1 Samuel 17–18; 24–26; 2 Samuel 5–7

Ikonsiderar ang pagsulat og David diha sa usa ka bahin sa pisara ug Goliat sa pikas bahin. Pwede nimong ipakita ang hulagway gikan sa sinugdanan sa leksiyon ug dapita ang mga estudyante nga isulat sa kada bahin sa pisara ang mga detalye nga ilang mahinumdoman ang kabahin kon usay resulta sa pagsangka ni David ug Goliat. (Kon kinahanglan, pwedeng tan-awon og kadiyot sa mga estudyante ang 1 Samuel 17:1–25 para sa mga detalye.)

Ipasabot nga makakat-on ta og importanteng mga kamatuoran gikan sa asoy ni David ug Goliat nga makatabang sa mga kalisdanan nga atong giatubang. Dapita ang mga estudyante sa paghunahuna sa kalisdanan nga ilang giatubang karon. Samtang magtuon karon, awhaga sila nga hatagan og pagtagad ang mga pag-aghat gikan sa Espiritu Santo nga makatabang nila sa pag-atubang sa ilang mga kalisdanan uban sa tabang sa Ginoo.

Dapita ang mga estudyante nga basahon ang 1 Samuel 17:26, 32–37, nga pangitaon kon giunsa pagsanong ni David dihang nadungog niya ang mga hulga ni Goliat ngadto sa kasundalohan sa Israel. Dayon ikonsiderar ang pagpangutana sama sa mosunod:

• Unsay inyong nakaplagan niini nga mga bersikulo nga nagpakita sa hugot nga pagtuo ni David ngadto sa Dios?

• Unsa ang pipila ka kamatuoran ang atong makat-onan bahin sa Ginoo gikan sa tubag ni David? (Mahimong mabantayan sa mga estudyante ang kamatuoran nga parehas niini: Samtang mosalig kita sa Ginoo, tabangan ta Niya nga maatubang ang atong mga hagit.)

Dapita ang mga estudyante nga basahon ang 1 Samuel 17:38–51 ug markahan ang mga paagi nga misalig si David sa Ginoo. Human sa igong panahon, pwede nimong hangyoon ang mga estudyante nga ipakigbahin ang ilang mga panabot ngadto sa usa ka kapares o gamayng grupo. Pwede usab nilang hisgotan ang mosunod nga mga pangutana:

• Unsay papel sa relasyon ni David ngadto sa Ginoo sa iyang kadaogan?

• Unsa ang pipila ka paagi nga mapakita nato nga misalig kita sa Ginoo dihang mag-atubang kita og mga hagit?

Dapita ang pipila ka estudyante nga ipakigbahin ang mga panabot gikan sa ilang mga panaghisgot uban sa klase. Dayon ikonsiderar ang pagpangutana sa mosunod:

• Kanus-a kaha nga ang pagsalig sa Ginoo sa inyong mga hagit nakatabang ninyo nga masinati ang Iyang tabang? (Isip kabahin niini nga panaghisgot, pwede nimong ipasalida ang bidyo gikan sa koleksiyon nga “His Grace [Iyang Grasya],” sama sa “I Didn’t Feel Good Enough, But I Was Good Enough for God [Dili Igo ang Akong Gibati, Apan Igo Ko sa Diyos]” [5:08].)

  

  5:9

Dapita ang mga estudyante nga hinumdoman ang personal nga hagit nga ilang gihunahuna sa sinugdanan sa kalihokan sa pagkat-on. Pahinumdomi sila nga mipili si David og lima ka bato aron mangandam sa pag-atubang ni Goliat. Awhaga sila nga isulat ang lima ka paagi nga makasalig sila sa Ginoo samtang nag-atubang sa ilang piho nga hagit.

Pwede nimong taposon pinaagi sa pagpakigbahin sa mosunod nga pagpamatuod gikan ni Sister Andrea Muñoz Spannaus sa Kinatibuk-ang Kapangulohan sa Young Women:

Si Kristo nagmatinguhaon sa pag-uban kanato sa panaw sa atong kinabuhi. … Siya mogiya kaninyo, ug Siya magtudlo kaninyo. Pinaagi sa Iyang kamot, kamo makapukan sa matag Goliat nga motunga sa inyong kinabuhi. (“Matinud-anon hangtod sa Kataposan,” Liahona, Mayo 2024, 61)

Balik ngadto sa “Mga Opsiyon sa Kalihokan sa Pagkat-on.”

Pwede nimong isulat sa pisara ang mga pulong nga panagbingkil, pagdumot, ug kasina. Hangyoa ang mga estudyante nga ikonsiderar ang kataposang higayon nga nakasinati sila og usa niining mga butanga. Dayon ipangutana ang parehas sa mosunod:

• Nganong lisod usahay ang paglikay niining mga butanga?

Samtang magtuon karong adlawa, awhaga ang mga estudyante nga pamalandongan kon unsay ilang makat-onan gikan ni David ug Saul nga makatabang nila sa panagbingkil nga mga sitwasyon nga ilang giatubang diha sa ilang kinabuhi.

Ipasabot nga human mapildi ni David si Goliat, gihimo siya ni Hari Saul nga maoy modumala sa iyang kasundalohan. Sa ulahi, nasina si Saul sa kalamposan ni David ug balikbalik nga misulay sa pagpatay kang David. Aron tabangan ang mga estudyante nga makakat-on gikan sa mga inter-aksiyon tali ni David ug Saul, pwede nimong iapod-apod ang handout nga “Pagtuon gikan sa Asoy nila ni David ug Saul.” Dapita ang mga estudyante nga kompletohon ang una o ikaduhang kalihokan sa pagtuon diha sa handout uban sa usa ka pares o gamayng grupo. Makatabang tingali nga ang mga estudyante motudlo og usa ka tawo sa ilang grupo nga mahimong lider sa panaghisgot.

Human mahatagi og igong panahon ang mga estudyante sa pagkompleto sa ilang bahin sa handout, dapita sila nga ipakigbahin ang kamatuoran diha sa klase. Ang mga ehemplo sa maong mga kamatuoran naglakip niini: Dihang masina o magdumot kita, atong gitugotan ang kaaway nga makaimpluwensiya sa atong kinabuhi. Ang Ginoo mag-uban kanato samtang maningkamot kitang molihok nga maalamon diha sa panagbingkil nga mga sitwasyon. Kay ang Ginoo usa ka hingpit nga maghuhukom, dili kita magtinguha og panimalos batok niadtong nakasala kanato.

Pwede nimong ipakigbahin ug hisgotan ang mosunod nga pahayag ni Presidente Russell M. Nelson:

Karon, ako mohangyo kanato sa pagtagad sa uban sa mas labaw, mas balaan nga paagi. …

Ang panagbingkil mopapahawa sa Espiritu—matag higayon. Ang panagbingkil nagsuporta sa sayop nga ideya nga ang pagpakigkomprontase mao ang paagi sa pasulbad sa mga kasungian; apan dili gayod. Ang panagbingkil usa ka pagpili. Ang pagpasiugda og kalinaw usa ka pagpili. Kamo adunay inyong kabubut-on sa pagpili og panagbingkil o panag-uli. Ako moawhag ninyo sa pagpili nga mahimong tigpasiugda og kalinaw, karon ug sa kanunay. (“Gikinahanglan ang mga Tigpasiugda og Kalinaw,” Liahona, Mayo 2023, 99–100)

Ikonsiderar ang paghisgot sa mosunod nga mga pangutana:

• Unsa nga mga pagtulun-an o mga ehemplo gikan sa kinabuhi ni Jesukristo ang makatabang nato nga mosanong sa hustong paagi sa mga panagbingkil nga atong giatubang?

• Sa unsang paagi ka napanalanginan sa mga tawo nga mipili nga mahimong tigpasiugda og kalinaw?

Awhaga ang mga estudyante nga pamalandongan ang ilang kinabuhi ug mga relasyon. Dapita sila sa paghimo og plano nga mas makasanong sa panagbangi nga mga sitwasyon nga tingali ilang masinati. Awhaga sila nga mag-ampo alang sa tabang sa Ginoo aron masuklan ang panag-away o ang pagbati sa pagdumot o kasina.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang paghangyo sa mga estudyante nga hunahunaon ang usa ka tawo nga ilang nailhan nga nagpahinumdom nila sa Manluluwas sa pipila ka paagi. Awhaga ang naggrupo o nagpares nga mga estudyante nga mopakigbahin og paghulagway sa maong tawo, apil ang usa ka litrato kon gusto nila. Pwede nilang hisgotan ang pipila sa mosunod nga mga pangutana:

• Unsa ang naa niini nga tawo nga nagpahinumdom nimo sa Manluluwas?

• Sa unsang paagi ka napanalanginan tungod sa iyang sama ni Kristo nga mga binuhatan?

Ipasabot nga ang 1 Samuel 25 naglangkob sa asoy sa usa ka panagbingkil nga mitumaw tali ni David ug sa usa ka tawo nga ginganlan og Nabal. Niini nga asoy, ang asawa ni Nabal nga si Abigail makita nga ingon ka maayo kaayo nga ehemplo sa usa ka matang o simbolo ni Jesukristo. (Kini mahimong usa ka maayong dapit sa pagpaila sa kahanas nga “Pagpunting kang Jesukristo diha sa mga Kasulatan” diha sa Mga Kahanas sa Pagtuon sa Kasulatan.) Samtang magtuon sila niini nga asoy, dapita ang mga estudyante sa pagkonsiderar sa mga paagi nga si Abigail nagpahinumdom nila kang Jesukristo.

Aron tabangan ang mga estudyante nga masabtan ang konteksto niini nga asoy, pwedeng ipakigbahin nimo o sa usa ka estudyante ang mosunod nga summary:

Human mamatay si propeta Samuel, si David ug ang iyang mga tawo miadto sa kamingawan aron moikyas kang Hari Saul, nga gustong mopatay ni David. Dihang naa sila sa kamingawan, gipanalipdan ni David ug sa iyang mga tawo ang mga karnero ug mga magbalantay sa karnero sa usa ka datong tawo nga ginganlan og Nabal, nga naminyo ni Abigail. Sa ulahi, nagkinahanglan og pagkaon ug mga suplay si David ug ang iyang mga tawo ug nangayo og tabang kang Nabal. Pero giinsulto ni Nabal si David ug midumili sa paghatag og bisan unsang tabang. Nainsulto si David ug nangandam sa iyang mga tawo sa pag-atake ni Nabal ug sa iyang panimalay. Dihang nahibaloan ni Abigail ang panagbingkil ni David ug sa iyang bana, milihok siya dayon og mitabang aron mapasiugda ang kalinaw.

Dapita ang mga estudyante nga basahon ang 1 Samuel 25:18–35 ug ikonsiderar ang mga paagi nga ang mga binuhatan ug mga pulong ni Abigail nagpahinumdom kanila ni Jesukristo. Pwede kang mogamit og table nga parehas sa mosunod aron marekord sa mga estudyante ang ilang mga nakaplagan. Kon nagkinahanglan og tabang ang mga estudyante, dapita sila nga tun-an ang entry para sa 1 Samuel 25 diha sa Mga Tabang sa Kasulatan: Daang Tugon.

Pagkahuman og tuon sa mga estudyante, ikonsiderar ang pagpangutana og parehas sa mosunod:

• Unsa ang pipila ka paagi diin si Abigail nagpahinumdom ninyo bahin ni Jesukristo? (Samtang motubag ang mga estudyante, mailhan tingali nila ang mga kamatuoran bahin sa Manluluwas nga parehas sa mosunod: Matabangan ta ni Jesukristo nga pasayloon kadtong nakapasakit nato.)

Aron tabangan ang mga estudyante nga mas masabtan kini nga kamatuoran, ikonsiderar ang pagpakigbahin sa mosunod nga pamahayag ni Sister Kristin M. Yee sa Kinatibuk-ang Kapangulohan sa Relief Society:

Sama nga si Abigail andam modawat sa sala ni Nabal ngadto sa iyang kaugalingon, mao usab ang Manluluwas—sa dili matukib nga paagi—angkonon Niya ang atong mga sala ug ang mga sala niadtong kinsa nakapasakit o nakapasilo nato. Sa Getsemani ug diha sa krus, Iyang giangkon kini nga mga sala. Siya mihimo og paagi alang kanato aron buhian ang mapanimaslon nga kasingkasing. Kana nga “paagi” mao ang pinaagi sa pagpasaylo—nga mahimong usa sa labing lisod nga mga butang nga sukad atong mahimo ug usa sa labing balaan nga mga butang nga sukad atong masinati. Ang dalan sa pagpasaylo, ang maulaong gahom ni Jesukristo modagayday sa atong kinabuhi ug mosugod sa pag-ayo sa mga lawom nga sakit sa kasingkasing ug sa kalag. (“Nagdala Akog Kalipay Inay Kagul-anan: Ang Makaayo nga Dalan sa Pagpasaylo,” Liahona, Nob. 2022, 37)

• Nganong lisod o imposible pa gani usahay ang pagpasaylo niadtong nakapasakit nato?

Dapita ang mga estudyante sa paghunahuna nga naa silay kaila nga naglisod sa pagpasaylo sa laing tawo. Hatagi sila og panahon sa pagpangita og usa o kapin pa nga mga kasulatan o mga pamahayag gikan sa mga lider sa Simbahan nga makatabang sa maong tawo nga magpasaylo. Inigkahuman sa mga estudyante, dapita sila nga ipakigbahin ang ilang nakaplagan ngadto sa kapares o sa gamayng grupo. Pwede usab nimong hangyoon ang pipila ka estudyante nga ipakigbahin ang ilang kasulatan o pamahayag diha sa klase.

Aron tabangan ang mga estudyante nga makakat-on bahin sa modernong panahon nga mga ehemplo ni Jesukristo nga nagtabang sa mga tawo nga makapasaylo, ikonsiderar ang pagpasalida sa “Forgiveness after Betrayal Is a Process [Ang Pagpasaylo Human ang Pagtraydor Usa ka Proseso]” [5:21] o sa “Wilt Thou Be Made Whole? [Gusto Ka Bang Mamaayo?]” (gikan sa time code 5:49 hangtod 7:44).

5:20

9:38

Dapita ang mga estudyante nga pamalandongan ang bisan unsang mga panghunahuna ug mga impresyon nga ilang nadawat karon nga makatabang sa ilang personal nga kinabuhi. Awhaga sila nga isulat ang ilang mga planong buhaton o ang espirituwal nga mga impresyon nga ilang nadwat gikan sa Espiritu Santo.

Balik ngadto sa “Mga Opsiyon sa Kalihokan sa Pagkat-on.”