Mose 1; Aperaamo 3

E lei leva ona uma ona lolomiina le Tusi a Mamona i le 1830, ae amata e le Perofeta o Iosefa Samita se faaliliuga musuia, po o se toe faafouga, o le Lomiga a King James o le Tusi Paia. O le taimi nei, o lenei faaliliuga musuia, lea na galue ai le Perofeta seia oo i lona maliu, ua lauiloa o le Faaliliuga a Iosefa Samita. O le tusi a Mose o se vaega o le Faaliliuga a Iosefa Samita o le Tusi Paia. (Mo nisi faamatalaga e uiga i le Faaliliuga a Iosefa Samita, tagai i le “O Le a le Faaliliuga a Iosefa Samita?” i le folasaga i le Fesoasoaniga mo Mau: Feagaiga Tuai.)

O leMose 1 e matuā faapitoa lava auā o se mea e matuā tulaga ese lava, e leai se isi mea e faatusatusa i ai i le Tusi Paia. O aafiaga paia o Mose o loo tusi faamaumauina i le Mose 1 e avea o se faatomuaga i le tala o le Foafoaga. E le gata i lea, o le Mose 2--8 o loo tuuina mai ai faamatalaga e le o maua i anomea talitutusa i le Kenese. O nei saofaga taua e aofia ai:

• Le taua o le Pa’ū o Atamu ma Eva ma faamalamalamaga manino o ona aafiaga i le tagata.

• O taga a Lusifelo a o lei tulieseina o ia mai le lagi.

• O le taua o le Togiola a Iesu Keriso.

• O faamaoniga na fiafia Atamu ma Eva ma a la fanau i faamanuiaga o le talalelei a Iesu Keriso.

• O le faavaeina o Siona i ona po o Enoka ma ana faaaliga vaaia o le Alii.

• O faamatalaga e faatatau i tulaga o le lalolagi a o lei i ai le Lolo, faapea foi taumafaiga a Noa e aoao atu le talalelei a Iesu Keriso ma lapataia tagata ia salamo.

I le Mose 1, sa talanoa atu Mose ia Iesu Keriso o le muai olaga, o Ieova, le Atua o le Feagaiga Tuai. Ona e tasi o Ia ma le Tama Faalelagi, e fetalai ai Iesu Keriso i nisi o taimi e pei o Ia o le Atua le Tama. O lea mea e ta’u o le faatuina aloaia faalelagi o le pule, lea na tuuina atu ai ia Keriso le pule e fetalai ai mo ma fai ma sui o le Tama.

Na aoao mai Peresitene Dallin H. Oaks: “A’o le’i tupu le Pa’ū, sa tulei tuusa’o lava le Tama Faalelagi ia Atamu ma Eva. Mulimuli ane, sa faalauiloa mai e le Tama Lona Alo e Toatasi na Fanaua, o Iesu Keriso, o lo tatou Faaola ma le Togiola ma tuuina mai le poloaiga ia te i tatou ia ‘faalogo ia te Ia.’ Mai lea faatonuga ua tatou faia ai se faaiuga e faapea, o faamaumauga faatusi paia o afioga na tulei i ai le ‘Atua’ po o le ‘Alii’ e toetoe o taimi uma lava o upu uma a Ieova, lo tatou Alii toetu, o Iesu Keriso.”

I le avea ai ma tagata faaletino, e tapulaa lo tatou vaaiga i le taimi ua tuanai ma le taimi nei ma e na o le taumate lava o le mea o le a tupu i le lumanai. E lē faapena le Atua. E silafia e Ia “le iuga mai le amataga.”

O le silafia e le Atua o mea uma—o Lona malamalama i mea uma—ua mafai ai le ata o le faaolataga. Na aoao mai le Perofeta o Iosefa Samita, “Na mafaufauina e le Ieova silisili mea uma na tutupu e fesootai ma le lalolagi, e faatatau i le ata o le faaolataga, a o lei i ai … ; o le taimi ua tuanai, o le taimi nei, ma le lumanai sa i ai ma o loo i ai, faatasi ma Ia, e tasi le ‘taimi nei’ e faavavau; … Sa malamalama o Ia i le Pa’ū o le tagata, ma lona togiolaina; Sa Ia silafia le ata o le faaolataga ma faasino mai; Sa masani o Ia i le tulaga o atunuu uma ma lo latou taunuuga; Sa Ia faatonuina mea uma e tusa ai ma fautuaga a Lona lava finagalo; E silafia e Ia le tulaga o e o ola ma e ua maliliu, ma faia le tele o sauniuniga mo lo latou togiolaina, e tusa ma o latou tulaga eseese, ma tulafono o le malo o le Atua, pe i lenei lalolagi, po o le lalolagi a sau.”

I le avea ai o se tagata o le aiga o Farao, o Mose “sa aoaoina i le poto uma lava o Aikupito; ua malosi i ana upu ma ana mea na faia.” Ae peitai, ina ua uma ona ia maua se faaaliga vaaia o le mana ma le mamalu o le Atua, sa ia faailoa atu ma le lotomaualalo e faapea, i se faatusatusaga, “o le tagata ua le aoga o ia.”

E ui lava sa lagona e Mose le lē taua pe a faatusatusa i le Atua, ae o le mea moni e faapea, e lē gata le taua o tagata uma. Na aoao mai Peresitene Dieter F. Uchtdorf, ao avea ma se sui o le Au Peresitene Sili: “O se faamatalaga feteenai lenei a le tagata: a faatusa atu i le Atua, o le tagata o le mea noa; peitai o i tatou o mea uma ia i le Atua. Pe a faatusa atu i le vaaiga o foafoaga e le mafaitaulia, atonu tatou te foliga mai o se mea noa, o loo i ai sa tatou aloiafi o le afi faavavau o loo mumu i totonu o o tatou fatafata. Ua tatou maua le folafolaga tatou te le malamalama i ai o le faaeaga—o lalolagi e leai se iuga—i o tatou lima. Ma o le faanaunauga sili lea o le Atua ia fesoasoani mai ina ia tatou ausia.”

O le liua o “le tulaga o tagata o e suia i foliga vaaia ma le natura le tumau—o lona uiga, e siitia i se tulaga faaleagaga maualuga atu—ina ia mafai ona latou tatalia le afioaga ma le mamalu o tamalii faalelagi.”

Na aoao mai Elder Neal A. Maxwell, “A o lei taitai fanau mai o Ia i Peteleema ma oo ina lauiloa o Iesu o Nasareta, o lo tatou Faaola o Ieova. I lena taimi, i lalo o le taitaiga a le Tama, o Keriso o le Alii o le atulaulau, sa foafoaina lalolagi e le mafaitaulia—o lo tatou lalolagi e na o se tasi lea (tagai i le Efeso 3:9; Eperu 1:2). E fia paneta o i ai i le atulaulau ua i ai ni tagata? Tatou te le iloa, ae ua le na o i tatou i le atulaulau! O le Atua e le o se Atua o le na o le tasi se paneta!”

“O le ola faavavau o le fuaitau lea o loo faaaogaina i tusitusiga paia e faauiga ai le ituaiga olaga o loo soifua ai lo tatou Tama e Faavavau. Sa fetalai mai le Alii, ‘O laʼu galuega ma loʼu mamalu lenei—ia aumaia le tino ola pea ma le ola faavavau o le tagata’ [Mose 1:39]. O le tino ola pea, o le ola lea e faavavau o se tagata toetu. E ala i le Togiola a Iesu Keriso, o le a maua ai e tagata uma lenei meaalofa. O le ola e faavavau, po o le faaeaga, o le ola lea i le afioaga o le Atua ma faaauau pea o ni aiga. E pei lava o le tino ola pea, o lenei meaalofa ua mafai ona maua ona o le Togiola a Iesu Keriso. Ae peitai, ina ia mautofi i le ola e faavavau, e manaomia ai lo tatou ‘usiusitai i tulafono ma sauniga o le Talalelei’ [Mataupu Faavae o le Faatuatua 1:3].”

O le tusi a Aperaamo o le “faaliliuga musuia a Iosefa Samita o tusitusiga a Aperaamo.” O loo iai faamatalaga tulaga ese e faatatau i le soifuaga ma le faiva a Aperaamo. O loo tuuina mai ai foi ni malamalamaaga taua e uiga i autu taua faaleaoaoga faavae e pei o le feagaiga faa-Aperaamo, muai faauuina, le Fono i le Lagi, ma le fuafuaina ma le Foafoaga o le lalolagi.

I le 1835, na aumai ai e se tagata na igoa ia Michael Chandler i Katelani Ohaio, ni mami [tino oti faasao] a Aikupito ma ni nai tusitaai [pa’uofevai] o ni tusitusiga faaAikupito anamua. Na faatau mai e tagata o le Ekalesia ia mami ma tusitaai o pa’uofevai. Na faaliliuina mulimuli ane e Iosefa Samita nisi o tusitusiga ma lolomiina o le “Tusi a Aperaamo” i se lomiga a le Ekalesia na ta’ua o le Times and Seasons na amata ia Mati 1842.

I aso nei, ua na o ni fasi vaega laiti o tusi tā’ai pa’uofevai uumi na umia e Iosefa Samita ua iloa o loo iai. O uluai tusi tā’ai na faatauina atu ina ua mavae le maliu o le Perofeta ma e tele vaega na leiloloa. O tusitusiga o loo i luga o nei fasi vaega na faasaoina e foliga mai e lē mai le vaega o tusitaai ia e tutusa ma le faaliliuga o loo aumaia i le tusi a Aperaamo. Atonu na faaliliuina e Iosefa le tusi a Aperaamo mai vaega o pa’uofevai o loo misi nei. O le isi tulaga e faapea, o le suesuega a le Perofeta o pa’uofevai sa avea o se mea na uunaia ai se faaaliga e uiga ia Aperaamo—e talitutusa ma le auala na maua ai e Iosefa le faaaliga e uiga i le soifuaga o Mose a o suesueina le Tusi Paia. E ui i lea, e manino lava e lei faaliliuina e Iosefa Samita le tusi a Aperaamo e faaaoga ai auala masani. Na te lei iloaina le faa-Aikupito pe na i ai foi ni meafaigaluega e manaomia e malamalama ai e aunoa ma le fesoasoani a le Alii. E pei o lana faaliliuga muamua o le Tusi a Mamona, na faaliliuina e le Perofeta o Iosefa Samita le tusi a Aperaamo e ala i faaaliga mai le Atua.

O loo i ai i le tusi o Aperaamo faamatalaga au’ili’ili e lē o maua i le Tusi Paia, ae e ōgatusa ma tusiga anamua. Peitai, o le faamaoniga sili o le moni o le tusi a Aperaamo, e lē o maua i faamaoniga faaletino po o talafaasolopito, ae o le iloiloina ma le agaga tatalo o lona anotusi ma le mana. E pei foi o isi tusitusiga paia uma, o se molimau i le moni o nei tusitusiga e muamua lava o se mataupu o le faatuatua.

O le urima ma le tumena e sau mai upu Eperu o lona uiga o “moli” ma le “atoatoa.” O le igoa Urima ma le Tumena na tuuina atu i se meafaigaluega na saunia e le Alii e fesoasoani ai i tagata taitoatasi i le mauaina o faaaliga ma le faaliliuina o gagana.

Ua faaalia mai i tusitusiga paia e sili atu ma le tasi le meafaigaluega faapena. O loo tusi faamaumauina i le Feagaiga Tuai e faapea, sa faaaoga e faitaulaga sili o Isaraelu se Urima ma se Tumena e maua ai faaaliga. I le Lalolagi Fou, sa faaaoga ai e perofeta o le Tusi a Mamona se pea ma’a sa latou ta’ua o “faamatalaupu.” Sa tuuina atu i le Perofeta o Iosefa Samita ia faamatalaupu na tuuina atu muamua i le uso o Iareto. Na faamatalaina e le Perofeta i latou o ni “maa e lua i aufana siliva—ma o nei maa, ua faamauina i se ufifatafata, ua faia ai le mea ua ta’ua o le Urima ma le Tumena.”

O le faaaliga vaaia a Aperaamo e uiga i fetu ma paneta na tupu a o malaga atu o ia i Aikupito. Sa masani tagata Aikupito anamua i le fegasoloa’i o paneta ma fetu, ma sa iai o latou talitonuga faalelotu e fesoota’i i ai. I le taimi o le faaaliga vaaia a Aperaamo, na faatonuina ai e le Alii ia Aperaamo e aoao atu upumoni sa ia aoaoina i tagata Aikupito. E mafai ona faapea sa aoaoina e le Alii ia Aperaamo e uiga i le vateatea ina ia mafai ona ia faasoa atu le talalelei i tagata Aikupito i se auala o le a latou talia ai.

O se tasi o nei fetu, ua lauiloa i le Tama Faalelagi o Kolape, e mafai foi ona avea o se faatusa o Iesu Keriso. O Kolape o le fetu sili, lea e aupito “latalata atu i le nofoalii o le Atua,” “e matua sili,” “o le foafoaga muamua” ma “faatuina … e pulea i latou uma o e o le faatulagaga e tasi.” Na iloa e Aperaamo e lē o le telē o le fetu po o le paneta e sili atu ai nai lo le isi, ae o le latalata atu ia Kolape. E moni foi lena lava mea i fanau a le Atua—o lo latou maoae ma le mamalu o le a faalagolago i lo latou latalata atu i le Atua.

O le faaupuga atamai e mafai ona faaaoga e faamatala ai fanau agaga a le Atua. E mafai foi ona faamatalaina ai “le elemene agaga sa i ai ae tatou te lei fananau mai o ni fanau agaga.” Na aoao mai Elder D. Todd Christofferson, “Ua faaalia mai e perofeta e faapea, na muai ona tatou ola o ni atamai ma sa tuuina mai ia i tatou ni foligafaatusa, po o ni tino agaga, e le Atua, o lea na avea ai ma Ana fanau agaga—o atalii ma afafine o ni matua faalelagi.”

Na aoaoina Aperaamo o ia o se tasi o le tele o agaga tautupu ma maoae i le muai olaga. Na fetalai le Atua o le a Ia faia nei agaga ma Ona “pule.” I lana faaaliga vaaia o le lalolagi o agaga, na faamatalaina ai e Peresitene Iosefa F. Samita agaga tautupu ma maoae “o e na filifilia i le amataga e avea ma pule i le Ekalesia a le Atua.” E uiga i nei agaga, na faaalia mai i le faaaliga vaaia a Iosefa F. Samita: “I le taimi lava ae lei fananau mai i latou, o i latou, faatasi ma le toatele o isi, sa latou maua a latou lesona muamua i le lalolagi o agaga ma sa saunia e o mai i le taimi e tatau ai a le Alii e galulue i lona tovine mo le faaolataga o agaga o tagata.”

O le tofiaina e le Atua o ni agaga faapitoa e faataunuu ni misiona patino i le lalolagi ua ta’ua o le muaifaauuina.

“O le muai faauuina e le faapea ua mautinoa ai o ia tagata o le a maua ni valaauga po o ni tiutetauave faapitoa. O nei avanoa e oo mai i lenei olaga o se taunuuga o le faaaogaina ma le amiotonu o le saolotoga, e pei lava o le oo mai o le muaifaauuina o se taunuuga o le amiotonu i le muai olaga. …

“O le aoaoga faavae o le muaifaauuina e faatatau i tagata uma o le Ekalesia, e le na o le Faaola, ma Ana perofeta. Ao lei foafoaina le lalolagi, sa tuuina atu ni tiutetauave faapitoa i ni tamaitai faamaoni ma sa muaifaauuina foi ni alii i ni tiute faapitoa o le perisitua. A o faamaonia e tagata lo latou agavaa, o le a tuuina atu ia i latou ni avanoa e faataunuu ai tofiga latou te maua i lena taimi.”

O le faaupuga “esetete muamua” e faasino i lo tatou muai olaga. Sa tatou tausia la tatou esetete muamua e ala i le taliaina o le fuafuaga o le faaolataga a le Tama Faalelagi ma filifili e mulimuli ia Iesu Keriso. Ona sa tatou tausia la tatou esetete muamua, sa tuuina mai ai ia i tatou le avanoa e o mai ai i le lalolagi ma maua se tino faaletino.

O lo tatou olaga faaletino i le lalolagi ua ta’ua o lo tatou “esetete lona lua.” Tatou te tausia lo tatou esetete lona lua e ala i le filifili e mulimuli ia Iesu Keriso ma maua sauniga o Lana talalelei. O i latou o e tausia lo latou esetete lona lua o le a maua le ola e faavavau ma “faaopoopo i luga o o latou ulu le mamalu e faavavau faavavau lava.” O i latou e le maua le avanoa e talia ai ma ola ai i le talalelei i le olaga nei, e tuuina atu i ai lena avanoa i le lalolagi o agaga, pe a latou oti.

• Jeffrey R. Holland, “Cast Not Away Therefore Your Confidence,” Ensign, Mar. 2000, 6–11

• Patrick Kearon, “O Le Faamoemoega o le Atua ia Aumai Oe i le Aiga,” Liahona, Me 2024, 87–89

• Andrew C. Skinner, “O Le Tusi a Aperaamo: O Se Meaalofa Sili ona Ofoofogia mo o Tatou Taimi” (tusiga e na o le faaeletonika), Liahona, Ian. 2022, Gospel Library

• Autu ma Fesili, “Aperaamo, Tusi a,” Gospel Library

• Gospel Topics Essays, “Translation and Historicity of the Book of Abraham,” Gospel Library