Genesis 3–4; Moises 4–5

Ikonsiderar ang pagpakita sa mosunod nga mga pangutana ug dapita ang mga estudyante sa paghisgot niini uban sa kapares. Kon ang mga estudyante nagkinahanglan og tabang, mahimo nilang tun-an ang Mga Hilisgotan ug mga Pangutana, “Agency and Accountability” (Gospel Library) sa dili pa nila sugdan ang ilang panaghisgot.

• Unsa ang kabubut-on?

• Nganong importante ang kabubut-on?

Ipasabot nga ang Moises 4 naghulagway sa premortal nga Konseho sa Langit, diin ang Langitnong Amahan mipili ni Jesukristo nga mahimong atong Manluluwas. Ang kabubut-on mao ang usa sa nag-unang isyu nga mitumaw niini nga konseho sa wala pa dinhi sa yuta. Dapita ang mga estudyante nga samtang sila magtuon karon aron makita kon unsa ang ilang makat-onan mahitungod sa kaimportante sa ilang kabubut-on ug unsaon nila pagprotekta niini.

Ikonsiderar ang pagpakita sa mosunod nga mga kalihokan sa pagtuon ug sa pagdapit sa mga estudyante sa pagkompleto niini nga managpares o sa ginagmay nga grupo:

Tun-i ang Moises 4:1–4, dayon hisgotan ang mosunod nga mga pangutana:

• Unsa ang pipila ka kalainan nga inyong nabantayan tali sa mga pulong sa Langitnong Amahan ug ni Jesukristo ug sa mga pulong ni Satanas?

• Sa unsang paagi ninyo nakita nga ang kabubut-on gipasidunggan o gibaliwala niini nga mga bersikulo?

Dapita ang mga estudyante nga ipakigbahin diha sa klase ang mga panabot nga ilang naangkon gikan sa ilang pagtuon ug panaghisgot. Samtang sila mopakigbahin, mahimo nilang ilhon ang mga kamatouran sama niini: Si Jesukristo mapainubsanong nagbuhat sa kabubut-on sa Langitnong Amahan. Si Satanas nagtinguha sa pagguba sa atong kabubut-on ug modala kanato sa pagkabihag.

• Sa unsang paagi nagtinguha si Satanas sa pagguba sa atong kabubut-on karon? Isip kabahin sa inyong panaghisgotan, ikonsiderar ang pagpakigbahin sa mosunod nga pamahayag ni Elder Paul V. Johnson:

Si Satanas karon naglimbong ug nagbuta sa mga tawo, ug siya modala kanila sa pagkabihag diha sa iyang kabubut-on. Kon siya nangulo aron mabihag ang mga tawo, dili ba kana nagpasabot nga iyang giguba ang kabubut-on?

Ang kamatouran mao, nga siya wala makaguba sa kabubut-on sa premortal nga kinabuhi, ug dili usab kana niya mabuhat karon. Apan siya modala nato sa pagkabihag pinaagi sa pagdani kanato sa pagpakasala. Kon kita makasala, atong gitahan ang atong kaugalingon ngadto kaniya. Kita, isip epekto, mihatag sa bahin sa atong kabubut-on ngadto kaniya. Siya dili makakuha niini gikan kanato, apan kita mahimong motahan niini. (“Free to Choose,” Ensign, Feb. 2019, 64)

Ipasabot nga sukwahi ni Satanas, kinsa nagtinguha sa pagguba sa atong kabubut-on, si Jesukristo nagtinguha sa pagpreserbar ug pagprotekta niini.

• Sa unsang paagi ang mga aksiyon sa Langitnong Amahan ug ni Jesukristo didto sa Konseho sa Langit nanalipod sa inyong kabubut-on?

• Sa unsang paagi nagpadayon ang Langitnong Amahan ug si Jesukristo sa pagpanalipod sa inyong kabubut-on karon? (Mahimo nimong ipakigbahin ang mosunod nga pamahayag ni Elder Johnson, isip kabahin niini nga panaghisgot:)

Kon kita mosunod kang Satanas, kita naghatag kaniya og gahom. Kon kita mosunod sa Dios, Siya mohatag kanato og gahom. Dili kini ang mensahe nga atong makuha gikan sa kalibotan, apan kini ang kamatuoran. Ang tinuod nga gahom, ang gahom nga mahimong sama sa Manluluwas, mapalgan lamang diha sa pagkamasulundon. Ang tinuod nga kagawasan mapalgan lamang diha sa pagkamasulundon—sa pagpasakop sa atong kaugalingon ngadto sa kabubut-on sa Dios kay sa kabubut-on sa unod o sa kabubut-on sa yawa. Ang pagkamasulundon nagdala og kagawasan, gahom, kalipay, kalinaw, ug paglaom.

… Pinaagi sa pagpuyo nga matarong, kita mahimong gawasnon gikan sa bisan unsang gahom nga gusto sa kaaway nga gamiton batok kanato. Siya makaangkon lamang sa gahom kon kita motugot niini pinaagi sa atong mga pagpili. Kon adunay butang sa atong kinabuhi nga nakahasol kanato ug naghigot kanato, kita maghinulsol. Ato kining isalikway ug dugangan ang kagawasan diha sa atong kinabuhi. (“Free to Choose,” 69)

Hatagi ang mga estudyante og panahon sa pagpamalandong sa mga paagi nga tingali ilang gibati nga si Satanas misulay sa pagdala kanila sa pagkabihag. Dasiga sila sa paghunahuna sa mga asksiyon nga ilang mahimo aron mas hingpit nga makasalig ni Jesukristo aron sila makasinati sa dakong kagawasan nga naggikan Kaniya. Dapita sila sa pagsulat sa mga hunahuna ug mga impresyon nga ilang madawat.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakigbahin sa mosunod nga senaryo:

• Unsa ang inyong mga hunahuna mahitungod sa tubag ni Lucas sa iyang sitwasyon?

Ipasabot nga ang mga aksiyon ni Adan ug Eva human sila makakaon sa gidili nga bunga mahimong motudlo kanato og importante nga mga leksiyon mahitungod kon asa modangop kon kita makalapas sa mga sugo sa Dios. (Kon gikinahanglan, mahimo nimong irebyo ang asoy ni Adan ug Eva nga mikaon sa bunga pinaagi sa pagtuon sa Moises 3:15–17; 4:5–12.) Awhaga ang mga estudyante sa pagtinguha og panabot gikan sa Langitnong Amahan mahitungod kon sa unsang paagi ang mga kamatuoran nga ilang natun-an karon mahimong maggamit sa ilang mga kinabuhi.

Dungang tun-an ang Moises 4:12–19, 27. Dapita ang mga estudyante sa pagpangita sa mga kamatuoran gikan niini nga mga bersikulo nga tingali makatabang ni Lucas nga mabag-o kon unsa ang iyang panglantaw sa iyang mga sayop. Hatagi ang mga estudyante og kahigayonan nga ipakigbahin ang ilang mga panabot nga magkapares o sa gagmay nga mga grupo. Mahimo nimong ipakita ang mga pangutana sama sa mosunod aron molambo ang panaghisgot:

• Ngano kaha nga misulay si Adan ug Eva sa pagtago gikan sa Dios? Sa unsang paagi karon ang mga tawo usahay mosulay sa “pagtago” gikan sa Dios?

• Unsa ang inyong makat-onan sa pangutana gikan sa Dios “Asa ikaw paingon?” (bersikulo 15)?

• Sa unsang paagi mitabang ang Dios ni Adan ug Eva sa bersikulo 27? Sa unsang paagi Siya makatabang kanato kon kita mahulog ngadto sa kalapasan?

Human matapos ang mga estudaynte sa ilang mga panaghisgot, ipasabot nga adunay importante nga simbolikanhong kahulogan sa “mga kupo nga mga panit” nga gihatag sa Dios alang kang Adan ug Eva. Ipakigbahin ang mosunod nga pamahayag ni Sister J. Anette Dennis. (O pwede ninyong tun-an ang “Genesis 3:21; Moises 4:27. Unsa ka mahinungdanong sa Dios ang pagsul-ob ni Adan ug Eva og mga kupo sa mga panit?” diha sa Mga Tabang sa Kasulatan: Daang Tugon.)

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kadtong sama kanato nga mipili sa paghimo og mga pakigsaad uban sa Dios diha sa balay sa Ginoo magsul-ob og pangseremonya nga panggawas nga bisti atol sa pagsimba sa templo, nga nagsimbolo sa bisti nga gisul-ob sa mga ritwal sa templo sa karaang panahon. Kita usab magsul-ob sa garment sa balaang pagkapari, atol sa pagsimba diha sa templo ug sa atong inadlaw-adlaw nga kinabuhi.

Ang garment sa balaan nga pagkapari lawom og kahulogan ug nagpunting usab ngadto sa Manluluwas. Sa dihang si Adan ug Eva mikaon sa prutas ug kinahanglan nga mobiya sa Tanaman sa Eden, sila gihatagan og mga sapot nga panit aron itabon nila. Adunay kalagmitan nga may hayop nga gisakripisyo aron mahimo kadtong mga sapot nga panit—nagsimbolo sa kaugalingon nga sakripisyo sa Manluluwas alang kanato. Ang Kaphar usa ka sukaranang Hebreo nga pulong alang sa pag-ula, ug usa sa mga kahulogan niini mao “ang pagtabon.” Ang atong garment sa templo nagpahinumdom kanato nga ang Manluluwas ug ang mga panalangin sa Iyang Pag-ula magtabon kanato sa tibuok natong kinabuhi. Samtang atong gisul-ob ang garment sa balaan nga pagkapari matag adlaw, kanang maanindot nga simbolo mahimong kabahin nato. (“Himoa ang Ginoong Jesukristo nga Inyong Tigpanalipod,” Liahona, Mayo 2024, 11)

Dapita ang mga estudyante nga ipakigbahin ang unsay ilang nakat-onan mahitungod ni Jesukristo ug sa mga garment sa templo gikan sa pamahayag ni Sister Dennis (Gamit ang ilang kaugalingong mga pulong, pwede nilang ipakigbahin ang usa ka kamatuoran nga sama niini: Ang mga garment sa templo simbolikanhong nagrepresentar ni Jesukristo ug sa mga panalangin sa Iyang Pag-ula.)

• Sa unang paagi ang pagsabot niini nga kamatuoran makaapektar sa atong pagkaandam nga modawat sa mga panalangin sa templo ug ang mosul-ob sa balaang garment? Sa unsang paagi kini makaimpluwensiya sa inyong pagbati bahin sa Langitnong Amahan ug ni Jesukristo?

Ikonsiderar ang pagpakigbahin sa mosunod nga pamahayag ni Presidente Jeffrey R. Holland ug dapiton ang mga estudyante sa pagpakigbahin kon unsa ang mipatigbabaw ngadto kanila:

Sa dihang isul-ob nato ang garment, kita, sama sa gitudlo sa Unang Kapangulohan, nagsul-ob sa usa ka sagrado nga simbolo ni Jesukristo. Kon ingon niana ang kahimtang, nganong mangita pa man kita og pasangil aron kuhaon kana nga simbolo? Ngano nga atong ihikaw sa atong mga kaugalingon ang saad sa gahom, panalipod, ug kaluoy nga girepresentaran sa garment? Sa laing bahin, sa matag higayon nga kita kinahanglan nga temporaryo nga magtangtang sa garment, kita kinahanglang matinguhaon nga isul-ob kini pag-usab, sa labing dali, tungod kay kita mahinumdom sa mga saad ug sa mga kapeligrohan nga naghatag og kahulogan sa atong mga pakigsaad. Labaw sa tanan, kita mohinumdom sa krus ug sa walay sulod nga lubnganan ni Kristo.

Ang uban posible nga mosulti og, “Anaa akoy laing mga paagi sa paghinumdom ni Jesus.” Ug ako motubag, nindot kana. Mas daghan mas maayo. Kitang tanan maghunahuna og daghang paagi kutob sa atong mahimo sa pagtuman sa atong pasalig nga “kanunay mahinumdom kaniya.” Apan sa pagbuhat sa ingon, dili matinud-anon ang tinuyo nga pagpasagad sa pahinumdom nga gihatag mismo sa Ginoo ngadto sa gitugahan, ang garment sa balaang pagkapari. (“Ang Garment sa Balaan nga Pagkapari,” Liahona, Sep. 2024, 7)

Pagpamatuod sa mga kamatuoran nga imong nahisgotan. Dapita ang mga estudyante sa pagrekord sa espirituwal nga mga impresyon nga tingali ilang madawat gikan sa Espiritu Santo mahitungod kon sa unsang paagi nila magamit ang mga kamatuoran nga ilang gitun-an. Awhaga sila sa paglihok sa ilang espirituwal nga mga impresyon.

Balik ngadto sa “Mga Opsiyon sa Kalihokan sa Pagkat-on.”

Sa dili pa moabot ang mga estudyante, ikonsiderar ang pagsulat sa mga pulong nga sama sa kalinaw, pagtubo, pagtagbaw, hingpit nga kalipay, ug kalipay sa usa ka bahin sa pisara ug mga pulong sama sa sakit, kabalaka, kasubo, naangol, ug kaguol sa laing bahin sa pisara.

Hangyoa ang klase sa paghunahuna sa mga higayon diin bag-o lang nila nasinati ang bisan asa niini nga mga butang. Mahimo usab kang mangutana:

• Unsa ang papel nga gidala sa Pagkapukan ni Adan ug Eva ngari kanato nga aduna niini nga mga pagbati o mga kasinatian?

Niini nga kalihokan sa pagkat-on, ang mga estudyante magtuon sa mga paagi nga makaapekto kanila ang Pagkapukan, ingon man usab sa importanteng tahas ni Jesukristo sa pagbuntog sa mga epekto sa Pagkapukan. Sa dili pa sila magsugod sa pagtuon, tingali makatabang nga adunay pipila ka estudyante nga mopakigbahin kon unsa ang ilang nasayran mahitungod sa mga panghitabo nga misangpot ngadto sa Pagkapukan ni Adan ug Eva. (Kon gikinahanglan, mahimong dungan ninyong tun-an ang Moises 3:15–17; 4:5–12.)

Ipakita ang mosunod nga table ug dapiton ang mga estudyante sa paghimo og ilang kaugalingon nga bersiyon. Hatagi sila og oras sa pagkompleto sa table sa indibidwal man o uban sa kapares. (Pwede usab nimong patun-an nila ang mga entry nga may kalabotan niini nga mga bersikulo sa Mga Tabang sa Kasulatan: Daang Tugon.)

Human sa igong panahon, hangyoa ang mga estudyante sa pagpakigbahin sa ilang mga tubag alang sa duha ka kolum diha sa table. Ang pipila sa ilang mga tubag mahimong maglakip sa mga kamatuoran sama sa mosunod: Ang Pagkapukan usa ka importanteng bahin sa plano sa kaluwasan sa Langitnong Amahan. Kon wala pa napukan si Adan ug Eva, dili unta sila makabaton og mga anak. Isip resulta sa Pagkapukan, ang tanang tawo makasinati sa pisikal ug espirituwal nga kamatayon. Pinaagi ni Jesukristo, kita mahimong matubos gikan sa Pagkapukan.

Aron matabangan ang mga estudyante nga mas makasabot ug mobati sa kaimportante niini nga mga kamatuoran, ikonsiderar ang pagsukna sa pipila sa mosunod nga mga pangutana:

• Ngano nga ang Pagkapukan usa ka mahinungdanon nga bahin sa plano sa kaluwasan sa Langitnong Amahan?

• Sa unsang paagi nga ang pagsabot sa Pagkapukan makatabang kaninyo nga mas masabtan ang inyong panginahanglan kang Jesukristo?

• Unsa ang gipadayag sa Pagkapukan mahitungod sa gugma ug mga paglaom sa Langitnong Amahan alang sa Iyang mga anak?

Ang pipila sa mosunod nga mga pamahayag tingali makatabang nga gamiton sa lainlain nga mga punto sa panaghisgotan:

Ingon nga ang tawo dili magtinguha og pagkaon hangtod nga gutomon siya, dili usab siya magtinguha sa kaluwasan ni Kristo hangtod nga masayod siya nganong nagkinahanglan siya ni Kristo. Walay usa ang igo ug tukma nga nasayod nganong gikinahanglan niya si Kristo hangtod nga iyang masabtan ug madawat ang doktrina sa Pagkapukan ug ang epekto niini sa tanang katawhan. (Ezra Taft Benson, “The Book of Mormon and the Doctrine and Covenants,” Ensign, Apr. 1987, 85)

Ang kinabuhi aduna gayoy pagkadili makiangayon. … Diha sa dili makiangayong mga sitwasyon, usa sa atong mga tahas mao ang pagsalig nga “ang tanan nga dili makiangayon kabahin sa kinabuhi mahimong mapahusto pinaagi sa Pag-ula ni Jesukristo” [Isangyaw Ang Akong Ebanghelyo: Usa ka Giya sa Serbisyong Misyonaryo (2018), 61]. Si Jesukristo mibuntog sa kalibotan ug “makapahiuli” sa tanan nga pagkadili makiangayon. Tungod Kaniya, makabaton kita og kalinaw dinhi sa kalibotan ug magmaya. (Dale G. Renlund, “Makapungot nga Pagkadili Makiangayon,” Liahona, Mayo 2021, 42–43)

Sila si Adan ug Eva milihok alang sa tanan nga mipili nga moapil sa mahinungdanong plano sa kalipay sa Amahan. Ang ilang Pagkapukan mimugna og kahimtang nga gikinahanglan alang sa atong pisikal nga pagkatawo ug alang sa mortal nga kasinatian ug pagkat-on sa gawas sa presensya sa Dios. Tungod sa Pagkapukan miabut ang pagkasayud sa maayo ug sa dautan ug sa hinatag sa Dios nga gahum sa pagpili. Sa kataposan, ang Pagkapukan nagdala og pisikal nga kamatayon nga mahimong temporaryo ang atong panahon sa mortalidad, aron dili kita magpuyo sa kahangtoran diha sa atong mga sala. (D. Todd Christofferson, “Nganong Kaminyoon, Nganong Pamilya,” Liahona, Mayo 2015, 52)

Mahimo nimong taposon pinaagi sa pagdapit sa mga estudyante sa paghanduraw nga sila namulong sa usa ka tawo kinsa mibati nga ang Pagkapukan mao ang usa ka dili maayong butang ug ang tinubdan sa tanang daotan sa kalibotan, ug sila natingala nganong ang mga miyembro sa Simbahan naghunahuna nga kini usa ka positibo nga butang. Ikonsiderar ang paghatag kanila og panahon sa pagpraktis uban sa kapares kon unsaon nila pagtubag.

Balik ngadto sa “Mga Opsiyon sa Kalihokan sa Pagkat-on.”