Exodo 35–40; Levitico 1; 4; 16; 19

Pwede nimong ikonsiderar ang pagdapit sa mga estudyante nga mopakigbahin og hulagway sa templo nga ila nang nabisita o ganahan kaayo nila. Pwede usab nimong ipakita ang pipila sa mosunod nga mga hulagway sa sulod sa mga templo.

Pwedeng ipakigbahin sa mga estudyante kon unsa ang templo para nila o kon unsay ilang mga hunahuna o mga pagbati dihang makita nila ang templo. Awhaga ang mga estudyante sa pagkonsiderar kon unsay gitudlo sa templo kanila bahin sa Langitnong Amahan ug ni Jesukristo samtang magtuon sila karon.

Ipasabot nga human gihatag sa Ginoo ang Napulo ka Sugo sa mga Israelihanon, mibalik si Moises sa Bukid sa Sinai aron sa pagdawat sa dugang mga instruksiyon gikan sa Ginoo.

Dapita ang mga estudyante nga basahon ang Exodo 25:8, nga pangitaon kon unsay gusto sa Ginoo nga himoon sa mga anak ni Israel ug kon ngano.

• Unsay gitudlo niini nga sugo kanimo bahin sa Ginoo ug sa Iyang pagbati bahin sa Iyang katawhan?

Ipasabot nga gihatagan sa Ginoo si Moises og mga instruksiyon sa pagtukod og sangtuwaryo o tabernakulo. Bisag ang karaang tabernakulo naglihok ilalom sa balaod ni Moises ug lahi ang paagi sa paggamit niini kay sa modernong mga templo, kining duha parehas nga balay sa Ginoo. Sama sa modernong mga templo, ang mga butang ug ordinansa sa tabernakulo maoy mga simbolo sa Langitnong Amahan ug ni Jesukristo ug gidisenyo aron tabangan ang mga anak ni Israel sa ilang panaw pabalik ngadto Kanila.

Pwede nimong idrowing o ipakita ang usa ka hulagway nga parehas sa mosunod aron ipakita ang layout sa tabernakulo sa panahon ni Moises.

Dapita ang mga estudyante nga gamiton ang mga kasulatan nga gilista sa mosunod nga table aron makakat-on bahin sa pipila ka elemento sa tabernakulo. (Makatabang tingali kini aron mapaila ug mapraktisan ang “Pagsabot sa mga Simbolismo diha sa mga Kasulatan,” diha sa Mga Kahanas sa Pagtuon sa Kasulatan. Pwede usab nimong tultolan ang mga estudyante sa “Exodo 35–40. Unsay katuyoan sa tabernakulo?” diha sa Mga Tabang sa Kasulatan: Daang Tugon o ipasalida ang bidyo nga “The Tabernacle” [7:18] aron tabangan silang makakat-on bahin sa lainlaing butang diha sa tabernakulo.)

7:19

Dihang mahuman na sa pagtuon ang mga estudyante, dapita sila sa pagpakigabahin sa ilang nakat-onan uban sa usa ka pares o gagmayng grupo. Pwede ninyong hisgotan ang mosunod nga mga pangutana ingon nga usa ka klase.

• Unsa nga mga simbolo ang makahuloganon para nimo? Ngano man?

• Sa imong hunahuna, sa unsang paagi kini nga mga simbolo nagpunting sa mga anak ni Israel ngadto sa Langitnong Amahan ug ni Jesukristo?

Dapita ang mga estudyante sa pagpakigbahin sa mga kamatuoran nga ilang nakat-onan gikan sa ilang pagtuon sa tabernakulo nga magamit usab sa modernong panahon. Pwedeng ipakigbahin sa mga estudyante ang mga kamatuoran sama niini: Ang Ginoo nagmando kanato sa pagtukod og mga templo aron Siya makapuyo taliwala kanato. Ang mga ordinansa ug mga simbolo sa templo nagtudlo mahitungod sa Langitnong Amahan ug ni Jesukristo. Ang templo magtabang kanato nga maandam sa pagbalik ngadto sa Langitnong Amahan ug ni Jesukristo.

Pwede nimong pilion ang usa sa mosunod nga mga opsiyon aron tabangan ang mga estudyante nga masabtan ang mga kamatuoran nga ilang nakit-an:

1. Dapita ang mga estudyante nga mangitag pahayag bahin sa mga templo o mga ordinansa sa teamplo sa bag-ohay lang nga pakigpulong sa kinatibuk-ang komperensiya. Pwede nilang ipakigbahin ang pahayag ug kon nganong makahuloganon kini para nila ngadto sa ilang partner o sa gamayng grupo.

2. Hatagig panahon ang mga estudyante nga bisitahon ang ChurchofJesusChrist.org/temples ug mangitag dugang mga panglantaw bahin sa templo.

3. Dungan ninyong tan-awa ang mga bidyo nga “Two Apostles Lead a Virtual Tour of the Rome Italy Temple” (11:31) o ang “Welcome to the Washington D.C. Temple” (11:45) ug tugoti ang mga estudyante sa pagpakigbahin kon sa unsang paagi ang ilang nakat-onan bahin sa modernong mga templo nagpamatuod sa Langitnong Amahan ug ni Jesukristo.

   

   10:37
   

   11:45

Pwede usab nimong ipakita ang mosunod nga pahayag ni Sister J. Anette Dennis ug tugoti ang mga estudyante sa pagpakigbahin kon unsay makahuloganon para nila.

“Tanan nga atong gibuhat diha sa templo nagpunting kanato ngadto sa plano sa atong Amahan alang kanato, diin ang sentro mao ang Manluluwas ug ang Iyang maulaong sakripisyo. Ang Ginoo magtudlo kanato pagtulon-an human sa usa ka pagtulun-an pinaagi sa simbolismo sa mga ordinansa ug mga pakigsaad samtang atong ablihan ang atong mga kasingkasing ug mainampoon nga magtinguha nga makasabot sa mas lawom nga mga kahulogan.” (“Himoa ang Ginoong Jesukristo nga Inyong Tigpanalipod,” Liahona, Mayo 2024, 11)

Ikonsiderar ang paghisgot sa mosunod nga mga pangutana ingon nga usa ka klase:

• Sa unsang paagi ang mga templo nagpunting nimo sa Langitnong Amahan ug ni Jesukristo?

• Sa unsang paagi ka napanalanginan sa mga ordinansa ug mga pakigsaad sa templo?

Pwede nimong dapiton ang pipila ka estudyante sa pagpakigbahin sa klase sa ilang nakat-onan o gibati karon nga gusto nilang hinumdoman. Kon nagpuyo kamo duol sa usa ka templo, awhaga ang mga estudyante nga motambong o mibisita sa templo kon itugot sa ilang kahimtang. Dapita sila nga mangitag mga simbolo ni Jesukristo diha sa mga ordinansa o mga simbolo sa templo.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagsugod pinaagi sa pagpaila sa kahanas nga “Pagpunting kang Jesukristo diha sa mga Kasulatan” diha sa Mga Kahanas sa Pagtuon sa Kasulatan. Pwede pod nimong ipangutana ang mosunod:

• Unsay inyong nakat-onan bahin ni Jesukristo sa bag-ohay lang ninyong pagtuon sa mga kasulatan?

Ipasabot nga ang basahon sa Levitico nakatutok sa mga ordinansa ug mga ritwal nga konektado sa balaod ni Moises. Kini naglakip sa detalyadong mga instruksiyon sa paghalad og sakripisyo, nga nagsimbolo sa maulaong sakripisyo ni Jesukristo (tan-awa ang Alma 34:14; Moises 5:5–7).

Dapita ang mga estudyante nga tun-an ang Levitico 1:1–9 o Levitico 16:7–9, 15–22 uban sa entry para sa Levitico 1–7 o Levitico 16 diha sa Mga Tabang sa Kasulatan: Daang Tugon. Samtang magtuon sila, dapita sila sa pagpangita sa mga pulong o hugpong sa mga pulong nga nagpahinumdom nila bahin ni Jesukristo ug sa Iyang maulaong sakripisyo.

Kon mahuman na ang mga estudyante, dapita sila sa pagpakigbahin sa ilang mga hunahuna ngadto sa ilang pares o gagmayng grupo. Dayon dapita ang pipila ka estudyante nga ipakigbahin sa klase ang ilang mga panglantaw. Ang pipila ka kamatuoran nga ipakigbahin tingali sa mga estudyante mao ang: Andam nga gihalad ni Jesukristo ang Iyang Kaugalingon isip sakripisyo alang kanato. Pinaagi sa Iyang maulaong sakripisyo, gibayran ni Jesukristo ang atong mga sala pinaagi sa pagdala niini ngadto sa Iyang Kaugalingon. Mahimo kitang mapasaylo sa atong mga sala tungod sa Pag-ula ni Jesukristo.

Pwede nimong ipakita ang mosunod nga hulagway samtang inyong hisgotan ang mga pangutana sa ubos.

• Unsay makatabang nato sa paghinumdom sa maulaong sakripisyo ni Jesukristo ug magmapasalamaton Kaniya? (Ingon nga bahin niini nga panaghisgot, makatabang tingali ang pagpahinumdom sa mga estudyante nga “ang mando nga ihalad ang mga sakripisyo sa hayop natapos na diha sa pagkamatay ni Jesukristo. Sa Simbahan karon, ang ordinansa sa sakramento usa ka pahinumdom sa maulaong sakripisyo sa Manluluwas” [Topics and Questions, “Sacrifice,” Gospel Library].)

Ikonsiderar ang paghatag sa mga estudyante og panahon aron mamalandong ug isulat ang ilang mga hunahuna bahin ni Jesukristo ug kon unsay kahulogan sa Iyang maulaong sakripisyo para nila. Aron mangandam sa paghimo niini, pwede ninyong kantahon o paminawon ang himno sa sakramento nga parehas sa “Ako Nagpabilin nga Natingala” o “As Bread Is Broken” (Gospel Library), o pwede ninyong tan-awon ang “For God So Loved the World” (4:48).

4:49

Sa pagtapos sa leksiyon, ikonsiderar ang pagpakigbahin sa imong pamatuod bahin ni Jesukristo o dapiton ang pipila ka estudyante nga himoon kini. Pwede usab nimong ipakigbahin ang mosunod nga pamahayag ni Presidente Dallin H. Oaks:

Nag-antos pag-ayo si Jesukristo aron isakripisyo ang Iyang kaugalingon alang sa sala sa tanan. Kana nga sakripisyo nagtanyag og kaayo—ang putli nga Kordero—alang sa hilabihang kadaotan—ang sala sa tibuok kalibotan. Sa dili malimtang mga pulong ni Eliza R. Snow:

Iyang bililhong dugo gipaagas;

Iyang kinabuhi gihalad,

Ang Sakripisyo alang sa sala,

Aron ang kalibotan maluwas.

Kanang sakripisyo—ang Pag-ula ni Jesukristo—anaa sa sentro sa plano sa kaluwasan. (“Sakripisyo,” Liahona, Mayo 2012, 19)

Balik ngadto sa “Mga Opsiyon sa Kalihokan sa Pagkat-on.”

Isulat ang pulong nga sakripisyo sa tunga sa pisara. Pangutan-a ang mga estudyante kon unsang mga hunahuna o mga pagbati ang ilang mahunahunaan kon makita nila kini nga pulong.

Dapita ang mga estudyante sa paghunahuna kon unsa sila ka andam sa paghimog mga sakripisyo para sa Langitnong Amahan. Samtang magtuon sila karon, awhaga sila sa pagpangita sa mga kamatuoran nga motabang nila sa ilang mga paningkamot nga magkinabuhi uyon sa balaod sakripisyo sa Ginoo.

Ipasabot nga ang Levitico 1 naglangkob sa mga instruksiyon sa Ginoo para sa mga Israelihanon sa paghimo og mga halad nga sinunog. Ang mga pari naghimo niini nga mga halad matag adlaw. Ang mga halad pwedeng isipon ingon nga simbolo sa Pag-ula sa Manluluwas. Timaan usab kini sa padayon nga pasalig sa Israel ngadto sa Ginoo.

Dapita ang mga estudyante sa pagpangita sa kahulogan sa pulong nga sakripisyo sa mosunod nga pamahayag ni Bishop L. Todd Budge sa Kapangulohang Bishopric:

Sa modernong paggamit, ang pulong nga sakripisyo nagsugyot sa konsepto sa “paghatag” sa mga butang alang sa Ginoo ug sa Iyang gingharian. Apan, sa karaang panahon, ang kahulogan sa pulong nga sakripisyo mas duol nga dunay kalabotan sa duha ka Latin niini nga mga gamotpulong: sacer, pasabot “sagrado” o “balaan,” ug facere, pasabot “sa paghimo.” Busa, sa karaan ang sakripisyo tinud-anay nga nagpasabot “sa paghimo nga balaan sa usa ka butang o sa usa ka tawo.” Kon hunahunaon sa ingon, ang sakripisyo mao ang usa ka proseso sa pagkahimong balaan ug pagkahibalo sa Dios, dili usa ka panghitabo o ritwal nga “paghatag” sa mga butang alang sa Ginoo. …

Ang sakripisyo dili kaayo kabahin sa “paghatag” ug mas kabahin kini sa “paghatag ngadto” sa Ginoo. (“Paghatag sa Pagkabalaan ngadto sa Ginoo,” Liahona, Nob. 2021, 101)

• Unsay ikatabang niini nga pamahayag aron masabtan ninyo ang katuyoan sa sakripisyo? (Pwedeng mailhan sa mga estudyante ang kamatuoran nga sama ani: Ang paghimog mga sakripisyo para sa Ginoo motabang nato nga mahimong balaan ug mas mapaduol Kaniya.)

Ikonsiderar ang pagpakita sa mosunod nga mga instruksiyon ug ang paghatag sa mga estudyante og panahon aron makompleto ang kalihokan sa pagtuon:

1. Tun-i ang Levitico 1:1–9, nga pangitaon ang mga aspeto sa paghalad og hayop nga may kalabotan sa paghimog mga sakripisyo para sa Ginoo karon.

2. Pangitag dugang mga kasulatan o pamahayag sa mga lider sa Simbahan nga makatabang ninyo nga makasabot kon unsaon pagpakabuhi uyon sa balaod sa sakripisyo sa atong panahon. Ang mga ehemplo naglakip sa Mga Taga-Roma 12:1–2; Omni 1:26; 3 Nephi 9:19–20.

Human makabaton og igong panahon sa pagtuon ang mga estudyante, dapita sila sa pagpakigbahin sa ilang nakat-onan ngadto sa ilang pares o gagmayng grupo. Dayon mahimo nimong dapiton sila sa paghisgot sa mosunod nga mga pangutana:

• Unsay atong makat-onan bahin sa sakripisyo gikan sa kinabuhi ni Jesukristo? (Pwede kang mangita og mga ehemplo sa kasulatan nga imong ipakigbahin.)

• Sa unsang paagi ang inyong pagkaandam sa paghimog mga sakripisyo para sa Langitnong Amahan ug ni Jesukristo makatabang ninyo nga mas mahisama Kanila?

Ikonsiderar ang paghangyo sa mga estuydante nga maghunahuna og mga panahon dihang sila andam nga mihimo og sakripisyo para sa Ginoo. Dapita ang pipila ka estudyante nga andam mopakigbahin sa ilang kasinatian ug kon sa unsang paagi sila gipanalanginan sa Ginoo.

Dapita ang mga estudyante sa paghunahuna kon sa unsang paagi sila mas magkinabuhi uyon sa balaod sa sakripisyo sa Ginoo. Hatagi silag panahon sa pagrekord sa mga hunahuna o espirituwal nga mga impresyon nga ilang nabatonan. Pwede usab nimong dapiton ang pipila ka estudyante nga gustong mopakigbahin sa ilang mga ideya ngadto sa klase.

Balik ngadto sa “Mga Opsiyon sa Kalihokan sa Pagkat-on.”