pe puente torre mokõiha.

Ko’ápe Jesús oipyso peteĩ puente ñane ñemaña yvate yvága gotyo, jahayhu hag̃ua Tupãme ha ñane ñemaña terrenal oka gotyo, jahayhu hag̃ua ñande rapichakuérape kuña ha kuimba’e. Peteĩva ha’e interdependiente ambuévagui. Ñane mborayhu Ñandejárare noĩmbái nañañangarekóirõ ñande rapicháre. Ko mborayhu oka gotyo oinklui opavave Tupã ta’yrakuérape taha’eha’éva igénero, clase social, raza, sexualida, ingreso económico, eda térã origen étnico. Jaheka umi oĩva herido, ipy’arasýva, umi oñemboykévape, “opavave ijojágui Tupã renondépe”. Ñande “jasokorre umi ikangývape, ñamopu’ã umi po ho’áva ha ñamombarete umi rodilla ikangýva”.

Pekonsiderami ko ehemplo: Hermano Evans oñesorprende oñandúvo ombopytava’erãha ikóche ha ombotava’erã peteĩ familia oikuaa’ỹva rokẽ. Peteĩ sy viuda orekóva diez mitã oipe’ávo pe okẽ, ijehasa’asy ha hekotevẽkuéra pya’eterei ojehechakuaa. Pe peteĩha isensíllo, opinta hag̃ua hóga, ojesegíva heta ary rehe oñeministrahápe chupe temporal ha espiritualmente.

Ko sy ome’ẽ meméva aguije ohaíkuri uperire iñangirũre oñembouva’ekue yvágagui: “Rehasa ningo nde rekove reipysóvo nde po pe michĩvévape ore apytépe. Ahenduseténte umi mba’e Ñandejára he’ítava ndéve Ha’e omombe’úvo Ijapresio umi mba’e iporãva rejapova’ekue económica ha espiritualmente umi tapicháre nde ha Ha’énte peikuaátava. Aguijevete ndéve orerovasa haguére hetáicha, …umi misionero-pe g̃uarã nde reme’ẽva’ekue. … Py’ỹi añeporandu Ñandejárapa ne’atõi ndévente térã ndénte ha’e pe ohenduva’ekue ra’e”.

Jahayhu ñande rapichápe oinklui umi py’aporã ha servicio rehegua mba’e’apo. Ikatúpa pemboyke umi py’aro, peperdonáta pende enemigo-pe, pemog̃uahẽporãtapa ha peministráta pende vesinokuérape ha peipytyvõta umi itujámavape? Peteĩteĩ peẽ peñeinspiráta a medida que pemopu’ã pende torre jehayhu rehegua tapichakuérape.

Presidente Russell M. Nelson ombo’e: “Ñande goso ha’e ñaipytyvõ ambuekuérape; jajapo peteĩ esfuerzo concienzudo jajepy’apy hag̃ua ambuekuérare tanto o más jajepy’apyháicha ñande jehe. En especial … ndaha’éirõ oportuno ha ñanemomombyrýiramo ñane comodida-gui. Javivi pe mokõiha mandamiento guasu ha’e pe kláve ha’e hag̃ua peteĩ Jesucristo discípulo añetéva”.

Jesús ombo’e avei: “Ko’ã mokõi tembiapoukapy ári oñemoĩ opa pe léi ha profetakuéra”. Kóva iñinstructivoiterei. Oĩ peteĩ interdependencia imba’eguasuetéva jahayhu Ñandejárape ha jajoayhu ojupe ha ambuekuérape apytépe. Pe puente Golden Gate okumpli hag̃ua ifunsiõ oñediseñava’ekuépe g̃uarã, mokõive torre imbarete ha ogueropu’aka joja umi cable de suspensiõ, pe calzada ha tráfico ohasáva pe puente rupi pohyikue. Ko ingeniería simetría’ỹre, pe puente ikatu oĩ comprometido ha jepe ikatu ho’a. Oimeraẽ puente osaingóva ojapo hag̃ua upe oñemopu’ãva’ekue ojapo hag̃ua, umi itorre ofunsionava’erã oñondive en completa armonía. Upéicha avei, ñande capacidad jasegi hag̃ua Jesucristo-pe odepende ñane mbaretekuégui ha pu’aka javivi hag̃ua pe peteĩha ha mokõiha mandamiento equilibrio ha devoción joja reheve mokõive lado-pe.

Upevére, pe contención okakuaáva ko yvórape osuheri sapy’ánte ndaikatuiha jahechakuaa térã ñanemandu’a upéva. Oĩ umi oñe’enfokaitereíva oñongatu hag̃ua umi mandamiento-kuéra ha katu ohechauka pokã tolerancia umi ha’ekuéra ohechávare hekojoja pokãvéva ramo. Oĩ umi hasývape ohayhu umi oiporavóva hína ovivi hekove okápe konvenio rapégui térã oñemomombyrýva oimeraẽ participación religiosa-gui.

Ambue hendápe, oĩ umi oenfatisáva importancia orekóva tajahayhu ambuekuérape jahechakuaa’ỹre opavave ñaimeha responsable Tupã renondépe. Oĩ umi ombotovepaitéva pe noción oĩha peteĩ añetegua absolútova, térã pe iporãva ha ivaíva, ha he’i hikuái pe oñeikotevẽvante ñandehegui ha’e tajareko completa tolerancia ha aceptación ambuekuéra oiporavóvare. Oimeraẽ ko’ã desequilibrio ikatu ojapo nde puente espiritual taijyke térã to’a.

Presidente Dallin H. Oaks omombe’u kóva he’ívo: “Oñemanda ñandéva jahayhuva’erãha opavavépe, pe Jesús parábola buen samaritano rehegua ombo’e opavave ha’eha ñande rapicha. Pero ñande celo ñañongatu hag̃ua pe mandamiento mokõiha nañanembohesaraiva’erã pe peteĩhágui, jahayhuva’erãha Tupãme opa ñane korasõ, ánga ha apytu’ũ reheve.

Upéicharõ pe porandu peteĩteĩ peẽme g̃uarã ha’e: mba’éichapa ñamopu’ã hína ñande puente jerovia ha devoción rehegua—ñamopu’ãvo umi puente torre ijyvatéva jahayhu Tupãme ha jayhu ñande rapichakuérape rehegua? Néi, ñañepyrũ ramo hína. Ñane ñeha’ã ñepyrũrã ikatu ojogua peteĩ plano peteĩ servilleta kupépente térã pe puente ñamopu’ãséva etapa ñepyrũrã plano. Ikatu okonsisti pokã meta realista-pe ñantendeve hag̃ua pe Ñandejára evanhélio térã ñapromete jahusga pokãvétaha ambuekuérape. Avave naimitãiterei ni ndaitujaiterei oñepyrũ hag̃ua.

Ára ohasávo, planificación minuciosa ha ñembo’e espíritu reheve, umi idea oñerrefináta ohóvo. Umi acción pyahúgui oiko umi hábito. Umi borrador peteĩhágui oiko umi plano pulido. Ñamopu’ã ñande puente espiritual personal jadedikávo ñane korasõ ha apytu’ũ Túva Yvagagua ha Ita’ýra Unihénito Jesucristo-pe, ha avei ñande hermano ha hermana-kuéra ñamba’apo, jahuga ha javivíva ndive.

Umi ára oúvape, pehasávo peteĩ mahestuóso puente osaingóva térã pehechárõ jepe peteĩ ta’anga itorre yvatete reheve, poinvita penemandu’a hag̃ua umi mokõi mandamiento guasu rehe oje’eva’ekue Jesucristo rupi Nuevo Testamento-pe. Ñandejára instrucción tañaneinspira. Ñane korasõ ha apytu’ũ toñemopu’ã yvate gotyo jahayhu hag̃ua Ñandejárape ha toñesentra ambuekuérape jahayhu hag̃ua ñande rapichakuérape.

Kóva tomombarete ñande jerovia Jesucristo ha Iñexpiasiõre, atestfikávagui Jesucristo rérape. Amén.