Genesis 18–23

Ikonsiderar ang pagpakigbahin sa mosunod nga senaryo, o maghimo og lahi nga senaryo nga mas makatubag sa mga panginahanglan sa imong mga estudyante:

Ikonsiderar ang paghangyo sa mga estudyante sa paghunahuna kon sila ba o ang usa ka tawo nga ilang kaila ang adunay susama og mga pagbati ni Miguel. Mahimo usab nimong dapiton ang mga estudyante sa pagsulat sa usa ka panalangin nga ilang gihulat nga madawat gikan sa Ginoo (sama sa pagminyo, pamilya, edukasyon, mga tubag sa mga pangutana, paghupay sa usa ka pagsulay, mga oportunidad ug daghan pa).

• Unsa ang nakalisod mahitungod sa paghulat alang sa gisaad nga mga panalangin nga matuman?

Pahinumdomi ang mga estudyante nga kabahin sa pakigsaad sa Dios ngadto ni Abraham mao ang saad nga siya ug si Sara makaangkon og daghang kaliwatan (tan-awa sa Genesis 13:16; 15:5; 17:15–19). Si Abraham ug Sara tigulang na kaayo ug wala gihapon nakabaton og anak. Ikonsiderar ang pagpangutana:

• Unsa nga mga hunahuna o mga pangutana nga tingali inyong gihunahuna kon kamo anaa sa sitwasyon ni Abraham ug Sara?

Ipasabot nga ang Ginoo mipadala og tulo ka mensahero aron bisitahon si Abraham ug Sara. Dapita ang mga estudyante sa pagtuon sa inter-aksiyon tali ni Abraham, Sara, ug sa mga mensahero sa Ginoo sa Genesis 18:9–14, uban sa unsay mahitabo unya sa Genesis 21:1–3.

Human nila mabasa, hangyoa ang mga estudyante sa pagpakigbahin sa unsay ilang nakat-onan mahitungod sa Ginoo ug sa Iyang gisaad nga mga panalangin. (Mahimong mailhan sa mga estudyante ang mga kamatuoran nga sama niini: Walay lisod kaayo alang sa Ginoo, ug Ang Ginoo motuman sa Iyang mga saad kanato sa Iyang panahon.) Ikonsiderar ang paghisgot sa mga pangutana sama sa mosunod:

• Unsa nga mga sitwasyon ang inyong giatubang diin makatabang ang paghinumdom niini nga mga kamatuoran? Sa unsa nga paagi nga ang paghinumdom niini nga mga kamatuoran makahimo og kalainan niini nga mga sitwasyon?

• Unsa nga mga kasinatian ang inyong naangkon nga nagpakita kaninyo nga walay lisod kaayo alang sa Ginoo?

Atol sa inyong panaghisgot, tingali kini makatabang nga hatagan og gibug-aton nga ang paghulat sa gisaad nga mga panalangin sa Ginoo usahay nagkinahanglan og pailob ug pagsalig sa saktong panahon sa Ginoo. Ikonsiderar ang pagpakigbahin sa mosunod nga pamahayag ni Elder Gerrit W. Gong:

Atol niining kinabuhia, kita usahay maghulat sa Ginoo. Kita mahimong wala pa maabot sa dapit nga atong gilaoman ug gipangandoy sa umaabot. Usa ka mapahinungoron nga sister miingon, “Ang matinud-anong paghulat sa Ginoo alang sa Iyang mga panalangin usa ka balaang paagi sa pagpuyo. Dili kini angayng tan-awon nga kinalooy, pagpataas, o paghukom apan pinaagi sa sagradong pagtahod.” Sa pagkakaron, nagpakabuhi kita, nga wala maghulat nga magsugod ang kinabuhi. (“Lawak sa Balay Abotanan,” Liahona, Mayo 2021, 27)

• Sa unsang paagi kita makabenepisyo gikan sa mga panahon dihang ang mga saad sa Ginoo dili dayon matuman sa atong kinabuhi?

• Unsaon ninyo pagsunod sa tambag ni Elder Gong nga “magpakabuhi [karon]” bisan kon kamo maghulat sa mga saad sa Dios nga matuman?

Hangyoa ang mga estudyante sa paghunahuna mahitungod sa panalangin nga ilang gihulat, diin ilang gisulat sa sinugdanan niini nga kalihokan sa pagkat-on. Dapita ang mga estudyante sa paghimo og lista sa mga paagi nga ilang mapakita ang hugot nga pagtuo ngadto sa Ginoo samtang sila naghulat sa panalangin. Mahimo nimong hangyoon ang mga estudyante sa pagpakigbahin diha sa klase sa makahuloganon nga mga ideya nga ilang gisulat nga dili kaayo personal nga ipakigbahin.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakigbahin sa mosunod nga pamahayag ni Presidente Jeffrey R. Holland:

Ang nangagi angay nga makat-unan apan dili puy-an. (“Ang Labing Maayo Moabut Pa,” Liahona, Ene. 2010, 18)

• Sa unsang mga paagi nga ang paghinumdom sa nangagi makatabang kanato?

• Ngano kahang importante ang paglikay nga magpuyo sa nangagi?

Samtang magtuon ang mga estudyante sa istorya ni Lot ug sa iyang pamilya nga mibiya sa ilang panimalay sa Sodoma, dapita sila sa pagkonsiderar kon basin adunay mga butang nga ilang nakita nga mahagiton sa pagpuyo sa nangagi. Mahimo nimong awhagon ang mga estudyante sa pagsulat sa mga hunahuna ug mga pagbati mahitungod sa bisan asa niini nga mga butang ang nagpugong nila sa pagsunod sa Ginoo.

Ipakigbahin ang mosunod nga pagpasabot aron sa pagtabang sa mga estudyante nga makasabot sa konteksto alang sa asoy nga ilang tun-an. Pwede usab nimong dapiton ang usa ka estudyante sa pagbasa sa pagpasabot.

Si Lot mao ang pag-umangkon nga lalaki ni Abraham. Human mobalhin uban ni Abraham gikan sa Ehipto ngadto sa yuta sa Canaan, si Lot ug ang iyang pamilya nanimuyo sa kapatagan sa Jordan (tan-awa sa Genesis 13:1–11). Si Lot “[mibalhin sa iyang] balongbalong nga nag-atubang sa Sodoma” (Genesis 13:12), usa ka siyudad nga nailhan nga dautan (tan-awa sa Genesis 13:13). Sa kataposan si Lot ug ang iyang pamilya didto na nanimuyo sa Sodoma (tan-awa sa Genesis 14:12). Sa Iyang kaluoy, ang Ginoo mipadala og mga mensahero ngadto sa Sodoma aron sa pagpasidaan kang Lot ug sa iyang pamilya nga mopahawa sa siyudad sa dili pa kini laglagon (tan-awa sa Genesis 19:12–13).

Dapita ang mga estudyante sa pagbasa sa Genesis 19:14–19, 24–26 nga mangita kon sa unsang paagi mitubag si Lot ug ang iyang pamilya sa mga instruksyon sa Ginoo nga mopahawa sa siyudad. (Aron sa pagtabang sa mga estudyante nga mas makasabot unsa ang nahitabo niini nga mga bersikulo, ikonsiderar ang pagtuon sa “Genesis 19:15–26. Nganong nahimong haligi sa asin ang asawa ni Lot?” sa Mga Tabang sa Kasulatan: Daang Tugon.)

• Unsa ang inyong nabantayan mahitungod ni Lot ug sa iyang pamilya samtang inyong tun-an kini nga mga bersikulo? Unsay inyong nabantayan mahitungod sa Ginoo?

Ipsabot nga sa Bag-ong Tugon, ang Manluluwas migamit sa istorya sa pamilya ni Lot sa pagtudlo mahitungod kon unsa kaha ang Ikaduhang Pag-anhi (tan-awa sa Lucas 17:28–32). Dapita ang mga estudyante sa pagbasa sa Lucas 17:32, nga mangita sa pasidaan sa Manluluwas. Ikonsiderar ang pagdapit sa mga estudyante sa pagmarka niini nga bersikulo diha sa ilang mga kasulatan.

• Unsa ang pipila ka importante nga mga leksiyon nga atong makat-onan gikan sa asoy sa asawa ni Lot? (Ang mga tubag sa mga estudyante mahimong maglakip sa usa ka kamatuoran nga sama niini: Ang Ginoo nagmando kanato sa pagpalayo ug hingpit nga biyaan ang pagkadaotan.)

• Unsa ang pipila ka ehemplo sa mga paagi nga ang mga tawo tingali matental nga “molingi” sa mga sala o daotang mga impluwensya nga nahimo nang kabahin kaniadto sa ilang kinabuhi?

• Unsaon sa pagtabang sa Manluluwas kanato nga mobiya sa atong nangagi nga mga sala ug mopadayon uban ang hugot nga pagtuo?

Aron matabangan ang inyong panaghisgot, mahimo nimong ipakigbahin ang mosunod nga pamahayag ni Presidente Jeffrey R. Holland:

Ayaw katingala kon grabe ang pagtintal nga mabira ka og balik sa nangagi. Mahimong maglakip kini sa karaang mga higala ug karaang naandan nga kinaiya—mga kinaiya nga midulot na og maayo kanimo, sama sa pagka-adik sa tabako, ilimnong makahubog, drugas, pornograpiya, sugal, sekswal nga mga sala, o pagkamalimbongon, kini sa pagngalan og pipila lamang niini. Kining mga butanga mipahibulag kanimo gikan sa impluwensya sa Espiritu Santo kaniadto, ug mahimo kining labaw pa ka makadaot kon mobalik ikaw niini karon. Apan ang gahom sa imong mga pakigsaad labaw pa nga gamhanan kay sa gahum sa tentasyon. Ayaw tuguti nga ang kahadlok sa nanglabay na nga mga kasal-anan mopahuyang sa imong tinguha sa paghinulsol ug sa pagbiya niini. Hinumdomi! Misaad ang Dios sa pagluwas kanimo “gikan sa kamot niya nga nagdumot [kanimo], ug [mitubos kanimo] gikan sa kamot sa kaaway.”[Mga Salmo 106:10]. (“Ang Akong Gipangandoy nga Mahibaloan sa Kada Bag-o nga Miyembro—ug Mahinumduman sa Tanang Dugay na nga mga Miyembro,” Liahona, Okt. 2006, 10)

Ikonsiderar ang pagdapit sa mga estudyante sa hilom nga pagpamalandong ug pagrekord sa ilang tubag sa mosunod nga pangutana:

• Unsa ang pipila ka butang nga akong mahimo aron mabiyaan ang mga sala o daotang mga impluwensya?

Mahimo nimong dapiton ang pipila ka estudyante sa pagpamatuod sa ilang abilidad sa pagbiya sa sala ug mga impluwensiya sa dautan uban sa tabang sa Ginoo.

Balik ngadto sa “Mga Opsiyon sa Kalihokan sa Pagkat-on.”

Dapita ang klase sa paghunahuna mahitungod sa importanteng mga sakripisyo nga gihimo sa uban alang kanila. Pwede nimong dapiton ang pipila ka estudyante sa pagpakigbahin.

• Unsa ang inyong gibati mahitungod sa mga tawo kinsa nagsakripisyo alang kaninyo?

Mahimo nimong ipakita ang mosunod nga litrato ni Abraham ug Isaac ug dapita ang mga estudyante sa pag-summarize kon unsa ang gipakita diha sa klase.

• Ngano kaha nga ang sugo sa pagsakripisyo ni Isaac usa ka piho nga lisod nga pagsulay sa hugot nga pagtuo ni Abraham?

Ipasabot nga kini nga asoy ni Abraham ug Isaac daghang lawom nga simbolo. Ikonsiderar ang pagdapit sa mga estudyante sa pagbasa sa Jacob 4:5, nga mangita unsa ang gitudlo ni propeta Jacob sa Basahon ni Mormon mahitungod sa simbolismo niini nga asoy. (Alang sa dugang mahitungod sa simbolismo, tan-awa sa “Pagsabot sa Simbolismo diha sa mga Kasulatan” sa Mga kahanas sa Pagtuon sa Kasulatan.)

Hatagi ang mga estudyante og panahon sa pagtuon sa Genesis 22:1–19, nga mangita sa mga detalye nga mahimong simbolikanhong nagtudlo niini mahitungod sa Langitnong Amahan ug ni Jesukristo. Pwede silang maghimo og mga mubo nga sulat niini nga mga simbolo ug mga pagkapareho diha sa ilang mga kasulatan.

Human matapos ang mga estudyante sa pagtuon, dapita ang uban sa pagpakigbahin diha sa klase kon asa nga mga simbolo o mga pagtandi nga mipatigbabaw kanila ug ngano. Mahimo usab kang mangutana nga sama niini:

• Sa unsang paagi ang asoy ni Abraham ug Isaac makatabang kaninyo nga mas makadayeg sa Langitnong Amhan ug ni Jesukristo?

• Unsa nga mga kamatuoran ang inyong nakat-onan mahitungod sa Langitnong Amahan ug ni Jesukristo gikan niini nga asoy? (Ania ang ehemplo sa usa ka kamatuoran nga tingali mailhan sa mga estudyante: Ang Langitnong Amahan mipakita sa Iyang hingpit nga paghigugma alang kanato pinaagi sa kaandam sa pagsakripisyo sa Iyang Anak, si Jesukristo.)

Ikonsiderar ang pagpakita sa mosunod nga hulagway ug dapita ang usa ka estudyante sa pagbasa sa pamahayag ni Sister J. Anette Dennis:

Sa dihang ang Dios nga Amahan mihalad sa Iyang Bugtong nga Anak isip sakripisyo alang kanato, si Jesukristo Mismo nahimong labing taas nga simbolo sa walay kamatayon nga gugma sa Amahan sa Langit alang sa matag usa kanato. (“Himoa ang Ginoong Jesukristo nga Inyong Tigpanalipod,” Liahona, Mayo 2024, 10)

• Sa unsang mga paagi ang sakrispisyo ni Jesukristo nagpakita sa gugma sa atong Langitnong Amahan?

Hatagi og oportunidad ang mga estudyante sa pagpamalandong sa gugma sa Langitnong Amahan ug ni Jesukristo pinaagi sa pagpaktukar o pagkanta sa “Kita sa Dios Gihigugma, Anak Niya Gipadala,” “Behold the Wounds in Jesus’ Hands,” o lain nga himno nga nagtutok sa gugma sa Dios (tan-awa sa Hymns—For Home and Church). Ang mga estudyante mahimong mopakigbahin sa mga pulong o hugpong sa mga pulong gikan sa himno nga mipatigbabaw kanila.

Taposa pinaagi sa pagdapit sa mga estudyante sa pagpamalandong kon unsa ang ilang nakat-onan o nabati gikan sa Espiritu Santo atol niining kalihokan sa pagkat-on. Hatagi sila og panahon sa pagrekord sa mga hunahuna, mga pagbati, o espirituhanon nga mga impresyon nga ilang naangkon.

Balik ngadto sa “Mga Opsiyon sa Kalihokan sa Pagkat-on.”