Jajaho’ívo Cristo Vy’ápe

Nuevo Testamento-pe jaikuaa ohecha’ỹva Bartimeo-gui, ojerure’asýva Jesús-pe oipotávo peteĩ milagro. “Jesús he’i chupe, Tereho; nde jerovia ndesalváma. Ha upe javeteohecha jey”.

Ambue ára, peteĩ kuimba’e Betsaida-gua oha’arõ puku okuera haĝua. Upeicha’ỹ katu, pe milagro ndoúi ope javete. Upe rãngue, Jesús ohovasa chupe mokõijeyve ha’e “oñemonguera mboyve”.

Mbohapyha tembiecharãme, Apóstol Pablo “mbohapy jeyve ojerure’asy Ñandejárape” ijehasa’asýpe, ha upevére, jaikuaaha peve, ijerure asyete noñeme’ẽikuri.

Mbohapy hénte iñambuéva. Mbohapy experiencia ijojaha’ỹva.

Upégui heñói ko porandu: Mba’ére piko oĩ umi ohupyty pya’éva umi Milagro oipotáva, ha ambuekuéra katu oaguanta pacientemente, oha’arõvo Ñandejárape? Ikatu ndajaikuaái mba’érepaha katu akói jaikuaa mávapa “[ñande] rayhu”ha “[ojapo] opa mba’e [ñane] ñeimeporã ha ñande vy’apavẽrã.”

Tupã, ohecháva ipaha iñepyrũmby guive, omoañete ñandéve “ndejeiko’asy ha ndejehasa’asykuéra sapy’amítante,” ha oñekonsagráta “ne ñeimeporãrã.”

Ñanepytyvõvo jajuhu haĝua signifikádo ñande prueba-kuérape, Elder Orson F. Whitney ombo’e: “Mba’eve mba’erasy jahasáva, ni peteĩ prueba jahasáva ndaha’éi rei. Oipytyvõ ñane ñehekombo’épe. … Opa … [py’aguapýpe] jagueropu’akáva … omopu’ã ñande rekopy, omopotĩ ñane korasõ, ombotuicha ñane ánga, ha ñanembopy’a roryve ha karitatívove. … Vy’a’ỹ ha jeha’asy, mba’evai ha jeiko’asy rupive, ha’e jahupytyha pe ñehekombo’e jajuva’ekue jareko hag̃ua ko’ápe ha ohejátava jajoguave ñande [rukuéra yvagaguápe]”.

Oentendévo “Cristo pokatu opytáta [hi[‘ári ijahasa’asy árape, apóstol Pablo he’i mirĩme: “Chekangýrõ, upérõ chembarete.”

Tekovegua desafio ñanepy’ara’ã. Pe Salvador jepe “oñemoarandu … ñe’ẽrendúpe” ha “oñemoĩporãmba jehasa’asy rupi.”

Ha peteĩ ára poriahuverekópe Ha’e odeklaráta, “Che romboverava’ekue, Che roiporavova’ekue che jehasa’asy ratakuápe.”

Ñaikũmby ha jajerovia Tupã propositokuéra divínore oipeju esperánsa angakuéra ikane’õvape ha omyendy determinasiõ tekovegua ára jepy’apýpe.

Ojapo heta ary, upérõ Élder Russell M. Nelson okomparti ko py’amongeta repyete: “Ñama’ẽrõ opa mba’ére jehecha eterno reheve, tuicha ombovevýita ñane mba’epohýi.”

Che rembireko Jill ha che, nda’aréi ha’ehague testígo ko añeteguágui Holly ha Rick Porter ijeroviarekóva rekovépe, ifamília 12 áño orekóva, Trey, omano peteĩ tatarendy vaietépe. Ipo ha hetyma okaivaipetéva reheve py’aguasúpe oñeha’ãgui osalva imemby ohayhuetéva, Holly oñembo’y barrio-gua reunión sacramental-pe ha otestifika pu’akapápe tuicha py’aguapy ha vy’a Ñendejára oñohẽva’ekuére ifamília ári iñeime’asýpe, oiporúvo umi ñe’ẽ milagroso, ojeguerovia’ỹva ha oñemomba’eguasúva.

Ko sy porãite mba’erasy ojegueropu’akakuaa’ỹva pya’ete oñemyengovia peteĩ py’aguapy ijojaha’ỹvare ko pensamiénto reheve: “Che po ndaha’éi umi po oporosalváva. Umi po ha’e ñande Salvador po! Ahecha rãngue umi che pere peteĩ momandu’a ramo pe ndaikatúivare ajapo, chemandu’a umi pere che Salvador orahávare”.

Holly testimónio okumpli ñande proféta promésa: “Pepensáramo celestial háicha, pehecháta umi jeipy’ara’ã ha oposisiõ peteĩ tesape pyahu guýpe”.

Élder D. Todd Christofferson he’i: “Arovia desafío jagueropu’aka hag̃ua mba’e hasýva ha jakakuaa hag̃ua umíva rupive jaguerohorýra’e Tupã omoĩrõguare Iplan rresendiõ rehegua mundo preterrenal-pe. Ñambovakeva’erã upe desafío jaikuaávo ñande Ru Yvagagua ñandejokotaha. Ha katu tekotevẽte jaju Hendápe. Tupã ỹre, umi tembiasa ypytũ jehasa’asy ha jeiko’asy rehegua oguerúva jepi kangy, py’aropu ha vy’a’ỹreko jepe”.

Ñamboyke haĝua pe descontento pytũmbykue ha upéva rãngue jajuhu tuichave py’aguapy, esperánsa ha vy’a jepe, umi jeiko’asy vaiete aja, che aikuave’ẽ mbohapy prinsípio divíno invitacion ramo.

Peteĩ— jerovia mbareteve ojehupyty ñamoĩvo Jesucristo-pe raẽvete. “Pema’ẽ cherehe opa pensamiento-pe,” Ha’e he’i; “ani pe duda, ani pekyhyje.” Presidente Nelson ombo’e:

“[Ñande] rekove ijapyra’ỹva odepende [ñande] jeroviáre [Cristo]-re ha Iñexpiasiõre.”

“Añorairõvo pe mba’easyete oúva che lesiõ ramoitévagui, añandu aguyje pypukuve Jesucristo ha Iñexpiasiõ ijojaha’ỹvare. Pepensami upévare! Pe Salvador ohasa’asy ‘mbaʼeʼasy ha jeikoʼasy ha jeipyʼaraʼã opaichaguáva’ Ha’e ikatu hag̃ua ñanemoangapyhy, ñanemonguera, [ha] ñanderreskata ñaikotevẽha árape.”

Che lesiõ chemopensa jey jey “pe Israel-gua Imarangatúva tuichakuére’. Añemonguera aja, Ñandejára ohechaukákuri Ipu’aka divíno py’aguapýpe ha aikuaaporãháicha”.

“Peiko’asýta ko yvy ári: ha katu pejerovia,” “Che ningo chepu’akava’ekue múndore.”

TMokõi—peteĩ esperanza omimbivéva heñói javisualisávo ñande destino eterno. Oñe’ẽvo pu’aka rehe ohóva jarekóvo “peteĩ visiõ umi jehovasa ojeguerovia’ỹvagui ñande Ru oprometeva’ekue … ñande resa renondépe ára ha ára”, hermana Linda Reeves otestifika: “Ndaikuaái mba’érepa jareko hetaite prueba jarekoháicha, ha katu ha’e che experiencia personal, añandúvo pe recompensa tuichaitereiha ha igososoitéva, ohasáva ñande entendimiento, upévare upe recompensa árape, ikatu ñañandu ja’eva’erãha ñande Ru misericordioso ha amoroso-pe: ¿Upévante piko upe oñeikotevẽva? Mba’épa oimportáta … jahasa’asýva ko’ápe, ipahápe, umi prueba … ñandekalifikátarõ tekove opave’ỹvarã … Tupã reino-pe?”

President Nelson okomparti ko pensamiento: “Pekonsiderami Ñandejára mbohovái José Smith-pe ojerure’asýrõ chupe alívio Liberty ka’irãime. Ñandejára ombo’e Profétape iñeimevai ome’ẽtaha chupe tembiasa ha ha’éta iñeimeporãrã. “Regueropu’aka porãramo’, opromete Ñandejára, “Tupã nemomba’eguasúta yvate.’ Ñandejára ombo’e José-pe opensa hag̃ua Celestial-háicha ha ohecha hag̃ua peteĩ jopói eterno oñesentra rangue umi mba’evai ijetu’úva upe araguáre.”

Ko jehecha ñemoambue ogueru José-pe santifikasiõ ipypukuetevéva, ojekuaaháicha peteĩ angirũme g̃uarã kártape: “Añemboty rire peteĩ ka’irãi tápia kuápe cinco mése aja ha’ete chéve kóva rire che korasõ akói hu’ũvetaha yma guarégui. … Tenondeve ohai: “Apensa araka’eve ndaikatumo’ãiha añeñandu ko’ág̃a añeñanduháicha ndahasáirire ko’ã mba’evai ahasava’ekue.”

Mbohapy: jahupyty pu’aka tuichave ñañesentrávo vy’ápe. Pe eternida aravo imba’eguasuvéva ha ipy’aropuvévape, ñande Salvador ndoguevírir ha katu hoy’u pe kópa iróvagui. Mba’éicha piko ojapo upéva? Jaikuaa “vy’apavẽ oñemoĩvare henondépe [Cristo] ohasa’asy pe Kurusu,”Ivoluntad “ojeabsorvéva Túva voluntad rehe.”

Ko ñe’ẽ “mokõ” chemomýi pypuku. Tuichavéntema che interés aikuaávo español-pe, “swallowed up” oñembohasaha “oje’úva” ramo; Alemán-pe “oñemokõva” ramo, ha Chino-pe, “ñemokõko” ramo. Upévare, añandúvo chejopyha tekovepegua tuicha desafío, chemandu’a ko promésa divínore, ñandejeroviarekópe “ndajahasamo’ãiha mba’evéichagua jeiko’asy, ndaha’éiramo ñañemoĩ [ñañeañua, jajejaho’i ha ñañemokõko] Cristo vy’ápe”

Ahecha heta penderehe upe vy’a “[odesafiáva] pe comprensión mortal,” jepe pende kópa iróva ndojeipe’ái gueteri. Aguijevete peẽme peñongatu haguére pene konveniokuéra ha peñembo’ývo Tupã testigo ramo. Aguijevete peẽme peipyso haguére pende po pehovasa haĝua opavavépe, upéva aja “pene korasõ ipy’aguapývape okañy peteĩ ñembyasy tesa ndaikatúiva ohecha.” Peguerahávo pe Salvador alivio ambuekuerape, pejuhúta penemba’erãite, ombo’e presidenta Camille Johnson.

Ko’áĝa, peho jey chendive reunión sacramental-pe ha’ehaguépe testigo upe milagro-gui Holly Porter familia ojesocorrehague Ñandejárare. Estrado-pe ajepy’amongeta aja mba’épa ha’ekuaa aikuave’ẽ hag̃ua angapyhy ko ijeroviarekóva famíliape ha iñangirũnguéra ojehayhuetévape, ou ko impresiõ: “Eiporu Salvador ñe’ẽnguéra.” Upéicha amohu’ã ko ára ajapo haguéicha upe Domingo, Iñe’ẽnguéra reheve, “ñeʼẽ omongueráva ánga hasýva”.

“Peju cherendápe, opavave pemba’apóva ha penemba’epohýiva, ha che pombopytu’úta”.

“Avei ambovevýita umi mbaʼepohýi oñemoĩva pene lómo ári, jepe ndaikatúi peve peñandu pende apére, jepeve peime aja ñeñapytĩmbýpe; … peikuaa porã hag̃ua che, pe Tupã Ñandejára, ajuha che tavayguakuérape ijeikoʼasýpe.”

“Ndapohejamo’ãi angapyhy’ỹre: Ajúta penerendápe”.

Reverénsia roryete reheve, atestifika ñande Salvador oikoveha ha “Ipromesakuéra isegúro.” Peẽme peiméva atribulado térã “pehasa’asýva oimeháicha,”atestifika ñande Ru Yvagagua ohenduha ñande jerure’asy tesay mbytépe ha akoite ombohováita arandu perfecto reheve. “Tupã toheja peẽme,” ojapohaguéicha ore familia ndive umi tekotevẽ guasu árape, “pende mba’e pohýi taivevýi” jepe “toñembogue Cristo vyʼápe.” Jesucristo réra marangatúpe. Amén