Esoto 7–13

Tagai i le “Esoto 4:21. Pe na faamaaa e le Atua le loto o Farao?”

Ina ua faatoa valaauina e le Alii ia Mose e laveai le fanauga a Isaraelu mai Aikupito, sa Ia faamalamalama atu o le a le faatagaina e Farao le fanauga a Isaraelu e o sei loga “o le lima malosi.” Ona folafola mai lea e le Alii, “A ou te faaoo atu lo’u lima ma ou taia Aikupito i o’u vavega uma lava ou te faia i ai, mulimuli ane na te tuuina atu outou e o.”

Na fetalai le Alii, e ala mai i mala o le a Ia auina mai, o le a “iloa ai e [Farao ma tagata Aikupito] o A’u lava o Ieova” ma “e leai lava se tasi e tusa ma a’u i le lalolagi uma lava.” Na faaalia manino mai i mala e sili atu le malosi o Ieova nai lo o atua o Aikupito, e aofia ai Farao, o lē na vaai i ai tagata Aikupito o se atua.

O se lisi lenei o mala o loo faamatalaina i le Esoto 7–11:

1. Na liua le vai i le toto (tagai i le Esoto 7:19–25)

2. Rane (tagai i le Esoto 8:5–15)

3. ’Utu (tagai i le Esoto 8:16–19)

4. (Lago] (tagai i le Esoto 8:20–24, 29–32)

5. Pepē povi (tagai i le Esoto 9:1–7)

6. Ma’i fulafula (tagai i le Esoto 9:8–12)

7. Uato’a ma le afi mai le lagi (tagai i le Esoto 9:22–35)

8. Sē akerise (tagai i le Esoto 10:12–20)

9. Pouliuli (tagai i le Esoto 10:21–27)

10. Oti o ulumatua uma (tagai i le Esoto 11:4–10)

Na saunoa mai Peresitene Dallin H. Oaks: “O le a e manatua o faataulāitu i le maota o Farao na faaluaina nisi o vavega na faia e Mose e ala i le mana o le Atua [tagai i le Esoto 7–8]. Atonu o nei faataulāitu o auauna a le tiapolo, na fa’aaogaina lona mana, ae ou te manatu atonu o i latou sa na o ni tagata tomai faapitoa i togafiti faataulaitu na latou fa’aaogaina e faamalosia ai lo latou tulaga i le maota o Farao.”

E ui ina sa mafai e taulaitu o Aikupito ona faia nisi o faata’ita’iga, ae sa le mafai lava ona latou taofia pe faatoilalo mala sa auina atu e le Alii. O le mea moni, o a latou faata’ita’iga o mala muamua e lua, atonu sa atili ai ona leaga le tulaga mo tagata o Aikupito. O le eseesega i le va o le mana o le perisitua a le Alii lea na faaaoga e Mose ma faata’ita’iga sa faia e taulaitu o Aikupito, na faapupula mai ai e silisili ese le mana o le Atua i lo isi ituaga mana uma.

O le mea moni e faapea, na talosaga atu Farao iā Mose ma Arona—nai lo o ana faataulāitu—ina ia faamuta le mala o rane, ua ta’u mai ai ua amata ona iloa e Farao le mana o Ieova. Na tali atu Mose i le talosaga a Farao e ala i le fesili atu ia Farao po o afea e manao ai e valaau atu Mose i le Alii e faamuta le mala. O le faatagaina o Farao e filifili le taimi e faamuta ai le mala, atonu sa faamanino atu e Mose o le aveesea o mala sa le ala i le tupufua ae ala i le mana o le Atua.

O le mala lona sefulu na faamata’uina ai le oti o ulumatua uma ma manu i Aikupito. Ae peitai, na saunia e le Alii se ala mo le fanauga a Isaraelu e sao ai mai lenei mala. Sa Ia faatonuina i latou e auai i se talisuaga faapitoa a o pasi ae le mala i o latou luga—o le tausamiga o le Paseka. O faatonuga a le Alii na aofia ai le tele o faatusa taua e faasino atu ia te Ia, e aofia ai mea nei.

O le toto o le tamai mamoe i le faalava ma pou o le faitotoa (Esoto 12:6–7, 12–13)

Na aoao mai Elder Gerrit W. Gong:

“O le mala mulimuli na faamatauina ai i le fasiotia o ulumatua i le laueleele ae le o le aiga o Isaraelu pe afai—e tuu e na aiga le toto o se tamai mamoe ulumatua e lē pona i luga o le faalava o o latou faitotoa.

“Na laaloa le agelu o le faafanoga i fale sa faailoga i le toto faatusatusa o le tamai mamoe. O lena laaloa, po o le sopo loa, e faatusa i le faatoilaloina moni e Iesu Keriso o le oti. O le mea moni, o le toto togiola o le Tamai Mamoe a le Atua ua tuuina atu ai i le Leoleo Mamoe Lelei le mana e faapotopoto ai Lona nuu i nofoaga uma ma tulaga uma i le saogalemu o Lana lafu i itu uma o le veli.”

Na poloaiina e le Alii ina ia faapaiaina atalii ulumatua o Isaraelu ia te Ia ma ia ofoina atu a latou manu ulumatua ia te Ia e fai ma taulaga. O lenei poloaiga sa faatatau i Lona faasaoina o fanau ulumatua ma manu a Isaraelu mai le mala mulimuli. O le laveaiina ai o ulumatua o e faamaoni mai le oti, sa tautino mai ai e le Alii o i latou e a Ia.

O le poloaiga ina ia faapaia atalii ulumatua i le Alii e mafai ona faamanatu mai ai ia i tatou ia Iesu Keriso, o le ulumatua lea o fanau agaga uma a le Tama Faalelagi. I le taimi o Lana galuega i le olaga nei, sa tautino mai ai e le Faaola Lona tuuto i le finagalo o le Tama: “Ou te lei alu ifo mai le lagi e fai lo’u lava loto, a o le finagalo o le ua auina mai a’u.”

Na faatonuina e Mose le fanauga a Isaraelu ina ia manatua le aso na aumaia ese ai i latou mai Aikupito. Ina ia faia lenei mea, sa tatau ona latou toe faia le tausamiga o le Paseka i tausaga taitasi i le faamanatuina o lo latou lavea’iga. Sa mulimuli ma le faamaoni le fanauga a Isaraelu i lenei poloaiga, faatasi ai ma nisi o vala o le faamanatuina o le Paseka na suia i le aluga o taimi.

I le afiafi a o loma le faasatauroina o Iesu Keriso, sa latou tausasami faatasi ai ma Ona soo i se tausamiga o le Paseka. I le faaiuga o lea tausamiga, sa folasia atu ai e Iesu le sauniga ua tatou aloaia nei o le faamanatuga, lea na Ia ta’u atu ai i Ona soo ia faia pea lava pea ma faamanatuga o Ia. O le aso na sosoo ai, i le faatusa o le tamai mamoe lea na ositaulagaina o se vaega o le Paseka, na ositaulagaina ai le Tamai Mamoe a le Atua i luga o le satauro mo agasala a le lalolagi. O lana taulaga na faamutaina ai le manaomia o taulaga i manu.

Ina ua mavae le faasatauroga o le Faaola, sa amata ona potopoto Ona soo i le uluai aso o le vaiaso e taumamafa i le areto ma le uaina e manatua ai o Ia. Na faamalamalama mai e Peresitene Boyd K. Packer e faapea, ina ua mavae le maliu o Iesu Keriso, “o le a faamanatuina e faavavau le Paseka o le faamanatuga.”

• Howard W. Hunter, “Christ, Our Passover,” Ensign, May 1985, 17–19

• “The Passover Supper,” Ensign, Apr. 2014, 74–75

• Jeffrey R. Holland, “Faauta i le Tamai Mamoe a le Atua,” Liahona, Me 2019, 44–46

• “As Bread is Broken,” Hymns—For Home and Church