Moises 7

Ikonsiderar ang pagpakigbahin sa mosunod nga pamahayag ni Propeta Joseph Smith:

Maoy atong tinguha nga matukod ang Zion isip atong pinakamahinungdanon nga katuyoan. (Mga Pagtulun-an sa mga Presidente sa Simbahan: Joseph Smith [2007], 221)

Dapita ang mga estudyante sa pagpakigbahin kon unsa ang ilang kasamtangang nahibaloan mahitungod kon unsa ang ipasabot sa pagtukod sa Zion ug nganong kini usa ka importante nga tumong. Mahimo usab nimo sila nga patimbang-timbangon sa hilom sa ilang kasamtangan nga mga pangingkamot sa pagtukod sa Zion. Awhaga sila nga samtang sila magtuon nga mangita sa mga kamatuoran nga makatabang nila nga mas makasabot kon unsa ang Zion ug unsaon nila pagtabang sa pag-establisar niini sa ilang mga kinabuhi ug diha sa kalibotan palibot kanila.

Ipasabot nga ang propeta Enoch mitudlo ug migiya sa iyang katawhan sa pag-establisar sa siyudad sa Zion. Bisan og kini nahitabo sa karaan, kini naghatag og sumbanan alang sa matang sa mga tawo nga atong gikinahanglan nga mamahimo sa pagtukod sa Zion karon.

Dapita ang mga estudyante sa pagtuon sa Moises 7:16–27, 53, 68–69 aron sa pagdiskobre sa pipila sa mga kinaiya sa Zion. (Kon adunay mga pangutana ang mga estudyante mahitungod sa bersikulo 22, mahimo nimo silang dapiton sa pagbasa sa “Moises 7:22. Unsa ang gipasabot nga ‘ang binhi ni Cain mga itum?” sa Mga Tabang sa Kasulatan: Daang Tugon.)

Dapita ang mga estudyante sa pagpakigbahin sa ilang nakita nga mga kinaiya sa Zion. Ikonsiderar ang paglista sa ilang mga nakita diha sa pisara. Pwede kang mangutana sa pipila sa mosunod nga mga pangutana aron tabangan ang mga estudyante nga ipakigbahin ang ilang mga panabot:

• Sa usang paagi lahi ang Zion gikan sa tibuok kalibotan?

• Unsa ang inyong nabantayan mahitungod sa relasyon niini nga mga tawo ngadto sa Ginoo?

• Unsa ang gitudlo sa bersikulo 18 kaninyo mahitungod kon unsaon nato nga mahimong katawhan sa Zion? (Mahimong mailhan sa mga estudyante ang usa sa kamatuoran nga sama sa: Kita mahimong katawhan sa Ginoo ug motukod sa Zion kon kita usa sa kasingkasing ug usa sa hunahuna, magkaubang magkinabuhi sa pagkamatarong, ug mag-atiman sa kabus. Ikonsiderar ang paghisgot kon sa unsang paagi gipakita ni Jesukristo kini nga mga kinaiya atol sa Iyang mortal nga kinabuhi.)

Ipasabot nga si Enoch ug ang iyang katawhan mahimong magsilbi nga ehemplo alang kanato samtang kita maningkamot sa pagtukod sa Zion karon. Ikonsiderar ang paglista sa mosunod nga mga grupo o mga sitwasyon diha sa pisara:

• Pamilya

• Kauban sa lawak ug mga higala

• Ward o branch

• Sa trabaho

• Online

• Diha sa komunidad

Diha sa managpares o gagmay nga mga grupo, dapita ang mga estudyante sa pagpili sa pipila sa grupo o mga sitwasyon gikan sa lista ug hisgoti ang mosunod nga mga pangutana:

• Unsa kahay hitsura sa pagtukod sa Zion niini nga sitwasyon?

• Unsa ang kalahian nga mahimo kon dunay dugang nga panaghiusa, pagkabalaan, o pag-atiman sa uban niini nga bahin sa akong kinabuhi?

Ikonsiderar ang pagpakigbahin sa mosunod nga pamahayag ni Elder D. Todd Christofferson ug sa paghisgot sa dugang nga mga panabot nga naangkon sa mga estudyante mahitungod sa Zion ug sa unsang paagi sila makatabang sa pagtukod niini:

Ang Zion usa ka Zion tungod sa pamatasan, hiyas, ug pagkamatinud-anon sa iyang pagkanasudnon. … Kon atong itukod ang Zion diha sa atong mga panimalay, mga branch, mga ward, ug mga stake, … gikinahanglan nga (1) mahimong maghiusa sa usa ka kasingkasing ug usa ka hunahuna; (2) aron mamahimo, sa tinagsa ug sa dinaghan, nga usa ka balaan nga katawhan; ug (3) moatiman alang sa mga timawa ug nagkinahanglan uban sa ingon ka epektibo nga atong wad-on ang kakabus taliwala kanato. Dili kita makahulat nga ang Zion moabut nga kining mga butanga mahitabo—ang Zion moabut lamang kon kini mahitabo. (“Dali na Diri sa Zion,” Liahona, Nob. 2008, 38)

Awhaga ang mga estudyante sa pagtinguha sa giya sa Espiritu Santo samtang sila maghimo og usa ka plano nga mahimong mas maghiusa, balan, o manggihatagon aron sila mahimong mas hingpit nga makatukod sa Zion sa ilang mga kinabuhi. Dapita sila nga ilakip ang piho nga mga aksiyon nga ilang buhaton ug kanus-a nila kini buhaton. Mahimo nimong dapiton ang pipila ka estudyante sa pagpakigbahin og plano nga dili kaayo personal ngadto sa klase.

Sa pagtapos, ikonsiderar ang pagpamatuod nga si Jesukristo mao ang “Hari sa Zion” (Moises 7:53) ug nga Siya mobalik sa yuta sa Iyang Ikaduhang Pag-anhi. Ang ilang mga paningkamot aron matukod ang Zion makatabang sa pag-andam sa ilang kaugalingon ug sa uban alang sa Iyang pagbalik.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakigbahin sa usa o duha sa mosunod nga mga senaryo, o maghimo og imong kaugalingon:

• Si Ruby adunay pamilya ug mga higala kinsa mipili nga dili mosunod ni Jesukristo. Siya naghunahuna kon ang ilang mga desisyon nakaapekto ba sa paghigugma sa Langitnong Amahan ngadto kanila.

• Si Max nagduhaduha sa pagtinguha sa pakigrelasyon uban ang Dios. Iyang nakita ang Dios isip usa ka mapintas ug dali nga mosilot sa mga tawo.

Dapita ang mga estudyante sa pagkonsiderar sa mga tawo nga ilang kaila kinsa tingali anaa niini nga mga sitwasyon sama niadtong anaa sa mga senaryo. Mahimo usab silang maghunahuna mahitungod sa ilang kaugalingong relasyon uban sa Dios ug sa ilang mga pangutana o mga pagbati mahitungod Kaniya. Awhaga sila nga mahimong maminaw kon unsa ang ilang makat-onan gikan sa Espiritu Santo samtang sila magkat-on pa mahitungod sa kinaiya sa Dios niini nga kalihokan sa pagkat-on.

Hatagi og gibug-aton nga si Enoch ug ang iyang katawhan nagtukod sa Zion ug sa kataposan gidala ngadto sa langit (tan-awa sa Moises 7:16–21, 68–69). Sa usa ka panan-awon, nakita ni Enoch ang impluwensiya ni Satanas niadtong kinsa nagpabilin sa yuta tungod kay wala sila mahimong bahin sa Zion.

Dapita ang mga estudyante sa pagbasa sa Moises 7:23–27, nga mangita unsa ang nakita ug nakat-onan ni Enoch.

• Unsa ang inyong nakita niini nga mga bersikulo nga tingali importante nga hinumdoman?

Tun-i ang Moises 7:28–33, nga mangita unsa ang gibati sa Langitnong Amahan samtang nagtan-aw siya niadtong wala mopili nga mosunod Kaniya.

• Unsa ang imong nakat-onan o gibati mahitungod sa Langitnong Amahan samtang inyong gitun-an kini nga mga bersikulo? (Mahimong mailhan sa mga estudyante ang mga kamatuoran nga sama niini: Ang Langitnong Amahan mobati sa gugma ug kaluoy alang sa tanang tawo ug maghilak kon sila mag-antos. Ang Langitnong Amahan maluluy-on ug mabination hangtod sa kahangturan. Ang Langitnong Amahan nakahibalo kaayo kanato ug sa atong personal nga mga sirkumstansiya.)

• Unsa nga kalainan ang mahimo niini diha sa inyong kinabuhi ang pagkasayod niini nga mga kamatuoran?

Ikonsiderar ang pagpakigbahin sa mosunod nga pamahayag ni Presidente Jeffrey R. Holland:

Didto, sa taliwala sa dakong panan-awon sa katawhan diin ang langit nakita niyang naabli, si Enoch, nga nag-obserbar sa mga panalangin ug mga hagit sa pagkamortal, milingi ngadto sa Amahan ug dili makatuo nga nakakita Kaniya nga nagbakho. Siya natingala ug nahingangha nga miingon ngadto niining labing gamhanan nga Nilalang diha sa uniberso: “Sa unsa nga paagi ikaw makabakho? …Ikaw makiangayon [ug] maloloy-on ug mabination sa kahangtoran; … Kalinaw …mao ang pinuy-anan sa imong trono; ug kalooy mouban sa atubangan sa imong nawong ug walay kataposan; sa unsa nga paagi ikaw makabakho?” …

Kanang nag-inusara, makatandog nga talan-awon nakahatag og labaw pa sa pagtudlo sa tinuod nga kinaiya sa Dios kay sa mapadangat sa bisan unsang teyolohikanhong sinulat mahitungod sa relihiyon. …

Unsa ka dako nga ehemplo nga dili malimtan ang pagpangga ug pagkalambigit sa Dios sa atong mga kinabuhi! Unsa nga kaguol sa usa ka ginikanan kon ang Iyang mga anak wala mopili Kaniya ni “sa ebanghelyo sa Dios” nga Iyang gipadala! [Mga Taga-Roma 1:1] Pagkasayon sa paghigugma sa usa ka tawo nga nag-inusarang nahigugma kanato! …

Ako mopahayag sa personal nga pagsaksi niini nga adlaw sa usa ka personal, buhi nga Dios, kinsa nakaila sa atong mga ngalan, naminaw ug nagtubag sa mga pag-ampo, ug nagpangga kanato sa kahangtoran isip mga anak sa Iyang espiritu. (“The Grandeur of God,” Liahona, Nov. 2003, 72)

Dapita ang mga estudyante sa pagpakigbahin kon unsay mipatigbabaw ngadto kanila gikan sa mga pulong ni Presidente Holland. Mahimo usab nimong ikonsiderar ang pagpangutana sa mosunod:

• Giunsa ninyo pagkahibalo nga ang Dios nahigugma kaninyo ug sensitibo sa inyong pag-antos? (Makatabang tingali sa mga estudyante nga makita ang mga ehemplo sa ubang batan-on nga mga tawo kinsa nakasinati na niini. Mahimo ninyong tan-awon ang bidyo nga “God Hears You | Mosiah 23:10” [2:24] o “Heavenly Father Knows Me” [3:18]; Gospel Library.)

  

  3:19

Kon aduna pay higayon, mahimo nimong ipasabot nga ang Dios mitudlo ni Enoch nga tungod sa dakong kadaotan nga anaa sa yuta, kadto kinsa dili maghinulsol mahimong mamatay sa lunop. Kini mao ang nakapahilak ni Enoch (tan-awa sa Moises 7:36–44). Mahimong tun-an sa mga estudyante ang Moises 7:44–53, nga mangita kon sa unsang paagi gihupay sa Ginoo si Enoch. Mahimo ninyong hisgotan nganong ang pagkakita niini nga mga butang nakapahimo sa kalag ni Enoch nga magmaya.

Sa pagtapos sa kalihokan sa pagkat-on, dapita ang mga estudyante sa pagpamalandong kon unsa ang ilang nakat-onan o gibati gikan sa Espiritu Santo. Hatagi sila og panahon nga makasulat sa ilang mga hunahuna ug mga empresyon.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakigbahin sa mosunod nga pamahayag ni Presidente Russell M. Nelson:

Sa umaabot nga mga adlaw, kita makakita sa labing dako nga mga pagpakita sa gahom sa Manluluwas nga sukad wala makita sa kalibotan. Tali karon ug sa adlaw sa Iyang pagbalik “uban sa gahom ug dakong himaya” [Joseph Smith—Mateo 1:36], Siya motanyag og dili maihap nga mga pribilehiyo, mga panalangin, ug mga milagro diha sa mga matinud-anon.

Bisan pa, kita karon nagpuyo sa unsay segurado nga mao ang labing komplikado nga panahon sa kasaysayan sa kalibotan. Ang mga kakomplikado ug mga hagit nakapahimo sa daghang mga tawo nga mobati nga nabug-atan ug gikapoy. (“Buntoga ang Kalibotan ug Pangita og Kapahulayan,” Liahona, Nob. 2022, 95)

Dapita ang mga estudyante sa pagpakigbahin sa ilang mga hunahuna kabahin sa pamahayag ni Presidente Nelson. Mahimo kang mangutana og sama niini:

• Unsa ang pipila sa mga hagit nga nakapalisod sa pagpakabuhi sa kataposang mga adlaw?

• Unsaon ninyo pagpangita og paglaom samtang nanginabuhi atol sa kataposang mga adlaw?

Ipasabot nga isip kabahin sa iyang panan-awon nga narekord sa Moises 7, si Enoch nakat-on sa pipila ka paagi nga ang Ginoo mopreserbar sa Iyang katawhan sa kataposang mga adlaw. Dapita ang mga estudyante samtang sila magtuon sa pagpangita sa mga kamatuoran ug mahimong magmatngon ngadto sa espirituwal nga mga impresyon gikan sa Espiritu Santo nga makatabang nila nga mobati sa dakong pasalamat mahitungod sa pagkinabuhi niining mahinungdanong panahon sa kasaysayan sa kalibotan.

Dungan nga magtuon sa Moises 7:60–61. Dapita ang mga estudyante sa pagangita ug sa pagpakigbahin sa mga katalagman nga gitudlo sa Ginoo ngadto ni Enoch nga mahitabo sa kataposang mga adlaw.

• Unsa ang gisaad sa Ginoo nga Iyang buhaton sa Iyang katawhan sa bersikulo 61? (Mahimo nimong dapiton ang mga estudyante sa pagmarka sa hugpong sa mga pulong nga “apan ang akong katawhan ako mopatunhay” diha sa ilang mga kasulatan.)

Ikonsiderar ang pagsulat sa mosunod nga hugpong sa mga pulong diha sa pisara: Aron mapatunhay ang Iyang katawhan sa kataposang mga adlaw, buhataon sa Ginoo ang:

Dapita ang mga estudyante sa pagtuon sa Moises 7:62–67, nga mangita sa mga paagi nga ilang makompleto ang hugpong sa mga pulong gikan sa pisara. Hangyoa ang mga sakop sa klase sa pagpakigbahin unsa ang ilang nakaplagan. Mahimo nimong isulat ang ilang mga tubag diha sa pisara. Kon gikinahanglan, ibaling ang atensiyon sa mga estudyante sa bersikulo 62 ug isulat ang mosunod nga kamatuoran diha sa pisara:

Aron mapatunhay ang Iyang katawhan sa kataposang mga adlaw, buhaton sa Ginoo ang:

• Pagpadala sa matarong gikan sa langit.

• Pagpadala sa kamatuoran gikan sa yuta.

• Ipakatap sa yuta ang pagkamatarong ug kamatuoran.

• Pagpundok sa Iyang katawhan ngadto sa Zion.

Aron matabangan ang mga estudyante nga mas makasabot sa kamahinungdanon niining gipanagna nga mga panghitabao, ikonsiderar ang paghisgot sa mga pangutana sa ubos. (Alang sa dugang nga mga ideya mahitungod sa pagpangutana niining mga matang sa mga pangutana, tan-awa sa “Pagsukna og mga Pangutana nga Magdapit og Makugihon nga Pagkat-on” sa Mga Kahanas sa Pagtuon sa Kasulatan.)

• Unsa ang pipila ka paagi nga ang Ginoo mituman o motuman pa niini nga panagna? (Pwede nimong isulat ang mga tubag sa mga estudyante diha sa pisara. Tingali makatabang ang pagbasa sa “Moises 7:62–63. Unsa ang gipakita kang Enoch bahin sa kataposang mga adlaw?” sa Mga Tabang sa Kasulatan: Daang Tugon aron sa pagtabang sa mga estudyante nga mahimong mas andam sa pagtubag niini nga pangutana.)

• Unsa ang nakatabang niining gipanagna nga mga panghitabo kaninyo aron masabtan o mabati ang mahitungod sa Langitnong Amahan ug ni Jesukristo?

• Sa unsang paagi ang bisan asa niining gipanagna nga mga panghitabo makatabang kaninyo latas sa mga kalisod sa kataposang mga adlaw?

Mahimo nimong taposon pinaagi sa pagpakigbahin pag-usab sa unang parapo sa pamahayag ni Presidente Russell M. Nelson sa sinugdanan niining kalihokan sa pagkat-on. Ikonsiderar ang pagdapit sa pipila ka estudyante sa pagpakigbahin sa mga rason nganong mapasalamaton sila nga mabuhi niini nga panahon sa kaysayan sa kalibotan.

Balik ngadto sa “Mga Opsiyon sa Kalihokan sa Pagkat-on.”