Kenese 42–50

I le Kenese 42–45, sa tofotofoina ai e Iosefa ona uso i le tele o taimi a o lei faailoa atu o ia. O le tele o nei tofotofoga na taulai atu i le taulealea o Peniamina, o lē na avea ma atalii pele o Iakopo ina ua faatauina atu Iosefa e fai ma pologa. Sa foliga mai sa tuu atu e Iosefa i ona uso ni avanoa e faamaonia ai ua latou suia ma o le a le faalataina Peniamina e pei ona latou faalataina o ia.

I lenei tala atoa, ua tatou vaaia ai faailoga ua suia moni lava uso o Iosefa. Na faaalia e Reupena le faanoanoa salamo mo le faatauina atu o Iosefa e fai ma pologa. Ina ua tuuaia sese Peniamina i le gaoi, sa ofo atu Iuta e ave le faasalaga a Peniamina nai lo le faatagaina o Peniamina e taofia i Aikupito o se auauna po o se pologa. Ma sa filimaoti Iuta ma isi uso e puipui Peniamina ina ia faasaoina lo latou tama mai le mafatia o le maliu o se isi atalii.

O se vaega o le suega a Iosefa mo ona uso na aofia ai le tuuina o lana ipu ario i totonu o le taga a Peniamina. Sa faamatalaina le ipu o le ipu “e iite ai [Iosefa].” O itega o le faaaogā lea o metotia faataulaitu e taumafai ai e valoia mea e tutupu i le lumanai. O itega e masani lava ona tausalaina i tusitusiga paia.

Ae peitai, o loo ta’ua foi i tusitusiga paia ni faataitaiga o tagata taitoatasi o loo faaaogaina ma le faamaoni ia meafaigaluega e fesoasoani ai ia i latou ia iloa pe maua le upumoni mai le lagi. O mea faitino e pei o le Urima ma le Tumema, maa talifaaaliga, tootoo, ma le Liahona ua faaaogaina mo faamoemoega amiotonu.

E lē o lava ni faamatalaga o tuuina mai e le tala i le Kenese e iloa ai le auala na faaaogā ai e Iosefa lana ipu ario. E ui atonu na faaaoga le ipu mo faamoemoega amiotonu, ae atonu foi na pau le mea na fai mai ai Iosefa sa ia faaaogaina ai le ipu mo itega o se vaega o lana togafiti i le tuuaia o Peniamina i le gaoiga o se mea faitino e sili ona taua.

Sa i ai se taimi na ita ai Iuta ia Iosefa ona o le avea ma atalii alofagia, ma o ia lea na fautuaina e faatau atu Iosefa e avea ma pologa. Peita’i, i le tele o tausaga mulimuli ane i Aikupito, na ofo atu ai Iuta e suitulaga iā Peniamina o se auauna po o se pologa. O gaoioiga a Iuta e mafai ona faamanatu mai ai ia i tatou Iesu Keriso, o lē na tupuga mai iā Iuta. E pei ona ofo atu Iuta e ave le faasalaga a Peniamina ina ia mafai ai e Peniamina ona toe foi atu i lona tama, sa faapena foi ona ave e Iesu Keriso a tatou agasala i Ona lava luga ina ia mafai ona tatou toe foi atu i lo tatou Tama Faalelagi.

Na ta’u atu e Iosefa i ona uso e aua le faanoanoa pe feita ia i latou lava ona o le faatauina atu o ia e fai ma pologa, ma faamatala atu na auina mai o ia e le Atua i Aikupito “e fai ma faaola.” E lē tatau ona manatu sesē i upu a Iosefa e faapea, na faapogaia e le Atua uso o Iosefa e faatau atu o ia e fai ma pologa. Nai lo lena, sa faailoa e Iosefa le silafia aoao o le Atua ma Lona gafatia e aumaia ai le lelei mai tulaga faigata. Na faamalamalama mai e Elder Neal A. Maxwell, “O faamoemoega leaga o uso o Iosefa sa gaugauina i fuafuaga a le Atua, o lē e silafia le amataga mai le iuga ma mea uma o i le va.”

Na folafola atu e le Alii ia Iakopo o le a faamoeiini e Iosefa mata o Iakopo pe a maliu. I le aganuu faa-Eperu, o le tiutetauave o le tauaiga e sili ona vavalalata ma sili ona pele, le faamoeiini lea o mata o se tagata ua maliu ma tuu atu iā i latou i se sogi faamavae.

A o lei maliu o ia, sa manao Iakopo e atofa atu tiutetauave o le ulumatua. E masani lava, o le atalii ulumatua na mauaina le tofi o le ulumatua. Ae peitai, o le ulumatua a Iakopo, o Reupena, na aveesea lona tofi o le ulumatua ona o le agasala, lea na oo ai ina maua e Iosefa le tofi o le ulumatua. I le avea ai ma atalii ulumatua, sa tatau ai ia Iosefa ona maua i se vaega faaluaina o le tofi o lona tamā. O le vaega faaluaina a Iosefa na faasoaina i ona atalii o Efaraima ma Manase. Ona o le vaetamaina o i laua e Iakopo, na faitauina ai nei atalii o Iosefa o le fanau a Isaraelu, ma na avea fanau a atalii taitoatasi o se ituaiga mavaevae o Isaraelu.

Ina ua uma ona vaetamaina Manase ma Efaraima, sa manao Iakopo e faamanuia i la’ua. Sa tuu e Iakopo lona lima taumatau i luga o le ulu o le uso laitiiti, o Efaraima, e faailoa mai ai o le a iu lava ina maua e Efaraima le tofi o le ulumatua a Iosefa. E ui e le o faamalamalama mai e tusitusiga paia pe aisea na filifilia ai Efaraima nai lo lona uso matua, o Manase, ae o le tali atu a Iakopo i le taumafaiga a Iosefa e faasalavei na faamanino mai ai o le finagalo lea o le Alii.

I le avea ai ma se vaega o tiutetauave o le tofi o le ulumatua o Efaraima, na tuuina atu ai iā te ia ma e tupuga mai ia te ia ni tiutetauave faaletaitai faatasi ai ma le ituaiga o Iuta. I aso e gata ai, o i latou o le ituaiga o Efaraima ua i ai le avanoa ma le tiutetauave “e tauave ai le perisitua, avatu le savali o le talalelei toefuataiina i le lalolagi, ma sii i luga se tagavai e faapotopoto ai Isaraelu ua faataapeapeina.”

I le faaiuga o lona soifuaga, sa faamanuia ai e Iakopo ona atalii taitoatasi. I nei faamanuiaga, na tuuina atu ai e Iakopo ni lapataiga, faamatalaina taunuuga o nisi o amioga ua tuanai a ona atalii, ma valoia mea e tutupu i le lumanai. O faamanuiaga aupito mataina ma auiliili na tuuina atu ia Iuta ma Iosefa.

O le “tootoo” o loo ta’ua i le fuaiupu e 10 o lona uiga o le aia tatau po o le pule a e tupuga mai ia Iuta e pule ai. O tupu o Isaraelu, e aofia ai Tavita ma Solomona, o e na tupuga mai ia Iuta, e pei foi o Iesu Keriso, le “Tupu o tupu.”

Na valoia foi e Iakopo o le a tumau pea le malo o Iuta “se’ia maliu mai Sailo.” I le gagana Eperu, o le igoa Sailo e mafai ona faauigaina “O Ia o lē e ana” ma e faatatau ia Iesu Keriso, o se e tupuga mai ia Iuta. Na aoao mai Peresitene Russell M. Nelson: “O le ituaiga o Iuta na tuuina i ai le tiutetauave e saunia le lalolagi mo le uluai afio mai o le Alii. Mai lena ituaiga, na valaauina ai Maria e avea ma tina o le Alo o le Atua.”

O le valoaga e faapea o lala o Iosefa “[o le a] sosolo ona la i luga i le pa” e mafai ona faasino i le faataapeapeina o e tupuga mai ia Iosefa i le lalolagi atoa. O Liae ma lona aiga, o e na malaga mai Ierusalema agai atu i le atu Amerika, sa faia se matafaioi taua i le faataunuuga o lenei valoaga. Ua aoao mai le Tusi a Mamona o le aiga o Liae o le gafa o le atalii o Iosefa o Manase.

Na aoao mai Peresitene Ezra Taft Benson: “Matou te molimau atu i le lalolagi ua ia i matou le talafaamaumau a Iosefa—o le Tusi a Mamona lea. E pei o Iuta, sa i ai se nuu o Iosefa—o sa Nifae ma sa Lamana. E pei o Iuta, sa i ai se laueleele o Iosefa—o le atu Amerika. E pei o Iuta, sa i ai perofeta a Iosefa, ma sa maua foi e ana fanau se asiasiga mai ia Iesu Keriso, o le Alii toetu lava.”

Na aoao mai Peresitene Russell M. Nelson:

“I [le Tusi Paia], o le Kenese 50 e faaiu i le fuaiupu e 26, lea o loo tusifaamaumauina ai le maliu o Iosefa. I le Faaliliuga a Iosefa Samita (FIS), o lena mataupu e le gata ina faaopoopo ai faamatalaga taua i fuaiupu e 24 e oo i le 26 ae ua tuuina mai ai fuaiupu faaopoopo e sefululua e faatamaoaiga ai lo tatou malamalama i le sootaga a Iosefa (tagai i le FIS, Kenese 50:27–38). O na faaopoopoga e aofia ai malamalamaaga nei, lea ou te toe faaupuina atu:

1. O se lala amiotonu o le a tulai mai mulimuli ane mai sulugatiti o Iosefa (tagai i le FIS, Kenese 50:24).

2. O le a faataapeapeina Isaraelu. O le a taia ese se lala ma ave atu i se nuu mamao (tagai i le FIS, Kenese 50:25).

3. O le a faatuina ae se tagatavaai filifilia mai sulugatiti o Iosefa e fai galuega mo le fua o ona sulugatiti (tagai i le FIS, Kenese 50:26–29).

4. O tusitusiga mai le fua o sulugatiti o Iosefa o le a tutupu faatasi ma tusitusiga mai le fua o sulugatiti o Iuta e aumai ai le malamalama e uiga i o latou tamā ma feagaiga tumau-faavavau. O lena malamalama o le a oo mai i aso e gata ai (tagai i le FIS, Kenese 50:30–32).

5. O le tagatavaai folafolaina o le a faaigoa ia Iosefa, e tusa ma le igoa o lona tamā, ma o le a faapei o ia o Iosefa, le atalii o Iakopo, e aumaia le faaolataga i fanau a le Alii (tagai i le FIS, Kenese 50:33).

“O nei faaopoopoga o ni faataitaiga lelei ia o upumoni ‘manino ma taua’ ua toefuatai mai e ala mai i le Perofeta o Iosefa Samita (tagai i le 1 Nifae 13:40).”

O le Faaliliuga a Iosefa Samita o le Kenese 50:26–33 o loo tusifaamaumauina ai le valoaga a Iosefa e uiga i se “tagatavaai filifilia,” lea e faatatau i le Perofeta o Iosefa Samita. O vaega o loo i lalo atonu o ni faataunuuga nei o nisi o valoaga a Iosefa e uiga ia Iosefa Samita.

Na valoia e Iosefa o Aikupito ni seti se lua o tusitusiga o le a “tutupu faatasi” i aso e gata ai: o tusitusiga a ana lava tupuaga (o le Tusi a Mamona) ma tusitusiga a e tupuga mai ia Iuta (o le Tusi Paia). Na ta’ua e Peresitene Boyd K. Packer e faapea, i o tatou aso, o le Tusi Paia ma le Tusi a Mamona ua “lalagaina faatasi i se auala a o e suesue i le tasi e te tosina atu i le isi; a e aoao mai le tasi, e faamalamalamaina oe e le isi. Ioe ua tasi lava i laua i o tatou lima.”

• Kristin M. Yee, “Matagofie e Sui A’i Le Lefulefu: O Le Ala Faamalolo o le Faamagaloga,” Liahona, Nov. 2022, 36–38

• Jeffrey R. Holland, “O le Galuega o le Faaleleiga,” Liahona, Nov. 2018, 77–79

• Autu ma Fesili, “Faamanuiaga Faapeteriaka,” Gospel Library

• Randall K. Bennett, “O Lou Faamanuiaga Faapeteriaka—Taitaiga Musuia mai le Tama Faalelagi,” Liahona, Me 2023, 42-43

• Kazuhiko Yamashita, “O Le Taimi e Maua ai Lou Faamanuiaga Faapeteriaka,” Liahona, Me 2023, 88–90

• Craig C. Christensen, “O Le A Ou Faatu Mai Se Tagatavaai Filifilia,” Liahona, Nov. 2016, 27–30

• Viia Le Na Fetaiai ma Ieova,” Viiga, nu. 15