Teuteronome 6–8; 15; 18; 29–30; 34

O le tusi o Teuteronome o loo i ai upu faaiu a Mose i le fanauga a Isaraelu ae latou te lei ulu atu i le laueleele o Kanana faatasi ma Iosua o lo latou taitai. O le autu o le tusi o lona uiga o le “tulafono lona lua” po o le “kopi o le tulafono.” O le fausaga o le Teuteronome e mulimuli i le mamanu anamua o le osia ma le faafouina o feagaiga.

O le aotelega lenei o lauga e tolu a Mose o loo tusia i le Teuteronome:

1. Teuteronome 1–4: Na toe faamatalaina e Mose mea taua na tutupu mai le 40 tausaga talu ai a Isaraelu, e aofia ai le feagaiga na osia e le Alii ma i latou i le Mauga o Sinai.

2. Teuteronome 5–26: Na toe iloiloina e Mose ia Tulafono e Sefulu ma talanoaina le tele o isi vaega o le tulafono a Mose.

3. Teuteronome 27–30: Na faafouina e Isaraelu le latou feagaiga ma le Alii. Sa faamatala e Mose ia faamanuiaga mo le usiusitai ma fetuu mo le le usiusitai.

O nei lauga o loo i aioiga faamaoni a Mose mo Isaraelu ia manatua le Alii ma ola i Ana tulafono i le nuu folafolaina. O faatonuga i le Teuteronome sa faasino tonu lava i se tupulaga fou na maliliu o latou matua i le vao ina ua mavae lo latou fouvale.

Mai tusi e lima a Mose, o le Teuteronome o le tusi lea e masani ona sii mai e perofeta o le Feagaiga Tuai. E masani foi ona sii mai pe ta’ua foi i le Feagaiga Fou. Sa faaaoga e Iesu Keriso ia fuaiupu mai le Teuteronome e faafetaiaia ai faaosoosoga a Satani ma faamatala ai po o le fea poloaiga sa silisili i le tulafono. O le tele o mau faasino i le Teuteronome o loo maua foi i le Tusi a Mamona.

O leTeuteronome 6:4 e amata i se tatalo e ta’ua e tagata Iutaia i aso nei o le Shema (mai le upu Eperu o lona uiga o le “faalogo”). E tauloto e Iutaia le Shema i aso taitasi o se tatalo i le taeao ma le afiafi. I lona atoatoaga, o le Shema e aofia ai le Teuteronome 6:4–9; 11:13–21; ma le Numera 15:37–41. Sa faasino atu le Faaola i le Shema ina ua Ia folafola atu le poloaiga sili muamua o le tulafono: “Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa.”

Ina ia faamamaluina le faatonuga a le Alii ia manatua pea nei upu, e toatele tagata Iutaia e tuu se fasi pa’u laitiiti ua tusia i fuaitau mai le Shema i se mezuzah—o se koneteina laitiiti e pipii i le itu taumatau o le faitotoa o o latou fale. E faapena foi, o le tefillin (e ta’ua foi o le filateri po o le pito i luma) o ni pusa pa’u laiti, faatafafa o loo i ai ni fasi pa’u i fuaitau mai le Shema. E toatele tagata Iutaia e fusi se pusa e tasi i luga o le muaulu ma fusi le isi pusa i le ogalima o le limavalea.

E le o manino ina ua faatoa vaetamaina e Isaraelu nei agaifanua, ae sa faatinoina e Iutaia i le taimi o le galuega a Iesu Keriso. Sa tausalaina e le Faaola le faamaualuga e fesootai ma nei agaifanua i Ona aso, ma ta’u atu ai o le toatele o tagata Iutaia o le a “faalauteleina o latou filateri” i a latou taumafaiga “ina ia iloa e tagata.”

O le upu Eleni ua faaliliuina o le “tofotofo” i le Lomiga a King James o le Tusi Paia o lona uiga o le “tuu atu i se suega.” O lea, i le fuaitau lenei, sa poloaiina ai Isaraelu ia aua nei tofotofoina le Atua e pei ona sa latou faia i Mase—lea na latou fesiligia ai pe sa faatasi le Alii ma i latou ina ua leai ni a latou vai.

I le taimi o le galuega a le Faaola i le olaga nei, sa faaosoosoina o Ia e le tiapolo e oso ifo o Ia lava mai le tumutumu o le malumalu. Na fautua mai le tiapolo e mafai e Iesu ona faamaonia o Ia o le Mesia e ala i le laveaiina vave o Ia e agelu. I le tali atu i ai, na faasino e Iesu le Teuteronome 6:16, ma fetalai atu, ”Aua tou te tofotofo ia Ieova lo outou Atua.”

Ina ua sauni Isaraelu e ulu atu i le nuu folafolaina i Kanana, sa nofoia e nisi o atunuu po o vaega o tagata, sa ta’ua faatasi o sa Kanana. Na poloaiina e le Alii ia Isaraelu e “matua faaumatia” sa Kanana pe a latou ulu atu i le nuu folafolaina.

Sa faamalamalama atu e Mose e tatau ona tutuli ese sa Kanana mai le laueleele ona o lo latou amioleaga. O lena amioleaga na aofia ai le tapuai i tupua ma e oo lava i le ositaulagaina o a latou fanau ia i latou. I le Tusi a Mamona, na faamalamalama atu e Nifae faapea o sa Kanana “sa teena e ia tagata afioga uma a le Atua, ma sa matua i latou i le agasala; ma sa i ai i o latou luga le atoatoa o le toasa o le Atua.” Na lapatai mai le Alii afai e nonofo faatasi Isaraelu i totonu o sa Kanana i le nuu folafolaina, o le a liliu atu o latou loto i isi atua, ma taitai atu ai i lo latou pau faaleagaga.

Tagai foi i le “Iosua 6:17–21. O le a le uiga o le faapea o Ieriko ma ona tagata sa nofoia o ni e ua ‘faatoina .… mo Ieova’?”

I le Mauga o Sinai, sa folafola atu ai e le Alii i le fanauga a Isaraelu afai latou te usiusitai i Lana feagaiga, o le a avea i latou ma “oloa taua mo’u [Ia] e sili i nuu uma.” E fasefulu tausaga mulimuli ane, a o lei ulu atu le isi tupulaga o Isaraelu i le nuu folafolaina, sa faamanatu atu e le Alii ia i latou lo latou faasinomaga o Lona nuu o le feagaiga. Na Ia tautino mai, “O oe o le nuu paia mo Ieova lou Atua: na filifilia oe e Ieova lou Atua ina ia avea ma nuu mona, o le oloa taua e sili i nuu uma lava o i le fogaeleele.”

O le upu Eperu ua faaliliuina o le “oloa taua” i le Esoto 19:5 ma e “taua” i le Teuteronome 7:6 o le segullah. O lenei upu e mafai foi ona faauigaina o “oloa taua” po o “oa.” O le fanauga a Isaraelu o ni tagata faapitoa o Ieova ona sa latou osia se feagaiga ma Ia. Sa faamanatu atu e le Alii ia Isaraelu sa Ia osia foi feagaiga ma o latou tuaa. Na laveaiina Isaraelu e le Alii mai le nofopologa i Aikupito aua “o le Atua lava ia, o le Atua faamaoni, o le na te tausi i le feagaiga atoa ma le alofa i e alolofa atu ia te Ia ma tausiusi i ana poloaiga e oo lava i le afe o tupulaga.”

I o tatou aso, o i latou uma o e filifili e osia ma tausia feagaiga ma le Alii e mafai ona avea ma Ona tagata paia, filifilia, ma faapitoa. Na aoao mai e Peresitene Russell M. Nelson: “O le osia o se feagaiga ma le Atua e suia ai lo tatou sootaga ma Ia e faavavau. E faamanuiaina ai i tatou i se fuataga faaopoopo o le alofa ma le alofa mutimutivale. E aafia ai i tatou ma le auala o le a fesoasoani mai ai le Atua ia i tatou ia avea ma tagata e mafai ona avea ai i tatou. Ua folafola mai ia i tatou, e mafai foi ona avea i tatou ma “oa taua” ia te Ia (Salamo 135:4).”

Tagai foi i le “Teuteronome 29:1–15. Aisea na osia ai e Isaraelu se isi feagaiga ma le Alii?”

O tausaga uma e fitu, na poloaiina ai e le Alii le fanauga a Isaraelu e tausia se tausaga o le Sapati, e pei lava ona tupu le Sapati i le aso lona fitu uma. O leTeuteronome 15 o loo i ai faatonuga a le Alii mo tagata aitalafu Eperu ina ia faasaoloto mai a latou aitalafu ma pologa Eperu ina ia faasaoloto mai le nofopologa i le tausaga o le Sapati. O nei poloaiga na fesoasoani ia Isaraelu e galulue limafoai ai i isi ma manatua ai o mea na tuuina mai ia i latou na aumai mai le Atua. O le isi faamoemoega taua mo nei poloaiga o le faamanatu atu lea ia Isaraelu lo latou lava faasaolotoina mai le nofopologa. Na fetalai mai le Alii, “Na fai oe ma auauna i le nuu o Aikupito, na laveaiina foi oe e Ieova lou Atua: o le mea lea ou te fai atu ai lenei mea ia te oe i le aso nei.”

I aso anamua, o le pologa o se vaega taliaina o malo mo le tele o aganuu. Na avea tagata ma pologa mo ni mafuaaga eseese, ma o nisi sa oo lava ina faatau atu i latou lava ma le lotomalie ia pologa ina ia o ese mai aitalafu po o le maua o le saogalemu. O pologa na ola i ni olaga faigata, ae o nisi ituaiga o pologa sa sili atu ona faigata nai lo isi. O nisi o pologa sa i ai ni avanoa faaleaoaoga ma sa umia ni tofiga o tiutetauave.

E lei faasaina e le tulafono a Mose le nofopologa, ae sa faatuina ai ni puipuiga taua mo le taulimaina o pologa a Isaraelu. I le avea ai ma se vaega o le tausaga o le Sapati, o pologa Isaraelu sa tatau ona faasaolotoina ma ni meaai limafoai, e ono fesoasoani e taofia ai i latou mai le toe foi atu i le pologa. E mafai foi e auauna Isaraelu ona filifili e nonofo ma lo latou matai ma le auaiga nai lo le faasaolotoina.

E le o tuuina mai i tusitusiga paia se faamalamalamaga manino pe aisea na le faasa ai e le Alii le nofopologa ia Isaraelu anamua. Ae peitai, i la tatou tisipenisione, ua folafola mai e le Alii e faapea “e le sa’o ona tatau ona nofo pologa soo se tagata o le tasi i le isi.”

O le valoaga a Mose faapea o le a faatuina e le Alii se perofeta i le lumanai e pei o ia i totonu o Isaraelu o loo ta’ua pe o loo faasino atu i ai i le tele o taimi i tusitusiga paia atoa. E toatele Iutaia i ona po o Iesu Keriso na faaaogaina fuaitau e pei o “o le perofeta ea oe” po “o le Perofeta” pe a faatatau i le Mesia.

Ina ua mavae Lona Toetu, sa tautino atu e Iesu Keriso o Ia o le faataunuuga o le valoaga a Mose. Na ia aoao mai, “Faauta, o aʼu o le na fetalai i ai Mose, ua faapea mai: O le a faatuina a’e e le Alii se perofeta ia te outou mai o outou uso, e pei o a’u; ia outou faalogo ia te ia i soo se mea na te fai atu ai ia te outou. Ma o le a oo foi ina vavae ese mai totonu o le nuu soo se tasi o le a le faalogo i lena perofeta.”

Ina ia vaai i faataitaiga o mea e tutusa ai Mose ma Iesu Keriso, tagai i le “Esoto 2:1–10. O le a le mea sa taua e uiga i le soifuaga ma le galuega a Mose?”

A o lei ulu atu Isaraelu i le nuu folafolaina, o le isi tupulaga na sosoo ai na faafouina le feagaiga na uluai osia e le fanauga a Isaraelu ma le Alii i Sinai. O lena feagaiga, faatasi ai ma ona faamanuiaga ma fetuu, o loo faamatalaina i le Teuteronome 28. I le faafouina o lenei feagaiga, na faamamafa mai ai e le Alii o le a avea Isaraelu ma Ona tagata ma o le a avea o Ia ma o latou Atua. O lenei sootaga faalefeagaiga o loo ta’ua soo i tusitusiga paia atoa.

Tagai foi i le “Teuteronome 7:6–12. O le a le mea na avea ai Isaraelu o se ‘oloa taua’ i le Alii?”

Na valoia e Mose o le a faataapeapeina Isaraelu o se taunuuga o le solia o a latou feagaiga ma le Alii. Sa ia faamatalaina foi se aso o le a “toe foi mai ia Ieova” Isaraelu ma “faalogo i lona siufofoga.” Na aoao mai Mose a tupu lenei mea, o le a “faapotopoto mai [e le Alii] [Isaraelu] ai nuu uma.”

E tusa ai ma le faapotopotoina o Isaraelu, na aoao mai ai Peresitene Russell M. Nelson:

‘Mo le tele o seneturi, na valo’ia ai lava e perofeta lenei faapotopotoina, ma o loo tupu i le taimi nei lava! I le avea ai ma se teuteu ala taua i le Afio Mai Faalua o le Alii, o le galuega aupito sili ona taua lea i le lalolagi! …

“Pe a tatou talanoa e uiga i le faapotopotoina o Isaraelu i itu uma e lua o le veli, o le mea moni o loo tatou faasino atu i le galuega faafaifeautalai, malumalu, ma talafaasolopito o aiga. O loo tatou faasino atu foi i le fausiaina o le faatuatua ma le molimau i loto o i latou o loo tatou ola faatasi, galulue, ma auauna i ai. Soo se taimi tatou te faia ai soo se mea e fesoasoani ai i soo se tasi—po o le fea lava itu o le veli—i le osia ma le tausia o feagaiga ma le Atua, ua tatou fesoasoani i le faapotopotoina o Isaraelu.”

O le peritomeina sa faatinoina o se faailoga o le feagaiga a le Atua ma Aperaamo ma e tupuga mai ia te ia. O le ata o se loto peritomeina o loo aumaia ai le manatu faapea o le feagaiga a se tasi ma le Alii ua avea ma se vaega taua o i latou ma ua latou oo i se suiga i lo latou natura.

Na aoao mai Elder Dale G. Renlund: “O le faaliliuina i le Alii e amata i se tautinoga mausali i le Atua. … Ma le mea mulimuli, o lenei tautinoga e avea ma se vaega o le tagata o tatou i ai, faaaofiaina i o tatou lagona faaletagata lava ia, ma e i ai pea i o tatou olaga. E pei lava o le le galo ia i tatou o o tatou lava igoa e tusa lava po o a mea o loo tatou mafaufau i ai, ia le galo foi ia i tatou se tautinoga ua tāmau i o tatou loto.”

I le faaiuga o lona soifua, na alu ai Mose i le tumutumu o le Mauga o Nepo, lea na ia vaai ai i le nuu folafolaina. O loo ta’ua i le tusiga faatusi paia na maliu Mose i talaane o le Mauga o Nepo “i le nuu o Moapi.” Ua faamanino mai e le Faaliliuga a Iosefa Samita e faapea e lei tanumia Mose i le laueleele o Moapi, ae nai lo lena, “sa ave o ia e le Alii i ona Tama, i se vanu i le laueleele o Moapi, … o lea, e leai se tasi na te iloaina lona tuugamau e oo mai i le aso nei.” Ua faamautu mai e le Tusi a Mamona e faapea i le iuga o le soifuaga o Mose, “sa aveina e le Alii Mose ia te ia lava.”

Na aoao mai Peresitene Boyd K. Packer e faapea, e pei o Elia, o Mose sa “liua—na aveesea mai le lalolagi e aunoa ma le oo i le oti faaletino. … Sa i ai mea e ao ona tuufaasolo atu e Elia ma Mose i isi i le tino i augatupulaga o le a oo mai, ma o le a la toe foi mai i le lalolagi e fai lena mea a o lei oo i le suiga mai le olaga faaletino i le tino toetutu.”

I le avea ai ma se tagata ua liua, sa faaali atu Mose i le Mauga o Liua ma faaee atu ki o le perisitua i luga o Peteru, Iakopo, ma Ioane.

• D. Todd Christofferson, “O Le Poloaiga Muamua e Muamua” (na o le tusiga faatekinolosi), Liahona, Fep. 2023, Gospel Library

• Dale G. Renlund, “Mafaufau i le Agaglelei ma le Silisiliese o le Atua,” Liahona, Me 2020, 41–44

• Ronald A. Rasband, “Ne’i Galo ia te Oe,” Liahona,, Nov. 2016, 113–15

• Henry B. Eyring, “Ia Manatua, Ia Manatua Lava,” Liahona, Nov. 2007, 66–69.

• Russell M. Nelson, “O Le Feagaiga e Faavavau,” Liahona, Oke. 2022, 4–11

• “The Gathering of Israel,” i le Teachings of Presidents of the Church: Russell M. Nelson (2024), Gospel Library