Kenese 18–23

O le Faaliliuga a Iosefa Samita o lenei tala ua faailoa mai ai alii e toatolu o “agelu o ni tagata paia, ma na auina mai e tusa ma le faatulagaga a le Atua.” O le King James Version o loo ta’ua ai nei alii o agelu, lea e mafai foi ona faauiga o “avefeau.” E ui lava tatou te le iloa po o ai nei avefeau, ae sa taulima i latou e Aperaamo ma le ava ma le faaaloalo tele.

A o faaali atu e le Alii ia Aperaamo Lana fuafuaga e faaumatia Sotoma ma Komoro, sa augani atu Aperaamo i le Alii e faasaoina e pele ia te ia ma isi tagata amiotonu atonu sa nonofo ai iina. Sa fefautuaai le Atua ma Aperaamo, ma e ala mai i lena faagasologa na oo ina malamalama ai Aperaamo e faapea, sa naunau le Atua e faaalia le alofa mutimutivale ma faasaoina e amioleaga i Sotoma ma Komoro pe afai sa nonofo ai na o ni nai tagata amiotonu iina. I isi tala faatusipaia, e masani ona faaalia e le Atua le alofa mutimutivale e ala i le faasaoina o e amioleaga ona o e amiotonu.

Ina ua uma ona valaaulia e Lota ma lona aiga ia avefeau a le Alii e nonofo i lo latou fale, sa faapotopoto se vaega o tagata faatupu vevesi i fafo. Na latou faatonuina Lota ina ia faamatuu atu ana malo ina ia sauāina. O loo faamatala mai i le tusiga i le Kenese le ofoina atu e Lota o ona afafine e toalua i le au faatupu vevesi matautia e sui ai avefeau a le Alii. O le faaliliuga musuia a Iosefa Samita ua faamanino mai ai e lei ofoina atu e Lota ona afafine i le au faatupu vevesi feita. Nai lo lena, sa poloaiina e le au faatupu vevesi ia tagata asiasi a Lota ma ona afafine. Ina ua musu Lota, sa taumafai le au faatupu vevesi e faamalosia lo latou ulufale atu i totonu o le fale ma sa taia i latou i le tauaso e avefeau paia.

Sa auai tagatanuu o Sotoma ma Komoro i le tele o faiga amioleaga ia sa matua tiga ai le Alii. Na tautino mai e le perofeta o Esekielu sa tumu tagata i le faamaualuga ma le paie ma e ui lava sa ia i latou “o le tele o mea e ai” ae sa lei fesoasoani i latou “i lē puapuaga ma lē mativa.” Sa taliaina ma faatinoina e tagata lautele feusuaiga lē mamā i Sotoma ma aai lata ane. Na ta’ua e le Perofeta o Iosefa Samita e faapea, o tagata o Sotoma ma Komoro “na faaumatia ona o le teenaina o Perofeta.” O le taunuuga o Sotoma ma Komoro o loo faaaogaina i tusitusiga paia atoa o se faataitaiga o taunuuga o le amioleaga.

O le upu Eperu o loo faamatala ai le auala na toe tepa ai i tua le avā a Lota i le aai, ua faaalia ai e lē na o se tepa faatauvaa ae o se vaai moomoo po o le maitau.

Na saunoa Peresitene Jeffrey R. Holland:

“O le a ea le mea na fai e le avā a Lota na matua sese lava? I le avea ai ma se tagata aoga o le talafaasolopito, sa ou mafaufau e uiga i lena mea ma ofo atu se vaega o le tali. O le mea moni, o le mea na sese i le avā a Lota sa le na’o lona tilotilo i tua: i lona loto sa manao o ia e toe foi i tua. E foliga mai ae lei taitai ona ia sopoia tuaoi o le aai, ua leva ona ia misia mea sa ofoina atu e Sotoma ma Komoro ia te ia. …

“E mafai ona faapea na tepa i tua le avā a Lota faatasi ma le ita i le Alii mo mea ua Ia fai atu ia te ia e tuu.”

Sa faaaoga e le Faaola le tala i le sosola ese o le aiga o Lota mai Sotoma o se lapataiga ia tuua vave talitonuga ma olaga amioletonu ma aua nei toe foi atu i ai. Sa Ia fautuaina Ona soo ia “manatua le avā a Lota.”

O le Faaliliuga a Iosefa Samita o le Kenese 19 ua faamatala manino mai ai amioga a afafine o Lota e leaga. Sa foliga mai sa malamalama tamaitai talavou e toalua sa la faia se mea sese, a o la fuafua e faaonā lo la tama ina ia ona le iloa ai le mea na tupu.

E masani ona mafaufau le toatele pe aisea ua faaaofia ai lenei tala i le Feagaiga Tuai. E pei o le tele o tala i le Kenese, o loo faamatala mai ai le amataga. O tamaiti na fananau mai i lenei tala e faapea o ni tuaa o sa Moapi ma sa Amoni. O nei atunuu o le a fesootai mulimuli ane ma Isaraelu, o nisi taimi e feteenai ai. O le afuaga o lenei tala e lē lelei i nei tagata, lea atonu na faatupuina ai le feeseeseaiga i lo latou va ma tagata Isaraelu. O se tasi o tagata Moapi taua o Ruta, le tina o le tinamatua o Tavita ma o se tuaa o Iesu Keriso.

E ui lava na folafola mai e le Alii o le a faaauau pea le feagaiga faaAperaamo e ala atu ia Isaako, ae sa faia foi se matafaioi a Isamaeli i le faataunuuga o faamanuiaga folafolaina a Aperaamo—aemaise lava le folafolaga o le a le mafaitaulia fanau a Aperaamo “e pei o le efuefu o le eleele.” A o i ai Isamaeli i le manava o Akara, sa folafola mai e le Alii o le a Ia “matua faatoateleina lava [le fanau a Akara].” Mulimuli ane, na ta’u atu e le Alii ia Aperaamo e uiga ia Isamaeli o le a Ia avea “ma tupuga o se nuu, aua o lau fanau ia.”

I lana faaaliga vaaia o le muai olaga, na aoao ai Aperaamo o se tasi o faamoemoega o le olaga faaletino o le vaai lea pe tatou te usitai i le Atua i mea uma. Atonu o le tofotofoga sili mo Aperaamo na tupu ina ua poloaiina o ia e ositaulaga ia Isaako.

E lē o ta’ua i le tusiga o le Kenese 22 mea na mafaufau i ai Aperaamo po o Isaako i le taimi o le puapuaga. Ae o loo ta’ua i le tusi o Eperu e faapea, sa matua maoae lava le faatuatua o Aperaamo na faapea ona ia talitonu ai e mafai e le Atua ona toe faatūina Isaako mai le oti. O le tali a Aperaamo i le fesili a Isaako ua maua ai le faamaoniga sili o le faatuatua o Aperaamo. Sa ia tautino atu ia Isaako, “E aumai e le Atua se tamai mamoe māna.”

Na aoao mai Iakopo le perofeta o le Tusi a Mamona e faapea, o le usiusitai o Aperaamo sa “o se faatusa o le Atua ma lona Atalii Pele e Toatasi.” O lenei tala o se molimau mamana o le naunau o le Tama ma le Alo e ositaulaga mea uma mo lo tatou togiolaina.

I o tatou aso, na faaali mai ai e le Alii o le a tofotofoina Lana Au Paia “e pei lava o Aperaamo,” e faailoa mai ai o le a tatou feagai uma lava ma tofotofoga faigata i o tatou olaga lea e manaomia ai ona tatou faalagolago atoatoa i le Atua. Na faamalamalama mai e le Alii o tofotofoga o le a taitai atu ai i lo tatou faapaiaina. Na molimau mai Peresitene Russell M. Nelson, “O suega uma, o tofotofoga uma, o luitau ma faigata uma e te onosaia o se avanoa lea e atiina ae atili ai lou faatuatua.”

E ui e le o ta’ua mai le matua o Isaako i le Tusi Paia, ae o mea na tutupu i le tala ua faaalia ai o ia o se tagata matua—ma o se tagata naunau e auai. I se faamatalaga e uiga i le saisaiga e Aperaamo o Isaako, na saunoa ai Peresitene Dallin H. Oaks: “O le a le manatu o Isaako ina ua faia e Aperaamo se mea ese faapena? E lē o ta’ua i le Tusi Paia se tauiviga po o se tetee. O le filemu o Isaako e mafai ona faamatalaina i ni upu e uiga i lona faatuatuaina ma le usiusitai i lona tamā.”

O le taulaga a Isaako sa o se faatusa o le taulaga togiola a Iesu Keriso mo i tatou. O le siata lenei o loo faamamafaina ai mea e tutusa ai mea e lua na tutupu.

Ina ua uma ona saunia e le agelu a le Alii se tamai mamoe e sui ai Isaako e fai ma taulaga, sa faaigoa e Aperaamo le nofoaga i luga o le mauga o Ieova-irae. O le King James Version o le Tusi Paia ua faaliliuina ai lenei fuaitau o le “i le mauga o le Alii o le a vaaia ai.” Ua fautua mai r tagata atamamai e faapea, o lenei fuaitau e mafai foi ona faaliliuina o le “i luga o lenei mauga o le a vaaia ai Ieova” po o le “i le mauga, o le a tuuina mai ai Ieova.” E masani ona talitonu o le mauga lea na ave ai e Aperaamo ia Isaako e ositaulagaina, o se itu o le vaega lava lea o atumauga e tasi lea na faasatauroina mulimuli ane ai Iesu Keriso.

• Quentin L. Cook, “In the World but Not of the World,” Ensign, Feb. 2006, 53–55