Exodo 7–13

Ikonsiderar ang pagpakita sa mosunod nga hulagway o idrowing ang parehas ani diha sa pisara. Pwede nimong butangan og label ang usa ka kasingkasing og “gahi” samtang ang lain “humok.”

Dayon, ikonsiderar ang pagpangutana:

• Unsay pipila sa mga kinaiya sa kasingkasing nga gahi sa espirituwal? Unsay mga kinaiya sa kasingkasing nga humok sa espirituwal nga paagi?

Dapita ang mga estudyante nga ikonsiderar ang kasamtangang espirituwal nga kondisyon sa kaugalingon nilang mga kasingkasing. Pwede nimo silang hangyoon nga hunahunaon ang pipila sa ilang mga kinaiya o batasan nga nagpakita og gahi o humok nga kasingkasing. Samtang magtuon karon, awhaga sila nga pangitaon ang mga peligro sa pagpagahi sa ilang mga kasingkasing batok sa Dios.

Ikonsiderar ang pagpakita og hulagway ni Moises ug Aaron nga nagtindog atubangan sa Paraon. Pahinumdomi ang mga estudyante nga dihang unang gihangyo ni Moises ug Aaron ang Paraon nga buhian ang mga Israelita gikan sa pagkabihag, gibalibaran sa Paraon ang ilang hangyo ug gidugangan hinuon ang kalisdanan sa mga Israelita (tan-awa ang Exodo 5:1–19). Gisugo sa Ginoo si Moises ug Aaron nga mobalik ngadto sa Paraon ug ingnon siya pag-usab nga buhian ang mga Israelita (tan-awa ang Exodo 7:1–2).

Dapita ang mga estudyante nga basahon ang Exodo 7:3–5, nga pangitaon kon unsay giingon sa Ginoo nga tubag sa Paraon niining ikaduhang hangyo nga buhian ang mga Israelita.

• Unsay giingon sa Ginoo nga tubag sa Paraon? (Seguroa nga nasabtan sa mga estudyante nga giklaro sa Hubad ni Joseph Smith nga pagahion sa Paraon ang iyang kaugalingong kasingkasing. Adunay gihimong dugang nga mga klaripikasyon sa ulahi)

Ipasabot nga ang “daghang milagro ug mga kahibulongang butang” nga gihisgotan sa Ginoo diha sa bersikulo 3 mao ang mga katalagman nga Iyang ipahinabo sa Ehipto tungod sa wala pagtuman ni Paraon. Ikonsiderar ang paghangyo sa mga estudyante nga ipakigbahin kon hain sa mga katalagman ang ilang nahinumdoman. Dayon, pwede nimong ipakita ang mosunod nga lista:

• Ang Napulo ka Katalagman

  1. Tubig nahimong dugo (tan-awa ang Exodo 7:19–25)

  2. Mga Baki (tan-awa ang Exodo 8:5–15)

  3. Tagnok (tan-awa ang Exodo 8:16–19)

  4. Mga Langaw (tan-awa ang Exodo 8:20–24, 29–32)

  5. Pagkamatay sa mga hayop (tan-awa ang Exodo 9:1–7)

  6. Mga Hubag (tan-awa ang Exodo 9:8–12)

  7. Pag-ulan og yelo ug kalayo (tan-awa ang Exodo 9:22–35)

  8. Mga Dulon (tan-awa ang Exodo 10:12–20)

  9. Kangitngit (tan-awa ang Exodo 10:21–27)

  10. Pagkamatay sa tanang panganay (tan-awa ang Exodo 11:4–10; 12:29–33)

Hatagig pipila ka minuto ang mga estudyante aron tun-an ang pipila sa mga bersikulo diha sa lista. Dapita sila nga pamalandongan ang ilang makat-onan gikan sa mga tubag sa Paraon sa mga katalagman. Pagkahuman sa pagtuon sa mga studyante, ikonsiderar ang pagpakita sa mosunod nga mga pangutana ug dapita ang mga estudyante nga ipakigbahin ang ilang mga tubag ngadto sa ilang partner:

• Unsay mipatigbabaw kaayo para ninyo sa mga gihimo sa Paraon diha sa mga bersikulo nga inyong gitun-an?

• Unsang mga leksiyon ang inyong makat-onan gikan niini nga mga asoy bahin sa resulta sa pagpagahi sa atong mga kasingkasing batok sa Dios?

Hangyoa ang pipila ka estudyante nga ipakigbahin ang ilang gihisgotan. Mailhan tingali nila ang kamatuoran nga sama sa: Kon atong pagahion ang atong kasingkasing batok sa Dios, pwede kining magdala og negatibong sangpotanan sa atong kaugalingon ug sa uban.

Dapita ang mga estudyante nga tun-an ang pipila sa mosunod nga mga kasulatan, nga pangitaon ang dugang mga panabot bahin sa pagpagahi ug pagpahumok sa atong mga kasingkasing:

• 1 Nephi 2:11–12, 16–18, 21; 12:17

• 2 Nephi 33:2

• Alma 12:10–11; 24:8

Ikonsiderar ang pagpanguta sa mosunod aron tabangan ang mga estudyante nga ipakigbahin ang ilang mga panabot:

• Sa espirituwal, unsay makapagahi o makahumok sa atong mga kasingkasing?

• Unsa ang negatibong mga sangpotanan sa pagbaton og gahing kasingkasing?

• Sa unsang paagi ta panalanginan sa Dios dihang naa tay humok nga kasingkasing? (Konsideraha ang pagdapit sa pipila ka estudyante nga ipakigbahin ang pipila ka pananglitan gikan sa kaugalingon nilang kinabuhi.)

Taposa pinaagi sa pagdapit sa mga estudyante nga irekord kon sa unsang paagi sila giawhag sa Espiritu nga ugmaron o mentinahon ang humok nga kasingkasing ngadto sa Dios. Awhaga ang mga estudyante nga isulat ang pihong mga aksiyon nga ilang himoon. Ikonsiderar ang pagdapit sa pipila ka estudyante nga ipakigbahin ang mga ideya nga dili kaayo personal.

Balik ngadto sa “Mga Opsiyon nga Kalihokan sa Pagkat-on.”

Dapita ang mga estudyante nga hunahunaon ang usa ka simbolo nga gigamit sa mga kasulatan ug ipakigbahin kon unsay gitudlo niini bahin ni Jesukristo o sa Iyang ebanghelyo. Pwede nilang ipakigbahin kini nga simbolo ngadto sa ilang partner o sa gamayng grupo. (Para sa dugang ideya bahin sa kon unsaon pagpaila ang hilisgotan sa simbolismo, tan-awa ang “Understanding Symbolism in the Scriptures” diha sa Mga Kahanas sa Pagtuon sa Kasulatan).

Pahinumdomi ang mga estudyante nga sa gabii sa wala pa giluwas ang Israel gikan sa Ehipto, gipaila sa Ginoo ang Pagpalabay. Gihatagan niyag pihong mga instruksiyon nga sundon ang mga Israelita aron ang kamatayon “molabay” sa ilang panganay nga mga anak nga walay kadaot. Ang Pagpalabay puno og simbolismo nga magtudlo sa mga Israelita bahin sa Ginoo ug bahin sa ilang mga kasinatian.

Dapita ang mga estudyante nga pangitaon ang Exodo 12:3–15, 21–23 aron makita kon unsang mga simbolismo ang ilang makaplagan. Awhaga sila nga pihong hatagan og pagtagad kon unsay ilang makat-onan bahin ni Jesukristo gikan niini nga mga bersikulo. Kon kinahanglan, pwede una nimong ilhon ug hisgotan ang usa ka simbolo uban sa klase. Pwede usab nimo silang itudlo ngadto sa entry para sa Exodo 12:1–15 diha sa Mga Tabang sa Kasulatan: Daang Tugon.

Aron tabangan ang mga estudyante nga organisahon ang ilang mga hunahuna, awhaga silang gamiton ang table nga parehas sa ubos:

Dihang mahuman na ang mga estudyante, dapita silang ipakigbahin ang ilang nakat-onan. Pwede usab nimong isulat diha sa pisara ang mosunod nga kamatuoran ug dapita silang ipakigbahin kon para nila, giunsa pagpresentar sa mga simbolo ang maong kamatuoran diha sa Pagpalabay: Gitanyagan kita ni Jesukristo og kaluwasan gikan sa pagkaulipon sa sala ug kamatayon pinaagi sa Iyang dugo.

Aron tabangan ang mga estudyante nga mas masabtan kon unsang paagi konektado sa ilang kinabuhi kini nga mga simbolo, ikonsiderar ang paghisgot sa mosunod nga mga pangutana:

• Sa unsang paagi ang sala parehas sa pagkaulipon nga nasinati sa mga Israelita?

• Unsay atong mahimo aron makaakses sa mga panalangin ang Pag-ula sa Manluluwas?

• Unsay inyong nahibaloan bahin sa Langitnong Amahan ug ni Jesukristo nga makatabang dihang kamo o ang uban kinahanglang luwason? (Ingon nga bahin sa panaghisgot, ikonsiderar ang pagpakigbahin sa mosunod nga pahayag ni Elder Patrick Kearon.)

Ang tuyo sa mahinungdanong plano sa kalipay sa Amahan mao ang atong kalipay, dinhi, karon, ug sa kahangtoran. Dili kini ang pagpugong sa inyong kalipay ug makapahimo hinoon kaninyo nga mabalaka ug mahadlok.

Ang tuyo sa plano sa katubsanan sa Amahan sa pagkatinuod mao ang atong katubsanan, ang pagkaluwas nato pinaagi sa mga pag-antos ug sa kamatayon ni Jesukristo, gilingkawas gikan sa pagkabihag sa sala ug kamatayon. Dili mobiya kaninyo kon unsa kamo. (“Ang Tuyo sa Dios Mao ang Pagdala Kaninyo Balik sa Panimalay,” Liahona, Mayo 2024, 88)

Pamatuod sa mga kamatuoran nga imong gihisgotan karon ug sa gahom ni Jesukristo sa pagluwas nato.

Balik ngadto sa “Mga Opsiyon nga Kalihokan sa Pagkat-on.”

Ikonsiderar ang pagpakita og hulagway ni Jesukristo.

Pahinumdomi ang mga estudyante nga kada moambit kita sa sakramento matag semana, nanaad kita nga “kanunay mohinumdom” ni Jesukristo (Doktrina ug mga Pakigsaad 20:77, 79). Dayon ikonsiderar ang pagdapit sa mga estudyante sa paghisgot sa mosunod nga mga pangutana uban ang ilang kapares:

• Unsay makatabang nimo nga makahinumdom ni Jesukristo?

• Para nimo, unsay importanteng hinumdoman bahin Niya?

Dapita ang mga estudyante nga tinguhaon ang giya sa Espiritu Santo samtang ilang tun-an kini nga leksiyon aron tabangan silang mahibalo kon unsay ilang buhaton aron mahinumdoman ang Manluluwas kada adlaw.

Pwede kang magpakita og hulagway nga nagpakita sa Pagpalabay ug dapita ang mga estudyante nga i-summarize ang ilang nahinumdoman bahin sa milagro sa unang Pagpalabay (kon kinahanglan, pwede nilang tun-an ang Exodo 12:1–13).

Ipasabot nga gisugo sa Ginoo ang Iyang katawhan nga balikon ang pagpangaon sa Pagpalabay “sa tanang [nilang] kaliwatan” (Exodo 12:14). Dapita ang mga estudyante nga tun-an ang mosunod nga mga tudling, nga pangitaon ang mga pulong ug hugpong sa mga pulong nga nagpakita kon unsay gusto sa Ginoo nga hinumdoman ug himoon sa mga Israelita.

• Exodo 12:14, 17, 25–27

• Exodo 13:3, 8–10

Dayon ipangutana ang parehas sa mosunod:

• Sa unsang paagi ang pag-andam ug pag-ambit sa pagkaon sa Pagpalabay gidisenyo sa pagtabang sa mga Israelita sa paghinumdom mahitungod sa Ginoo?

Ipasabot nga sa kapanahonan sa Bag-ong Tugon, panahon sa pagpangaon sa Pagpalabay nga nailhang Kataposang Panihapon, gipaila ni Jesukristo ang atong nailhan karon nga sakramento.

Dapita ang mga estudyante nga basahon ang Lucas 22:13–15, 19–20. Pwede kang makighisgot sa klase, nga mangutana og parehas ani:

• Sa unsang paagi ang ordinansa sa sakramento parehas sa Pagpalabay? Sa unsang paagi nga kini managlahi?

• Nganong gihatag sa Langitnong Amahan ug ni Jesukristo ang mga ordinansa nga parehas sa Pagpalabay ug sa sakramento para nato?

Mailhan tingali sa mga estudyante ang lainlaing kamatuoran, apil ang: Gihatag sa Langitnong Amahan ug ni Jesukristo ang mga ordinansa nga sama sa Pagpalabay ug ang sakramento aron tabangan tang mahinumdom Kanila.

• Unsang mga kausaban ang mahitabo sa atong kinabuhi kon kanunay natong hinumdoman ang Langitnong Amahan ug si Jesukristo? (Ingon nga bahin sa panaghisgot, ikonsiderar ang pagpakigbahin sa mosunod nga pahayag gikan kang Elder Dale G. Renlund.)

Ang atong Langitnong Amahan gusto nga kita mahinumdom sa Iyang pagkamaayo ug sa Iyang Hinigugmang Anak, dili alang sa Ilang kaugalingon nga katagbawan apan sa impluwensiya niana nga paghinumdom diri kanato. Pinaagi sa pagkonsiderar sa Ilang pagkamabination, molapad ang atong panglantaw ug panabot. Pinaagi sa pagpamalandong sa Ilang kamanggiluy-on, mas mapaubsanon na kita, mainampoon, ug makanunayon. (“Hunahunaa ang Pagkamaayo ug Pagkahalangdon sa Dios,” Liahona, Mayo 2020, 41)

Hatagig panahon ang mga estudyante nga pamalandongan ang kaimportante sa ordinansa sa sakramento ug kon sa unsang paagi makatabang nila ang pag-ambit sa sakramento makapaduol kanila sa Langitnong Amahan ug ni Jesukristo. Ang mosunod maoy pipila sa mga ideya nga makatabang sa klase nga maghisgot ug makakat-on pa og dugang:

1. Hisgoti kon unsay gihimo sa mga estudyante aron mahimong mas makahuloganon ang sakramento diha sa ilang kinabuhi. Pwede usab nilang ipakigbahin ang mga panalangin nga ilang nasinati gikan sa paghinumdom ni Jesukristo panahon sa sakramento ug sa tibuok semana.

2. Kantaha o basaha ang mga pulong sa mga himno sa sakramento (pananglitan, “Sa Pag-ambit sa Sakramento” o “Unsa Kadako sa Kaalam ug sa Gugma,” diha sa Mga Himno). Pwedeng ipakigbahin sa mga estudyante ang mga pulong o hugpong sa mga pulong nga mipatigbabaw kanila.

3. Ipaila sa mga estudyante ang pipila sa mga simbolismo sa Pagpalabay nga gihisgotan sa Exodo 12:1–12. Pwede nilang hisgotan kon sa unsang paagi kini ug ang uban pang simbolo makatabang nila nga mahinumdom sa Manluluwas samtang moambit sa sakramento.

4. Hangyoa ang mga estudyante nga basahon ang mga pag-ampo sa sakramento diha sa Doktrina ug mga Pakigsaad 20:77, 79. Pwede nilang irekord ang ilang mga impresyon bahin sa mga saad ug mga panalangin sa pakigsaad nga gihisgotan diha sa mga pag-ampo.

Dapita ang mga estudyante nga hilom nga mamalandong sa ilang nakat-onan o gibati panahon sa leksiyon. Awhaga sila nga ikonsiderar kon unsay ilang mahimo aron himoong mas makahuloganong bahin sa ilang pagsimba ang sakramento.

Balik ngadto sa “Mga Opsiyon nga Kalihokan sa Pagkat-on.”