Esoto 19–20; 24; 31–34

O le tusi o Esoto o loo faasino atu i le Mauga o Sinai (na ta’ua foi o Horepa) o le “mauga o le Atua.” O se nofoaga paia lea na ulu atu ai Mose i le afioaga o le Atua i le itiiti ifo e faatolu ni taimi eseese. O Sinai na maua ai le uluai aafiaga e pei o se malumalu mo le fanauga a Isaraelu. O le nofoaga lea na tuuina mai ai e le Alii Lana tulafono i le fanauga a Isaraelu ma le mea na uluai osia ai e le fanauga a Isaraelu feagaiga ma Ia. Na nonofo pea le fanauga a Isaraelu i Sinai mo le toeitiiti atoa le tausaga. O mea na tutupu i Sinai o loo tusifaamaumauina i le vaega o totoe o le Esoto, Levitiko atoa, ma mataupu muamua e 10 o le Numera.

A o talanoa Mose ma le Alii i le Mauga o Sinai, sa tautino mai e le Alii Lona finagalo e ulu atu i se feagaiga ma Isaraelu. Sa Ia folafola mai faamanuiaga taua nei pe afai o le a usitai Isaraelu i Lona siufofoga ma tausia Lana feagaiga:

A o faapotopoto le fanauga a Isaraelu i le auvae mauga o le Mauga o Sinai, sa latou faalogo i le siufofoga o le Atua o folafola atu ia i latou Tulafono e Sefulu mai se ao i le tumutumu o le mauga. O Tulafono e Sefulu o se vaega faavae o le talalelei a Iesu Keriso. O loo aoaoina ma ta’ua faafia i tusitusiga paia atoa. Na aoao mai Peresitene Spencer W. Kimball e faapea, o nei poloaiga sa “iloa e Atamu ma ana fanau” a o lei mauaina e Mose.

O Tulafono e Sefulu e ogatasi ma poloaiga sili e lua a le Faaola: ia alofa i le Atua ma alofa atu i isi. Na aoao mai Elder L. Tom Perry e faapea, o poloaiga muamua e fa “e faatatau i o tatou uiga faaalia i le Atua; o le ono o loo totoe e faatatau i o tatou uiga faaalia i o tatou uso a tagata. O le migao mo le Atua sa o le faavae lea o Tulafono e Sefulu.

A o saunoa e uiga i le poloaiga lona lua, lea e faasā ai le tapuai i tupua, na aoao mai ai Peresitene Dallin H. Oaks: “E sili atu nai lo le na o le faasāina o tupua faaletino, o loo ta’u mai ai se faamuamua autu mo taimi uma. Ua faamalamalama mai e Ieova, ‘Aua o a’u o Ieova lou Atua, o le Atua fuā, … ou te alofa i … e alofa mai ia te au, ma tausi mai i a’u poloaiga’ (Esoto 20:5–6). E manino le uiga o le fuā. O lona uiga autu faaEperu ‘o le i ai o ni lagona maaleale ma loloto’ (Esoto 20:5, vaefaamatalaga e). O lea, tatou te faatiga i le Atua pe a tatou ‘auauna’ i isi atua—pe a i ai nisi mea tatou te faamuamuaina.”

Mo tagata Isaraelu anamua, o le ta’u fua o le suafa o le Alii o lona uiga o le faaaogaina o le suafa o le Atua i se auala faatauvaa, le faaaloalo, po o le le migao—pe i le talanoaga, osia o feagaiga, po o le tauto i tautoga. I le saunoa ai e uiga i lenei poloaiga i o tatou aso, na aoao mai ai Elder Dale G. Renlund: “I le papatisoga ma pe a tatou aai ma feinu i le faamanatuga, tatou te molimau atu ua tatou naunau e tauave i o tatou luga le suafa o Iesu Keriso. I lea matalalaga, ia tatou magafagafa i le poloaiga i le Feagaiga Tuai, ‘Aua e te ta’u fua le suafa o Ieova lou Atua.’ [Esoto 20:7]. O lo tatou faalogo i ai i le taimi nei, e foliga mai lea mea o se faasā mai le faaaogaina ma le lē migao o le suafa o le Alii. O le poloaiga e aofia ai lena mea, ae o lona faatonuga malosi e sili atu ona o’oo’o. O le upu Eperu sa faaliliuina o le ‘ta’u’ o lona uiga ‘tu’u i luga’ po o le ‘tauave’ e faapei ona faia e se tasi i se tagāvai e faailoa atu ai o ia lava i se tagata po o se vaega. O le upu ua faaliliuina o le ‘fua’ o lona uiga o le ‘gaogao’ po o le ‘taufaasese.’ O le poloaiga e ‘aua e te ta’u fua le suafa o Ieova e mafai ona faauigaina, ’E le tatau ona e faailoa oe lava o se so’o o Iesu Keriso sei vagana ua e faamoemoe e fai ma sui lelei o Ia.’”

O le upu Eperu ua faaliliuina o le “fasioti” i le King James Version e sili atu ona malamalama i ai o le “fasioti tagata.” O le fasioti tagata o lona uiga o le faamuta faamoemoeina ma faasolitulafono o le ola o se isi tagata. E i ai nisi tulaga e mafai ai e se tasi ona fasiotia se isi tagata e le o aofia o le fasioti tagata—mo se faataitaiga, i le puipuiga o le tagata lava ia po o le taimi o faatinoga faamiliteli i le laina o le tiute.

Sa fefefe le fanauga a Isaraelu ina ua latou vaaia le uila ma le asu i luga o le Mauga o Sinai, ma faalogoina faititili a o folafola mai e le siufofoga o le Alii ia Tulafono e Sefulu. Na latou talosaga atu ina ia talanoa Mose ma Ieova, nai lo o le talanoa tuusa’o atu o Ieova iā i latou. E ui ina apoapoai atu Mose ia i latou ina ia “aua le matatau,” ae sa “tutu mamao” atu le fanauga a Isaraelu a o alu a’e Mose i le Mauga o Sinai e talanoa ma le Alii.

I le tolu aso na muamua atu, na poloaiina ai e le Alii ia Mose e faapaia tagata ina ia mafai ona latou saunia mo le taimi “o le a afio ifo ai Ieova i luma o tagata uma i luga o le mauga o Sinai.” Ua faamalamalama mai i leMataupu Faavae ma Feagaiga 84 e faapea, sa saili Mose e faapaia tagata ina ia mafai ona latou saunia e “vaai i fofoga o le Atua.” E ui ina sa faalogo le fanauga a Isaraelu i Tulafono e Sefulu, ae e foliga mai sa faamoemoe le Alii mo i latou ia oo i se mea e sili atu ona taua. Peitai, sa “faamaaa e le fanauga a Isaraelu o latou loto, ma sa le mafai ona onosaia le afioaga [o le Atua].”

Ona o le maaa o le loto na faaalia e le fanauga a Isaraelu i le taimi o lenei aafiaga ma lo latou tapuai atu i le tamai povi auro i se taimi mulimuli ane na taofia ai e le Alii Lana tulafono maualuga atu mai ia i latou. Na aoao mai le Perofeta o Iosefa Samita: “Pe a ofoina mai e le Atua se faamanuiaga po o se malamalama i se tagata, ae na te musu e mauaina, o le a ta’usalaina o ia. Sa tatalo le fanauga a Isaraelu, ina ia fetalai atu le Atua ia Mose ae le o i latou; o le taunuuga lea na ia fetuu ai i latou i se tulafono faaletino.”

Ina ua malilie le fanauga a Isaraelu e talia le feagaiga a le Alii, sa faia e Mose se sauniga faapitoa. O le toto na sausauina e Mose i luga o le fatafaitaulaga o se faatusa o le toto o Iesu Keriso, lea o le a Ia faamaligiina i Ketesemane ma luga o le satauro. Ina ua sausauina e Mose le toto i luga o tagata, sa faatusa i faamanuiaga o le Togiola a Iesu Keriso lea o le a maua e tagata e ala i le feagaiga na latou osia. Sa faatusa foi i le o’oo’o o na feagaiga. O le sausauina o le toto na faaalia ai sa noatia faatasi le Atua ma tagata e ala i lenei feagaiga.

Na o a’e Mose ma isi alii Isaraelu i le Mauga o Sinai ina ua uma ona ulu aloaia le fanauga a Isaraelu i se feagaiga ma le Alii. O iina sa “latou iloa atu ai le Atua, ma latou aai ma inu.” I taimi o le Feagaiga Tuai, o taumafataga paia sa masani ona avea ma se vaega o le faagasologa o le osia o feagaiga po o le faafouina o feagaiga. O le aai faatasi i se taumafataga o se auala aloaia lea o le faamautuina o le feagaiga ma fusia faatasi ai tagata o le feagaiga. I o tatou aso, o le aai ma feinu i le faamanatuga o se auala tatou te faafouina ai a tatou feagaiga ma le Alii ma faamalosia ai la tatou sootaga ma Ia.

Na aoao atu e le Alii le fanauga a Isaraelu e faapea, na Ia tuuina atu le aso Sapati ia i latou o se “faailoga” o la latou sootaga o le feagaiga ma Ia. A o latou tausia Lona Sapati, sa folafola atu ai le Alii e faapaiaina Lona nuu o le feagaiga.

Na aoao mai Peresitene Russell M. Nelson: “Sa tuuina mai le Sapati o se feagaiga faaagaga, o se faamanatu faifai pea o le a faapaiaina e le Alii Lona nuu. …

“E faapefea ona tatou faapaiaina le aso Sapati? A o ou laitiiti, sa ou suesue i lisi na faia e isi e faatatau i mea e fai ma mea e le faia i le Sapati. O se taimi mulimuli ane na faatoa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi. Faatasi ai ma lena malamalamaaga, sa ou le toe manaomia ni lisi o mea e faia ma mea e lē faia. Pe a manaomia ona ou faia se filifiliga pe o se gaoioiga talafeagai pe leai foi mo le Sapati, e na o lo’u fesili lava ia te a‘u, ‘O le a le faailoga ou te manao e avatu i le Atua?’ O lena fesili na matuai manino mai ai a’u filifiliga e uiga i le aso Sapati.”

A o faaalu e Mose le 40 ao ma po i luga o le Mauga o Sinai, ma sa amata ona taumanatunatu tagata po o le a le mea na tupu ia te ia. Sa latou fai atu ia Arona e fai “atua e muamua atu ia te i tatou,” ma sa usitaia e Arona la latou faatauanau. O nei faatinoga atonu e foliga mai e ese pe a mafaufau i ai, sa lei leva atu, na osifeagaiga ai le fanauga a Isaraelu e usitai i poloaiga a le Atua, e aofia ai le poloaiga ia aua nei faia ni tupua ua ta.

Ua faapea mai nisi o tagata atamamai, o le faiga o le tamai povi auro, atonu sa o se taumafaiga sese lea a tagata Isaraelu e manatua ai Ieova pe utuvai mai ai i Lona mana. Na tautino atu e Arona o le aso o le faapaiaga o le tamai povi o le a avea ma “tausamiga ia Ieova.” Atonu na talitonu o ia o le tamai povi auro ua fai ma sui o Ieova.

E tusa lava po o a faamoemoega o le fanauga a Isaraelu, e manino lava o a latou gaoioiga sa matuai faatiga lava i le Alii. Sa faanoanoa o Ia ona o le fanauga a Isaraelu ua “leaga lava i latou” ma “ua vave ona latou o ese” mai Ona ala. Na ta’ua mulimuli ane e se Faisalamo e faapea, e ala i lo latou tapuai i le tamai povi auro, na “liliu e le fanauga a Isaraelu lo latou mamalu i le faatusa o se povi po’a na te ’aia vao. Ua galo ia te i latou lo latou Faaola le Atua, o lē na faia mea tetele i Aikupito.”

E ui ina sa iloa e Mose le ogaoga o le agasala a le fanauga a Isaraelu, ae sa ia aioi atu i le Atua ina ia alofa mutimutivale ia i latou. Sa ia ofo atu foi mulimuli ane, e ave i ona lava luga lo latou faasalaga. Na folafola mai e le Alii o le a Ia faasaoina i latou o e salamo.

O le aioiga a Mose i le Alii e fai ma sui o lona nuu e mafai ona faamanatu mai ai ia i tatou ia Iesu Keriso, o lē o lo tatou fautua i le Tama. O se fautua o se tasi e aioi atu e fai ma sui o se isi. Na aoao mai Elder Dale G. Renlund e faapea, i le avea ai ma o tatou fautua, o Iesu Keriso “e lagolagoina le mea sa finagalo ai le Tama i taimi uma: mo i tatou ia toe foi atu ia te Ia o ni suli i Lona malo.”

Ina ua alu ifo Mose mai le Mauga o Sinai, ma vaaia le tamai povi auro ma amioga a le nuu, sa ia tata’eina le papamaa lea sa tusia e le Alii. O le gaoioiga a Mose o le tata’e o papamaa na atagia mai ai le feagaiga ua solia a Isaraelu. Na faamalamalama mai e Peresitene Jeffrey R. Holland e faapea “sa tele atu mea sa i ai i na papamaa nai lo o Tulafono e Sefulu.”

Ua faamanino mai e le Faaliliuga a Iosefa Samita e faapea, o papamaa ua malepelepe sa i ai faatonuga a le Alii mo sauniga ma feagaiga o le Perisitua Mekisateko. O nei sauniga ma feagaiga e manaomia mo i tatou ina ia avea ai e faapei o le Atua ma nonofo ai i Lona afioaga. Ae peitai, ona sa faamaaa e le fanauga a Isaraelu o latou loto, sa le agavaa ai i latou e maua nei faamanuiaga mai le Alii.

E ui lava i le le usiusitai o Isaraelu, ae sa alofa mutimutivale pea le Alii ia i latou o e salamo. Ina ua a’e Mose i le Mauga o Sinai mulimuli ane, sa faatonuina o ia e le Alii e faatuina le “tulafono o se poloaiga faaletino,” po o le talalelei sauniuni e faatautaia e ala i le Perisitua Arona. O lenei tulafono ua ta’ua o le tulafono a Mose.

O le fetalaiga a le Alii i le fuaiupu e 20 e faapea “e le mafai ona vaai mai lava se tagata ia te au ma ola pea ia” e foliga mai e feteenai ma le fuaiupu e 11, lea e faapea mai “ua fetalai mai foi Ieova ia Mose, o loo fesagai lava, faapei o le tagata ona tautalatala ma lana uo.”

Ua tuuina mai e le Faaliliuga a Iosefa Samita le faamaninoga aoga i le fuaiupu e 20. Na faailoa mai e le Alii e faapea, ona o agasala a Isaraelu, o le a le faatagaina ai i latou e vaai i fofoga o le Alii i lena taimi. Sa ia faaopoopo mai foi, “Ma e leai se tagata agasala i soo se taimi, o le a leai lava se tagata agasala i soo se taimi, na te vaai i oʼu mata ma ola ai pea.”

• “Esoto 19:5–6,” New Era, Iulai 2011, 5

• L. Tom Perry, “O Le Usiusitai i le Tulafono o le Saolotoga Lea,” Liahona, Me 2013, 86–88

• Russell M. Nelson “O Le Sapati o se Aso Fiafia,” Liahona, Me 2015, 129–32

• Dallin H. Oaks, “Leai Ni Atua Ese,” Liahona, Nov. 2013, 72–75

• “Tausi Poloaiga,” Viiga, nu. 303