Faafeiloai Atu Mai le Feagaiga Tuai

O le Feagaiga Tuai o se faamaumauga o fegalegaleaiga a le Atua ma Ana fanau o le feagaiga mai le Foafoaga seia oo i le tusa ma le fa selau tausaga a o lei soifua mai Iesu Keriso. O le upu Eperu ua faaliliuina o le “feagaiga” e mafai foi ona faauigaina o le “tautoga.” I le Feagaiga Tuai, tatou te faitau ai e uiga i le talafaasolopito o le nuu o le feagaiga a le Atua. O lenei feagaiga na amata ia Atamu ma faaauau ai e ala i peteriaka maoae. Na faafouina e ala mai ia Aperaamo, Isaako, ma Iakopo ma a latou fanau, o e ua ta’ua “o le aiga o Isaraelu” po o “le fanauga a Isaraelu.“

O aoaoga ma feagaiga i le Feagaiga Tuai ua taialaina ai soo o Ieova mai le amataga. O aoaoga ma valoaga a le toatele o perofeta o le Feagaiga Tuai sa faasaosaoina mo sa Nifae ma sa Lamana i luga o papatusi apamemea. O nei aoaoga ua avea ma faavae faatusi paia na faaaoga e Nifae, Iakopo, Apinati, Alema, ma isi e aoao ai o latou tagata ma tusi a latou lava faamaumauga. O tusitusiga paia nei o ona po o Iesu, ma sa masani ona Ia faatatau i tusitusiga o le Feagaiga Tuai i le taimi o Lana galuega. O tusitala o le Feagaiga Fou e pei o Mataio, Ioane, ma Paulo sa masani ona faalagolago i le Feagaiga Tuai e avea o se faavae mo a latou molimau i le Faaola. O aoaoga ma feagaiga o le Feagaiga Tuai o loo tumau pea le avea ma faavae mo i tatou i aso nei.

E pei o tusitusiga paia uma, o le Feagaiga Tuai o loo aoao mai ma molimau mai ia Iesu Keriso. O Ia o Ieova, le Atua o le Feagaiga Tuai. Na aoao mai Peresitene Spencer W. Kimball: “O loo molimau mai perofeta o le Feagaiga Tuai mai ia Atamu e oo ia Malaki i le paia o Iesu Keriso ma lo tatou Tama Faalelagi. O Iesu Keriso o le Atua o le Feagaiga Tuai, ma o Ia lea na talanoa ma Aperaamo ma Mose. O Ia lea na musuia Isaia ma Ieremia; o Ia lea na vavalo e ala mai i na tagata filifilia ia mea e tutupu i le lumanai, e oo lava i le aso ma le itula mulimuli.”

O tusi o le Feagaiga Tuai atonu na uluai tusia i anomea e pei o pa’u o manu po o pepa ofevai. O nei tusi na tusia ma faasaosaoina o ni tusi tā’ai, o le tele lava na tusia i le gagana Eperu. Na i’u lava ina tuufaatasia tusiga anamua i se tuufaatasiga e tasi lea na ta’ua o le Tusi Paia Eperu. O le upu bible e sau mai le upu Eleni biblia, o lona uiga o “tusi.” E le o toe i ai ni uluai tusitusiga o totoe na tusia e tusitala o le Feagaiga Tuai. O tusitusiga sili ona leva o le Feagaiga Tuai o loo i ai na amata mai i le seneturi lona tolu TLM.

E i ai ni nai taumafaiga taua na faia i le aluga o seneturi e faatulaga ma faasaosao ai tusitusiga o le Feagaiga Tuai. O le lua o nei taumafaiga o le Septuagint ma le tusitusiga a le Masoretic. O le Septuagint o se faaliliuga faa-Eleni o tusitusiga o le Feagaiga Tuai na tuufaatasia i le vaitaimi o le senituri lona tolu e oo i le lona lua TLM. O le lomiga lenei o le Feagaiga Tuai sa masani ona faaaoga e tagata Iutaia i ona po o le Faaola. O le tusitusiga Masoretic na faia pe tusa o le seneturi lona fitu e oo i le sefulu TA e se vaega o tagata atamamai Iutaia e ta’ua o le au Masoretes. O lomiga faaPeretania faaonaponei o le Tusi Paia, e aofia ai le King James Version, na tosinaina e anotusi Septuagint ma le Masoretic.

E ui lava i taumafaiga a tagata faamaoni e faasaosao tusitusiga faatusipaia, ae sa iai lava tusitusiga musuia sa le’i aofia ai i le Tusi Paia. Mo se faataitaiga, e i ai ni tusi o mau o loo ta’ua i le Tusi Paia o loo misi pe leiloloa ona o ni mafuaaga eseese. E le gata i lea, na amata ona i ai suiga i anotusi faaletusi paia i le aluga o taimi. Sa masani ona taunuu i lenei mea ona o mea sese i le tusiga po o le faaliliuga. Na valoia foi e le perofeta o Nifae o le Tusi a Mamona e faapea, o nisi o upumoni manino ma taua o le a aveesea mai le Tusi Paia e tagata e i ai faamoemoega amioletonu e “faasese ai ala sa’o o le Alii” ma taitai sese ai tagata.

E ui lava i le le atoatoa o loo i ai i Tusi Paia i ona po nei, ae e le tatau ona le amanaiaina le natura faavavega o lona faasaosaoga. Na saunoa Peresitene M. Russell Ballard: “O le Tusi Paia o se vavega! O se vavega le tusifaamaumauina ma faasaosaoina o talafaasolopito paia ma faalelalolagi o le 4,000 tausaga o le Tusi Paia e perofeta, aposetolo, ma tagata lotu musuia.”

Ina ua tuufaatasia le Feagaiga Tuai, sa le o taimi uma na tuu ai ona tusi i le faasologa na tutupu ai ae sa tuufaatasia e tusa ai ma anomea o o latou mataupu. I aso anamua, sa faavasegaina ai tusi o le Feagaiga Tuai i ni vaega autu se tolu: o le Tulafono, o Perofeta, ma Tusitusiga. O le tele o Tusi Paia Kerisiano i aso nei ua faavasegaina tusi o le Feagaiga Tuai i vaega nei e fa:

1. O Le Tulafono. O tusi mai le Kenese e oo i le Teuteronome o loo tuuina mai ai se talafaasolopito o fegalegaleaiga a le Atua ma Ana fanau mai le foafoaga o le lalolagi e oo atu i le faaiuga o le soifuaga o Mose. E masani ona ta’ua i latou o le Tulafono aua o loo i ai le tulafono a Mose.

2. O Le Talafaasolopito. O tusi mai le Iosua e oo i le Eseta o loo faaauau ai le faamatalaina o le talafaasolopito o le fanauga a Isaraelu mo le silia i le 600 tausaga ina ua mavae Mose.

3. O Le Lagisolo. O tusi mai le Iopu e oo atu i le Pese a Solomona ua faatumulia i aoaoga ma faaaliga ua tusia i se faiga o tusigasolo. O le tusi o Salamo o loo i ai upu o vaega eseese o musika paia.

4. O Perofeta. O tusi mai le Isaia e oo i le Malaki, o loo i ai aoaoga a perofeta o a latou galuega sa tutupu i le taimi po o le ma’ea ai o le taimi na nofotupu ai tupu i le fanauga a Isaraelu. O nei tusi e le o i ai i le faasologa faaletalafaasolopito.

Mai le 1604 e oo i le 1611, pe tusa ma le 50 tagata atamamai na tofia e le Tupu o James I o Egelani, na galulue i se faaliliuga fou faaPeretania o le Tusi Paia. Na oo ina ta’ua o le King James Version, o nisi taimi e ta‘ua ai o le Lomiga Faatagaina.

Sa faalagolago le ‘aufaaliliu i faaliliuga na muamua atu o le Tusi Paia faaPeretania. Sa latou sa‘ili fo‘i i isi punaoa, e aofia ai tusiga o mau o le Tusi Paia i le gagana Eperu ma le Eleni. O le Lomiga a King James o le Tusi Paia lea na suesueina e Iosefa Samita. O le King James Version e tumau lona taua i Le Ekalesia a Iesu Keriso o le Au Paia o Aso e Gata Ai o se vaega ona o lona vaogagana ma le sitaili o le gagana e mafai ona vaaia i le Tusi a Mamona atoa ma le Mataupu Faavae ma Feagaiga.

Sa tusia e le Au Peresitene Sili: “E ui o isi lomiga o le Tusi Paia atonu e sili ona faigofie ona faitauina nai lo le King James Version, ae i mataupu faalea’oa’oga faavae e lagolago ai e faaaliga o aso e gata ai le King James Version e sili atu nai lo isi faaliliuga faaPeretania. … O le Tusi Paia i le gagana Peretania o loo faaaogaina e Le Ekalesia a Iesu Keriso o le Au Paia o Aso e Gata Ai.”

I le faaputuga o Tusitusiga Paia i le Gospel Library, e mafai ona e maua ai Faaliliuga ma Faatulagaga. Filifili le “Tusi Paia” e vaai ai i se lisi o faaliliuga o le Tusi Paia ua lolomiina pe ua taliaina e faaaoga e Le Ekalesia a Iesu Keriso o le Au Paia o Aso e Gata Ai.

Na faaalia e le Perofeta o Iosefa Samita se fiafia tele mo le Tusi Paia i lona soifuaga atoa. Ae peitai, na ia iloa na i ai ni faaletonu i le tusiga. Sa ia faamalamalama mai i le aluga o taimi, e tele suiga ma mea sese na fetolofi atu i le anotusi faaletusi paia, lea na mafua ai ona le malamalama tagata i ona aoaoga.

I le taumafanafana o le 1830, na amata ai e le Perofeta o Iosefa Samita ona toe iloilo le King James Version o le Tusi Paia i le gagana Peretania, ma le faamoemoe e faasa’o ma faamanino anotusi. O lenei toe iloiloga ua ta’ua o le Faaliluga a Iosefa Samita. Sa manatu Iosefa o lenei galuega o se vaega o lona valaauga faaperofeta. Na faamae’aina e Iosefa le tele o ana galuega ia Iulai 1833, e ui ina sa faaauau pea ona ia faia ni suiga laiti i tusitusiga seia oo i lona maliu i le 1844.

E ui lava o lana toe iloiloga e masani ona ta’ua o se “faaliliuga,” ae sa lei faaliliuina e le Perofeta le Tusi Paia mai se tasi gagana i se isi. Pe sa ia faaaogā fo‘i ni punaoa po o lomifefiloi faaEperu pe faaEleni. Nai lo lena, sa suesue o ia i fuaitau mai le King James Version o le Tusi Paia, ona faia lea o faasa‘oga ma faaopoopoga e pei ona sa musuia ai e le Agaga Paia. O lana galuega faaliliu muamua na faalauteleina ma faaopoopo atu i le tele o tala faaletusi paia, ma fausia ai fuaitau fou o anotusi. O faataitaiga o lenei mea e aofia ai le tusi a Mose ma Iosefa Samita—Mataio. O isi faafouga na aofia ai “suiga laiti na faaleleia ai le kalama, faamanino ai le uiga, faaonapo nei ai le gagana, faasa‘oina o manatu o aoaoga faavae, po o le faaitiitia o le le ogatusa.”

Na ta’ua e Peresitene Dallin H. Oaks e faapea “i le avea ai ma se tasi o le aiga tautupu o tusitusiga paia [o le Faaliliuga a Iosefa Samita o le Tusi Paia] e tatau ona matauina ma faamamaluina i soo se taimi pe a i ai.”

O le tele o faafouga musuia a le Perofeta e mafai ona maua i le Faaopoopoga o le Faaliliuga a Iosefa Samita i le Fesoasoani mo Suesuega i le Gospel Library. O isi toeiloiloga taua e mafai foi ona maua i vaefaamatalaga ma le faaopoopoga o le Tusi Paia o lomiga a le Au Paia o Aso e Gata Ai o le Tusi Paia.