Jerovia konveniokuérape Jesucristo rupive

Che hermano ha hermana-kuéra pohayhuetéva, añembo’e tañañembopyahu espíritu-pe umi mensáhe inspirádo rupi ñande liderkuéragui ko semana pahápe ha tajavy’a upe che ahayhúva ahenóivo “jerovia konveniokuérape Jesucristo rupive”. Ko jerovia ha’e pe ñemboaje kirirĩ ha katu añetete jahupytyha umi jehovasa Tupã oprometéva umi oñongatúvape ikonveniokuéra ha tekotevẽtéva ko’ã ñande áragua circunstancia ñanera’ãva mbytépe.

Ñandejára Róga pyahu ñemopu’ã yvóra jerére, Presidente Russell M. Nelson liderazgo inspirado guýpe, ombovy’aiterei Tupaogua miembro-kuérape ha ha’e peteĩ símbolo imba’eguasúva Ñandejára rréino jekakuaa rehegua.

Ajepy’amongetávo che rembiasa inspirado rehe pe Feather River, California Templo dedikasiõme, añeporandu ndaha’éipa sapy’ánte ñakañyha upe ñemokyre’ỹrasápe jareko haguére umi templo pyahu ñande táva ha komunidápe ha ñanderesarái upe propósito marangatuvévagui ome’ẽva ñandéve umi templo.

Peteĩteĩ templo fachádape ojehai peteĩ momarandu solemne: “Santida Ñandejárape”. Ko’ã ñe’ẽ inspirádo ha’e peteĩ invitasiõ hesakãva jaikévo Ñandejára rógape, jaikeha peteĩ ñemoarandu je’ói sagrádope, oiko hag̃ua ñandehegui Cristo discípulo ijyvateve ha imarangatuvéva. Jajapóvo marangatúpe konveniokuéra Tupã renondépe ha ñañekomprometévo jasegitaha Salvador-pe, jahupyty pe pu’aka ñamoambue hag̃ua ñane korasõ, ñambopyahu hag̃ua ñande espíritu ha ñambopypukuve hag̃ua ñande relasiõ Hendive. Upéichagua ñeha’ã omomarangatu ñane ánga ha oforma peteĩ joaju sagrádo Tupã ha Jesucristo ndive, oprometéva ñande ikatuha jahupyty pe tekove ijapyra’ỹva don. Ko je’ói sagrádo rresultádo ha’e jahupytyha peteĩ jerovia imarangatuve ha ijyvatevéva ñande ára ha aragua rekovépe umi ñane konvénio ryepýpe jajapóva Jesucristo rupive.

Upeichagua jerovia ha’e pe ñane divíno jojau ru’ã Tupã ndive ha ikatu ñanepytyvõ ñambokakuaa hag̃ua ñane devosiõ ha aguijeme’ẽ Jesucristo ha Ijehasa’asy expiatóriore. Omombarete ñande katupyry jahayhu ha jaservi hag̃ua ambue tapichakuérape, ha omombarete ñane ánga jaiko hag̃ua peteĩ yvóra marangatu’ỹ iñypytũve ha ñanemokangývape. Ñanemombarete jagueropu’aka hag̃ua umi duda ha py’aropu, kyhyje ha frustrasiõ, korasõrasy ha esperansa’ỹ ra’ỹi pe opa añetegua rayhu’ỹha oñeha’ãva oñoty pypuku ñane korasõme, especialmente tekove hasýrõ, umi py’ara’ã ipuku térã umi circunstancia hasyetérõ. Peteĩ Biblia-gua versículo ome’ẽ peteĩ konsého iñarandúva peteĩteĩ ñandéve g̃uarã ñambohovakévo umi py’ara’ã yvoragua yvytu atã ko’ã árape: “Ani peperde pende jerovia.”

Hermano ha hermana-kuéra pohayhuetéva, umi ohupytýva jerovia añetéva umi konvéniope ojejapóva Ñandejára rógape Jesucristo rupive oguereko peteĩ umi pu’aka imbaretevévagui ikatúva jahupyty ko tekovépe.

Ko ary jaestudiávo Mormón Kuatiañe’ẽ Eju Chesegípe, ñande ha’e testigo mba’éichapa Nefi oehemplifika porãite upeichagua konveniogua jerovia pu’aka ijeroviareko rupive ombohovakévo umi ñepa’ã ha ijetu’úva, ohupyty hag̃ua umi pláncha omanda haguéicha Ñandejára. Nefi, ojepy’apyetereírõ jepe Lamán ha Lemuel kyhyje ha jerovia’ỹ rupi, opyta desidído ha ojeroviávo Ñandejára ome’ẽtaha chupekuéra umi pláncha. Ha’e he’i ijoyke’ykuérape: “Ñandejára oikoveháicha, ha ñande jaikoveháicha, ndajaguejymoʼãi ñande ru rendápe taveʼỹme jajapo peve pe mbaʼe Ñandejára omandavaʼekue ñandéve.” Nefi jerovia rupive Ñandejára promesakuérape, ha’e ohasa peteĩ milagro ha ikatu okumpli oñemandava’ekue chupe ojapo hag̃ua. Uperireve, ivisiõme, Nefi ohecha avei upeichagua jerovia influénsia ohaívo: “Che, Nefi, ahecha pe Tupã Cordero puʼaka, oguejýramo umi imarangatúva Cordero tupaogua ári, ha umi Ñandejára konvénio tavayguakuéra ári, … ha oguereko hikuái hiʼármaramo tekojoja ha pe Tupã puʼaka tuicha verapýpe.”

Che ahecha de primera mano umi Ñandejára promesa ha pu’aka omyanyhẽva Tupã ra’yrakuéra rekove, omombaretévo chupekuéra ombohovake hag̃ua umi tekovegua rembiasa. Ára ohasávape che rembireko ou ógape otupãitũ rire templo-pe ha omombe’u chéve mba’eichaitépa opoko ikorasõre upe ohasava’ekue upépe. Oikévo ha’e pe Ñandejára rógape, ohecha peteĩ kuimba’e silla de ruedas-pe omýiva mbeguekatuete ha peteĩ kuña oguata asyetévo peteĩ bastón reheve, mokõivéva oúvo py’aguasúpe otupãitũ hag̃ua Ñandejárare Hógape. Che rembireko oikévo iniciatoria áreape, ha’e ohecha peteĩ hermana ijukyetéva, ndorekovéimava peteĩ jyva—ha orekóva pe ambue jyva pehẽnte—ojapóvo porãite ha celestial-háicha oimeraẽ tembiaporã oñeme’ẽva chupe.

Roñemongetávo umi mba’ére, che rembireko ha che rog̃uahẽ peteĩ conclusiõme, ha’eha pe jerovia potĩ ha añetéva añónte umi promesa ijapyra’ỹva Tupã ome’ẽvare umi konvénio sagrádo rupive ojejapóva Hendive Hógape ikatu ojapo umi Cristo discípulo hechapyrãva tosẽ hogakuéragui upe ára ro’yetépe, jepe umi icircunstancia personal.

Che angirũnguéra pohayhuetéva, oĩrõ peteĩ mba’e jaguerekokuaáva, ha peteĩ mba’e ikatútava ñambohasa ñande ta’ýra ha nieto-kuérape oipytyvõtava peteĩteĩme umi py’ara’ã ha jehasa’asýpe oútava, upéva ha’éne pe jerovia konveniokuérape ojejapóva Jesucristo rupive. Ohupytývo upeichagua mba’erepy divíno oipytyvõta chupekuéra oiko hag̃ua Ñandejára oprometeháicha Isegiha ijeroviarekóvape: “Ha katu che rembiguaikuéra oĩta tenda marangatúpe, ha noñemonguʼemoʼãi.”

¿Mba’éichapa jahupyty upeichagua jerovia Jesucristo rupive? Ou humilda rupive, ñasentrávo ñande rekove pe Salvador-pe, jaikóvo Jesucristo evanhélio principio-kuéra rupive, jahupytývo umi salvasiõ ha exaltasiõ ordenansakuéra, ha ñaonrrávo umi konvénio jajapóva Tupã ndive Hóga marangatúpe.

Umi iñe’ẽ paha Conferencia General Octubre 2019-guápe, ñande proféta jahayhuetéva ñanemomandu’a peteĩ mba’e imba’eguasúva jahupyty hag̃ua jerovia konveniokuérare he’ívo: “Pe dignida personal ojeike hag̃ua Tupã rógape oikotevẽ heta ñembosako’i espiritual. … Pe dignidad personal odemanda peteĩ conversión total ñane mente ha korasõ ha’eve hag̃ua Ñandejáraicha, ha’e hag̃ua peteĩ ciudadano honrado, peteĩ mejor ejemplo, ha peteĩ persona más santa.” Upévare, ñamoambuérõ ñane ñembosako’i jaike hag̃ua templo-pe, ñamoambuéta ñane rembiasakuéra templo ryepýpe, ha upéva omoambuéta ñande rekove okápe. “Upérõ ndejeroviapy oñemombaretéta Tupã renondépe; ha sacerdocio doctrina otykytykýta ne ánga ári ysapy yvágagui guáicha.”

Peteĩ obispo che aikuaáva ojerreferi mitãnguéra ijedavéva Primaria clase rehe ndaha’éi “Primaria” clase ramo ha katu “ñembosako’i templo-rã” clase ramo. Enero-pe obispo ojerure upe clase miembro-kuéra ha umi imbo’ehárape toho iñofisínape, upépe oñe’ẽ hikuái mba’épa ojapóta hikuái ary pukukue aja oñembosako’ívo oike hag̃ua templo-pe. Obispo oiporu tiempo oho hag̃ua umi porandu entrevista-pegua templo rekomendasiõrã rupive, ha upéi oinklui umíva imbo’epykuéra Primaria-guápe. Ha’e oinvita mitãnguérape oñembosako’i hag̃ua upéicha ou vove hikuái iñofisínape peteĩ arýpe, ha’ekuéra ojeroviáta, ijeroviáta konveniokuérare, oĩporãmbáta ohupyty hag̃ua peteĩ recomendación templo-rã ha oike hag̃ua Ñandejára rógape. Ko arýpe obispo orekókuri irundy mitãkuña ikere’ỹva, oñembosako’i, ha ojeroviáva oho hag̃ua templo-pe ha ha’ekuéra oipotákuri obispo toimprimi irrekomendasiõnguéra Año Nuevo árape 12:01 a.m.-pe.

Ñembosako’i ndaha’éi umi ohótavape g̃uarã templo-pe peteĩha javénte. Opavave ñañembosako’i memeva’erã jaha hag̃ua Ñandejára rógape. Peteĩ estáka che aikuaáva ojagarra pe léma: “Ógape oñesentráva, Tupaóre ojepytasóva, ha templo-re ojoajúva”. Joaju ha’e peteĩ ñe’ẽ iñinteresánteva he’iséva oñesentra peteĩ dirección gotyo, ha katu avei he’ise ojejokuáva térã ojeaseguráva peteĩ mba’e rupi, rresuélto, ha determinado, segúro. Upéicha ojoajúvo templo-re ñanembojoaju pe Salvador-re, ome’ẽ ñandéve dirección ha estabilida iporãva, oasegura aja jarekoha jerovia konveniokuérare Jesucristo rupive. Upévare, opavave ñande intencionalmente ñamehorava’erã upe ñembojoaju jarekóvo programado ñande cita oútava Ñandejára ndive Hóga marangatúpe, taha’e pe templo hi’ag̃ui térã mombyry ñandehegui.

Ñande proféta jahayhuetéva Presidente Russell M. Nelson, ñanemomandu’a ko’ã principio imba’eguasuetévare he’ívo: “Pe témplo oĩ ñande jerovia ñemombarete ha ñemombarete espiritual mbytépe, pe Salvador ha Idroctrina ha’e haguére pe témplo korasõite. Opa mba’e témplope oñembo’éva, ñemoarandu ha Espíritu rupive, omongakuaa ñane ñeikũmby Jesucristo-gui. Iñordenánsa esencial-kuéra ñanembojoaju Hese umi sacerdocio kónvenio sagrádo rupive. Upéi, ñaneñe’ẽrendúramo ñane konveniokuérare, Ha’e ñane añuã Ipu’aka omongueráva ha omombaretévape. Ha o, mba’eichaitépa ñaikotevẽta Ipu’akáre umi ára oútavape.”

Pe Salvador oipota ñañembosako’i ñantende hag̃ua, tuicha tesakã reheve, mba’eichaitépa ñamba’e’apova’erã jajapóvo konveniokuéra ñande Ru Yvagagua ndive Hérape. Ha’e oipota tañañembosako’i ñaexperimenta hag̃ua umi ñande priviléhio, promesa ha responsabilidad; tañañembosako’i jareko hag̃ua umi tembirecha ha jepáy espiritual ñaikotevẽva ko tekovépe. Che aikuaa Ñandejára ohecha vove peteĩ potapy’imi térã peteĩ ñeha’ã joja’imi jepe ñasentra hag̃ua ñande rekove Hese ha umi ordenánsa ha konvénio jajapóva Hógape, Ha’e ñanderovasáta, Oikuaaporãháicha, umi milagro ha poriahuvereko kyrỹi reheve ñaikotevẽva.

Ñandejára róga ha’e ikatuhápe ñañemoambue ijyvateve ha imarangatuveháicha. Upéicha, ñasẽrõ templo-gui, ñañemoambuévo ñane esperánsare umi konvénio promesa rehe, ñañemondévo pu’aka yvategua reheve, ñande jagueraha pe templo ñandendive ñande róga ha ñande rekovépe. Amoañete peẽme jaguereko ñandepype Ñandejára róga espíritu, ñanemoambuepaiteha.

Avei jaikuaa templo rupi jaipotárõ pe Ñandejára Espíritu toĩ meme ñande rekovépe, simplemente ndaikatúi ha ndajaguerekoiva’erã temiandu vai avavére. Ñame’ẽvo tenda ñane korasõ térã apytu’ũme umi temiandu térã pensamiento ipy’apora’ỹvape oguerúta umi ñe’ẽ ha mba’e’apo ipy’aporã’ỹva, taha’e redes sociales térã ógape, ojapóvo Espíritu Santo tejei ñane korasõgui. Upévare, ani pehejami oho pende jerovia, upéva rangue peheja pende jerovia toñemombarete.

Umi templo ñemopu’ã meme ha pya’e ñanemokyre’ỹ, ñaneinspira ha ñanderovasa meméta gueteri. Upevére, pe imba’eguasuvéva niko, ñamoambuévo ñane ñembosako’i jaike hag̃ua templo-pe, ñamoambuéta ñane rembiasakuéra templo ryepýpe, ha upéva omoambuéta ñande rekove templo okárape. Ko ñemoambue tañanemyanyhẽ jeroviágui umi ñane konvénio marangatúpe jajapóva Tupã ndive Jesucristo rupive. Tupã oikove, Jesús ñande Salvador ha kóva Itupao restaurado ko yvy ári. Reverentemente amomarandu ko’ã añetegua ñande Salvador Jesucristo réra sagrádope. Amén.