Ruta; 1 Samuelu 1–7

O le tusi a Ruta o loo faamatala ai le talafaasolopito o le aiga o Naomi ma Elimeleka, o e sa nonofo i le taimi o faamasino. O se tasi lea o tusi e lua i le Feagaiga Tuai ua faaigoaina i se tamaitai. O loo faamamafa mai i le tusi le agaalofa ma le alofa na i ai ia Naomi ma lana tama teine faaletulafono o Ruta a o laua uia luitau o ni tamaitai ua oti a laua tane.

O se autu tutotonu i le tusi a Ruta o le togiola. O Ruta o se tagata fai mai, sa leai sana tama, ma o se fafine ua oti lana tane, lea na tuua ai o ia ma le mativa tele ma le leai o se mea e ola ai. E ui lava i ona tulaga, sa filifili o ia e mulimuli ia Ieova ma avea ma se vaega o Lona nuu o le feagaiga. Na iu lava ina toe faaipoipo Ruta, sa taliaina atoatoa o ia o se Isaraelu, ma sa faamanuiaina i se fanau. I le tuuina mai o lenei autu o le togiola, e taua le matau o Iesu Keriso, le Togiola o le lalolagi, o se e tupuga sa’o mai ia Ruta.

O le au Moapi o e na tupuga mai ia Lota ma lona afafine ulumatua. O sa Moapi sa masani ona fetauai ma Isaraelu i taua eseese. Sa latou tapuai ia Kimosa, o se atua atonu e i ai taimi e fesootai ai ma le faiga masani o le faataulagaina o tagata. O le laueleele o Moapi sa i le itu i sasae o le Sami Mate, i Ioritana i ona po nei.

Na poloaiina e le Alii i le tulafono a Mose e faapea, o i latou o e na umia fanua e le tatau ona seleseleina fua o faatoaga i pito o o latou fanua. O lenei mea na mafai ai e e matitiva ona selesele nei fua o faatoaga, ia mautinoa ai o le a i ai se mea latou te aai ai. Ina ua uma ona ao mai le seleselega, sa faatagaina foi e matitiva e ao mai aofaiga itiiti o fua o faatoaga sa misi pe na toulu i le au selesele. I ona po o le tusi paia, o le faatinoga o le aoina mai o saito po o isi fua na tuua e le au selesele sa ta’ua o le “aoina.”

Sa faaalia e Poasa le agalelei tele ia Ruta e ala i le faatonuina o lana aufaigaluega e tuua se aofaiga faaopoopo o saito mo ia e aoina. Ina ua toe foi atu Ruta ia Naomi, sa ia aumaia le tusa o se efa o karite—pe tusa ma le 23 lita pe tusa ma le 30 pauna (13.5 kg). Sa sili atu lenei mea nai lo le mea e masani ona faaputu mai e le toatele o ao fua o faatoaga i le aso.

O le fasifuaitau “tagata e sosoo ai” i le Lomiga a King James o le Feagaiga Tuai e sau mai le upu Eperu gō’el, o lona uiga o le “togiola.” I Isaraelu anamua, o se togiola sa faasino atu i se tauaiga vavalalata o le sa i ai le tiutetauave e laveai tagata o le aiga mai aitalafu sa le mafai ona latou totogiina e i latou lava. O lenei mea na aofia ai le faasaolotoina o tagata o le aiga mai le nofopologa po o le faatauina mai o fanua o le aiga lea atonu o le a aveesea ona o aitalafu e le totogia.

O le tusi a Ruta e tulaga ese lava lona faafesootaia o le togiola o le aiga ma le tulafono o le faaipoipo i le ava a le uso ua maliu. I lalo o le tulafono o le faaipoipo i le ava a le uso ua maliu, afai e maliu se tane ae leai se fanau, o le tiute o le uso o le tane po o se tauaiga alii e sili ona latalata i ai, e faaipoipo i le fafine ua oti lana tane. Ina ua ta’u atu e Naomi ia Ruta, “Ua tatou aiga ma ia [Poasa]o ia foi o so latou e i ai le tausi tama,” sa ia faailoa atu o Poasa o se tasi e mafai ona togiolaina i latou mai lo latou tulaga faigata. O le a faia e Poasa lenei mea e le gata i le faatauina mai o le fanua o Elimeleka ae faapea foi i le mulimuli i tu ma aga o le faaipoipo i le ava a le uso ua maliu, e faaipoipo ai ia Ruta.

E pei o Naomi ma Ruta, e le mafai ona tatou faasaoina i tatou lava ae e tatau ona faalagolago i lo tatou Togiola o Iesu Keriso, o le na “faatauina [i tatou] i lona lava toto.” Sa faamalamalama mai e Elder D. Todd Christofferson: “O se tasi o faalagiga aupito sili ona taua e faamatalaina ai Iesu Keriso o le Togiola. … O le upu togiola o lona uiga o le totogi faauma o se noataga po o se aitalafu. O le togiola e mafai foi ona faauigaina ia laveai pe faasaoloto e ala i le totogiina o se tau. … O nei uiga taitasi ua fautuaina mai ai vaega eseese o le Togiola sili na faataunuuina e Iesu Keriso e ala i Lana Togiola.” E ala i Lana taulaga togiola, ua totogi ai e Iesu Keriso a tatou aitalafu faaleagaga, laveai i tatou mai le agasala ma le oti, ma ofoina mai ia i tatou se tofi e faavavau.

A uma le seleselega, sa faapotopoto tagata faigaluega i luga o se fasi fanua lapotopoto ua ta’ua o le mea e sasa ai saito. O iinei na latou tuueseeseina ai fatu o saito mai pa’u saito ia e afifi ai—e ta’ua o le aputi. Sa masani ona faia lenei mea i le afiafi, lea e mafai ai e savili malolosi ona tafi ese le aputi. O le sasaga o le saito sa o se taimi o le faamanatuina, e faailoga ai le faaiuga o le vaitau o le totoina ma le seleselega. O le pule o le fanua e masani ona nofo i le fola e sasa ai le saito i le po atoa e puipui le seleselega mai tagata gaoi.

Ina ua iloa e Naomi le agalelei o Poasa ia Ruta ma iloa ai o ia e ono avea ma se togiola faamoemoeina, sa uunaia e Naomi ia Ruta e saili e faaipoipo ia te ia. I le mulimuli ai i faatonuga a Naomi, sa taoto ai Ruta i vae o Poasa a o moe o ia i le fola e sasa ai saito. O le Lomiga a King James o le Feagaiga Tuai o loo tusia ai le talosaga a Ruta ia Poasa e faapea, “Faaafu mai ia lou pito ofu i lau auauna fafine; aua o ia te oe le tausi tama.” O se faaliliuga e sili atu ona moni o le, “Faalautele mai lou apaau i luga ae o lau auauna fafine, ona o oe o se togiola.” I le faia o lenei talosaga, sa talosaga atu ai Ruta ia Poasa e faaipoipo ia te ia ina ia mafai ona ia aveina o ia i lalo o lana puipuiga ma tausi ia te ia.

O le tagata vavalalata o le aiga o Naomi na ioe muamua e laveai le fanua o Elimeleka, ae sa suia lona mafaufau ina ua ia iloa o le a faamoemoeina foi o ia e faaipoipo ia Ruta. Sa popole o ia o le faaaogaina o lana aia tatau o le togiola o le a “faaleaoga i [lona] tofi.” O lenei atugaluga ua ta’u mai ai sa lei manao o ia i le fanua na ia faatauina ina ia maua e atalii o Ruta i le lumanai nai lo tagata o lona lava aiga.

O le tusi o le 1 Samuelu o loo faamatala ai le galuega a le perofeta o Samuelu, le faamasino mulimuli o Isaraelu. I le vaitaimi o faamasino, e toatele tagata Isaraelu na faagaloina le Alii ae liliu atu i le ifo i tupua. O le tusi o le 1 Samuelu o loo faamatala ai taumafaiga a Samuelu e toefaatuina tapuaiga masani a Ieova. O loo faamatala ai foi le suiga faigata a Isaraelu mai faamasino i tupu. I lalo o le taitaiga a le Alii, na valaau ma faauuina ai e Samuelu ia Saulo e avea ma uluai tupu o Isaraelu ma Tavita e avea ma tupu o Isaraelu i le lumanai.

Sa faia e Hana se tautoga afai e faamanuia o ia e le Alii i se tama tane, o le a ia “foai atu lea o ia ia Ieova i aso uma o lona ola.” O lenei tautoga, faatasi ai ma lana folafolaga o le a le oo se tafi i le ulu o lana tama tane, ua ta’u mai ai sa tausia Samuelu o se Naseri ma vaetofia mo le auaunaga i le Atua. O Naseri o tagata e faia se tautoga faapitoa o le tuuto atu i le Atua mo se vaitaimi. I le taimi lea, sa folafola atu ai e Naseri e le otia o latou lauulu, e le inu uaina, pe pa’i atu i soo se mea ua mate.

O le fasifuaitau “atalii o Pelialo” o loo faaaogaina i le Lomiga a King James o le Feagaiga Tuai e faamatala ai tagata o e sa fouvale i aoaoga a le Alii ma tulaga faatonuina faaagafesootai. Sa tuuina atu i atalii o Eli lenei faailoga ona o a latou faatinoga agasala a o auauna atu o ni ositaulaga i le falefetafa’i. O a latou faatausuai na aofia ai le aveesea o aano o manu mai taulaga i manu ma le faia o amioga le mama ma fafine o e na o mai e tapuai i le falefetafa’i.

O le upu valavala e pei ona faaaogaina i le Lomiga a King James o le Feagaiga Tuai o lona uiga “e seāseā tupu.” Na aoao mai Peresitene Harold B. Lee e faapea, i lenei vaitau i le talafaasolopito o Isaraelu, “sa leai se perofeta i luga o le fogaeleele e mafai ai e le Alii ona faaali mai lona finagalo, pe ala i aafiaga patino, po o faaaliga.” O lenei taimi o le leai o se faaaliga na faamutaina ina ua fetalai atu le Alii ia Samuelu, o le na iu lava ina iloa e Isaraelu uma o se perofeta a le Alii.

O le atolaau o le feagaiga na faatusa i le afio ai o le Alii. Sa masani ona tuuina i le Paia o Paia i totonu o le falefetafa’i. I le taimi o lo latou manumalo ai i le nuu folafolaina, sa tauave ai e Isaraelu le atolaau faatasi ma i latou o se faatusa ma se faamanatu sa faatasi le Atua ma i latou.

Sa manatu toeaiina o Isaraelu o le a fesoasoani le atolaau ia i latou e manumalo ai i la latou taua e faasaga i Filisitia. O le fasifuaitau “ona faaolaina ai lea o i tatou” i le fuaiupu e 3 ua ta’u mai ai atonu na tuu e Isaraelu lo latou faatuatua i le atolaau nai lo le Alii. O lo latou amioleaga na taofia ai i latou mai le mauaina o le malosi ma le puipuiga a le Alii. Ona sa lei faatasi le Alii ma i latou, o lea na faatoilaloina ai Isaraelu e Filisitia, na fasiotia ai atalii o Eli, ma faoa ai le atolaau. Ina ua iloa e Eli le maliliu o ona atalii ma le faoa o le atolaau, sa matuai lofituina o ia i le faavauvau o lea na pau ai mai lona nofoa ma maliu ai. O nei mea na tutupu na faataunuuina ai le valoaga a Samuelu e faapea, o le a fetaiai le aiga o Eli ma se iuga matautia.

O Takono o se tasi o atua sa tapuai i ai Filisitia. Sa talitonu Filisitia na tuuina atu e Takono ia i latou le manumalo ia Ieova ma Isaraelu. Sa latou aumaia le atolaau o le feagaiga i totonu o le malumalu o Takono ma tuu i vae o le faatagata o Takono o se ipu [manumalo] o le taua. I le taeao lona lua, na iloa ai e filisitia ua pau faō le faatagata o Takono i luma o le atolaau, ua motusi ese lona ulu ma ona alofilima. Ona auina mai lea e le Alii o se mala o silailalo (atonu o fula po o maisua) ma isumu i luga o Filisitia, lea ana le toe faafoia lava le atolaau ia Isaraelu e le uma. O nei mea na tutupu na faaalia ai le maualuga atu o Ieova ia Takono.

Ina ua uma ona faatoilaloina e Isaraelu ia Filisitia, sa faatu e Samuelu se maa sa ia faaigoaina o “Epenesa” o se maafaamanatu e manatua ai le Alii. O le uiga faaEperu o le epenesa o le “maa fesoasoani.”

E ui lava ina sa tele ina taofia e le Alii le Perisitua Mekisateko mai ia Isaraelu ina ua Ia faatuina le tulafono a Mose, ae sa lei aveesea atoa mai le lalolagi. Na aoao mai le Perofeta o Iosefa Samita e fapea, “sa i ai i perofeta uma le Perisitua Mekisateko.” O lenei mea e mautinoa lava le aofia ai o Samuelu, o lē sa iloaina e Isaraelu uma o se perofeta a le Alii. Ona sa umia e Samuelu le Perisitua Mekisateko, sa faatagaina ai o ia e osi atu taulaga ma faatino isi tiute sa masani ona faapolopolo mo faitaulaga sa Levi.

• “The Threshing Floor,” Ensign, Sept. 2017, 70–71

• Kristin M. Yee, “O Le Olioli i lo Tatou Togiolaina,” Liahona, Nov. 2024, 57–60

• Elaine S. Dalton, “Lessons from the Old Testament: Lessons from Ruth and Hannah,” Ensign, Apr. 2006, 34–37

• Walter F. González, “Listening as Samuel Listened,” Ensign, Aug. 2010, 38–41

• “Faaola o Isaraelu,” Viiga, nu. 5

• “Come, Thou Fount of Every Blessing,” Viiga—Mo Aiga ma le Ekalesia, nu. 1001