Kenese 3–4; Mose 4–5

I le Fono i le muai olaga i le Lagi, na tuuina mai ai e lo tatou Tama Faalelagi Lana fuafuaga o le faaolataga. Sa tusia e Elder Neal A. Maxwell, o lenei fono “sa le o se fonotaga sa lei faatulagaina lelei, pe sa o se soalaupulega i le va o fuafuaga, po o se fono e sue ai ni manatu, pe faapefea ona fatufatu le fuafuaga mo le faaolataga ma faatino. O le fuafuaga a lo tatou Tama sa iloa lava, ma o le fesili moni na tuu mai o le, o ai e tatau ona auina mai e le Tamā e faatino le fuafuaga.”

O Iesu Keriso, o le “Pele ma Filifilia mai le amataga,” na lagolagoina le fuafuaga a le Tama Faalelagi. Na fetalai o Ia, “Le Tama e, ia faia lou finagalo, ma e a oe pea le mamalu e faavavau.” I le fouvale, na fautuaina ai e Satani se isi auala e suia ai le fuafuaga ua uma ona faatuina a le Tama. Sa ia “saili e faaumatia le faitalia a le tagata” ma ia faate’aina le Atua.

O le tala ia Atamu ma Eva ua tuuina mai ai poloaiga e foliga mai e feteenai mai le Atua. Sa Ia poloaiina i laua ia maua ni fanau ae sa Ia faasāina foi i laua mai le aai i le fua o le laau e iloa ai le lelei ma le leaga. O le aai i le fua faasāina o le a avea ai Atamu ma Eva ma tagata faaletino ma mafai ai ona maua ni fanau.

Sa faamalamalama mai e Peresitene Iosefa Filitia Samita, “O le ala lenei ou te faauigaina ai le [Mose 3:16–17]: Na fetalai atu le Alii ia Atamu, o le laau lenei e iloa ai le lelei ma le leaga. Afai e te manao e nofo iinei, o lona uiga e le mafai ona e ’ai i lena fua. Afai e te manao e nofo iinei, ona Ou faasaina lea o oe ona e ’aia. Ae e mafai ona e faatino mo oe lava, ma e mafai ona e ’ai pe afai e te manao ai. Ma afai e te aia, o le a e oti.”

O le Pa’ū o Atamu ma Eva sa o se vaega manaomia o le fuafuaga o le faaolataga a le Tama Faalelagi, ae e na o le faaaogaina o le faitalia e mafai ona faailoa mai ai i le lalolagi. Na aoao mai Peresitene Boyd K. Packer, “Sa tele naua mea na tupu e faailoa mai ai le tagata i le olaga faaletino e ala i le faamalosia. O le a solia ai le tulafono tonu lava lea e taua i le fuafuaga.”

O le fuafuaga a le Atua e togiola Atamu ma Eva ina ua uma ona la filifili e aai i le fua faasāina e aofia ai le auina mai o Lona Alo e avea ma Togiola. Ona o le Togiola a Iesu Keriso, ua mafai ai e i laua—ma fanau uma a le Atua—ona aoao mai o latou aafiaga (e aofia ai a latou mea sese ma agasala) e aunoa ma le ta’usalaina i na mea. O lea, e ala i la laua lava filifiliga, na ulufale ai Atamu ma Eva i le olaga faaletino, aoaoina mo i laua lava le eseesega i le va o le lelei ma le leaga, ma maua ai le olioli o le togiola e ala ia Iesu Keriso.

Na fetalai atu le Atua ia Atamu o le a oti o ia pe afai e ai o ia i le fua o le laau e iloa ai le lelei ma le leaga. Ina ua uma ona aai Atamu ma Eva i le fua faasaina, sa faaauau pea ona la ola, ae sa faamalosia i laua e tuua le faatoaga ma le afioaga o le Alii, ma mafua ai ona la mafatia i le oti faaleagaga. E le gata i lea, ina ua pauu i la’ua, sa suia o la’ua tino i se tulaga faaletino, ma iu ai ina la oo i le oti faaletino.

E toatele tagata ua talitonu sa solia e Atamu ma Eva se agasala matuia e ala i le aai i le fua o le laau e iloa ai le lelei ma le leaga. Ua tuuina mai e le talalelei toefuataiina se vaaiga e ese mai.

Na aoao mai Peresitene Russell M. Nelson: “O lo tatou Tina mamalu o Eva—faatasi ma lana vaai mamao i le fuafuaga a lo tatou Tama Faalelagi—na taulamua i le mea ua tatou ta’ua ‘o le Pa’ū.’ O lana filifiliga atamai ma le lototele ma le faaiuga lagolagosua a Atamu na agai ai i luma le fuafuaga o le fiafia a le Atua. O i la’ua na mafai ai mo i tatou taitoatasi ona o mai i le lalolagi, maua se tino, ma faamaonia atu o le a tatou filifili e tutū atu mo Iesu Keriso i le taimi nei, pei lava ona tatou faia i le muai olaga.”

Na talanoaina e Peresitene Dallin H. Oaks le eseesega i le va o se agasala ma se solitulafono. Sa ia aoao mai: “O lea eseesega fautuaina i le va o se agasala ma se solitulafono ua faamanatu mai ai ia i tatou le faaupuina ma le faaeteete o le mataupu faavae lona lua o le faatuatua: ‘Matou te talitonu e faasalaina tagata ona o a latou lava agasala, ae le o le solitulafono a Atamu’ (ua faaopoopo le faamamafa). O loo ta’ua ai foi se tulaga masani i le tulafono. O nisi o faatinoga, e pei o le fasioti tagata, o soligatulafono aua e matuai sese lava. O isi faatinoga, e pei o le faia o se pisinisi e aunoa ma se laisene, ua na o ni soligatulafono aua ua faasaina faaletulafono. I lalo o nei tulaga iloga, o le faatinoga na fanau mai ai le Pa’u sa le o se agasala—pe matuai sese—ae o se solitulafono—e sese ona sa faasāina aloaia. O nei upu e le faaaogaina i taimi uma e faailo mai ai se mea e ese, ae o lea tulaga iloga e foliga ‘anoa i tulaga o le Pa’u.”

O le tama a le fafine e faatatau ia Iesu Keriso, o lē na tupuga mai ia Eva ma Atamu. Na folafola mai e le Atua o le a tu’imomomoina e Iesu Keriso le ulu o Satani, ae o Satani e na o le mulivae o le Faaola e mafai ona ia tu’imomoina. O lenei tautinoga ua faaalia ai le mana o Iesu Keriso i luga o Satani, e ui lava i taumafaiga a Satani e tau faasaga i le Faaola ma Lana galuega.

O lenei fuaitau o mau ua malamalama sese i ai i nisi o taimi e faapea, o lona uiga ua faatagaina se tane e le Atua e pulepuletutu pe pulea, o se mea sese lea. Na saunoa Peresitene Spencer W. Kimball: “E i ai sa’u fesili e uiga i le upu pule. E tuuina atu ai le manatu sese. Ou te fia faaaogaina le upu pulefaamalumalu.”

I o tatou aso, ua aoao mai perofeta a le Alii e tatau i tane ma avā ona vaai le tasi i le isi o ni paaga tutusa. Na aoao mai Elder Ulisses Soares: “E leai se tulaga maualuga pe faatauvaa i le sootaga faalefaaipoipoga, ma e leai foi se savali i luma po o tua o le isi. La te savavali faatasi, o ni fanau e tutusa, ma paia a le Atua. E tasi i laua i mafaufauga, naunauga, ma le faamoemoe faatasi ma lo tatou Tama Faalelagi ma Iesu Keriso, e taitai ma taialaina faatasi ai le iunite faaleaiga.”

O ofu pa’umanu na tuuina atu e le Atua ia Atamu ma Eva sa i ai se uiga faafaatusa loloto—o faatusa ia o loo faatusa foi i ofusa paia tatou te maua e ala i le faaeega paia o le malumalu. Na aoao mai Sister J. Anette Dennis, Fesoasoani Muamua i le Au Peresitene Aoao o le Aualofa: “Ina ua aai Atamu ma Eva i le fua ma tatau ona tuua le Faatoaga o Etena, sa tuuina atu ia i laua ofu pa’umanu e fai ma ufiufi mo i laua. E foliga mai sa taulagaina se manu ina ia faia ai na ofu pa’umanu—o se faatusa o le taulaga a le Faaola lava ia mo i tatou. O le Kaphar [Kafā] o le upu faavae Eperu mo le togiola, ma o se tasi o ona faauigaga o le ‘e ufia’i.’ O o tatou ofusa o le malumalu e faamanatu mai ai ia i tatou, o le Faaola ma faamanuiaga o Lana Togiola ua ufia’i ai i tatou i o tatou olaga atoa. A o tatou ofuina le ofusa o le perisitua paia i aso taitasi, e avea lena faatusa matagofie o se vaega o i tatou.”

Ua aoao mai e le Au Peresitene Sili [taiala] nei e uiga i le ofusa paia o le malumalu: “O le ofusa o le perisitua paia e faamanatu mai ai ia i tatou le veli i le malumalu, ma o lena veli o se faatusa o Iesu Keriso. Pe a e ofuina lou ofusa, ua e ofuina se faatusa paia o Iesu Keriso. O le ofuina o se faailoaga lea i fafo o lau tautinoga i totonu e mulimuli ia te Ia. O le ofusa o se faamanatu foi lea o au feagaiga o le malumalu. … A o e tausia au feagaiga, e aofia ai le avanoa paia e ofu ai le ofusa e pei ona faatonuina ai i sauniga amata, o le a e maua atili ai le alofa mutimutivale, puipuiga, malosi, ma le mana o le Faaola.”

O Kerupi o ni “faatagata e faatusa i meaola faalelagi, e le o iloa lelei foliga tonu. Ua valaauina Kerupi e leoleo nofoaga paia.” Na tuu e le Atua kerupi ma se pelu afi mumu e faatapulaa ai le oo atu i le laau o le ola. Na aoao mai le perofeta o Alema e faapea, na taofia Atamu ma Eva mai le laau ona o ona fua na semanu e mafai ai ona la ola e faavavau; nai lo lena, sa manaomia ona laua tumau i lo laua tulaga “nofo vaavaia” faaletino ina ia mafai ona laua salamo.

I le avea ai ma tagata faitino ua tuliesea mai le faatoaga, o le a oo Atamu ma Eva i tiga, faanoanoaga, ma faigata e fesootai ma lo tatou lalolagi pa’u. Ae ina ua uma ona aoaoina i la’ua e le agelu a le Alii ma faatumulia i le Agaga Paia, sa la’ua faaalia le agaga faafetai mo faamanuiaga o le a oo mai o se taunuuga o le Pa’u.

“O le Pa’ū o se vaega taua o le fuafuaga o le faaolataga a le Tama Faalelagi. E valalua le faasinoga—e faasino agai i lalo ae agai i luma. E le gata i le folasiaina mai ai o le oti faaletino ma le faaleagaga, ae ua tatou maua ai le avanoa e fananau mai ai i le lalolagi ma ia aoaoina ma alualu ai i luma. E ala i le faaaogaina ma le amiotonu o le faitalia ma lo tatou salamo faamaoni pe a tatou agasala, e mafai ai ona tatou o mai ia Keriso ma, e ala i Lana Togiola, saunia e maua le meaalofa o le ola e faavavau.”

E le o ta’ua patino i le Kenese po o le tala a Mose le mafuaaga na talia ai e le Alii le taulaga a Apelu ae le o le taulaga a Kaino. Ae peitai, o le Mose 5:18 ua tuuina mai ai faamatalaga taua e faapea “sa sili atu le alofa o Kaino ia Satani nai lo le Atua” ma “sa faatonu e Satani” Kaino e “fai se taulaga i le Alii.” Ua aoao mai e tusitusiga paia le taua o le usiusitai ma le i ai o faamoemoega amiotonu pe a faia taulaga i le Alii. Sa mulimuli Kaino i faatonuga a Satani ma sa le mama ona faamoemoega. Na aoao mai le Perofeta o Iosefa Samita e faapea, o Kaino i lana taulaga sa lei faaalia ai le faatuatua i le togiola a Iesu Keriso.

Na fetuuina e le Atua ia Kaino ona o le fasiotia o lona uso. O le fetuu a Kaino o le, o le a le ola i le eleele ni faatoaga toto mo ia, o le a fealuai solo o ia o se tagata solasola, ma o le a vavaeeseina o ia mai le afioaga o le Alii. Na tuu foi e le Atua se “faailoga” i luga o Kaino, o se faailoga lea mo isi ia aua nei tauimasui ma fasiotia o ia.

E le o manino po o le a le faailoga a Kaino, e ui ina sa taumatemate le toatele e uiga i ai. Ua faailoa mai i suesuega talu ai nei e faapea o le upu Eperu sa faaaoga mo le faailoga “e le masani ona o faatasi ma foliga vaaia po o uiga faaletino.” Nai lo se faailoga faaletino, o le faa-Eperu e faasino atu i faatinoga na avea ai Kaino ma se “‘tagata ua faailogaina,’ o lona uiga na iloa e tagata o ai o ia, ma e tatau ona taofia lo latou pa’i atu ia te ia, ae tuu atu i le Atua e taulimaina lona faasalaga.”

E tatau ona tatou ’aloese mai le taumatemate e uiga i le natura po o foliga vaaia o le faailoga na tuu i luga o Kaino, pe na faatatau foi le fetuu i se isi lava tagata e ese mai iā te ia. E teena ma ta’usalaina e le Ekalesia le faailogalanu o ituaiga ma aganuu i soo se tulaga lava. Na aoao mai Peresitene Russell M. Nelson: “Ou te faamautinoa atu ia te oe o lou tu i luma o le Atua e le filimaotia lea i le lanu o lou pa’u. O le fiafia po o le le fiafia o le Atua e faamoemoe i lou tuuto atu i le Atua ma Ana poloaiga ae e le o le lanu o lou pa’u.”

• Jeffrey R. Holland, “Pe a Faatasia le Faamasino Tonu, Alofa ma Alofa Mutimutivale,” Liahona, Me 2015, 104–6

• Autu ma Fesili, “O le Pa’ū o Atamu a Eva,” Gospel Library

• Jeffrey R. Holland, “O Le Ofusa o le Perisitua Paia,” Liahona, Sete. 2024, 4–9

• J. Anette Dennis, “Ia Outou Ofu i le Alii o Iesu Keriso,” Liahona, Me 2024, 10–13