Esoto 1–6

O le tusi o Esoto o se tala i le tuua ai e Isaraelu o le nofopologa i Aikupito ma a latou tapenaga e fai mo latou tofi le laueleele folafolaina o le nuu o le feagaiga a le Alii. O le upu exodus o lona uiga o le “ulufafo” po o le “tuua.” I lenei tusi tatou te molimauina ai le mana maoae o Ieova ma Lona alofa faalefeagaiga. O loo tuuina mai foi i le Esoto ia faamatalaga auiliili o le tausiga o Mose ma le amataga o lana galuega o se perofeta maoae a le Alii.

O mea na tutupu o loo tusifaamaumauina i le Esoto—e pei o le vaeluaina e le Alii o le Sami Ulaula, tuuina mai o le manai i le vao, ma le tuuina mai o Tulafono e Sefulu—na avea ma faavae i le faasinomaga o Isaraelu o se nuu. Na faasino atu e Iesu Keriso ma Ana perofeta i nei mea faavavega na tutupu e aoao atu ai le tele o mataupu faavae o le talalelei. O le sosola ese o Isaraelu mai le nofopologa ma la latou malaga i le vao e mafai ona faatusa i la tatou malaga i se lalolagi pa’ū ma toe foi atu ai i le afioaga o le Atua.

Ua vaevaeina le tusi o Esoto i ni vaega tetele se lua. Omataupu 1–18 o loo faamatala mai ai le valaauga o Mose ma le laveaiga o Isaraelu mai le nofopologa. Omataupu e 19–40 o loo faamatala mai ai le feagaiga a le Alii ma Isaraelu ma le tuuina mai o Lana tulafono i le Mauga o Sinai, faatasi ai ma le fausiaina o le tapeneko.

E talitonu le toatele o tagata atamamai i le taimi o Iosefa, o Aikupito i matu sa pulea e Hyksos e lē o ni tagata Aikupito. Na iu lava ina faatoilaloina e se tupuaga fou nei taitai ese, lea e ono faamalamalama ai le faamatalaga e faapea “ona nofo mai lea i le malo o Aikupito o le tupu fou.” Sa amata ona faaeteete le Farao fou i le fanauga a Isaraelu mo ni mafuaaga eseese, e aofia ai le faatoateleina o lo latou faitau aofai, o le gafatia mo i latou ona aufaatasi ma fili o Aikupito, ma atonu o lo latou sootaga ma taitai Hyksos sa i ai muamua.

Na tetee le faatosaga Eperu o Sepela ma Pu’a i le faatonuga a Farao e fasioti atalii pepe o Eperu ona sa laua “matata’u i le Atua.” O le mata’u i le Atua o lona uiga o le i ai o le migao ma le faaaloalo loloto mo Ia.

Na aoao mai Elder David A. Bednar: “E le pei la o le mata’u faalelalolagi lea e tupu ai le te’i ma le atuatuvale, o le mata’u i le Atua o se puna lea o le filemu, faamautinoaga, ma le talitonuga.” Sa ia faamalamalama atili e faapea, o le mata’u i le Atua “e aofia ai se lagona loloto o le migao, faaaloalo, ma le maofa mo le Alii o Iesu Keriso … , usiusitai i Ana poloaiga … , ma le tulimatai atu i le Faamasinoga Mulimuli ma le faamasinotonu i Lona aao.”

O Mose o se tasi o perofeta silisili ua iloa e le lalolagi. O lona soifuaga ma lana misiona o le autu lea o valoaga a Iosefa o Aikupito i seneturi a o lei fanau mai o ia. E tele mea e tutusa ai le soifuaga o Mose ma le soifuaga ma le misiona a Iesu Keriso, o le sa ta’ua “o se perofeta … e faapei o” Mose. Ina ua valaauina e le Alii ia Mose e avea o se perofeta, sa Ia ta’u atu ia te ia, “Ua tusa oe ma la’u Toatasi na Fanaua.”

O le siata lenei o loo lisi ai nisi o mea e talitutusa ai Mose ma Iesu Keriso.

E utiuti ni faamatalaga o loo tuuina mai i le Esoto e uiga i le olaga o Mose i Aikupito ina ua uma ona vaetamaina o ia e le afafine o Farao. Ae ui i lea, o le tusi o Galuega o loo aumaia ai ni malamalamaaga faaopoopo e uiga i uluai tausaga o Mose. Sa faamatala mai e Setefano e faapea, “Na aoaoina foi Mose i le poto uma lava o Aikupito, ua malosi i ana upu ma ana mea na faia.” Ma na fautua mai le tusitala o talafaasolopito Iutaia anamua o Josephus e faapea, o Mose sa o se perenise a’oa’oina lelei ma o se taitai ’au o le militeli sa tautua i Aikupito.

O aoaoga a Setefano ua ta’u mai ai na iloa e Mose o ia lea o le a laveaia tagata Eperu mai Aikupito. Sa ia aoao mai ina ua “fasefulu tausaga o Mose, sa oo mai i lona loto e asiasi atu i ona uso, le fanauga a Isaraelu. … Aua sa manatu o ia o le a malamalama ona uso i le auala o le a laveaiina ai i latou e le Atua i lona aao; ae latou te le’i malamalama.”

O le tala e uiga i le fasiga e Mose o se pule o galuega a Aikupito e puupuu ma e tele ni auiliiliga sa lei i ai. O le upu Eperu ua faaliliuina o le “fasi” i le fuaiupu e 11 ua faaliliuina o le “fasioti” i le fuaiupu e 12 ma e faamatalaina ai le faatinoga sauā a fitafita. O lona uiga sa lamatia moni lava le ola o le pologa Eperu. I se isi faaupuga, na fasiotia e Mose le tagata Aikupito ina ia faasaoina ai le ola o le tagata Eperu. O gaoioiga a Mose a o le’i faia ma le uma ai ona faia o le mea na tupu, ua faaalia ai na ia iloa o le a lē taliaina e tagata Aikupito le mea na ia faia. Peitai, talu ai sa ia faia o se puipuiga, sa le’i tausalaina ai Mose i le fasioti tagata faamoemoeina.

O Ietero (e lauiloa foi ia Reuelu) sa o le ositaulaga sili o Mitiana, o se itu i sasa’e o Aikupito. I le avea ai ma se tagata Mitiana, o Ietero o se e tupuga mai ia Aperaamo ma Kitura e ala mai i lo la atalii o Mitiana. Na faaipoipo Mose iā Sepora, o se tasi o afafine o Ietero. Mai tusitusiga paia o aso e gata ai, ua tatou aoao ai na maua e Ietero le perisitua e ala i le gafa o Aperaamo ma sa ia faaee atu le perisitua i luga o Mose.

Na faia e le Alii ni folafolaga ofoofogia e ala i Ana feagaiga ma Aperaamo, Isaako, ma Iakopo. Faatasi ai ma nei folafolaga o le a tupuga mai tupu ma atunuu mai ia Aperaamo, o le a faamanuiaina atunuu uma o le lalolagi e ala i ana fanau, ma o le a maua e Aperaamo ma e tupuga mai ia te ia le laueleele o Kanana “mo latou e faavavau.” Na folafola mai foi e le Alii ia Aperaamo e ui lava o le a i ai se aso o le a faapologaina ai ana fanau “i le nuu ese” ae o le a iu lava ina latou “o mai ai ma le oloa tele.”

Ina ua mavae le tele o senituri o le faapologaina i Aikupito, atonu na faigofie i le fanauga a Isaraelu ona manatu ua faagaloina i latou e le Atua. Ae ua faamanatu mai e le Esoto 2:24 ia i tatou, “ua manatua foi e le Atua lana feagaiga na na faia ma Aperaamo, ma Isaako, atoa ma Iakopo.” O le a faamamaluina lava e le Alii ia Ana feagaiga ma Lona nuu. Na aoao mai Peresitene Russell M. Nelson: “O le taimi lava tatou te osia ai se feagaiga ma le Atua, o le a sili atu ona vavalalata lo tatou sootaga ma Ia nai lo le taimi a o lei faia a tatou feagaiga. O lenei ua fusia faatasi i tatou. Ona o la tatou feagaiga ma le Atua, o le a lē vaivai ai lava o Ia i Ana taumafaiga e fesoasoani ia i tatou, ma o le a tatou le faaumaina lava Lona onosai alofa mutimutivale ia i tatou. Ua tofu i tatou ma se nofoaga faapitoa i le fatu o le Atua.”

O le feiloaiga a Mose ma le Alii i le laau talatala na mu na tupu i Horepa, “le mauga o le Atua.” O Horepa e ta’ua foi o le Mauga o Sinai ma o le nofoaga lea o le a mulimuli ane maua ai e Mose le tulafono ma Tulafono e Sefulu mai le Alii.

Na valaau muamua atu le Atua ia Mose mai se laau talatala i luga o le Mauga o Sinai, “o loo mu lava le laau talatala i le afi, ae lei faaumatia le laau talatala.” O le uluai taimi lenei na tusifaamaumauina o le faaali mai o le Alii ia Mose. Mulimuli ane, a o lei taitaia ese le fanauga a Isaraelu mai Aikupito, sa toe talanoa Mose ma le Alii—o le taimi lenei “faafesagai.” I lena fegalegaleaiga, “sa i luga o Mose le mamalu o le Atua; o lea na mafai ai e Mose ona gafataulimaina lona mamalu.”

I tusitusiga paia atoa, o faamatalaga o le i ai [afioaga] o le Atua e masani ona faamamafaina ai le susulu, mamalu, po o le afi. Ina ua faaali atu le Alii ia Mose i se isi taimi i luga i Sinai, o Ona foliga vaaia sa “pei o le afi maamaai.” Sa taialaina le fanauga a Isaraelu i le i ai o le Alii i se “afi faaniutu” i le taimi o la latou malaga i le vao. I se tasi o tala o le Uluai Faaaliga, na faamatalaina ai e le Perofeta o Iosefa Samita se afi faaniutu lea sa lei susunuina ai laau na latalata ane. Na faamatalaina e Liae se afi faaniutu i luga o se papa. Sa faaaoga foi e isi perofeta se gagana talitutusa faapena e faamatala ai le mamalu o le Atua.

O le upu Eperu mo le Atua o Isaraelu o le YHWH, o se upu e masani ona faaliliuina o Ieova i le gagana Peretania. O lenei igoa e faavae i le veape “ia pei” ma e mafai ona faauigaina “O Ia,” po o, i le tagata muamua, “O a’u.” O le natura e faavavau o Iesu Keriso o loo atagia mai i lenei suafa. Na aoao mai Elder D. Todd Christofferson: “O Ia o Ieova ma le Mesia, o Ia o le O A’u Silisili, o le Atua o soifua lava Ia. O soifua lava Ia ma o le a faavavau pea.

O le faama’aaina o le loto o Farao o se autu tupu soo i uluai mataupu o le Esoto. O le tele o nei fuaitau o loo ta’ua ai na faama’aa e le Alii le loto o Farao. Ae peitai, i le Faaliliuga a Iosefa Samita, o ia fuaitau taitasi ua toe faafouina e faapea na faama’aa e Farao lona lava loto. O nei toe iloiloga ua faamamafaina ai le faitalia patino o Farao i le tetee atu i le finagalo o le Atua.

O le tala i le taumafai o le Atua e fasioti Mose e faigata ona malamalama i ai, ona anotusi e le o i ai le tele o faamatalaga taua. Ua faailoa mai i le Faaliliuga a Iosefa Samita sa toasa le Alii ia Mose ona o le le peritomeina o lona atalii, ma o faatinoga a Sepora o le peritomeina o le tamaitiiti na faasaoina ai le ola o Mose.

O le anotala i le Esoto 6:3 ua fautua mai ai sa le’i iloa e Aperaamo, Isaako, ma Iakopo le suafa Ieova. Ae ui i lea, o lenei fautuaga e feteenai ma tala muamua o le Feagaiga Tuai lea o loo ta’u mai ai o le suafa o le Alii sa iloa e tagata anamua. O le Faaliliuga a Iosefa Samita ua toe faatulagaina ai le faasologa o upu i lenei fuaiupu e fai atu ai se fesili faafaatusa ma se tali lelei faalemanino nai lo le faia o se tautinoga: “Pe sa latou le’i iloa ea lo’u igoa?”

• Heather B. Moore, “O Tamaitai i le Soifuaga o Mose” (tusiga e na o le faafuainumera), Liahona, Mati 2022, Gospel Library

• Neil L. Andersen, “O Le Perofeta a le Atua,” Liahona, Me 2018, 24–27

• Willard Elieson ma Michael Magleby, “Lesona o Taitaiga mai ia Mose” (tusiga e na o le faafuainumera), Liahona, Ape. 2022, Gospel Library