Exodo 14–18

Dapita ang mga estudyante nga hunahunaon ang mga sitwasyon nga tingali atubangon sa mga young adult nga mahiimong bation nila nga natanggong o mahadlok. Ikonsiderar ang pagsulat sa ilang mga tubag diha sa pisara. Pwede usab nimong dapiton ang mga estudyante nga hilom nga mamalandong sa mga panahon dihang personal silang mibati nga natanggong ug dili nila makita kon unsaon pagpadayon sa ilang kinabuhi. Samtang magtuon karon, awhaga sila nga tinguhaon ang pagdasig gikan sa Espiritu Santo aron tabangan sila kon unsay angay nilang tubag sa ingon niini nga mga sitwasyon.

Pahinumdomi ang mga estudyante nga human makabiya sa Ehipto si Moises ug ang mga anak sa Israel, nagkampo sila duol sa Pulang Dagat. Dihang gigukod sila sa Paraon ug sa iyang kasundalohan, wala nay kaadtoan ang mag Israelita ug dili na sila makaikyas (tan-awa ang Exodo 14:1–9). Hangyoa ang mga estudyante nga ihanduraw kon unsa kahay ilang bation sa ingon niana nga situwasyon. Pwede nimong ipakita ang hulagway sa Pulang Dagat aron tabangan silang mahanduraw ang eksena.

Ipasabot nga makatabang tingali ang pagtandi sa reaksiyon sa mga Israelita niini nga sitwasyon ngadto sa tubag ni Moises. (Makakuha kag ideya kon unsaon pagpaila kini nga kahanas diha sa “Looking for Contrasts in the Scriptures” diha sa Mga Kahanas sa Pagtuon sa Kasulatan.)

Dapita ang mga estudyante nga basahon ang Exodo 14:10–14, nga pangitaon ang kalainan sa reaksiyon sa mga Israelita niini nga sitwasyon ug ang tubag ni Moises. Pwede usab kamong magkauban nga hisgotan ang mosunod nga mga pangutana:

• Asa nagpunting ang mga Israelita niini nga mga kahimtanga? Asa nagpunting si Moises?

• Unsay imong makat-onan niini nga pagtandi? (Gawas sa mga kamatuoran nga ipakigbahin tingali sa mga estudyante, tabangi sila nga masabtan ang mosunod: Madaog nato ang kahadlok dihang mobarog tag lig-on ug motutok sa Ginoo.)

Dapita ang mga estudyante nga tun-an ang pagtabok sa Israel diha sa Pulang Dagat diha sa Exodo 14:15–31. Ipunting ang ilang atensyon sa ilang makat-onan bahin sa Ginoo gikan niini nga mga bersikulo. Human ang igong panahon, dapita ang klase nga ipakigbahin ang mga panabot pinaagi sa paghisgot sa mosunod nga mga pangutana uban sa ilang pares:

• Unsay inyong nakat-onan bahin sa Ginoo gikan niini nga asoy?

• Sa unsang paagi ang paghinumdom sa mga pagtabok sa mga Israelita sa Pulang Dagat motabang nato sa mga kalisdanan nga atong giatubang karon?

Ikonsiderar ang pagdapit sa mga estudyante nga hunahunaon ang mga panahon sa ilang kinabuhi dihang gitabangan sila sa Ginoo samtang nagpakita silag hugot nga pagtuo Kaniya panahon sa mga pagsulay. Pwede nimong dapiton ang mga estudyante nga andam nga ipakigbahin ang ilang mga kasinatian. Ikonsiderar pod ang pagpasalida sa bidyo nga “Feeling the Lord’s Love and Goodness in Trials” (4:17).

4:22

Balik ngadto sa “Mga Opsiyon nga Kalihokan sa Pagkat-on.”

Ikonsiderar ang pagpakita sa mosunod nga pahayag ug paghatag sa mga estudyante og panahon nga hilom nga timbangtimbangon ang ilang kaugalingon gamit ang sukdanan gikan sa 1 (dili gyod tinuod bahin kanako) ug 5 (halos kanunayng tinuod bahin kanako).

1. Mibati ug nagpahayag kog pasalamat sa Dios.

2. Sagad kong magreklamo dihang lisod ang kahimtang.

3. Naningkamot kong magmapasalamaton sa Dios bisag unsa pay kahimtang.

Pahinumdomi ang mga estudyante nga ang mga Israelita nakaatubang og daghang kalisdanan dihang mibiya sila sa Ehipto. Dapita sila nga tun-an ang mosunod nga mga tudling, nga pangitaon kon unsay tubag sa mga Israelita sa ilang mga kalisdanan:

• Exodo 15:22–25

• Exodo 16:1–8

• Exodo 17:1–6

Human matun-i sa mga estudyante kini nga mga bersikulo, ikonsiderar ang pagpangutana:

• Unsay mipatigbabaw nimo bahin sa tubag sa mga Israelita ngadto sa ilang mga kalisdanan?

• Nganong sayon ra kaayong magbagulbol o magreklamo dihang dili masunod ang atong gusto?

• Unsay kalainan sa pagbagulbol ug pagreklamo kaysa sa hustong pagsulti sa imong mga gikabalak-an o pagpangayog tabang?

Ikonsiderar ang pag-apod-apod sa handout nga nag-ulohan og “Pagdaog sa mga Tentasyon sa Pagbagulbol [Overcoming the Temptation to Murmur]” ug ang pagdapit sa mga estudyante nga kompletohon kini nga silasila ra o uban sa usa ka pares.

Human makompleto sa mga estudyante ang handout, dapita silang ipakigbahin ang pipila sa mga baroganan nga ilang nailhan. Apil tingali sa mga ehemplo sa mga kamatuoran nga ilang hisgotan mao kini: Dihang magbagulbol kita batok sa tinawag nga mga alagad sa Ginoo, nagbagulbol kita batok sa Ginoo. Ang pagpunting ngadto ni Jesukristo magtugot nato nga mobatig kalipay, bisag unsa pay kahimtang. Ang pagkamapasalamaton motabang nato nga makasinatig kalipay.

Pwede usab nimong hisgotan ang mga pangutana sama sa mosunod:

• Sa inyong hunahuna, sa unsang paagi makatabang ang mga kamatuoran nga inyong nailhan aron mabuntog ang tentasyon nga magbagulbol?

• Nganong ang pagpunting ngadto ni Jesukristo makatabang aron mobati kitag kalipay bisag unsa pay kahimtang?

• Unsay nakatabang ninyo nga mamenosan ang pagbagulbol ug mas mosalig pa sa Dios?

Pwede nimong ipahunahuna sa mga estudyante kon unsay pwedeng mahimo nila aron malikayan ang pagbagulbol. Dapita silang irekord ang mga panabot ug espirituwal nga mga pag-aghat nga ilang nadawat.

Balik ngadto sa “Mga Opsiyon nga Kalihokan sa Pagkat-on.”

Sugdi pinaagi sa pagdapit sa mga estudyante nga pamalandongan kon nganong kinahanglan silang mosalig ni Jesukristo kada adlaw. Usa ka paagi sa paghimo niini mao ang pagbasa, pagkanta, o pagpaminaw sa himno nga “Nagkinahanglan Ko Nimo sa Matag Takna” (Mga Himno) o uban pang himno bahin sa pagsalig ngadto ni Jesukristo. Awhaga ang mga estudyante nga ipakigbahin sa klase o sa usa ka pares ang mga pulong o hugpong sa mga pulong nga makahuloganon para nila ug kon ngano.

Hangyoa ang mga estudyante nga pamalandongan ang ilang mga paningkamot sa pagsalig sa Ginoo kada adlaw. Pwede silang maghunahuna og pihong mga aksiyon nga ilang gihimo nga nagpakita sa ilang pagsalig sa Ginoo. Pwede usab nilang ikonsiderar ang mga angay nilang pauswagon. Samtang magtuon, awhaga sila nga mahimong sensitibo sa mga pag-aghat sa Espirtu bahin kon sa unsang paagi sila mas bug-os nga mosalig sa Ginoo kada adlaw.

Ikonsiderar ang pagpakita og hulagway nga nagpakita sa mga anak sa Israel nga namunit og mana. Pahinumdomi ang mga estudyante nga human maluwas ang mga Israelita gikan sa Ehipto ug sa milagrosong pagtabok sa Pulang Dagat, sila nag-atubang sa daghang kalisdanan sa kamingawan. Usa niini nga mga kalisdanan mao ang kawalay pagkaon. Agig tubag, gihatag sila sa Ginoo og mana gikan sa langit aron dili sila magutman.

Hatagig panahon ang mga estudyante nga tun-an nga mosunod nga mga kasulatan. Samtang magtuon sila, dapita sila sa pagrekord sa espirituwal nga mga leksiyon nga ilang makat-onan gikan niini nga pagtulun-an bahin sa mana.

• Exodo 16:2–5, 14–21, 31

• Juan 6:31–35, 47–51

Kon mahuman nag tuon ang mga estudyante, dapita sila nga ipakigbahin ang ilang mga panabot ngadto sa gagmayng mga grupo. Pwede nimong ipakita ang mosunod nga mga pangutana ug dapiton ang kada estudyante nga mopilig bisag usa nga tubagon:

• Unsang espirituwal nga mga leksiyon ang inyong nakat-onan gikan sa mga pagtulun-an bahin sa mana?

• Pinaagi niini nga mga pagtulun-an unsay inyong nasabtan bahin sa pagsalig kang Jesukristo?

• Unsay atong mahimo karon nga parehas sa pagpundok sa mana?

Dapita ang pipila ka estudyante nga ipakigbahin ang mga panabot gikan sa ilang mga panaghisgot uban sa klase. Samtang makigbahin ang mga estudyante, pwede nilang mailhan ang mga kamatuoran nga parehas ani: Kon kada adlaw tang mosalig sa Ginoo, panalanginan kita Niya og espirituwal nga pagkaon. Samtang kita naghinumdom sa Ginoo matag adlaw, ang atong pagsalig diha Kaniya motubo.

Aron tabangan ang mga estudyante nga mas masabtan kini nga mga kamatuoran, ikonsiderar ang pagpasalida sa bidyo nga “Daily Bread: Pattern” (2:51). Mahimo usab kang mangutana nga sama sa mosunod:

2:52

• Nganong ang pagsalig sa Ginoo kada adlaw mas maayo kaysa talagsa, gamhanan nga espirituwal nga kasinatian?

• Unsa ang pipila ka paagi nga nadawat ninyo ang kusog ug pagkaon kada adlaw pinaagi ni Jesukristo? Unsay nausab sa inyong kinabuhi tungod niini nga mga binuhatan?

Ikonsiderar ang pagpakigbahin sa mosunod nga pamahayag ni Presidente Russell M. Nelson:

Uban sa makalilisang nga gikusgon, ang usa ka pagpamatuod nga dili maalimahan matag adlaw “sa maayong pulong sa Dios” [Moroni 6:4] mahagsa. Sa ingon, ang pangontra sa plano ni Satanas klaro: nga kita nagkinahanglan og inadlaw nga mga kasinatian sa pagsimba sa Ginoo ug pagtuon sa Iyang ebanghelyo. (“Ang Gahom sa Kadasig sa Espirituhanong Paglambo,” Liahona, Mayo 2022, 99)

Hatagig panahon ang mga estudyante nga ikonsiderar kon unsay ilang himoon aron mas bug-os pa nga mosalig sa Ginoo kada adlaw. Awhaga sila nga isulat ang ilang mga tumong ug ang bisan unsang espirituwal nga impresyon nga ilang nadawat.

Balik ngadto sa “Mga Opsiyon nga Kalihokan sa Pagkat-on.”