Genesis 6–11; Moises 8

Dapita ang mga estudyante sa paghunahuna sa usa ka higayon dihang sila milihok sa tambag nga gikan sa usa ka propeta ug napanalanginan o napanalipdan. Ang pipila ka estudyante mahimong mopakigbahin sa ilang mga kasinatian. Mahimo usab kang mangutana:

• Unsa ang makapalisod sa pagsunod niini nga tambag gikan sa mga propeta sa Ginoo?

Pahinumdomi ang mga estudyante nga human gidala si Enoch ug ang iyang pamilya ngadto sa langit, kadaghanan sa mga tawo kinsa nagpabilin sa yuta mga dautan kaayo. Sa Iyang kaluoy, ang Ginoo mitawag ni Noe sa pagsangyaw ug pagpasidaan sa katawhan nga sila malaglag kon sila dili maghinulsol. Dapita ang mga estudyante samtang sila magtuon sa pagpangita alang sa mga kamatuoran nga makatabang nila sa pagtubag uban sa dakong pagtuo ngadto sa tambag ug mga pasidaan sa mga propeta sa Ginoo.

Ipanghatag ang handout nga giulohan og: “Ang Pagsangyaw ni Noe sa Wala pa ang Lunop.” Hatagi ang mga estudyante og panahon sa pagkompleto sa handout uban sa kapares o gagmay nga grupo. Sa pagdugang og kapilian, ikonsiderar ang pagpatrabaho sa mga estudyante sa laing kapares o grupo alang sa matag hut-ong sa mga bersikulo nga ilang tun-an.

Dapita ang mga estudyante sa pagpakigbahin sa mga panabot nga ilang naangkon gikan sa ilang mga panaghisgot. (Samtang sila mopakigbahin, mahimong mailhan sa mga estudyante ang usa ka kamatuoran nga sama niini: Tungod kay Siya nahigugma kanato, ang Ginoo nagtawag og mga propeta sa pagpasidaan, pagtudlo, ug paghangyo kanato nga maghinulsol.)

Ang mosunod nga pamahayag ni Elder D. Todd Christofferson mahimong magamit isip bahin niini nga panaghisgot:

Ako dugay nang naaghat, ug usab mibati, sa mapangandoyon nga gugma sa mga propeta sa Dios sa ilang mga pagpasidaan batok sa sala. Sila wala gidasig pinaagi sa tinguha sa pagpanghimaraot. Ang ilang tinuod nga tinguha sama ra sa gugma sa Dios, gani, kini mao ang gugma sa Dios. Sila mohigugma niadtong kinsa sila gipadala, kon si kinsa man sila ug unsa pa man sila sama. Sama lang sa Ginoo, ang Iyang mga sulugoon dili gusto ni bisan kinsa nga mag-antos sa kasakit sa sala ug sa dili maayo nga mga pagpili. (“Ang Gugma sa Dios,” Liahona, Nob. 2021, 17)

Hatagi ang mga estudyante og pipila ka minuto sa pagpangita sa bag-o nga mga pasidaan ug tambag gikan sa ulahing adlaw nga mga propeta ug mga apostol. Ikonsiderar ang pagpasulat sa mga estudyante sa pipila sa mga pasidaan o mga pulong sa tambag nga ilang makaplagan. Dayon dapita ang mga estudyante sa pagpakigbahin kon unsa ang ilang gisulat uban sa pipila ka tawo nga naglingkod duol nila ug ipasabot ngano nga kana nga tambag mipatigbabaw kanila. Ang mga estudyante mahimo usab nga mopakigbahin kon sa unsang paagi kini nga mga pasidaan ug tambag nagpakita sa gugma sa Manluluwas alang kanato.

Dapita ang mga estudyante sa paghunahuna og mga aksiyon nga tingali sila giaghat sa Espiritu Santo nga himoon samtang sila nagtuon karon. Mahimo usab nimo silang dapiton sa pagsulat og tubag sa mosunod nga pangutana:

• Unsa nga propetikanhong pagtulun-an, pasidaan, o tambag nga kinahanglan nakong mas bug-os nga lihokon?

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakigbahin sa mosunod nga senaryo:

Dapita ang mga estudyante nga maghunahuna kon unsaon nila sa pagtubag ang pangutana sa ilang higala. Dayon dapita sila sa pagbasa sa 2 Nephi 26:24 ug sa pag-ila unsa ang gitudlo niini nga bersikulo mahitungod sa kinaiya sa Dios. Dapita ang mga estudyante sa pagpakigbahin sa unsay ilang nakaplagan. (Tingali ilang mailhan ang usa ka kamatuoran nga sama niini: Ang tanan nga gibuhat sa Dios alang sa kaayohan sa kalibotan.)

• Unsa nga ebidensiya ang inyong nakita nga ang tanang gibuhat sa Dios alang sa kaayohan sa kalibotan?

Hatagi og gibug-aton ang asoy sa Lunop nga naglangkob sa ebidensiya nga ang tanang gibuhat sa Dios alang sa kaayohan sa kalibotan. Ipakita ang mosunod nga mga instruksiyon ug hatagi ang mga estudyante og panahon aron magtuon. (Tingali mao kini ang makatabang nga panahon aron ipaila ang kahanas “Pagbasa nga inubanan sa Mahangturon nga Panglantaw” sa Mga Kahanas sa Pagtuon sa Kasulatan.)

Basaha ang mosunod nga mga tudling mahitungod sa Lunop ug sa padulngan sa mga tawo nga nangamatay. Samtang imong buhaton, pangitaa ang ebidensiya sa gugma ug kaluoy sa Ginoo.

1. Genesis 6:13–22; 7:1–5, 16–19

2. Labing minos usa sa mosunod: Moises 7:38–39, 43; 1 Pedro 3:18–20; Doktrina ug mga Pakigsaad 138:28–34; o “Genesis 6:7–13, 17; Moises 8:17, 23–30. Unsa ang pipila ka posible nga mga rason nga gipadala sa Dios ang Lunop?” sa Mga Tabang sa Kasulatan: Daang Tugon.

Human sa igong panahon, dapita ang mga estudyante sa pagpakigbahin sa ilang panabot uban sa usa ka pares o sa gagmay nga mga grupo. Mahimo usab ninyong dungan nga hisgotan ang mosunod nga mga pangutana isip usa ka klase:

• Unsay inyong nabantayan mahitungod sa kaimportante sa arka? Sa unsang paagi ang arka nagpahinumdom kaninyo ni Jesukristo?

• Sa unsang paagi ang asoy sa Lunop nagpakita sa kamatuoran nga ang tanan nga gibuhat sa Dios alang sa kaayohan sa kalibotan? (Isip kabahin sa inyong panaghisgotan, mahimo nimong ipakigbahin ang mosunod nga pamahayag ni Elder Patrick Kearon.)

Ang Dios walay hunong sa pagtinguha kaninyo. Siya “gusto nga ang Iyang tanang mga anak mopili nga mobalik ngadto Kaniya” [Kinatibuk-ang Tamdanan nga Basahon, 1.1, Librarya sa Ebanghelyo], ug Iyang gibuhat ang tanang posible nga paagi sa pagdala kaninyo og balik. …

Ang tanang butang kabahin sa plano sa Amahan alang sa Iyang minahal nga mga anak gituyo aron sa pagdala sa tanan balik sa panimalay. …

Ang tuyo sa plano sa katubsanan sa Amahan sa pagkatinuod mao ang atong katubsanan, ang pagkaluwas nato pinaagi sa mga pag-antos ug sa kamatayon ni Jesukristo, gilingkawas gikan sa pagkabihag sa sala ug kamatayon. Dili mobiya kaninyo kon unsa kamo. (“Ang Tuyo sa Dios Mao ang Pagdala Kaninyo Balik sa Panimalay,” Liahona, Mayo 2024, 87–88)

• Kanus-a kamo nakasaksi sa mga paningkamot sa Dios aron sa pagtabang kaninyo o lain nga kasinatian sa Iyang makaluwas ug makatubos nga gahom?

Ikonsiderar ang pag-refer balik ngadto sa senaryo sa sinugdanan niini nga kalihokan sa pagkat-on. Dapita ang mga estudyante sa paghisgot nga magpares kon unsaon nila karon pagtubag sa pangutana sa higala.

Mahimo nimong taposan pinaagi sa pagdapit sa mga estudyante sa paggahin og pipila ka minuto sa pagpamalandong ug sa pagsulat unsa ang bag-ong gibuhat sa Dios diha sa ilang kinabuhi nga alang sa ilang kaayohan. Awhaga sila nga magtinguha og inspirasyon gikan sa Espiritu Santo aron matabangan sila nga mailhan kini nga mga butang.

Balik ngadto sa “Mga Opsiyon sa Kalihokan sa Pagkat-on.”

Mahimo nimong dapiton ang mga estudyante sa pagkonsiderar kon sila ba nakadungog sa ekspresyon sama sa “Ang tanan maluwas ra gihapon.” Dayon pangutana:

• Sa unsang paagi nga ang pagtuo niini nga pilosopiya makaapektar sa kinabuhi sa usa ka tawo?

Ipasabot nga human sa Lunop, ang pipila sa kaliwat ni Noe nagtukod sa gingharian sa Babel (tan-awa sa Genesis 10:8–10). Awhaga ang mga estudyante sa pagpangita sa mga kamatuoran nga makatabang nila sa pag-ila sa ilang panginahanglan sa pagsunod ni Jesukristo samtang sila magtuon sa asoy niini nga katawhan.

Dapita ang mga estudyante sa pagtuon sa Genesis 11:1–9, nga mangita nganong ang katawhan nagtukod sa tore ug sa unsang paagi ang Ginoo mitubag sa ilang mga paningkamot. (Alang sa tabang sa pagsabot niini nga mga bersikulo, ang mga estudyante mahimo usab nga magtuon sa “Genesis 11:1–9. Unsa ang sayop mahitungod sa pagtukod sa Tore sa Babel?” sa Mga Tabang sa Kasulatan: Daang Tugon.)

Dapita ang mga estudyante sa pagpakigbahin kon unsay ilang nakat-onan. Mahimo usab kang mangutana nga sama sa mosunod:

• Unsa nga mga problema ang inyong nabantayan sa mga tawo nga misulay aron makaabot sa langit?

Dapita ang mga estudyante sa pagbasa sa usa o daghan sa mosunod nga mga bersikulo: Juan 3:16; Juan 14:6; o Mosiah 3:17. Hangyoa ang mga estudyante sa pagpangita sa mga pagtulun-an nga tingali importante alang sa mga tawo sa Babel nga masabtan.

• Unsa ang inyong nakat-onan gikan niini nga mga bersikulo nga mahimong makatabang sa mga tawo sa Babel? (Mahimong mailhan sa mga estudyante ang usa ka kamatuoran nga sama niini: Maluwas lamang kita pinaagi ni Jesukristo.)

Ikonsiderar ang pagpakigbahin sa mosunod nga pamahayag ni Elder D. Todd Christofferson:

Nakahinumdom ko sa kanta mga katuigan ang milabay nga hinimo sa sikat nga mang-aawit nga si Frank Sinatra nga adunay panapos nga linya “Gihimo ko kini sumala sa akong paagi.” Sa pagkatinuod sa kinabuhi adunay daghang luna alang sa personal ug indibidwal nga kapilian, apan kon bahin na kini sa kaluwasan ug kinabuhing dayon, ang atong tema sa kanta kinahanglang “Gihimo ko kini sumala sa paagi sa Dios,” kay sa pagkatinuod lang walay laing paagi. …

Walay “akong paagi” kon kita mosunod sa ehemplo ni Kristo. Ang pagsulay sa pagpangita og laing agianan paingon sa langit nahisama sa walay pulos nga pagtrabaho sa Tore sa Babel imbes nagtutok ni Kristo ug sa Iyang kaluwasan. (“Paghunong sa Paggamit sa Atong mga Hinagiban sa Rebelyon,” Liahona, Nob. 2024, 28)

Ang mga estudyante mahimong maghisgot sa mosunod nga mga pangutana uban sa kapares o gagmay nga grupo:

• Unsa ang pipila sa ehemplo kon sa unsang paagi ang mga tawo karon mopili sa pagbuhat sa mga butang “sa ilang paagi” kay sa pagsunod sa ehemplo ug mga pagtulun-an ni Jesukristo? Ngano kaha nga mopili ang mga tawo niadtong ubang mga paagi?

• Unsay nakatabang ninyo nga makat-onan ang bili sa pagsunod kang Jesukristo?

Human matapos sa mga estudyante ang ilang mga panaghisgot, ikonsiderar ang pagdapit sa pipila sa pagpakigbahin sa ilang mga tubag diha sa tibuok klase.

Ikonsiderar ang pagpasalida sa bidyo nga“Jesus Christ Is the Way” (5:20) o sa pagkanta sa “Jesus Is the Way” (Hymns—For Home and Church). Dapita ang mga estudyante samtang sila magtan-aw sa bidyo o magkanta sa himno nga mamalandong sa ilang kaugalinong mga paningkamot sa pagsalig ug pagsunod ni Jesukristo. Awhaga sila sa pagrekord sa bisan unsang mga impresyon nga ilang madawat gikan sa Espiritu Santo, lakip ang mga pagpahiangay nga ilang himoon sa ilang mga kinabuhi.

5:2

Ipakigbahin ang imong pagpamatuod ni Jesukristo ug sa Iyang mahinungdanong tahas sa pagtabang kanato nga makadawat sa kaluwasan ug uban pang mga panalangin nga gitinguha sa Langitnong Amahan nga ihatag kanato.

Balik ngadto sa “Mga Opsiyon sa Kalihokan sa Pagkat-on.”