“Ang Buhi nga Kristo: Ang Pagpamatuod sa mga Apostol,” Manwal sa Magtutudlo sa Institute sa Daang Tugon (2026)

“Ang Buhi nga Kristo: Ang Pagpamatuod sa mga Apostol”

Aron saulogon ang pagkatawo sa Manluluwas kapin sa duha ka libo ka tuig na ang milabay, ang Unang Kapangulohan ug ang Korum sa Napulog Duha ka Apostoles mipahayag sa ilang pagsaksi ni Jesukristo diha sa “Ang Buhi nga Kristo: Ang Pagpamatuod sa mga Apostol.” Gipamatud-an niini nga pagpahayag ang “dili hitupngan nga kinabuhi ug sa walay kataposan nga gahom sa labing dako nga sakripisyo sa pag-ula [sa Ginoo].”

Pag-awhag og Personal nga Pagtuon

Sa wala pa ang klase, ikonsiderar ang pagpadala sa mga estudyante og usa o daghan pa sa mosunod nga mga mensahe o pipila sa inyong kaugalingong mensahe:

Samtang sugdan nimo pagtuon ang Daang Tugon, basaha ang “Ang Buhi nga Kristo: Ang Pagpamatuod sa mga Apostol” (Librarya sa Ebanghelyo). Pangitaa ang mga kamatuoran bahin ni Jesukristo nga makatabang aron mas modako ang imong pagpasalamat ug gugma Kaniya.
Gitambagan kita sa mga lider sa Simbahan sa “pagseguro nga ang atong pagsaulog sa labing importante nga panghitabo nga nahitabo sukad dinhi niini nga yuta—ang Pag-ula ug Pagkabanhaw ni Jesukristo—naglakip sa balaan nga katahoran ug pagtahod nga angayan ang Ginoo” (Gary E. Stevenson, “Ang Labing Nindot nga Istorya sa Pasko sa Pagkabanhaw nga Sukad Nasugilon,” Liahona, Mayo 2023, 6). Aron tabangan kang mapunting ang imong hunahuna ug kasingkasing kang Jesukristo alang niini nga Pasko sa Pagkabanhaw, tun-i ang “Ang Buhi nga Kristo: Ang Pagpamatuod sa mga Apostol.” Bantayi kon unsay imong nakat-onan ug gibati bahin sa Manluluwas.
Giawhag ta ni Elder Gerrit W. Gong nga “magmaya kita diha ni Jesukristo, sa panahon sa Pasko ug sa kada adlaw” (“Si Kristo, Ang Atong Manluluwas, Natawo” [Debosyonal sa Pasko sa Unang Kapangulohan, Dis. 3, 2023], Librarya sa Ebanghelyo). Paggahin og panahon sa pagtuon sa “Ang Buhi nga Kristo: Ang Pagpamatuod sa mga Apostol.” Unsay imong nakaplagan nga makatabang nimo sa pagmaya diha kang Kristo?

Mga Pangutana ug Pagpakigbahin

Hatagig panahon ang mga estudyante sa pagpangutana ug pagpakigbahin sa mga panglantaw ug mga kamatuoran nga ilang nadiskobrehan diha sa ilang personal nga pagtuon sa “Ang Buhi nga Kristo.”

Pagbansay sa Kahanas

Samtang imong dapiton ang mga estudyante sa pagtuon sa “Ang Buhi nga Kristo” panahon sa leksiyon, pwede nimong ikonsiderar ang pagrebyo sa kahanas nga “Pagpunting kang Jesukristo diha sa mga Kasulatan” diha sa Mga Kahanas sa Pagtuon sa Kasulatan.

Pagpalambo sa Atong Pagtudlo ug Pagkat-on

Paghimo og mga sitwasyon ug mga oportunidad alang sa mga tigkat-on nga matudloan pinaagi sa Espiritu Santo. Kay ang Espiritu Santo man ang tinuod nga magtutudlo, himoa ang kahimtang sa classroom diin makapuyo ang Espiritu. Pahinumdomi ang mga estudyante sa ilang tahas sa paghimog espirituwal nga palibot. Pangitag mga paagi diin matabangan nimo ang mga tigkat-on nga madiskobrehan kon sa unsang paagi ang Espiritu makig-istorya nila. Hatagig igong panahon ang mga estudyante sa pagpamalandong ug pagsulat bahin sa ilang nakat-onan gikan sa Espiritu Santo.

Kalihokan sa Pagkat-on

Sa unsang paagi ang pagtuon sa “Ang Buhi nga Kristo” makapalalom sa akong koneksiyon ngadto sa akong Manluluwas?

Ipakita ang hulagway ni Jesukristo, parehas sa naa sa sinugdanan sa leksiyon. Pwede usab nimong dapiton ang mga estudyante nga pangitaon ang ilang paboritong hulagway sa Manluluwas. Dapita sila nga hilom nga mamalandong ug magsulat og personal nga tubag sa pag-aghat nga sama ani:

Kinsa si Jesukristo para nimo? Unsay imong hunahuna, pagbati, o gituohan bahin Kaniya?

Pahinumdomi ang mga estudyante nga niadtong Enero 1, 2000, gipakigbahin sa Unang Kapangulohan ug Kurom sa Napulog Duka ka Apostoles ang ilang pamatuod kang Jesukristo diha sa “Ang Buhi nga Kristo: Ang Pagpamatuod sa mga Apostol.”

Ipasabot nga giawhag kita sa mga lider sa Simbahan nga tun-an kining balaan nga dokumento. Ikonsiderar ang dungan nga pagbasa sa pipila o tanan sa mosunod nga mga pahayag aron makapangandam ang mga estudyante sa pagtuon sa “Ang Buhi nga Kristo.” Dapita ang mga estudyante sa pagpakigbahin sa unsay mipatigbabaw para nila.

Kita motan-aw, maminaw, mobasa, magtuon, ug mopakigbahin sa mga pulong sa propeta aron mapasidan-an ug maprotektahan. Sama pananglit, “Ang Pamilya: Usa ka Pamahayag ngadto sa Kalibutan” gihatag dugay na sa wala pa nato masinati ang mga hagit nga karon giatubang sa pamilya. “Ang Buhi nga Kristo: Ang Pagpamatuod sa mga Apostoles” giandam nang daan alang sa panahon nga mas gikinahanglan kini nato. (Robert D. Hales, “Kinatibuk-ang Komperensya: Paglig-on sa Pagtuo ug Pagpamatuod,” Liahona, Nob. 2013, 7)

Daghang miyembro ang nakasag-ulo sa [mga kamatuoran nga naa sa “Ang Buhi nga Kristo”]. Ang uban walay nahibaloan bahin niini. Samtang magtinguha kamo nga mas makat-on pa mahitungod ni Jesukristo, moawhag ako kaninyo sa pagtuon sa “Ang Buhi nga Kristo.” (Russell M. Nelson, “Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 40)

Samtang akong natun-an ang kinabuhi ug mga pagtulun-an ni Jesukristo nga mas may tumong ug mipasalig sa “The Living Christ [Ang Buhi nga Kristo]” sa panumdoman, ang akong pasalamat ug gugma alang sa atong Manluluwas mitubo. Ang tanang kapahayag [sentence] nianang dinasig nga dokumento naglangkob og wali ug nakapadugang sa akong pagsabot sa Iyang balaang mga tahas ug yutan-ong misyon. (Jean B. Bingham, “Nga ang Imong Hingpit nga Kalipay Mapuno,” Liahona, Nob. 2017, 85)

Aron giyahan ang mga estudyante sa ilang pagtuon sa “Ang Buhi nga Kristo,” ikonsiderar ang pagpakita sa mosunod nga mga instruksiyon.

Tun-i ang “Ang Buhi nga Kristo.” Markahi ang mga pulong o hugpong sa mga pulong nga makahuloganon para ninyo.
Pangitaa ang mga kamatuoran gikan sa “Ang Buhi nga Kristo” nga gipasiugda diha sa Daang Tugon o konektado sa mga kasulatan sa Daang Tugon. Pananglitan, unsay inyong nakaplagan sa “Ang Buhi nga Kristo” nga konektado sa mga kamatuoran diha sa mosunod nga mga tudling sa Daang Tugon? Genesis 1:1–2, 31 (tan-awa usab ang Moises 2:1); Job 19:25–26; Salmo 9:7–8; Mga Panultihon 3:5–6; Isaias 12:2; 45:23; 53:3–5.
Irekord ang inyong mga nahunahunaan ug mga impresyon bahin kang Jesukristo samtang nagtuon.

Aron tabangan ang mga estudyante nga makakat-on gikan sa usag usa, dapita sila nga ipakigbahin ang ilang mga panabot diha sa gagmayng grupo. Dayon mahimo nimong dapiton sila sa paghisgot sa mosunod nga mga pangutana:

Hunahunaa ang mga kamatuoran nga inyong nadiskobrehan bahin sa Manluluwas. Gitabangan kamo niini nga masabtan ang unsa bahin sa tahas sa Manluluwas diha sa inyong kinabuhi?
Sa unsang paagi makabenepisyo kamo gikan sa dugang nga pagpunting ngadto ni Jesukristo diha sa inyong kinabuhi?

Sa pagtapos, dapita ang mga estudyante nga ikonsiderar kon unsaon nila paggamit ang “Ang Buhi nga Kristo” aron matabangan sila sa pagpalig-on sa ilang relasyon sa Langitnong Amahan ug ni Jesukristo. Hatagig panahon ang mga estudyante sa pagpamalandong ug pagsulat sa mga impresyon gikan sa Espiritu Santo nga nadawat tingali nila panahon sa leksiyon.