O Le Faatomuaga

Ua mamanuina lenei punaoa e fesoasoani ai i tagata aoao ia malamalama lelei i le Feagaiga Tuai. Ua fuafuaina e fesoasoani i le suesuega o tusitusiga paia— ae le ia suia ai. E tuuina atu ai fesoasoaniga nei:

• Faamatalaga o talaaga. O malamalamaaga faasolopito, aganuu, ma le taatiaga faafaafanua lea e maua ai le talaaga i tala, aoaoga, ma aoaoga faavae o mau.

• Faamalamalamaga o gagana. Faamaninoga o faaupuga faigata, faaupuga anamua, ma faaliliuga fenumiai

• Fesoasoani i fuaitau faigata pe fenumiai. O Tusitusiga Paia o le Toefuataiga, o upu a perofeta ma aposetolo o onapo nei, ma le sikolasipi faatuatuaina e fesoasoani e faamanino ai le uiga o fuaitau faigata

• O Lauga ma Tusiga. O se vaega o le “Aoao Atili” faatasi ai ma savali mai taitai o le Ekalesia ma tusiga na gaosia e le Ekalesia e faatatau i tala ma aoaoga o loo maua i tusitusiga paia

• Ala o Faasalalauga. O ata ma vitio e mafai ona fesoasoani i le au faitau e vaai faalemafaufau ai ma malamalama i le tulaga, mea faitino, faafaailoga, ma tala o tusitusiga paia

A o e saili ia malamalama lelei i le Feagaiga Tuai, ia manatua le taua tele o le suesueina o mea o loo aoao mai e perofeta ma aposetolo soifua a le Faaola. A o e suesue, saili e aoao pe faapefea ona faaliliu, faamalamalama, ma faaaoga e auauna a le Alii ia tusitusiga paia (tagai i le “Faaaogaina o Aoaoga a Taitai o le Ekalesia ia Malamalama ai i Mau” i le Tomai mo le Suesueina o Tusitusiga Paia).

Amata lau suesuega o tusitusiga paia i le tatalo. Ole atu mo le taitaiga a le Agaga Paia, o lē e matuai manaomia lava i lau sailiga mo le mea moni. I le avea ai ma se tasi o le AigaAtua, e molimau mai le Agaga Paia i le Tama ma le Alo, aoao mai upumoni, ma faapaia i tatou. O le Agaga e aumaia mea i lo tatou manatua, tuuina mai le faamafanafanaga, faaatumulia i tatou i le faamoemoe, ma faaali mai ia i tatou le auala e faaaoga ai mea ua tatou aoaoina.