1 Samuelu 8–10; 13; 15–16

Sa avea Samuelu o se perofeta, ositaulaga, ma faamasino i luga o Isaraelu uma mo le tele o tausaga. A o faasolo ina toeaina o ia, sa ia tofia ona atalii o ni faamasino, ae o lo latou amioleaga na avea ai i latou ma ni taitai le talafeagai. Sa o atu toeaiina o Isaraelu ia Samuelu ma talosagaina se tupu, ma le faamoemoe ia “faapei o atunuu uma.” Sa latou manatu o le i ai o se tupu o le a fesoasoani ia i latou i a latou taua. O lenei manao mo se tupu sa ono faateteleina e ala i le taufaamatau a le au Filisitia, o e sa mauaina le paoa ma le uunaiga i le itulagi.

Sa faapopoleina Samuelu i la latou talosaga, e le faapea ona o le i ai o se tupu e sese, ae e foliga mai ona o le latou mafuaaga sa mananao ai i se tupu. Na folafola mai e le Alii lava Ia e tau i taua a Isaraelu pe a latou tumau faamaoni ia te Ia. O le talosaga mo se tupu na faaalia ai lo latou le faalagolago i folafolaga a Ieova ma la latou sootaga faalefeagaiga ma Ieova. Sa tali atu le Atua i le manao o tagata e ala i le ta’u atu ia Samuelu, “Latou te lei teena oe, ae ua latou teena a’u, e le tatau ona ou nofotupu ia te i latou.”

Sa maitauina e Peresitene Jeffrey R. Holland: “O le tulaga tiga lea, ona na uma ona i ai so latou tupu na muamua atu ia i latou ma tau a latou taua. O Ia o Ieova, le Tupu o tagata uma, ae latou te le toe mananao ia Ieova e pule ia i latou. O le a latou le toe mananao ia te Ia e tau a latou taua. Ma o le ogatusa ai ma le autu o le tele o lesona o talafaasolopito, na oo mai ai taunuuga tiga ina ua tuai tele ona aloese ai. Sa tagitui mulimuli ane tagata, ‘Ua matou faaopoopoina i a matou agasala uma lenei mea leaga, ina ua matou faatoga atu ai i se tupu mo i matou’ (1 Samuelu 12:19).”

Na aoao mai Peresitene Ezra Taft Benson: “E ao i le Atua ona galue i tagata faaletino e eseese tikeri o le alualu i luma faaleagaga. O nisi taimi e faamatuu mai ai e Ia mo se taimi le tumau i tagata a latou talosaga lē faautauta ina ia mafai ai ona latou aoao mai o latou lava aafiaga faanoanoa. E ta’u e nisi lea mea o le ‘mataupu faavae a Samuelu.’ Sa mananao le fanauga a Isaraelu i se tupu e pei o isi malo uma. … O lea sa tuu atu ai e le Atua ia i latou se tupu ma tuu i latou e pagatia. Sa latou aoaoina le ala faigata. Ae sa ese lea le finagalo le Atua, ae i totonu o ni tuaoi faapitoa, na te tuuina atu i tagata e tusa ai ma o latou manao.”

O se tagatavaai “o se tagata ua faatagaina e le Atua e vaai ma ni mata faaleagaga i mea ua natia e le Atua mai le lalolagi.” E pei ona faamatalaina i le Tusi a Mamona, o tagatavaai o talifaaaliga ma perofeta. Ua tuuina mai ia i latou le mana mai le Atua e “iloa ai mea ua tuanai, ma mea foi o le a oo mai.” I aso nei, o sui uma o le Au Peresitene Sili ma le Korama a Aposetolo e Toasefululua e lagolagoina foi ma faauuina o ni perofeta, tagatavaai, ma talifaaaliga.

O “nofoaga maualuluga” o mauga, tumutumu mauga, po o tulaga maualuluga ia na fausia ai e Isaraelu fatafaitaulaga ia Ieova. Sa faaaoga foi e sa Kanana ia nofoaga maualuluga e fausia ai fatafaitaulaga po o maafaamanatu i o latou atua pepelo. Na poloaiina e le Alii ia Isaraelu e faaumatia nofoaga maualuluga o sa Kanana i le taimi na manumalo ai i le nuu folafolaina. I ni nai seneturi talu ona mavae le taimi o Samuelu, sa faatonuina ai e le Tupu o Iosia ia aveesea nofoaga maualuluga ona o faiga leaga faalelotu e fesootai ma i latou.

Tagai i le “1 Samuelu 16:1–13. O le a le faamoemoega o le faauuga o Tavita?”

E ta’ua i nisi taimi e le Feagaiga Tuai ia vaega po o ‘au perofeta. O nei vaega atonu na aofia ai ni tagata amiotonu o e na auai faatasi i taimi o le liliuese o Isaraelu e faamalosia ma siitia e le tasi le isi.

O le toatele o sikola e ioe o le fuainumera e 30,000 o karitoa a Filisitia e le sa’o. O nisi faaliliuga o le Tusi Paia ua suia le numera i le 3,000. O mea sese faapenei o loo faaali mai i le Tusi Paia mo ni mafuaaga eseese, e aofia ai mea sese i le faaliliuga ma atonu foi o ni faatelega mai tusiupu mulimuli ane.

Sa ta’u atu e le perofeta o Samuelu ia Saulo e tatau ona alu i Kilikala ma faatalitali ai mo aso e fitu mo le alu atu o Samuelu e osi atu taulaga i le Alii. Sa lei i ai ia Saulo le pule o le perisitua e manaomia e faatino ai taulaga mu. Ae ui i lea, ina ua oo mai le aso atofaina ae sa lei taunuu atu Samuelu, sa le to’a Saulo ma faia ai e ia lava le taulaga. O lenei faatinoga na faaalia ai o le loto o Saulo sa le ogatusa ma le finagalo o le Alii e pei ona sa i ai muamua.

Sa aoao mai Peresitene Dieter F. Uchtdorf, o lē sa avea i lena taimi ma sui o le Au Peresitene Sili:

“Sa iloa e le perofeta o Samuelu se vaivaiga taua i uiga o Saulo. Ina ua faamalosia e faatosinaga mai fafo, sa lei i ai ia Saulo le loto pulea e tumau ai i le ala, faalagolago i le Alii ma Lana perofeta, ma mulimuli i le mamanu na faavaeina e le Atua.

“O le eseesega o ni nai tikeri, e pei o le … toilalo o Saulo e pipiimau i le fautuaga a le perofeta mo sina taimi umi teisi atu, atonu e foliga mai e laitiiti. Ae e oo lava i mea sese laiti i le aluga o taimi e mafai ona faia ai se eseesega maoae i o tatou olaga.”

O sa Amaleka o ni tagata sa le matatau i le Alii. Sa latou osofaia faamalosi foi le fanauga a Isaraelu, o e sa tolauapi i le vao i le taimi o le Malaga Tele, ma fasiotia le toatele o Isaraelu sili ona vaivai. I le tali atu i ai, na tautino mai ai e le Alii e faapea, e tatau i le au Isaraelu ona “soloia ese le faamanatuina o Amaleka mai lalo o le lagi.” Tatou te le iloa mafuaaga uma na poloaiina ai e le Atua ia Saulo ma lana autau e faaumatia sa Amalekā uma ma a latou manu. Peitai, ua tatou iloa e popole tele le Atua mo Ana fanau uma ma e “le fiafia [o Ia] i le oti o e amioleaga.” E silafia e Ia mea uma ma amiotonu atoatoa ma alofa mutimutivale.

Tagai foi “E faapefea ona tatou malamalama i taimi o sauaga i tusitusiga paia?,” in Topics and Questions, “Religion vs. Violence,” Gospel Library.

Na faamalamalama mai e Elder Robert D. Hales:

“Sa lei mulimuli Saulo i le poloaiga a le Alii. Na ia faatinoina se mea ou te ta’ua o le ‘usiusitai filifili.’ O le faalagolago ai i lona lava atamai, ma na ia faasaoina ai le ola o le Tupu o Akako ma aumai mamoe, povi, ma isi manu aupito lelei. …

“… Ona e lei faalogo Saulo ma le atoatoa—ona na ia usitai filifili—na ia le maua ai le avanoa ma le faitalia e avea ai ma tupu.”

Tagai i le “Kenese 6:6. O le a se mea ua tatou malamalama i ai mai le fasifuaitau ‘ona salamo ai lea o Ieova’?”

O le faauuina i le suauu o se faiga masani i le Feagaiga Tuai. E faatusa i “se suiga i le tulaga po o le vaetofiaina i se valaauga musuia faalelagi” mo tofi paia o perofeta, ositaulaga, ma tupu. O le suauu olive sa fesootai ma le mama a’ia’i, faamalologa, ma le Agaga Paia. Sa masani ona tauaveina i se foafoa, lea e faatusa i le malosi po o le mana.

E pei o le faauuina muamua o Saulo, o le faauuina o Tavita na sosoo mai ai ma le taliaina o le Agaga o le Alii. O Tavita ma isi na faauuina i aso anamua sa ta’ua i nisi taimi o “e ua faauuina.” I lea auala, na valoia ai e Tavita lona tupuaga i le lumanai, o Iesu Keriso, o lona faalaniga o le Mesia o lona uiga “o lē ua faauuina.”

Ua faamanino mai e le Faaliliuga a Iosefa Samita o le agaga leaga na oo mai ia Saulo sa le mai le Alii. E ui atonu na faatosina sa’o ia Saulo e se agaga leaga, ae e mafai foi ona ia oo i se agaga o le le faamalieina ona o ana agasala.

• Jeffrey R. Holland, “Filifili le Alii ma Lana Perofeta,” Liahona, Iuni 2022, 4–9

• Peggy Furniss Lee, “A King for Israel,” Ensign, Iuni 2002, 21–23

• Robert D. Hales, “Filifiliga: E Taua i le Fuafuaga o le Olaga,” Liahona, Nov. 2010, 24–27

• Dieter F. Uchtdorf, “Na o Ni Nai Tikeri Lava,” Liahona, Me 2008, 57–60