1 Tupu 12–1317–22

Ina ua mavae le maliu o Solomona, sa avea lona atalii o Reopoamo ma tupu i luga o Isaraelu uma. Sa faateteleina e Reopoamo avega a tagata, lea na taitai atu ai ituaiga e sefulu i matu e tetee faasaga ia te ia. Sa latou tofia Ierepoamo e fai ma o latou tupu ma faatuina le mea na ta’ua o le Malo i Matu o Isaraelu. Sa onosaia e le Malo i Matu mo le tusa ma le lua seneturi a o lei faatoilaloina e Asuria ma pueina le toatele o tagata. O nei ituaiga sa iu lava ina faataapeapeina i atunuu uma o le lalolagi. Talu mai lena taimi ua ta’ua i latou o ituaiga e sefulu o Isaraelu ua leiloloa.

O le Malo i Saute sa aofia ai le teritori e anaina e ituaiga o Iuta ma Peniamina. Sa ta’ua o le Malo o Iuta ma o lo latou laumua sa i Ierusalema. Na iu lenei malo ina ua faaumatia e Papelonia ia Ierusalema i le 586 TLM.

Sa popole Ierepoamo o le a malaga atu ona tagata i saute e tapuai i le malumalu i Ierusalema ma iu ai ina toe faatasia ma le Malo i Saute. Ina ia taofia lenei mea, sa ia faatonuina ai e fai ni tamai povi auro se lua, faatuina ni nofoaga fou mo tapuaiga, faalauiloa ni tausamaaga na sui ai [tausamaaga sa i ai] , ma tofia ana lava ositaulaga. Atonu na faamoemoe Ierepoamo o tamai povi auro e avea ma sui mo le atolaau o le feagaiga. E ui lava i faamoemoega o Ierepoamo, o ana amioga na taitai atu ai lona nuu i le liliuese.

Na auina mai e le Alii se perofeta mai ia Iuta e lapatai Ierepoamo e uiga i lona amioleaga ma le ifo i tupua. E ui i le molimauina o faailoga faavavega o le mana o le Alii, sa le’i salamo Ierepoamo ma faaauau pea ona faalauiloa atu le ifo i tupua.

E itiiti se mea na iloa e uiga i le fafine ua oti lana tane a o lei fetaiai ma Elia. Sa nofo o ia i Sarefata, o se nuu o Filipo lea sa tapuai ai tagata ia Paala ma isi atua pepelo. E ui lava sa le o ia o se tagata Isaraelu, ae sa ia faatinoina le faatuatua tele ia Ieova ma Lana perofeta o Elia. I le taimi o Lana galuega i le olaga nei, sa faaaoga ai e le Faaola le faataitaiga a le fafine ua oti lana tane e tausalaina ai Lona lava nuu ona o lo latou le talitonu ia te Ia.

Na aoao mai Elder Lynn G. Robbins, o le Fitugafulu o le Pulega Aoao ua malolo:

“O se luutaga o se meaai o le a matuai laitiiti lava, atonu e lava ai na o le tasi se tufaaga, lea atonu na tulaga ese ai le tali a Elia … : ‘Ona fai atu lea o Elia ia te ia, Aua e te fefe; alu ia ina e faia le mea na e fai mai ai: a emuamuaona e fai se potoi areto itiiti ma’u’ [1 Tupu 17:13; faaopoopo le faamamafa]. …

“Na malamalama Elia i le aoaoga faavae, o faamanuiaga e oo mai pe a uma ona tofotofoina lo tatou faatuatua [tagai Eteru 12:6; Mataupu Faavae ma Feagaiga 132:5]. Sa lei manatu faapito o ia. I le avea ai ma auauna a le Alii, na i ai iina Elia e foai atu, ae le o le aveese.”

O le faaliliuga o le fesili a Elia i le Lomiga a King James o le Feagaiga Tuai ua faavae i luga o se faaupuga faaEperu lea atonu na faasino i se manulele e osooso i le va o lālā e lua. I le vaitaimi o Elia, e toatele tagata Isaraelu sa taumafai e tapuai i atua e tele faatasi ai ma Ieova. O le savali a Elia o se valaau mo tagata e tuu le femoumouai ae tuuto atoatoa atu ia Ieova.

Na aoao mai Elder D. Todd Christofferson:

“Ina ua o mai faatasi tagata, sa fai atu Elia ia i latou, ‘Pe tou te faaletonu i manatu e lua seia afea? [pe i nisi upu, ‘O afea ea tou te filifili tonu ai?’] afai o Ieova o le Atua ia, … mulimuli atu ia te ia; ae afai o Paala, … mulimuli atu ia te ia. A e le tali mai le nuu ia te ia i se upu.’ …

“O le asō atonu e faapea mai Elia:

• Pe o loo i ai le Atua, lo tatou Tama Faalelagi, pe leai, ae afai o loo i ai o Ia, tapuai atu ia te Ia.

• Pe o Iesu Keriso o le Alo o le Atua, le Togiola toetu o tagata uma, pe leai, ae afai o Ia lena, mulimuli atu ia te Ia.”

“O Paala sa o se atua o afā o sa Kanana, sa fesootai ma uila ma timuga.” Ae i le taimi o le tauvaga ma Elia, sa leai se afi na oo mai ina ua valaau atu faitaulaga a Paala i lo latou atua pepelo. Sa leai foi se malosi o faitaulaga a Paala e taofia ai Elia mai le faia o se lamala e ala i le tapunia o le lagi. I se faatusatusaga, na auina mai e Ieova le afi mai le lagi e faaumatia ai le taulaga ma le fatafaitaulaga, e ui lava ina sa susū pala uma i le vai, lea sa tau leai se mea i le taimi o le lamala. Sa matua iloagofie le mana o Ieova o lea, o i latou uma sa i ai sa pauu i le eleele ma tautino atu, “O Ieova, o le Atua ia; o Ieova, o le Atua ia.” Ina ia faaalia atili le mana o Ieova i elemene, sa fesoasoani ai lea o Elia e aumai se afā lea na faamutaina ai le lamala.

Ina ua uma ona lipoti atu e Aapo ia Iesepela le mea na tupu i le va o Elia ma faitaulaga a Paala, sa tauto Iesepela i se tautoga o le a ia fasiotia Elia i totonu o le 24 itula. Sa sola ese Elia mai le nuu o Isaraelu ma malaga i le tele o aso seia oo ina tau atu i le Mauga o Horepa, po o Sinai.

O le aafiaga o Elia i le Mauga o Horepa ma le Alii e matuai iloga le eseese i lana feiloaiga muamua ma faitaulaga a Paala, ina ua faaali mai e le Alii o Ia lava i se ala maoae tele. I Horepa, sa lei i ai Ieova i le matagi, afi, po o le mafuie ae nai lo lena, sa fetalai mai e ala i se “leo filemu ma le itiiti.”

Ua faamamafa mai e perofeta ma aposetolo o aso nei e faapea, e sili atu ona masani ona fesootai mai le Alii i Ana fanau i ni auala maaleale nai lo faaaliga maoae. Sa lapatai mai Peresitene Dallin H. Oaks: “E tatau ona tatou iloa e seāseā fetalai leotele mai le Alii. O Ana savali e toetoe lava o taimi uma e oo mai ai i se musumusu.” Sa aoao mai Peresitene Boyd K. Packer: “E le mafai ona maua e le Agaga lo tatou gauai atu e ala i le feei po o le luluina o i tatou i se lima mamafa. Ae e musumusu mai. E pa’i mai ma le malū lea afai tatou te pisi tele o le a lē mafai lava ona tatou lagonaina.”

Tagai “2 Tupu 2:12–13. O le a se mea taua e uiga i le pau ifo o le ofutele o Elia ia Elisaia?”

I le tele o aganuu anamua, sa talitonu tagata o le mana o se atua sa faatapulaaina i se atunuu patino, tulaga faafaafanua, po o se eria. Atonu na talitonu le au Suria o le mana o le Alii sa faatapulaaina i maupuepue ma mauga ona sa asiasi atu o Ia ia Isaraelu i Sinai. O lenei mea na faaosofia ai i latou e sii atu le taua i vanu ina ia mafai ai ona latou manumalo i le taua. E ui i le talitonuga o Suria, ua faamanino mai e tusitusiga paia o Ieova o le Atua “i luga o le lalolagi uma.”

O le tala o loo tusia i le 1 Tupu 22 o loo maua foi i le 2 Nofoaiga a Tupu 18. O le Faaliliuga a Iosefa Samita o le 2 Nofoaiga a Tupu 18:20–22 ua faamanino mai ai na maua e Ieova se agaga pepelo i perofeta a Aapo mai lo o le tuu o se agaga pepelo ia i latou. Sa faatauanauina e perofeta pepelo a Aapo ia Aapo e o e tau ma Suria e ui lava i le valoaga a Mikaia o le a faatoilaloina Isaraelu ma o le a oti ai Aapo i le taua. Sa alu Aapo i le taua i se taufaasese ae sa fasiotia pea.

• D. Todd Christofferson, “O Le Mana o Faamauga,” Liahona, Nov. 2023, 19–22

• Jeffrey R. Holland, “A Handful of Meal and a Little Oil,” Ensign, May 1996, 29–31

• Carol F. McConkie, “Ola e Tusa ma Upu a Perofeta,” Liahona, Nov. 2014, 77–79

• D. Todd Christofferson, “Tumau ma Mausali i le Faatuatua o Keriso,” Liahona, Nov. 2018, 30–33

• Jorge F. Zeballos, “Aua Nei o Tatou Toilalo e Lagona,” Liahona, Iulai 2018, 59–61