1 Samuel 8–10; 13; 15–16

Ikonsiderar ang pagsugod sa klase pinaagi sa paghisgot sa mosunod nga pamahayag ni Sister Elaine S. Dalton, kanhi Kinatibuk-ang Presidente sa Young Women:

Kon nagtinguha mo sa paghimo’g kalainan sa kalibotan, kinahanglang lahi kamo sa kalibotan. (“Karon ang Panahon sa Pagtindog ug Pagpakita!,” Liahona, Mayo 2012, 124)

• Unsa nga mga hagit kaha ang mahimo ninyong atubangon samtang pilion ninyong mahimong lahi sa kalibotan?

Dapita ang mga estudyante sa pagpamalandong kon unsa sila ka andam nga mobarog dihang makaatubang sila og mga hiyas nga lahi sa Ginoo. Awhaga sila samtang magtuon karon nga pangitaon ang mga kamatuoran nga makatabang sa ilang mga paningkamot nga mosunod ni Jesukristo.

Pahinumdomi ang mga estudyante nga ang mga Israelinhon gidumala sa mga maghuhukom sulod sa unang gatosan ka katuigan human sila makasulod sa gisaad nga yuta. Si propeta Samuel mao ang usa sa kataposan niini nga mga maghuhukom. Matinud-anon niyang gipangulohan ang Israel ubos sa direksiyon sa Ginoo sulod sa daghang katuigan.

Dapita ang mga estudyante nga basahon ang 1 Samuel 8:1–9, nga pangitaon kon unsay gitinguha sa mga anciano sa Israel samtang nagkatigulang si Samuel. Ipapakigbahin nila ang ilang nakaplagan. Mahimo usab kang mangutana:

• Nganong gusto og hari ang mga anciano? (Kon kinahanglan, ipasiugda nga mibati ang mga Israelinhon nga mas maayong naa silay hari kay mao na ang gihimo sa “tanang mga nasod” nga naglibot nila. Tan-awa sa bersikulo 20.)

• Sa imong hunahuna, nganong wala malipay si Samuel sa ilang mga rason sa pagbaton og hari?

I-summarize ang mga bersikulo 10–18 pinaagi sa pagpasabot nga ang Ginoo mihatag og piho nga mga pahimangno kang Samuel bahin sa mga peligro sa pagbaton og hari.

Dapita ang mga estudyante sa pagtuon sa 1 Samuel 8:19–22 ug sa mosunod nga pamahayag ni Presidente Jeffrey R. Holland, nga mangita kon giunsa pagtubag sa mga Israelinhon sa mga pahimangno ni Samuel.

Ang sakit nga hunahunaon dinhi mao nga sila aduna nay usa ka hari nga mikuyog nila ug nakig-away sa ilang mga gubat. Siya mao si Jehova, ang Hari sa tanan, apan dili na si Jehova mangulo nila. Dili na Siya makig-away sa ilang mga gubat. Ug sama sa tema sa daghan na kaayong mga leksiyon sa kasaysayan, ang sakit nga mga sangpotanan miabot sa dihang ulahi na kaayo ang paglikay niini. Sa kaulahian ang mga tawo nagbangotan, “Nadugangan namo ang among sala pinaagi sa pagpangayog hari” (1 Samuel 12:19). (“Pilia ang Ginoo ug ang Iyang Propeta,” Liahona, Hunyo 2022, 6)

Dapita ang mga estudyante nga ipakigbahin ang mga kamatuoran nga ilang nakat-onan gikan niini nga asoy nga makatabang nila sa mga sitwasyon nga ilang atubangon. Aniay usa ka pananglitan sa kamatuoran nga ilang mailhan: Ang pagpili sa pagsunod sa popular nga mga ideya imbes sa tambag sa Ginoo moresulta sa pag-antos ug pagmahay.

Ikonsiderar ang pagpakita sa mosunod nga mga pangutana ug sa pagdapit sa mga estudyante sa paghisgot niini uban sa usa kapares o sa gagmay nga grupo:

• Unsa ang pipila ka kasagarang gidawat nga mga ideya o mga mithi nga makapahilayo sa mga young adult gikan sa Dios?

• Unsay imong nahibaloan bahin ni Jesukristo nga makatabang nimo nga mabuntog ang tentasyon nga sundon kini nga matang sa mga ideya?

Pwede nimong dapiton ang pipila ka estudyante nga ipakigbahin ang ilang mga panglantaw panahon sa panaghisgot. Pwede usab nimong ikonsiderar ang paghisgot og pangutana nga sama sa mosunod:

• Kanus-a ang higayon diin mibati mo nga duol sa Manluluwas tungod kay gipili ninyo nga sundon ang Iyang tambag nga magkinabuhing lahi sa kalibotan?

Ikonsiderar ang pagtapos pinaagi sa pagpakigbahin sa mosunod nga pamahayag ni Presidente Holland ug sa pagdapit sa mga estudyante nga ikonsiderar kon sa unsang paagi nila kini masabtan:

Isip mga sakop niining sama nga panimalay sa Israel nga halapad nga gihulagway, kita gimandoan nga dili lamang mahimong sama sa ubang mga tawo, dili lamang mahimong sama sa kalibotan. Apan sama sa mga tawo sa Dios sa panahon ni Samuel, nag-atubang kita og gamhanang impluwensiya sa tentasyon aron mamahimong sama niadtong mahuyang, niadtong mga tawo nga mibuhat sa mga butang nga popular sa ilang panahon. …

Gitawag kita aron ipalayo ang atong kaugalingon gikan sa pagkadaotan … ug mahimong espirituhanon nga igpapatubo sa pan ngadto sa kalibotan nga dili mahimong sama og lebel sa espirituhanong paagi sa kalibotan. (“Pilia ang Ginoo ug ang Iyang Propeta,” 6, 7)

Awhaga ang mga estudyante sa pag-ila kon unsaon nila paggamit ang mga kamatuoran nga ilang gitun-an karon. Dapita sila sa pagsulat sa ilang mga hunahuna o mga impresyon nga gikan sa Espiritu Santo.

Balik ngadto sa “Mga Opsiyon sa Kalihokan sa Pagkat-on.”

Pwede nimong sugdan pinaagi sa pagpakigbahin niini nga pamahayag ni Presidente Russell M. Nelson ug paghisgot sa nagsunod nga pangutana:

Makasugat [kamo] og mga tawo nga pilion lang ang mga sugo nga ilang tumanon ug mobaliwala sa uban nga ilang gipiling supakon. Gitawag ko kini og pangkarinderya nga pagkamasulundon. Kini nga kinaiya sa pagpili-pili dili magsilbi. Mopadulong kini ngadto sa kauyamot. Aron andam nga mosugat sa Dios, kita motuman sa tanan Niyang mga sugo. Nagkinahanglan og hugot nga pagtuo ang pagtuman niini, ug ang pagtuman sa Iyang mga sugo makapalig-on niana nga pagtuo. (“Atubanga ang Umaabut uban sa Hugot nga Pagtuo,” Liahona, Mayo 2011, 34)

• Ngano kaha nga pilion sa usa ka tawo nga dili tumanon ang piho nga sugo gikan sa Dios?

Samtang tun-an sa mga estudyante ang 1 Samuel 15, dapita sila sa pagpamalandong kon unsa ka importante kini para nila ang pagtuman sa tanang sugo sa Dios. Awhaga sila sa tibuok kalihokan sa pagkat-on nga ikonsiderar ang mga paagi diin ilang mapauswag ang ilang pagkamasulundon sa Dios.

Pahinumdomi ang mga estudyante nga si Saul mapaubsanon ug kanunay nga nagsalig sa Ginoo dihang gidihogan siya nga hari sa Israel (tan-awa ang 1 Samuel 9:21; 15:17). Pero, samtang nakasinati siya og daghang kalamposan, nakuhaan ang iyang pagsalig sa Ginoo ug mas misalig na siya sa kaugalingon niyang paghukom. Dihang mihulga ang mga Filistehanon nga moatake, gisupak ni Saul ang Ginoo pinaagi sa paghalad og dili awtorisado nga sakripisyo (tan-awa sa 1 Samuel 13:8–14. “Nganong sayop si Saul sa paghalad og sakripisyo?” diha sa Mga Tabang sa Kasulatan: Daang Tugon). Dunay susama nga kasinatian nga nahitabo diha sa 1 Samuel 15, dihang wala tumana sa tukma ni Saul ug sa iyang kasundalohan ang Ginoo.

Dapita ang mga estudyante sa pagbasa sa 1 Samuel 15:1–3, 7–9, nga pangitaon ang sugo nga gihatag sa Ginoo ngadto ni Saul ug sa iyang kasundalohan ug giunsa nila pagsanong.

Makatabang tingali ang pag-ila nga naay mga bahin niini nga asoy nga lisod tingali para sa modernong mga magbabasa. Alang sa dugang bahin sa sugo nga laglagon ang mga Amalekanhon, tan-awa sa “1 Samuel 15:1–3. Nganong gisugo si Saul nga ‘pamatyon tanan’ ang mga Amalekanhon?” diha sa Mga Tabang sa Kasulatan: Daang Tugon, ug kon “How do we make sense of instances of violence in the scriptures?” diha sa Topics and Questions, “Religion vs. Violence,” Gospel Library.

Ipasabot nga bisan kon wala kita masayod sa tanang rason kon nganong gisugo si Saul nga patyon ang tanang Amalekanhon ug ang ilang mga hayop, makakat-on gihapon ta og mga leksiyon sa paagi sa pagsanong ni Saul sa sugo sa Ginoo.

Dapita ang mga estuydante sa pagbasa sa 1 Samuel 15:13–26, nga pangitaon kon giunsa pagpangatarongan ni Saul kang propeta Samuel ang iyang mga gihimo. Dayon, pwede nimong hisgotan ang mosunod nga mga pangutana:

• Unsa may labing importante para nimo bahin sa katarongan ni Saul?

• Unsa ang pipila ka pananglitan kon unsaon pagpangatarongan sa mga tawo sa atong panahon ang ilang pagkamasinupakon sa mga sugo sa Dios?

Hangyoa ang mga estudyante nga ipakigbahin ang mga kamatuoran nga ilang nakat-onan gikan sa asoy ni Saul ug Samuel nga makatabang nato kon matental ta sa pagpangatarongan sa atong pagkamasinupakon. (Usa ka kamatuoran nga mahimong hisgotan sa mga estudyante mao ang sama niini: Ang pagpatalinghog ug pagsunod sa Ginoo mas maayo pa kay sa paghalad og mga sakripisyo.) Mahimo usab kang mangutana og sama sa mosunod:

• Unsay koneksyon relasyon tali sa pagkamasulundon ug pagsakripisyo?

• Unsay kalainan sa atong pagtuman sa mga sugo sa Dios diha sa atong relasyon ngadto Kaniya?

Ikonsiderar ang paghatag og panahon sa mga estudyante nga pangitaon ang pipila ka kasulatan o pamahayag gikan sa mga lider sa Simbahan nga makatabang nila nga mas bug-os nga tumanon ang mga sugo sa Langitnong Amahan ug ni Jesukristo. (Pwede usab nimong tabangan ang mga estudyante sa pagbansay sa kahanas nga “Pagbutang og Timaan sa mga Kasulatan ug Ubang mga Pagtulun-an sa Ebanghelyo” diha sa Mga Kahanas sa Pagtuon sa Kasulatan pinaagi sa paghimo og Tag nga gitawag og “Pagkamasulundon” alang sa mga pagtulun-an nga ilang makaplagan.) Human sa igong panahon, dapita ang mga estudyante sa pagpakigbahin og usa sa mga kasulatan o pamahayag nga ilang nakaplagan ngadto sa usa ka kapares o gamayng grupo.

Dapita ang mga estudyante nga ikonsiderar kon unsaon nila paggamit ang mga kamatuoran nga ilang gitun-an karon. Awhaga sila sa pagsulat sa ilang mga tumong o mga plano nga himoon alang sa ilang kaugalingon. Pagpamatuod sa mga kamatuoran nga inyong nahisgotan karon.

Balik ngadto sa “Mga Opsiyon sa Kalihokan sa Pagkat-on.”

Dapita ang mga estudyante sa paghisgot sa mosunod nga mga pag-aghat uban ang usa ka kapares:

• Unsa nga mga butang ang labing nakaapekto sa imong unang impresyon sa usa ka tawo?

• Duna ba kay unang impresyon sa usa ka tawo nga sa ulahi napamatud-an nga sayop? Unsay nakapausab sa imong hunahuna?

Samtang magtuon sila karon, awhaga ang mga estudyante sa paghatag og pagtagad sa bisan unsang mga impresyon gikan sa Espiritu Santo nga makatabang nila nga makita ang ilang kaugalingon ug ang uban sa paagi nga gihimo sa Dios.

Ipasabot nga tungod sa pagkamasinupakon ni Saul, ang Ginoo misalikway kaniya isip usa ka hari sa Israel (tan-awa sa 1 Samuel 13:13–14; 15:26–28). Dapita ang mga estudyante nga tun-an ang 1 Samuel 16:1–13, nga pangitaon ang mga pulong o hugpong sa mga pulong nga nagpakita nga gitabangan sa Ginoo si Samuel nga makaplagan ang tawo nga Iyang gipili nga mopuli ni Saul. Dayon ikonsiderar ang pagpangutana:

• Unsay importante nga giya ang gihatag sa Ginoo ngadto ni Samuel aron tabangan siya nga mailhan ang sunod nga hari? (Mahimong mailhan sa mga estudyante ang kamatuoran nga sama sa Ang mga tawo motan-aw sa panggawas nga panagway, apan ang Ginoo motan-aw sa kasingkasing.)

Aron tabangan ang mga estudyante nga mas masabtan kini nga kamatuoran, ikonsiderar ang pagpakita sa mosunod nga mugbong kalihokan, ug dapita ang mga estudyante nga kompletohon ang usa o duha niini:

1. Pangita og mga pananglitan sa kasulatan kon sa unsang paagi ang Manluluwas motan-aw sa kasingkasing sa uban ug sa pangsulod nga potensiyal imbes sa ilang panggawas nga panagway o mga binuhatan. Makakita ka og mga pananglitan nga ikaw-ikaw ra o pwede nimong gamiton ang usa sa mosunod: Mateo 11:7–11; Lucas 19:1–10; Juan 8:1–11.

2. Gamita ang Librarya sa Ebanghelyo sa pagpangita sa mga pamahayag gikan sa mga lider sa Simbahan nga may kalabotan sa pagtan-aw sa atong kaugalingon ug sa uban sa paagi nga gibuhat sa Dios.

Dapita ang mga estudyante sa pagpakigbahin kon unsa ang ilang nakaplagan uban sa usa ka kapares o sa gagmay nga grupo. Dayon pwede nimong hangyoon ang pipila ka estudyante nga ipakigbahin sa klase ang ilang mga panabot. Isip kabahin niini nga panaghisgot, ikonsiderar ang pagpasalida sa bidyo nga “Pray for Eyes to See as He Sees [Pag-ampo alang sa mga Mata nga Makakita sama sa Iyang Pagtan-aw]” (6:27).

6:27

Ikonsiderar ang pagpakita sa mosunod nga mga pangutana ug paghatag og panahon sa mga estudyante sa pagsulat sa ilang mga tubag sa usa o sa duha.

• Sa unsang paagi ka makakat-on sa pagtan-aw sa imong kaugalingon ug sa uban sama sa paagi sa pagtan-aw sa Ginoo kanimo?

• Kanus-a ka gitabangan sa Ginoo nga makita ang imong kaugalingon o ang uban sama sa Iyang pagtan-aw?

Human sa igong panahon, dapita ang pipila ka andam nga mga estudyante sa pagpakigbahin sa ilang girekord nga mga tubag nga dili kaayo personal.

Pagpamatuod sa mga kamatuoran nga inyong nahisgotan karon. Awhaga ang mga estudyante nga tinguhaon ang tabang sa Langitnong Amahan nga mas magtan-aw sa ilang kaugalingon ug ang uban sama sa Iyang pagtan-aw.

Balik ngadto sa “Mga Opsiyon sa Kalihokan sa Pagkat-on.”