Moises 1; Abraham 3

Isulat ang hugpong sa mga pulong nga Kinsa man Ako? diha sa pisara. Dapita ang mga estudyante sa pagpakigbahin og lain-laing mga paagi nga ilang matubag kini nga pangutana. Ikonsiderar ang pagsulat sa ilang mga tubag diha sa pisara.

• Sa unsang mga paagi nga ang inyong pagkaila sa inyong kaugalingon makaapektar sa inyong kinabuhi ug sa mga pagpili nga inyong himoon?

Ipasabot nga samtang nakigsulti sa Ginoo, si Moises nakat-on og importanteng mga kamatuoran mahitungod kon si kinsa siya. (Tingali importante ang pagpasabot nga sa Moises 1, namulong si Jesukristo alang sa Langitnong Amahan. Ang awtoridad nga mamulong alang sa Langitnong Amahan gipsabot isip awtoridad nga gihatag ngadto ni Jesukristo gikan sa Dios [tan-awa sa “Moises 1:2–8. Kinsa ang nakig-istorya kang Moises?” Mga Tabang sa Kasulatan: Daang Tugon]).

Dapita ang mga estudyante sa pagbasa sa Moises 1:1–11 ug ikonsiderar ang pagmarka kon unsa ang nakat-onan ni Moises ug sa unsang paagi kini nga mga kamatuoran magamit sa ilang kaugalingon.

• Unsa nga mga kamatuoran ang nakat-onan ni Moises mahitungod sa iyang kaugalingon nga makatabang ninyo nga mas makasabot kon si kinsa gayod kamo? (Mahimong ipakigbahin sa mga estudyante ang mga kamatuoran sama sa mosunod: Ako anak nga lalaki o anak nga babaye sa Langitnong Amahan. Nasayod Siya sa akong ngalan, ug Siya adunay buluhaton nga akong buhaton.)

• Sa unsang paagi kaha nga ang pagtuo niini nga mga kamatuoran moimpluwensiya kon sa unsang paagi kamo maghunahuna sa inyong kaugalingon? Sa unsang paagi kini makaimpluwensiya sa inyong pagtan-aw sa uban? Sa unsang paagi kini makaimpluwensiya sa inyong pagtaw-aw sa Dios?

Aron matabangan ang mga estudyante nga mas makasabot sa kamahinungdanon sa ilang pagkatawo isip mga anak sa Dios, dungang hisgotan ang mosunod nga pamahayag ni Presidente Russell M. Nelson:

Nagtuo ako nga kon ang Ginoo direktang namulong kaninyo karong gabhiona, ang unang butang nga Iyang segurohon nga inyong masabtan mao ang inyong tinuod nga pagkatawo. Hinigugma kong mga higala, kamo literal nga espiritu nga mga anak sa Dios. Gikanta ninyo kini nga kamatuoran sukad inyong nakat-onan ang mga pulong [nga] “Ako Anak sa Dios” [Mga Himno, num. 189]. Apan kana ba nga mahangtoron nga kamatuoran napatik sa inyong kasingkasing? Kini ba nga kamatuoran nakaluwas kaninyo sa dihang nag-atubang og tintasyon?

Nahadlok ko nga tingali kanunay ninyong nadungog kini nga kamatuoran nga kini daw mas sama sa usa ka motto [slogan] kay sa balaanon nga kamatuoran. Ug gani, ang paagi nga kamo maghunahuna mahitungod kon kinsa gayod kamo makaapekto sa hapit matag desisyon nga inyong himoon. (“Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022], Librarya sa Ebanghelyo)

• Unsa ang mipatigbabaw diha kaninyo sa mga pagtulun-an ni Presidente Nelson? Ngano man?

• Ngano kaha nga ang paghinumdom sa inyong pagkatawo isip anak sa Dios “makaapektar sa hapit matag desisyon nga inyong pagahimoon”?

Mahimo nimong ipahunahuna sa mga estudyante ang usa ka panahon diin ang pagsabot sa ilang tinuod nga pagkatawo isip anak sa Dios nakaimpluwensiya sa desisyon nga ilang gihimo. Dapita ang pipila ka estudyante sa pagpakigbahin sa ilang mga kasinatian. Ang mga estudyante mahimo usab nga maghunahuna sa usa ka desisyon nga kinahanglan nilang himoon—karon o sa umaabot—ug irekord kon sa unsang paagi ang mga kamatuoran nga ilang nakat-onan karon mahimong makaapektar niana nga desisyon. Awhaga sila sa paglihok sa ilang espirituwal nga mga impresyon.

Pahinumdom: Depende kon unsay dagan sa inyong panaghisgotan, makatabang tingali kini nga masabtan kon sa unsang paagi si Moises, samtang giatubang niya si Satanas, mibuntog pinaagi sa pagkasayod sa iyang tinuod nga pagkatawo isip usa ka anak sa Dios (tan-awa sa Moises 1:13). Mahimo ninyong dungan nga tun-an ang Moises 1:12–22 ug dapita ang mga estudyante sa pagpakigbahin sa unsang paagi ang pagkasayod ni Moises sa iyang balaanong pagkatawo nakatabang niya.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang dungan nga panaghisgot sa mosunod nga pamahayag ni Presidente Russell M. Nelson:

Ang giyera batok sa sala tinuod. Ang kaaway mipakusog pag-ayo sa iyang mga paningkamot aron sa pagbalda sa mga pagpamatuod ug pagbabag sa buhat sa Ginoo. Iyang gisangkapan ang iyang mga sulugoon og gamhanang mga hinagiban aron dili kita makaambit sa hingpit nga kalipay ug gugma sa Ginoo. (“Kita Makabuhat og Mas Maayo pa ug Mahimong mas Maayo,” Liahona, Mayo 2019, 68)

• Unsa ang pipila ka “gamhanang mga hinagiban” nga gigamit ni Satanas batok sa mga young adult karon? (Ikonsiderar ang paglista sa mga tubag sa mga estudyante diha sa pisara.)

Dapita ang mga estudyante sa paghunahuna mahitungod sa ilang kaugalingong personal nga mga paningkamot sa pagbuntog sa mga tentasyon ni Satanas. Awhaga sila nga tinguhaon ang giya gikan sa Espiritu Santo sa pag-ila sa mga kamatuoran nga makatabang nila nga makadawat og mas dakong kalig-on sa paglikay ug sa pagbatok sa tentasyon.

Pahinumdomi ang mga estudyante nga samtang namulong si Moises ngadto sa Ginoo nawong sa nawong, siya nakat-on nga siya mao ang anak sa Dios ug nga ang Dios adunay buluhaton nga ipabuhat kaniya (tan-awa sa Moises 1:1–11). Human niining balaang kasinatian, “si Satanas miabot nga nagtintal kaniya” (Moises 1:12).

Dapita ang mga estudyante sa pagtuon sa Moises 1:12–24, nga mangita unsa ang gibuhat ni Moises aron mabuntog ang mga tentasyon ni Satanas. Mahimo usab nimong awhagon sila nga hatagan og pagtagad ang kalahian nga nabantayan ni Moises tali sa Ginoo ug ni Satanas. (Alang sa dugang nga mga ideya mahitungod kon unson sa pagtabang sa mga estudyante nga makagamit niini nga kahanas, tan-awa sa “Mangita sa Kalahian diha sa mga Kasulatan,” sa Mga Kahanas sa Pagtuon sa Kasulatan.)

Pagsukna og mga pangutana sama sa mosunod sa pagdapit sa mga estudyante sa pagpakigbahin kon unsa ang ilang nakat-onan gikan niini nga mga bersikulo:

• Unsa ang inyong nakaplagan niini nga mga bersikulo nga mahimong makatabang ninyo kon kamo mag-atubang og tentasyon? (Mahimo nimong i-summarize ang mga tubag sa mga estudyante pinaagi sa pagsulat og usa ka kamatuoran sama sa mosunod diha sa pisara: Kita mahimong makadawat og tabang sa Dios sa pagbuntog sa impluwensiya ni Satanas kon kita makasabot ug mahinumdom sa atong pagkatawo isip mga anak sa Dios, paghinumdom sa nangagi nga espirituhanon nga mga kasinatian, ug sa pagtawag sa Dios alang sa kalig-on.)

• Unsa ang uban pang mga paagi nga kita makaakses sa gahom sa Dios sa pagbuntog sa impluwensiya ni Satanas? (Pwede nimong dapiton ang mga estudyante nga mangita og mga kasulatan o mga pamahayag gikan sa mga lider sa Simbahan nga makatabang sa pagtubag niini nga pangutana. Ang mga ehemplo niana nga mga kasulatan naglakip sa 1 Nephi 15:23–24; Helaman 5:11–12; ug Doktrina ug mga Pakigsaad 10:5.)

Ikonsiderar ang pagdapit sa pipila ka estudyante sa pagpakigbahin kon unsa ang nakatabang nila nga nakalikay ug nakasugakod sa mga tentasyon ni Satanas. (Ipasabot nga kinahanglang dili gayod sila mopakigbahin og mga kasinatian nga personal ra kaayo.)

Dapita ang mga estudyante sa paghunahuna mahitungod sa unsang paagi ang mga kamatuoran nga ilang natun-an makatabang nila sa pagbuntog sa ilang kaugalingong mga tentasyon. Awhaga sila sa pagtakda ug pagrekord og usa ka tumong base sa unsay ilang nakat-onan ug sa bisan unsang espirituhanon nga mga impresyon nga tingali ilang nadawat gikan sa Espritu Santo.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakita niini nga imahe ug sa paghisgot sa mosunod nga pangutana:

• Unsa ang inyong mga pagbati o mga pangutana samtang naghunahuna mahitungod sa kalapad sa mga nilalang sa Dios?

Ipasabot nga samtang si Moises namulong ngadto sa Ginoo nawong sa nawong, gipakita kaniya ang usa ka panan-awon sa mga nilalang sa Ginoo. Dapita ang mga estudyante sa pagtuon sa Moises 1:27–30, nga mangita unsa ang gipakita sa Ginoo ngadto ni Moises ug unsa ang gitubag ni Moises.

• Unsa nga mga pangutana ang gisukna ni Moises ngadto sa Ginoo human makita kining dili hitupngan nga panan-awon? (Ikonsiderar ang pagsulat og duha ka pangutana ni Moises gikan sa bersikulo 30 diha sa pisara.)

Dapita ang mga estudyante sa pagtuon sa Moises 1:31–39, nga mangita kon giunsa pagtubag sa Ginoo ang mga pangutana ni Moises. (Mahimong gamiton usab sa mga estudyante ang mga entry nga may kalabotan niini nga mga bersikulo sa Mga Tabang sa Kasulatan: Daang Tugon aron mas masabtan ang mga pagtulun-an sa Ginoo ngadto ni Moises.)

Dapita ang mga estudyante sa pagpakigbahin kon unsa ang ilang nakat-onan uban sa usa ka pares o sa gagmay nga grupo. Pwede nimong ipakita ang mosunod nga mga pangutana aron ilang mahisgotan:

• Unsay inyong nakat-onan o gibati bahin sa Langitnong Amahan ug ni Jesukristo samtang inyong gitun-an kini nga mga bersikulo?

• Sa unsang paagi ang mga pulong sa Ginoo sa kataposan sa bersikulo 35 inyong magamit?

• Sa unsang paagi ang paghinumdom sa buhat ug himaya sa Langitnong Amahan (tan-awa sa bersikulo 39) nakaimpluwensiya sa inyong mga desisyon ug sa inyong pakipagsandurot sa uban?

Human matapos sa mga estudyante ang ilang panaghisgot, pagdapit og pipila sa pagpakigbahin sa ilang mga panabot uban sa tibuok klase. Kon gikinahanglan, tabangi sila sa pag-ila sa pipila ka mosunod nga mga kamatuoran gikan niini nga mga bersikulo: Ubos sa direksiyon sa Langitnong Amahan, si Jesukristo milalang sa mga kalibotan nga dili maihap. Bisan kon kita apil sa halapad nga gidaghanon sa mga nilalang, ang Ginoo nakaila sa matag usa kanato sa tagsa-tagsa. Ang katuyoan sa Langitnong Amahan mao ang pagpahinabo sa pagka-imortal ug sa kinabuhing dayon.

Ikonsiderar ang pagpakigbahin sa mosunod nga pamahayag ni Elder Dieter F. Uchtdorf:

Atong ibayaw ang atong mga tingog agi og pagdayeg sa atong manggihatagon ug mapasayloon nga Dios. … Ang halangdon nga katuyoan sa tanan Niyang buluhaton mao ang pagtabang kanato, Iyang mga anak, nga molampos sa atong gitinguha nga pagka-imortal ug kinabuhing dayon. (“Inadlaw nga Pagpahiuli,” Liahona, Nob. 2021, 79)

Dapita ang mga estudyante sa paghunahuna o paghisgot sa mga pamaagi nga ang Ginoo aktibong naghago aron sa pagtabang nila nga molampos sa ilang pagpangita sa kinabuhing dayon. Mahimo usab nimong dapiton sila nga ikonsiderar kon sa usang paagi sila mahimong mas hingpit nga kapares uban sa Ginoo aron sa pagtabang sa Iyang buhat ug himaya nga mapahinabo, alang nila sa personal ug alang sa uban. Awhaga sila sa pagrekord sa espirituwal nga mga impresyon nga tingali ilang nadawat gikan sa Espiritu Santo.

Balik ngadto sa “Mga Opsiyon sa Kalihokan sa Pagkat-on.”

Dapita ang mga estudyante sa pagpamalandong sa mosunod nga pagdapit gikan ni Sister Wendy W. Nelson: “Hunahunaa ang epekto sa inyong kinabuhi karon kon tugotan kamo sa pagtan-aw og 10 minutos sa inyong premortal nga kinabuhi” (“Paglaom sa Israel,” [tibuok kalibotang nga debosyona sa kabatan-onan, Hunyo 3, 2018], Librarya sa Ebanghelyo).

• Kon makita ninyo ang inyong kaugalingon sa premortal nga kinabuhi, unsa nga piho nga mga butang ang inyong gilaoman nga makat-onan mahitungod sa inyong kinabuhi?

• Unsay kalainan sa inyong hunahuna ang mahimo niini sa inyong kinabuhi?

Ipasabot nga ang Abraham 3 nagrekord sa panan-awon ni Abraham sa premortal nga kinabuhi. Dapita ang mga estudyante sa pagtinguha sa giya sa Espiritu samtang sila magtuon aron sa pagtabang nila nga mas makasabot kon si kinsa sila kaniadto sa wala pa sila moanhi sa yuta.

Dungan nga tun-an ang Abraham 3:22–28. Dapita ang mga estudaynte sa pagpangita kon unsa ang nakat-onan ni Abraham mahitungod sa espiritu nga mga anak sa Dios didto sa premortal nga kinabuhi. (Mahimo usab nimong dapiton ang mga estudyante sa pagtuon sa mga entry alang niini nga mga bersikulo sa Mga Tabang sa Kasulatan: Daang Tugon.)

Ikonsiderar ang pagpangutana sama sa mosunod aron sa pagtabang sa mga estudyante nga mopakigbahin sa unsay ilang nadiskobrehan:

• Unsa ang inyong nakat-onan mahitungod sa premortal nga kinabuhi gikan niini nga mga bersikulo? (Sa pipila ka mga kamatuoran, ang mga estudyante mahimong makaila nga Ang Dios mipili sa Iyang “halangdon ug bantogan” nga espiritu nga mga anak sa wala pa sila matawo aron mahimong mga lider sa Iyang gingharian sa yuta.)

• Sa inyong hunahuna ngano kaha nga ang Ginoo mihubit nga “halangdon ug bantogan”?

Aron sa pagtabang sa mga estudyante nga makasabot nga apil sila niadtong pinili didto sa premortal nga kalibotan aron sa pagtuman sa piho nga mga responsibilidad sa yuta, ipakigbahin ang mosunod nga pamahayag ni Elder Steven R. Bangerter. (Mahimo usab ninyong tan-awon ang bahin sa iyang pakigpulong“Gi-orden nang Daan nga Moserbisyo” gikan sa time codes 2:13 hangtod 5:28.)

11:29

Sa wala pa kamo matawo, ang Dios mitudlo sa matag usa ninyo sa pagtuman sa piho nga mga misyon atol sa inyong mortal nga kinabuhi dinhi sa yuta. Kon kamo magpabiling takos, ang mga panalangin nianang kamandoan sa wala pa dinhi sa yuta makapahimo nga kamo makabaton sa tanang matang sa mga oportunidad niini nga kinabuhi, lakip na ang mga oportunidad sa pagserbisyo sa Simbahan ug sa pag-apil sa labing importante nga buhat nga nahitabo sa yuta karon: ang pagpundok sa Israel. Kadtong mga saad ug mga panalangin sa wala pa dinhi sa yuta gitawag nga inyong pagka-orden nang daan. “Ang doktrina sa pagka-orden nang daan gihatag sa tanang miyembro sa Simbahan.” [Topics and Questions, “Foreordination,” Gospel Library]. Ang pagka-orden nang daan wala maggarantiya nga kamo makadawat og pihong mga tawag [calling] o mga responsibilidad. Kini nga mga panalangin ug mga oportunidad moabot dinhi niini nga kinabuhi isip resulta sa inyong matarong nga paggamit sa kabubut-on, ingon nga ang inyong pagka-orden nang daan didto sa kinabuhi sa wala pa dinhi sa yuta miabot isip resulta sa pagkamatarong. (“Gi-orden nang Daan nga Moserbisyo,” Liahona, Mayo 2024, 57)

Tugoti ang mga estudyante sa paghisgot kon unsay makahuloganon ngadto kanila gikan sa pamahayag. Mahimo usab nimong awhagon sila sa pagpraktis sa pagtudlo sa matag usa kon unsa ang ipasabot sa giorden nang daan ug nganong kini nga doktrina importante kaayo.

Sa pagtapos, mahimo nimong hatagan ang mga estudyante og panahon nga mainampoong mamalandong ug sa pagrekord sa ilang mga hunahuna mahitungod sa usa o daghan pa sa mosunod nga mga pangutana:

• Ang ako ba nga mga pagpili nagtugot kanako sa pagtuman sa mga responsibilidad nga gihatag sa Ginoo kanako o gusto nga ihatag kanako?

• Unsaon nako pagsunod ang ehemplo ni Jesukristo ug pagtuman sa buhat nga ako gipili sa Dios nga mobuhat?

• Unsa ang akong buhaton aron makahinumdom nga ang Langitnong Amahan nakaila kanako ug mipili kanako?

Balik ngadto sa “Mga Opsiyon sa Kalihokan sa Pagkat-on.”