1 Mga Hari 12–13; 17–22

Ikonsiderar ang pagsulat sa mosunod nga pangutana diha sa pisara ug ipangutana kini ngadto sa klase. Pwede nimong isulat ang mga tubag sa mga estudyante diha sa pisara.

• Unsa ang pipila ka dili seguradong sitwasyon nga giatubang sa mga young adult nga nagkinahanglan og dakong pagsalig sa Ginoo?

Dapita ang mga estudyante nga pamalandongan ang mahagiton nga mga kahimtang nga ilang giatubang karon, ilabina ang mga sitwasyon diin ang pagsalig sa Ginoo daw lisod tungod kay wala sila makahibalo sa sangpotanan sa mga butang. Samtang magtuon karon, awhaga sila nga pangitaon ang mga kamatuoran nga makatabang nila nga mas mosalig pa sa Ginoo, bisan pa og dili segurado kon unsay mahitabo sa umaabot.

Aron tabangan ang mga estudyante nga masabtan ang konteksto sa 1 Mga Hari 17, pwedeng i-summarize nimo o sa usa ka estudyante ang impormasyon sa mosunod nga parapo:

Si propeta Elias nagpuyo sa Amihanang Gingharian sa Israel sa panahon diin grabe ang pagkadaotan ug idolatriya. Gigamit niya ang gahom sa Dios aron pugngan ang pagbundak sa ulan, nga miresulta sa daghang tuig nga hulaw ug gutom. Gitagan-an sa Ginoo ang mga panginahanglan ni Elias pinaagi sa pagsugo niya nga motago duol sa sapa, diin dad-an siyag pagkaon sa mga uwak. Giingnan sa Ginoo si Elias nga moadto sa yuta sa Sarefat, diin usa ka biyuda ang magtagana para niya (tan-awa sa 1 Mga Hari 17:1–9). Daghan sa mga gihimo ni Elias niini nga asoy ang simbolikal nga magpahinumdom nato kang Jesukristo. (Kini tingali usa ka kahigayonan sa pagpaila sa kahanas nga “Pagpunting kang Jesukristo diha sa mga Kasulatan” diha sa Mga Kahanas sa Pagtuon sa Kasulatan.)

Hatagig panahon ang mga estudyante sa pagtuon sa 1 Mga Hari 17:10–24 ug sa pagrekord sa ilang mga tubag sa mosunod nga mga pangutana:

• Unsay gihimo o giingon ni Elias nga nagpahinumdom nimo kang Jesukristo?

• Unsay imong nakat-onan gikan sa biyuda bahin sa pagsalig sa Ginoo?

Human makabaton og igong panahon sa pagtuon ang mga estudyante, dapita sila sa pagpakigbahin sa ilang mga tubag niining mga pangutana ngadto sa usa ka kapares o sa gamayng grupo. Pwedeng ipakigbahin usab sa pipila ka estudyante ang ilang mga panabot ngadto sa klase. Ang usa ka pananglitan sa kamatuoran nga ilang mailhan mao kini: Dihang mosalig kita sa Ginoo, panalanginan ug tagan-an kita Niya.

Ikonsiderar ang pagdapit sa mga estudyante nga tun-an ang pipila sa mosunod nga mga kasulatan. Hangyoa sila sa pagpakigbahin og mga kamatuoran gikan niini nga mga bersikulo nga nagtudlo sa kaimportante sa pagsalig sa Ginoo. Pwede pod nilang ipakigbahin kon sa unsang paagi ang mga kamatuoran nga gitudlo niini nga mga tudling gipakita diha sa asoy ni Elias ug sa biyuda diha sa 1 Mga Hari 17.

• Mga Salmo 34:22

• Mga Panultihon 3:5–6

• Juan 6:35

• Juan 11:25

• Juan 14:6

• Alma 36:3

Pwede nimong iderekta ang atensiyon sa mga estudyante sa listahan nga imong gihimo diha sa pisara sa sinugdanan sa kalihokan sa pagkat-on, ug dayon ipangutana ang pipila ka pangutana nga parehas sa mosunod:

• Unsay nakapalisod sa pagbutang sa atong pagsalig sa Ginoo niini nga mga sitwasyon?

• Unsa ang pipila ka paagi nga mapakita sa mga tawo ang ilang pagsalig sa Ginoo niini nga mga sitwasyon?

Dapita ang mga estudyante nga mogahin og panahon sa pagsulat bahin sa panahon diin sila o ang ilang kaila kinahanglang bug-os nga mosalig sa Ginoo bisan wala mahibalo sa sangpotanan. Pwede usab nilang ihulagway kon sa unsang paagi nila nakita ang mga panalangin sa Ginoo gikan sa maong mga kasinatian. Pwede nimong dapiton ang pipila ka andam nga estudyante nga ipakigbahin diha sa klase ang ilang mga kasinatian.

Ikonsiderar ang pagpakita og usa ka garapon nga naay gamayng lana ug laing garapon nga naay gamayng harina. Dapita ang mga estudyante nga pamalandongan kon unsaon nila pagsundog ang ehemplo sa biyuda sa Sarefat ug mobutang sa ilang pagsalig ngadto sa Ginoo taliwala sa lisod nga kahimtang nga ilang giatubang. Awhaga sila nga irekord ang ilang mga hunahuna o mga impresyon.

Balik ngadto sa “Mga Opsiyon sa Kalihokan sa Pagkat-on.”

Pwede kang magsugod pinaagi sa pagpakigbahin sa mosunod nga pamahayag ni Presidente Thomas S. Monson ug hisgotan ang nag-uban nga mga pangutana:

Diin kanhi ang mga sumbanan sa Simbahan ug mga sumbanan sa katilingban hapit nahiangay, karon aduna nay halapad nga kal-ang taliwala kanato, ug kini mas nagkadako pa. (“Gahum sa Priesthood,” Liahona, Mayo 2011, 66)

• Unsa ang pipila ka pananglitan nga inyong mahunahunaan nga naghulagway sa gihulagway ni Presidente Monson diha sa iyang pamahayag?

Ipasabot nga nagpuyo usab si propeta Elias sa panahon diin dakog kalainan ang mga sumbanan sa iyang katilingban ug mga sumbanan sa Ginoo. Panahon sa pagmando ni Hari Ahab ug Rayna Jezebel diha sa Amihanang Gingharian sa Israel, daghang Israelihanon ang misulay sa pagsimba sa bakak nga mga dios, apil ni Baal, samtang nagsimba ni Jehova. Gihagit ni Elias ang gatosan ka bakak nga mga propeta sa usa ka pakigsangka didto sa Bukid sa Carmel aron pamatud-an kon si Baal o si Jehova ba ang matuod nga Dios (tan-awa sa 1 Mga Hari 18:17–21). Sa wala pa magsugod ang sangka, si Elias nakigsulti ngadto sa mga tawo.

Dapita ang mga estudyante nga basahon ang 1 Mga Hari 18:21, nga pangitaon ang pangutana ni Elias sa mga Israelihanon. Dayon, pwede kang mangutana:

• Unsaon ninyo pag-summarize ang mga pulong ni Elias niini nga mga bersikulo? (Kon kinahanglan, pwedeng basahon sa mga estudyante ang entry para sa 1 Mga Hari 18:21 diha sa Mga Tabang sa Pagtuon sa Kasulatan: Daang Tugon.)

• Unsa nga kamatuoran ang atong makat-onan gikan sa pangutana ni Elias ngadto sa mga tawo? (Mailhan tingali sa mga estudyante ang kamatuoran nga parehas sa mosunod: Dili ta pwedeng mosunod sa Dios samtang nagsunod sa bakak nga mga dios ug dili matarong nga mga impluwensiya.)

Ikonsiderar ang pagpakigbahin ug paghisgot sa mosunod nga pamahayag ni Elder D. Todd Christofferson:

Karon si Elijah moingon:

• Bisan ang Dios, ang atong Langitnong Amahan, anaa, o wala Siya, apan kon Siya anaa, simbaha Siya.

• Bisan si Jesukristo mao ang Anak sa Dios, ang nabanhaw nga Manunubos sa katawhan, o Siya dili, apan kon Siya mao, sunda Siya. …

Sa pagpatunhay sa kalig-on ug pagkamakanunayon sa pagtuo kang Kristo magkinahanglan nga ang ebanghelyo ni Jesukristo modulot sa kasingkasing ug kalag sa usa ka tawo, nagpasabot nga ang ebanghelyo mahimong dili lamang usa sa daghang mga impluwensya sa kinabuhi sa tawo apan ang makahuloganong pagtutok sa iyang kinabuhi ug kinaiya. (“Lig-on ug Makanunayon diha sa Hugot nga Pagtuo kang Kristo,” Liahona, Nob. 2018, 30, 31)

• Unsa ang pipila ka paagi diin ang mga tawo sa atong panahon mosulay sa pagsunod sa Dios samtang nagsunod sa bakak nga mga dios ug dili matarong nga mga impluwensiya?

• Unsay inyong nahibaloan bahin sa Dios nga makaimpluwensiya ninyo sa paghimo Kaniya ug sa Iyang ebanghelyo nga “makahuloganong pagtutok” sa inyong kinabuhi?

Dapita ang mga estudyante sa pagbasa sa 1 Mga Hari 18:22–39, nga pangitaon kon unsay nahitabo kang Elias ug sa mga pari ni Baal. (Pwede usab basahon sa mga estudyante ang entry para sa 1 Mga Hari 18:22–46 diha sa Mga Tabang sa Kasulatan: Daang Tugon.) Ikonsiderar ang pagpanguta sama sa mosunod aron tabangan ang mga estudyante nga ipakigbahin ang ilang mga panabot:

• Ngano kaha nga gibubuan ni Elias og daghang tubig ang sakripisyo ug ang altar?

• Sa unsang paagi kini nga asoy nakatabang ninyo aron masabtan ang gahom sa Dios?

Pwede nimo kining taposon pinaagi sa dungan nga pagkanta o pagbasa sa mga liriko sa himno nga “Kinsay Dapig sa Dios?” (Mga Himno, 161). Dapita ang mga estudyante nga pamalandongan ug isulat ang mga paagi nga mas bug-os nilang mahatag ang ilang kaugalingon sa pagsunod sa Ginoo.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagsugod pinaagi sa paghisgot sa mosunod nga pahayag ni Elder Gary E. Stevenson:

Sa tibuok sa akong pagpangalagad, akong nakit-an ang malukpanon nga pagtinguha sa tanan aron masayod kon unsaon sa pagdapit ug sa pag-ila ang mga pag-aghat sa Espiritu Santo. (“Mga Pag-aghat sa Espiritu,” Liahona, Nob. 2023, 43)

Nganong lisod usahay para nato ang pagkahibalo kon unsaon pagdapit ug pag-ila ang mga pag-aghat sa Espiritu Santo?

Niini nga kalihokan sa pagkat-on, pwede nimong tabangan ang mga estudyante sa pagpraktis ang kahanas nga “Pagpangutana Nga Magdapit og Makugihon nga Pagkat-on” gikan sa Mga Kahanas sa Pagtuon sa Kasulatan. Dapita ang mga estudyante nga isulat ang usa o kapin pa sa ilang mga pangutana bahin sa pagdapit ug pag-ila sa mga pag-aghat gikan sa Espiritu. Samtang magtuon, awhaga sila nga pangitaon ang mga kamatuoran nga makatabang nila sa pagtubag sa ilang mga pangutana.

Ipasabot nga human mapildi ni Elias ang bakak nga mga propeta ni Baal, gusto sa asawa ni Ahab nga si Jezebel nga patyon si Elias. Miikyas siya gikan sa yuta sa Israel ug mibiyahe og daghang adlaw hangtod nga naabot siya sa Bukid sa Horeb, laing ngalan sa Bukid sa Sinai.

Dapita ang mga estudyante nga basahon ang 1 Mga Hari 19:9–12 ug ang entry alang niini nga mga bersikulo diha sa Mga Tabang sa Kasulatan: Daang Tugon, nga pangitaon kon unsay nahitabo samtang si Elais miadto sa bukid. Mahimo ka nga mangutana sama sa mosunod:

• Unsay atong makat-onan gikan niini nga asoy bahin kon sa unsang paagi ang Ginoo makigsulti kanato? (Tabangi ang mga estudyante nga mailhan ang kamatuoran nga sama niini: Ang Ginoo sagad makigsulti nato bisan sa hinay, hinagawhaw nga tingog sa Espiritu.)

• Ngano kaha nga importante nga makahibalo nga ang Ginoo kasagaran makigsulti kanato sa hinay, hinagawhaw nga tingog? Sa unsang paagi nagpakita kini sa Iyang kinaiya ug mga hiyas?

• Unsaon nato pagpalig-on ang atong abilidad sa pag-ila sa hilom nga mga pag-aghat sa Balaang Espiritu?

Hatagi og kahigayonan ang mga estudyante nga mogahin og panahon sa pagtuon sa mga pangutana nga ilang gisulat sa sinugdanan sa kalihokan sa pagkat-on. Pwede nilang pangitaon sa mga kasulatan, mga pagtulun-an sa mga lider sa Simbahan, o uban pang kapanguhaan diha sa Librarya sa Ebanghelyo aron pangitaon ang mga tubag sa ilang mga pangutana. Ang mga pananglitan sa mga kapanguhaan nga mga pwede nilang magamit naglakip sa Giya ngadto sa mga Kasulatan, “Pagpadayag” (Librarya sa Ebanghelyo); Mga Hilisgotan ug mga Pangutana, “Pagpadayag” (Librarya sa Ebanghelyo); o pakigpulong ni Elder Gary E. Stevenson nga nag-ulohan og “Mga Pag-aghat sa Espiritu” (Liahona, Nob. 2023, 42–45).

Human makabaton og panahon ang mga estudyante nga mangita og mga tubag, dapita sila nga ipakigbahin ang ilang nakaplagan, una ngadto sa ilang kapares o sa gamayng grupo ug dayon ngadto sa klase. (Pahinumdomi ang mga estudyante nga kon dili pa nila makaplagan ang mga tubag, makapadayon sila sa pagtinguha sa mga tubag pinaagi sa pag-ampo, pagpatambag niadtong ilang gisaligan, ug ubang balaanong gitudlo nga mga kapanguhaan.)

Ikonsiderar usab ang paghisgot sa mga pangutana nga sama sa mosunod:

• Unsay inyong ikatambag sa ubang young adult nga naay mga pangutana sama sa inyo?

• Sa unsang paagi ang pagpaningkamot nga ilhon ug mosanong sa mga pag-aghat makapalig-on sa inyong relasyon sa Langitnong Amahan ug ni Jesukristo?

• Unsa ang mga pananglitan kon sa unsang paagi bag-ohay lang nga nakigsulti ang Ginoo nimo pinaagi sa hinay, hinagawhaw nga tingog sa Espiritu? (Pahimangnoi ang mga estudyante nga dili ipakigbahin ang mga kasinatian nga personal ra kaayo.)

Dapita ang mga estudyante nga isulat ang mga lakang nga gusto nilang himoon aron mas mailhan o madawat ang pagpadayag gikan sa Espiritu Santo. Pagpamatuod sa mga kamatuoran nga inyong nahisgotan karon.

Balik ngadto sa “Mga Opsiyon sa Kalihokan sa Pagkat-on.”