Upu Taua o le Feagaiga Tuai

O se malamalama faavae i le vaogagana lenei e mafai ona fesoasoani i au suesuega o le Feagaiga Tuai.

Faauu.O le faauu o le faaaoga lea o le suauu i se tagata po o se mea faitino. I taimi o le Feagaiga Tuai, o faauuga sa faia mo faamoemoega paia, faafomai, ma tulaga masani. Sa faia faauuga ina ia faapaia ai se tagata po o se mea faitino i le Atua. Mo se faataitaiga, na faauuina tupu, ositaulaga, ma perofeta i le suāuu ina ia vaetofia ai i latou e auauna i le Atua.

Peritomeina.O le tipiina ma le aveesea o le pa’u o le totoga sa o le tane. O lenei agaifanua anamua ua faataitaia i vaega eseese o le lalolagi e le tele o tagata. O le peritomeina na faia e le fanauga a Isaraelu o se sauniga na faailoa atu e le Atua ia Aperaamo. Sa o se faailoga lea o le feagaiga i le va o le Atua ma Lona nuu. O alii sa tatau ona peritomeina i le valu aso o le matutua.

Feagaiga.“O se maliliega paia lea i le va o le Atua ma se tagata po o se vaega o tagata. E faatulaga e le Atua ni tuutuuga fitoitonu, ma ua Ia folafola mai e faamanuia i tatou pe a tatou usitaia na tuutuuga. A tatou filifili e le tausia feagaiga, e le mafai ona tatou maua faamanuiaga.” E ala i feagaiga, tatou te fausia ai se sootaga faapitoa ma faavavau ma le Atua lea Na te faamanuia ma suia ai i tatou. O feagaiga i le va o le Atua ma Lona nuu e i ai se matafaioi tutotonu i le Feagaiga Tuai. O le feagaiga faa-Aperaamo e faapitoa lona taua aua o faamanuiaga na folafola mai ia Aperaamo o loo avanoa mo fanau uma a le Atua o e osia ma tausia feagaiga ma Ia.

Ifo i Tupua.O le ifo i tupua po o le soona pipii pe tuuto atu i se isi mea e ese mai i le Atua. Sa masani ona lē amanaia e tagata Isaraelu anamua le poloaiga a le Atua e faasaga i le ifo i tupua. O la latou ifo i tupua e masani lava ona aofia ai le tapuai i se tasi o atua o atunuu na siomia i latou, po o le faia o faatusa na fai ma sui o Ieova.

Isaraelu.O le igoa na tuuina atu e le Atua i le atalii o le atalii o Aperaamo o Iakopo, o lona uiga “ia manumalo le Atua” po o le “o lē e manumalo ma le Atua.” O le igoa Isaraelu e mafai foi ona faasino i e tupuga mai ia Iakopo po o soo se tasi e talitonu moni ia Iesu Keriso. I aso anamua, na faataapeapeina ai e le Atua le fanauga a Isaraelu ona o lo latou amioleaga ma le fouvale. Sa Ia folafola mai o le a Ia faapotopotoina Isaraelu i aso e gata ai. E faapotopotoina tagata o le Atua a o latou talia le talalelei a Iesu Keriso.

Ieova.O le igoa Eperu mo le Atua o Isaraelu o le YHWH, o se upu e masani ona faaliliuina i le gagana Peretania o Ieova. O le suafa lea i le muai olaga o Iesu Keriso, le Atua o le Feagaiga Tuai. OIeova e mafai ona uiga “O Ia,” po o le, i le tagata muamua, “O A’u.” O le mea lea, o lenei suafa e atagia mai ai le natura e faavavau o Iesu Keriso. Pe tusa o le 500 TLM, na amata ai ona tuu e tagata Isaraelu ona tautala leotele i le suafa o le Atua ona o le migao. O lenei faiga na mafua ai le leiloa o le ulua’i faaleoga o le igoa. O faalagiga e sui ai, e pei o le “Adonai” (“lo’u Alii”), sa mulimuli ane faaaogaina i soo se taimi lava e faaali mai ai [YHWH] Ieova i le Feagaiga Tuai.

Mesia.“O se upu Faa-Aramaika ma Faa-Eperu o lona uiga ‘o lē na faauuina.’” O lenei upu Eperu e sili atu ma le 30 taimi o ta’ua ai i le Feagaiga Tuai, e ui lava e seāseā faaliliuina i le gagana Peretania o le “Mesia.” E faaaogā e faasino atu i tupu, ositaulaga, ma perofeta faauuina. I le gasologa o taimi, na oo ina eseese uiga o tagata e faatatau i le Mesia. O le upu Mesia na oo mai o lona uiga o le Perofeta, Ositaulaga, ma le Tupu faauuina o le gafa o Tavita ma o le a afio mai e laveai Lona nuu. Na folafola atu iā Tavita e faapea, e ala mai i lana fanau, o le a faatuina ai e le Atua lenei Tupu, po o le Mesia, o lē o le a faatoilaloina malo uma o le lalolagi. O le upu Eleni e tutusa ma le Mesia o le Christos, lea ua maua ai le faalagiga o le Keriso.

Togiolaina, Togiola.O le faatinoga o le togiolaina sa o se galuega masani o le olaga anamua. O le togiola o le totogi lea o se aitalafu, toe faatau mai, po o le faatau mai o le saolotoga o se tasi. O na togiola e masani ona i ai se sootaga faaleaiga i le tagata na latou togiolaina. I se tulaga tele, o le faasaolotoina o tagata Isaraelu mai le faatagataotauaina i Aikupito, na faalolotoina ai le tāua faalelotu o le togiolaina mo tagata o le Atua. Na folafola mai e le Alii lava Ia e togiolaina Lona nuu mai le nofopologa i Aikupito. O Iesu Keriso o le Togiola, aua o Lana taulaga e faasaoloto ai i tatou mai le agasala ma le oti.

Faaolataga, Faaola.O le upu Eperu yāšaʿ i le Feagaiga Tuai e mafai ona faaliliuina o le “faaola,” “faaolataga,” “faasao,” “laveai,” po o le “fesoasoani,” E masani lava ona faasino i le Atua po o se tasi na Ia auina mai e aumai le laveaiga faaletino. O le tāua o le faaupuga e mafai ona vaaia i igoa o tagata iloga e pei o Elisaia (“O le Atua o le faaolataga”), Hosea (“faaolataga”), Iosua (“O Ieova o le faaolataga”), ma Isaia (“O Ieova o le faaolataga”).

Ositaulaga.Ina ua uma ona tuliesea Atamu ma Eva mai le Faatoaga o Etena, sa poloaiina i laua e le Alii e osi atu taulaga. O lenei tulafono na aofia ai le ofoina atu o ulumatua o a latou lafu, lea e faatusa i le taulaga a Iesu Keriso. Na poloaiina e le Alii Lona nuu e ola i le tulafono o le taulaga i le Feagaiga Tuai atoa. Na faaauauina lenei faiga seia oo i le maliu o Iesu Keriso, o lē o le taulaga tele ma mulimuli.