Cristo doctrina siklo virtuoso ipu’akapáva

Ojapo heta ary, che rembireko Ruth, ore rajy Ashley ha che, roñemoirũ ambue turista-kuéra ndive peteĩ excursiõme kayak ári Hawai estado, Estados Unidos-pe. Kayak ha’e peteĩ yga y apére, kanoa joguaha, oguapyhápe ipype pe orremáva oma’ẽvo tenonde gotyo ha oipurúva peteĩ rrémo ipepo mokõiva oitira hag̃ua henondégui hapykue gotyo, peteĩ ládogui ha upéi ambue gotyo. Pe plan ha’ékuri rorremataha mokõi isla michĩva peve Oahu ipýpe ha rojevy jey. Ajeroviaiterei chejehe, chemitãrusúpe, arremáma haguére umi kayak yvyty lagokuéra ári. Pe arrogancia araka’eve ndoguerúi mba’eveporã, ajepa?

Ore gía omeʼẽ oréve instrusiõ ha ohechauka oréve umi kayak océano pegua roiporútava. Umíva iñambue umi che arremamavaʼekuégui yma. Aimo´ã aguapyva’erãha pe kayak ári, aguejy rangue hyepýpe. Ajupívo pe kayak-pe, che centro de gravedad ijyvateve ajepokuaávagui, ha amymyive upe y ári.

Roñepyrũvo, arrema pyaʼeve Ruth ha Ashley-gui. Uperiremi, mombyrýma ahasa chupekuéra. Añemomba’eguasu ramo jepe che ritmo heroico rehe, narremavéi ha aha’arõ tacherupyty hikuái. Peteĩ ola tuichaiete—13 centímetro rupi—oinupã che kayak ykére ha chembojere ýpe. Ambojere jeývo pe kayak ha añeha’ãmbaite ajupi jey hi’ári, Ruth ha Ashley cherasáma, ha katu chepytuhẽmba añepyrũ jey hag̃ua arrema. Añepyrũ jey mboyve chepytuhẽ, ambue ola, kóva katu añetehápe tuichaitereíva—oiméne 20 centímetro rupioinupã che kayak ha chembojere jey. Amohenda porã jeývo pe kayak, chepytuhẽmbaite ha akyhyje ndaikatúi ramo g̃uarã ajupi hi’ári.

Ohechávo che situasiõ, pe gía orrema ha omohenda porã che kayak, opyta porã hag̃uáicha chéve ajupi hag̃ua hiʼári. Ohechávo chepytuhẽmbaha gueteri arrema hag̃ua cheaño, ombojoaju peteĩ remolke pióla che kayak rehe ha oñepyrũ orrema, chembotyryrývo upéicha hendive. Uperiremínte chepytuhẽ jey ha añepyrũ arrema hekoitépe cheaño. Opoi pe piólagui, ha che ag̃uahẽ pe isla peteĩháme ñeipytyvõ’ỹre. Ag̃uahẽvo, ajeity yvyku’i ári, chekane’õitereígui.

Upe aty opytu’upa rire, pe gía he’i chéve kirirĩhamete: “Karai Renlund, resegíramo rerrema, remantene ne impulso, chéve g̃uarã reime porãitereíta”. Asegí umi ikonsého rorrema aja pe isla mokõiha meve ha upéi rojukuévo rosẽ ypy haguégui peve. Mokõi jey, pe gía ohasa orremávo ha he’i chéve ejapo “porãiterei!” Umi ola tuichavéva jepe ojejapete che kayak rehe ijyke gotyo, ha katu nachembojeréi.

Arrema meme rupi pe kayak, amantene pe impulso ha progreso tenonde gotyo, amomichĩvo umi ola efecto cheinupãva ijyke gotyo. Upeichagua principio ojeipuru ñande rekove espiritual-pe. Ñag̃uahẽ ñande reko kangy ñañemombegue aja ha ko’ýteve japytáramo. Ñamantenéramo ñane impulso espiritual “ñarrema” meme aja Salvador gotyo, ñaimevéta seguro upe ñande rekove ijapyra’ỹva odepende rupi ñande jerovia rehe Hese.

Pe impulso espiritual ojejapo “peteĩ tekove pukukue aja ñamog̃uahẽ jeyjeývo Cristo doctrina.” Ojejapóvo upéicha, Presidente Russell M. Nelson ombo’e, oiko peteĩ “siklo virtuoso ipu’akapáva.” Añetehápe, umi elemento Cristo doctrina pegua—ha’eháicha jerovia Ñandejára Jesucristo rehe, arrepentimiento, jaike peteĩ relasiõ konvéniope Ñandejára ndive ñemongarai rupive, jahupyty pe Espíritu Santo don ha jaha hese ipahaite pevenoñemoĩri ojehasa hag̃ua peteĩ evento peteĩmi ramo, peteĩ lista oñemarkava’ẽráicha. Particularmente, “jaha hese ipahaite peve” ndaha’éi peteĩ paso aparte Cristo doctrina-pe —ku ñamohu’ã ramoguáicha umi irundy elemento tenondegua ha upéi ñañakãity, jajopy ñande juru ha ñaha’arõ ñamano. Nahániri, jaha hese ipahaite peve ha’e jaiporu jeyjey ha jeyjeyve umi ambue elemento Cristo doctrina pegua, omoheñóivo pe “siklo virtuoso ipu’akapáva” Presidente Nelson odescribiva’ekue.

Peteĩve jey he’ise ja’experimenta jeyjeyha umi elemento Cristo doctrina pegua ñande rekove pukukue aja. Jeyjeyve he’ise ñamopu’ã ha ñamehoraha jajapo jeyjeývo. Jajapo jeyjey ramo jepe umi elemento, ndaha’éi jajerénteva peteĩ jerépe ojeguereko’ỹre trayectoria tenonde gotyo. Upéva rangue, ñañemoag̃ui jeyve Jesucristo-re pe siklo rupive.

Pe impulso ogueru mokõive, velocidad ha dirección. Arremárire kyre’ỹme pe kayak dirección ndahaéiva gotyo, ikaturamo’ã amoheñói peteĩ impulso significativo, ha katu nag̃uahẽiramo’ã pe destino oñeg̃uahẽva’erãme. Upéicha avei, tekovépe, tekotevẽ “ñarrema” Salvador gotyo jaju hag̃ua Hendápe.

Ñande jerovia Jesucristo rehe oñemongaruva’erã ára ha ára. Oñemongaru ñañembo’évo ára ha ára, jastudiávo escritura-kuéra ára ha ára, jajepy’amongetávo Ñandejára mba’eporã rehe ára ha ára, ñañearrepentívo ára ha ára ha jasegívo ára ha ára umi Espíritu Santo impresiõ. Naiporãiháicha avei ndaja’upái ñane rembi’u domingo peve ha upéi katu jajepy’a’atakapa upe tembi’u semanal otoka vove ñandéve, espiritualmente nahesãiri jajoko ñande comportamiento ñamongaruva’erãha ñande testimonio peteĩ ára semana-kue aja.

Ja’asumi ramo responsavilida ñande testimoniokuéra rehe,jahupyty impulso espiritual ha mbeguekatúpe ñamoheñói jerovia imbaretéva Jesucristo rehe, ha Cristo doctrina og̃uahẽ oiko fundamental tekove propósito-pe g̃uarã. Pe impulso avei oñemopu’ã ñañeha’ãvo ñaneñe’ẽrendu Tupã leikuérare ha ñañearrepenti. Pe arrepentimiento ha’e vy’apavẽ ha oheja ñandéve ña’aprende ñande javykuéragui, ha’éva mba’éichapa japrogresa tapiaite g̃uarã. Katuete jaguerekóta ára jajeretaha ñande kayak-kuéra rehe ha jajejuhúta y pypukúpe. Pe arrepentimiento rupive, ikatu jajupi jey yvate ha jasegui, oimporta’ỹre mboy jeýpa ja’a. Pe iñimportánteva haʼe nañañemeʼẽiha.

Pe elemento oúva ko’ág̃a Cristo doctrina pegua ha’e ñemongarai, oikehápe pe ñemongarai y rehegua ha, konfirmasiõ rupive, ñemongarai Espíritu Santo rehegua. Pe ñemongarai ha’éramo jepe peteĩ evento ijojaha’ỹva, ñambopyahu jeyjey ñane konvénio ñemongarai rehegua japarticipávo pe Santa Cena-gui. Pe Santa Cena nomyengoviái pe ñemongarai, ha katu ombojoaju umi elemento ñepyrũ Cristo doctrina pegua—jerovia ha arrepentimiento—Espiritu Santo jehupyty reheve. Japarticipávo ñane conciencia-pe porã pe Santa Cena-gui, ñainvita Espíritu Santo ñande rekovépe, ñañemongarai ha ñañekonfirma ramoguaréicha. Ñañongatúvo pe konvénio oñemombe’úva umi ñembo’e sacramento-pe, Espíritu Santo-gui oiko ñane irũ.

Pe Espíritu Santo oguereko aja peteĩ influencia tuichavéva ñande rekovépe, akãrapu’ãme ha jeyjeyve jadesarrolla umi atributo Cristo-ichagua. Ñane korasõ okambia. Ñande disposisiõ jajapo hag̃ua ivaíva oguejy. Upe iporãva jajapose ojupi “jajapose meme peve iporãva” añónte. Ha upéicha jaike pe pu’aka celestial-pe oñeikotevẽva jaha hag̃ua hese ipahaite peve. Ñande jerovia oñembohetave, ha ñaiméma jajapo jey hag̃uáicha pe siklo virtuoso ipu’akapáva.

Pe impulso espiritual ñanemomýi jajapo hag̃ua ambue konveniove Tupã ndive Ñandejára rógape. Konvenioita ñanemoag̃uive Cristo rehe ha ñanembojoaju mbareteve Hese. Ko’ã konvénio rupive, tuichave jaikekuaa Ipokatúpe. Ñamohesakã haĝua, umi bautismo ha templo-gua konvénio ndaha’éi ijehegui pe pu’aka fuente. Pe pu’aka fuente ha’e Ñandejára Jesucristo ha ñande Ru Yvagagua. Jajapóvo ha ñañongatúvo konveniokuéra okrea peteĩ conducto Ipu’akakuérape ĝuarã ñande rekovépe. Jaiko ramo ko’ã konvénio he’iháicha, og̃uahẽ vove hi’ára oikota ñandehegui eredéro opa mba’e Túva Yvagagua oguerekóvagui. Pe impulso oikóva jaiko haguére Cristo doctrina ndaha’éi omombareténteva pe ñande naturalesa divina transformasiõ ñande destino eterno-pe, ha katu avei ñanemomýi ñaipytyvõ hag̃ua ambue tapichakuéra hekoitépe.

Pehechami mba’éichapa chepytyvõ pe expedisiõ ogiáva ajere rire pe kayak rehe. Ndosapukáiri mombyry guive peteĩ mba’eporandu oipytyvõ’ỹva, ha’évaicha: “Karai. Renlund, mba’épiko rejapo pe ýpe?”. Ha’e norremái ha cheja’o, he’ívo: “Karai Renlund, nereimeiramoʼã ko situasiõme nderete oĩ porãmie guive.” Haʼe noñepyrũi orremolka che kayak che añehaʼã aja ajupi hiʼári. Haʼe nachekorregíri pe aty renondépe. Upéva rangue, omeʼẽ chéve pe pytyvõ aikotevẽva upe aikotevẽ jave. Haʼe omeʼẽ chéve konsého upe ikatu aja arresivi. Ha haʼe oñehaʼãmbaite chemokyreʼỹ hag̃ua.

Ñaministrávo ambue tapichakuérape, natekotevẽi ñaporandu umi mba’e oipytyvõʼỹva térã ja’e umi mba’e ojehecha porãmava. Hetave umi hénte oñehaʼãva oikuaa oñehaʼãha hína. Ndajahusgáiva’erã; ñande huisio noipytyvõi ni ndojeguerohorýi ha hetave kásope noñemomaranduporãi.

Ñañekompara ñande rapichakuérare ikatu jajavy vaieterei, koʼýte ñamohuʼãramo ñande rekojojaveha umi oñehaʼãvagui. Ko’ãichagua ñekompara ha’ete jajahogáva esperansa’ỹre 3 metroýpe, rehechávo ne konosido ojahoga 4 metroýpe, rehusgávo chupe peteĩ pekador tuichavéva ramo, ha reñeñandu porã ndejehe. Ipahápe, opavave ñañeha’ã hína ñande propia manera-pe. Avave ñande apytépe ndohupytýi salvasiõ. Ñande araka’eve ndaikatúi. Jacob, Mormón Kuatiañe’ẽme, ombo’e: “Penemandu’áke, [ñande] ñañemoĩporã rire Tupã ndive, ha’eha peTupã grásiape ha hese añoiténte [ñande] jajesalvaha.” Opavave ñaikotevẽ Salvador Expiasiõ opave’ỹva rehe, ndaha’éi peteĩ párte añónte.

Ñame’ẽ opaite ñande poriahuvereko, ñande py’aporã ha mborayhu ñañemoirũvo umi ñande jerére oĩva ndive. Umi oñeha’ãva “tekotevẽ oñandu Jesucristo mborayhu potĩ ojehechaukáva [ñande] ñe’ẽ ha rembiapokue rupive.” Ñaministrávo, py’ỹi ñamokyre’ỹ ambue tapichakuérape ha ñaikuave’ẽ pytyvõ. Noiméiramo jepe orresivi hag̃uáicha, jasegi ñaministra ha’ekuéra opermitiháicha. Pe Salvador ombo’e “ko´ãva rehe pesegíta peministra; ndapeikuaáigui peichahágui ojeréramo g̃uarã hikuái ha oñearrepenti, ha ou cherendápe korasõ añete reheve, ha che amongueráta chupekuéra; ha peẽ haʼéta tembiporu pegueru hag̃ua chupekuéra salvasiõ”. Pe Salvador rembiapo ha’e upe poromonguera. Ñane rembiapo ha’e jahayhu—jahayhu ha ñaministra ikatuháicha ambuekuéra oñeñandu ojegueraha Jesucristo gotyo. Kóva ha’e peteĩ pe Cristo doctrina siklo virtuoso ipu’akapáva yva.

Po’invita peiko jeyjey ha jeyjeyve hag̃ua Cristo doctrina-pe ha peipytyvõ ambue tapichakuéra hapépe. Atestifika Cristo doctrina ha’eha fundamental Túva Yvagagua plan-pe; ha’éva, opa mba’e rire, Idoctrina. Ñamomba’apóvo jerovia Jesucristo ha Ijexpiasiõ rehe, ñañemongu’e pe konvénio rapére ha ñañemokyre’ỹ ñaipytyvõ hag̃ua ambue tapichakuérape oiko hag̃ua chuguikuéra Jesucristo discípulo ijeroviarekóva. Ikatu oiko ñandehegui eredéro Túva Yvagagua réinope, ha’éva pe ñemohu´ã jaikohague jeroviarekópe Cristo doctrina-pe. Jesucristo rérape, amén.