Fesoasoaniga mo Tusitusiga Paia
Suesueina o le Feagaiga Tuai

Fesoasoaniga mo Tusitusiga Paia: Feagaiga Tuai

Suesueina o le Feagaiga Tuai

Punaoa

Manatua: O le sii maia o se punavai e le‘i lolomiina e Le Ekalesia a Iesu Keriso o le Au Paia o Aso e Gata Ai e le faapea ai o le tusiga po o lona tusitala ua faamaonia e le Ekalesia pe o se sui o le tofiga aloaia o le Ekalesia.

O le a se mea e mafai ona fesoasoani ia te a’u e malamalama ai i le Feagaiga Tuai?

O le Feagaiga Tuai o loo i ai aoaoga faavae e uiga i le Atua, Lana ata o le faaolataga, ma le sootaga o feagaiga e finagalo o Ia ia i ai ma i tatou taitoatasi. Ae peitai, o le eseesega o taimi ma aganuu i le va o aso anamua ma aso nei e mafai ona faigata ai ona malamalama i nisi o vaega o le Feagaiga Tuai. O mataupu faavae ma fautuaga nei e mafai ona fesoasoani ia te oe e maua ai le malamalama ma maua ai le tulaga sili ona vavalalata a o e suesue i le Feagaiga Tuai.

Saili le taitaiga a le Agaga Paia

O le Agaga Paia o se faiaoga ma se talifaaaliga. E ala mai i le Agaga, e mafai ai e le Atua ona faateleina lo tatou malamalama ma fesoasoani ia i tatou e iloa le upumoni. Ia saili ma le agaga tatalo le mafutaga a le Agaga Paia a o e suesue. A o e faia, o le a faateleina lou malamalama i le Feagaiga Tuai.

Vaavaai mo Iesu Keriso

O loo molimau mai le Feagaiga Tuai ia Iesu Keriso. O loo i ai valoaga o Lana galuega i le olaga nei, taulaga togiola, ma le Afio Mai Faalua. E ala i faatinoga ma fetalaiga a Ieova i le Feagaiga Tuai, e mafai ai ona tatou aoao e uiga i Lona tagata,, uiga auaumama, ma aoaoga. E mafai foi ona tatou maua ai faailoga e molimau ia te Ia. O le tele o nei faailoga e tu’usa’o, ae o isi e sili atu ona faaleiloa. A o e suesue i le Feagaiga Tuai, ia gauai atu i mea o loo e aoaoina e uiga ia Iesu Keriso. E mafai ona e latalata atili atu ia te Ia a o e aoao e uiga i Lona alofa, alofa mutimutivale, ma le mana i olaga o tagata anamua.

o loo faaali atu se agelu ia Atamu ma Eva a o laua sauni e ofo atu se tamai mamoe e fai ma taulaga mū

Atamu ma Eva o Loo Osia Taulaga, saunia e Keith Larson

Faaaoga tusitusiga paia o le Toefuataiga

I lo tatou tisipenisione, ua faamanuiaina i tatou e le Alii i le tele o tusitusiga paia e lagolago ma faamanino ai aoaoga o le Feagaiga Tuai. Mo se faataitaiga, o le Tusi a Mamona o loo i ai le tele o mau faasino ma upusii mai le Feagaiga Tuai. O le faaliliuga musuia a le Perofeta o Iosefa Samita o le Tusi Paia ua aumaia ai ia i tatou ni faamalamalamaga aoga mo le tele o fuaitau o le Feagaiga Tuai. O tusi a Mose ma Aperaamo i le Penina Tau Tele o loo aofia ai faamatalaga ma malamalamaaga faaleaoaoga faavae e le o tusifaamaumauina i le Kenese. Ma o nisi o faaaliga a Iosefa Samita ua tusifaamaumauina i le Mataupu Faavae ma Feagaiga o loo faamalamalama mai ai foi pe faamanino ai fuaitau o le Feagaiga Tuai.

O le faaaogaina o tusitusiga paia o le Toefuataiga e mafai ona fesoasoani ia te oe e malamalama atili ai i le Feagaiga Tuai ma le taua o lana savali.

Faaaoga fesoasoaniga mo le suesueina o mau

O lomiga a le Au Paia o Aso e Gata Ai o le Tusi Paia o loo i ai meafaigaluega aoga mo le malamalama i le Feagaiga Tuai. E aofia ai ulutala o mataupu, vaefaamatalaga, Taiala i Tusitusiga Paia, Taiala i Autu, Bible Dictionary, ma faafanua. O le polokalama o le Gospel Library o loo aofia ai foi se matapule o le “Faauiga” mo se fesoasoani i le malamalama i le uiga o upu.

O punaoa nei o loo maua i vaefaamatalaga i lomiga a le Au Paia o Aso e Gata Ai o le Feagaiga Tuai:

  • Mau fefaasoaa’i. O mau i tusitusiga faavae atoa e faatatau i fuaitau o le Feagaiga Tuai.

  • Faasinoga i le Topical Guide (TG). O loo fautua mai ai autu e mafai ona vailiili mo suesuega atili ma ia maua ai fuaitau faaopoopo o mau e faatatau i ai.

  • O le uiga i le gagana Eperu (HEB). Isi faaliliuga mai le gagana Eperu.

  • Upu uiga tutusa faaonapo nei po o faamalamalamaga faaonapo nei (IE ma le OR). Faamaninoga mo upu ma fasifuaitau anamua pe le manino.

  • Faaliliuga a Iosefa Samita (FIS) Vaega filifilia mai le Faaliliuga a Iosefa Samita o le Tusi Paia. O le tele o iloiloga pupuu a le Perofeta o loo aofia i vaefaamatalaga, ae o vaega uumi o loo i le Faaopoopoga o le Faaliliuga a Iosefa Samita (o loo maua i le faaputuga o Fesoasoaniga mo Suesuega o Mau o le Gospel Library).

o se tamaitai o loo nofo i se laulau ma suesue i tusitusiga paia

Manatua le faamoemoega o tusitusiga paia

Sa lei faamoemoe tusitala o le Feagaiga Tuai e tuuina mai se tala faasolopito atoa i a latou tusitusiga. O lo latou faamoemoega o le aoao mai lea e uiga i le Atua ma le auala e fegalegaleai ai o Ia ma Ona tagata. Na aoao mai Elder D. Todd Christofferson, “O le faamoemoega tutotonu o tusitusiga paia uma o le faatumuina lea o ō tatou agaga i le faatuatua i le Atua le Tamā, ma Lona Alo o Iesu Keriso—fa’atuatua o lo o soifua i La’ua; fa’atuatua i le fuafuaga a le Tamā mo lo tatou tino ola pea ma le ola e fa’avavau; fa’atuatua i le Togiola ma le Toetu o Iesu Keriso, lea e galueaiina lenei fuafuaga o le fiafia; fa’atuatua ia avea le talalelei a Iesu Keriso ma ala tatou te ola ai; ma le fa’atuatua e oo ina iloa “le Atua moni e to’atasi, ma Iesu Keriso, o lē [ua Ia] auina mai’ (Ioane 17:3).”

Ia manatua le manatu o le tusitala

Talu ai o loo tatou ola i se lalolagi e matua ese lava mai tagata o e na tusia le Feagaiga Tuai, atonu tatou te faaaogaina sese ai o tatou lava manatu faaonapo nei ma tulaga faatonuina faaleaganuu i mea o loo tatou faitauina. O lenei mea e mafai ona taitai atu ai i le le femalamalamaa’i. Fai se taumafaiga e vaai i mea o loo e faitauina mai le vaaiga a tusitala musuia i lo latou uluai talaaga.

Mo nisi manatu e fesoasoani ia te oe e suesue ai tusitusiga paia, tagai i autu o loo talanoaina i le Tomai mo le Suesueina o Tusitusiga Paia (2025).

Aoao Atili

Faamatalaga

  1. Tagai Richard Neitzel Holzapfel and others, Jehovah and the World of the Old Testament: An Illustrated Reference for Latter-day Saints (2009), 3.

  2. Tagai i le Ioane 14:26; Alema 5:46.

  3. Tagai i le Alema 32:28; Moronae 10:5; Mataupu Faavae ma Feagaiga 11:12–13.

  4. 2 Nifae 25:4.

  5. Tagai i le Luka 24:25–27; Ioane 5:39; 1 Nifae 19:23; 2 Nifae 11:4.

  6. Mo se faataitaiga, tagai Gary J. Coleman, “O Le Tusi a Mamona: O Se Taiala mo le Feagaiga Tuai,” Ensign, Ian. 2002, 45–49.

  7. O faataitaiga e aofia ai le Mataupu Faavae ma Feagaiga 2; 65; 84:5–39; 107:40–57; 113; 116; 132:34–39. O le tele o isi faaaliga ua faamaumauina i le Mataupu Faavae ma Feagaiga e faaaoga ai le gagana o le Feagaiga Tuai (tagai i le Nicholas J. Frederick, “Old Wine in New Bottles: Exploring the Use of the Old Testament in the Doctrine and Covenants,” i le Prophets and Prophecies of the Old Testament, ed. Aaron P. Schade and others [2017], 231–64).

  8. D. Todd Christofferson, “O Le Faamanuiaga o Tusitusiga Paia,” Liahona, Me 2010, 34.

  9. Na ta’ua e Matthew J. Grow, o se tusitalafaasolopito o le Ekalesia: “I le avea ai ma se tusitala o talafaasolopito, ou te taumafai e mulimuli i le fautuaga a se tusitala Peretania. Fai mai a ia: ‘O le taimi ua tuanai o se atunuu ese: latou te faia ai ni mea e ese iina’ (L. P. Hartley, The Go-Between [1953], prologue). O lona uiga, a tatou asiasi i taimi ua tuanai, tatou te le mananao e avea i tatou ma se ‘turisi matagā.’ Tatou te mananao e taumafai ia malamalama i tagata i totonu o o latou lava siosiomaga ma a latou lava aganuu. Tatou te fia onosai i mea tatou te vaai i ai o o latou sese. Tatou te fia lotomaualalo e uiga i tapulaa o lo tatou lava malamalama. Ma tatou te mananao ia i ai se agaga o le alofa mama e uiga i le taimi ua tuanai” (“E Faapefea Ona Tatou Iloa Pe Faatuatuaina se Punavai e uiga i le Talafaasolopito o le Ekalesia?,” i le Quentin L. Cook, “Church History: A Source of Strength and Inspiration,” Ensign, July 2020, 15).