Mga Maghuhukom 2–4; 6–8; 13–16

Ikonsiderar ang pagpaila sa kahanas nga “Pagpangita og mga Sundanan diha sa mga Kasulatan” diha sa Mga Kahanas sa Pagtuon sa Kasulatan. Aron ihulagway ang kaimportante sa pagpangita sa mga sundanan, pwede nimong ipakita ang mosunod nga hulagway ug ipapangita sa mga estudyante kon pila ka numero ang ilang makita nga nagsunod-sunod,sugod sa numero 1, sulod sa 30 segundos.

Dapita ang mga estudyante nga ipakigbahin kon nakabantay ba sila og sundanan kon giunsa pag-organisar ang mga numero. Kon kinahanglan, ipasabot nga kon magsal-ot ka ug pinatindog ug usa ka pinahigda nga linya sa tunga-tunga sa tsart aron makahimo og upat ka managsama nga kwadrante, makit-an nimo nga kana nga mga numero nagsunod sa usa ka orasan nga sundanan, nga ang matag numero makita nga nagsunod diha sa sunod nga kwadrante (tan-awa ang hulagway).

Dapita ang estudyante sa paggahin og dugang 30 segundos aron usbon ang hagit ug tan-awon ang kalainan nga mahimo niini kon sundon nila ang sundanan.

Ipasabot nga ang basahon sa Mga Maghuhukom nag-asoy sa kasaysayan sa mga Israelinhon human sila manimuyo sa yuta sa Canaan ug sa kamatayon ni Josue (tan-awa sa “Unsa ang basahon sa Mga Maghuhukom?” diha sa Mga Tabang sa Kasulatan: Daang Tugon). Sa basahon sa Mga Maghuhukom, atong makat-onan ang bahin sa espirituwal nga sundanan, o sikulo nga nasinati sa mga Israelinhon tungod kay balikbalik silang napakyas sa pagsunod sa mga instruksiyon sa Ginoo. Ikonsiderar ang pagpakita og blangko nga diagram sa siklo, sama sa makita sa ubos, diha sa pisara. Dapita ang mga estudyante nga kopyahon kini diha sa usa ka piraso sa papel.

Dapita ang mga estudyante sa pagtuon sa mosunod nga mga bersikulo uban sa usa ka kapares o gagmayng grupo, nga pangitaon ang sundan sa kinaiya nga nahitabo tali sa mga Israelinhon. Pwedeng i-summarize sa mga estudyante ang kada hut-ong sa mga bersikulo gamit ang usa ka pulong o hugpong sa mga pulong ug dayon isulat kana nga pulong o hugpong sa mga pulong sa tukma nga kahon diha sa ilang mga diagram.

1. Mga Maghuhukom 3:5–7

2. Mga Maghuhukom 3:8

3. Mga Maghuhukom 3:9 (unang hugpong sa mga pulong sa bersikulo)

4. Mga Maghuhukom 3:9–11

Human matun-i sa mga estudyante ang mga bersikulo, dapita sila sa pagpakigbahin sa mga pulong o hugpong sa mga pulong nga ilang giapil sa ilang mga diagram. Kon kinahanglan, pwede nimong itanyag ang mosunod nga mga sugyot para sa kada kahon: (1) Sala, (2) Mga Resulta, (3) Pagtuaw ngadto sa Ginoo, (4) Kaluwasan. Pwede usab nimo silang papangitaon og dugang mga pananglitan sa sikulo o mga bahin sa sikulo diha sa Mga Maghuhukom 2:10–18; 3:12–15, 26–30; 4:1–4, 14–16. Dayon, ikonsiderar ang pagpangutana:

• Unsang pipila ka kamatuoran ang imong nakat-onan bahin sa Ginoo gikan niini nga sikulo sa Mga Maghuhukom? (Ang mga pananglitan sa mga kamatuoran nga pwede nilang ipakigbahin naglakip niini: Kon pilion nato nga isalikway ang Ginoo, peligro nga mawala nato ang Iyang paggiya ug proteksiyon diha sa atong kinabuhi. Samtang mopili kita sa pagdangop ngadto sa Ginoo ug pagtawag sa Iyang ngalan, luwason kita Niya.)

Ipasabot nga usa sa mga titulo ni Jesukristo mao ang Tigluwas (tan-awa sa 2 Samuel 22:2). Dapita ang mga estudyante sa pagpakigbahin og mga pananglitan sa mga sitwasyon o mga kahimtang diin gikinahanglan nato ang Manluluwas aron moluwas kanato. Ikonsiderar ang paglista sa ilang mga tubag diha sa pisara. (Para sa mga ideya, pwede nimong patun-an sa mga estudyante ang Alma 36:27–29; 38:5.)

• Unsa ang pipila ka aksyon ang atong himoon sa pagtabang nato nga makaakses sa gahom sa Manluluwas sa pagluwas? (Isip kabahin sa inyong panaghisgot, ikonsiderar ang pagtuon sa Mosiah 7:33; 29:20; Alma 58:10–11.)

• Unsa ang pipila ka pananglitan sa pagluwas sa Manluluwas ang imong mahunahunaan diha sa mga kasulatan, sa kinabuhi sa mga tawo nga imong nailhan, o sa kaugalingon nimong kinabuhi?

Ikonsiderar ang pagbalik sa atensiyon sa mga estudyante ngadto sa diagram sa siklo gikan sa milabay nga kalihokan. Pwede nimong isulat ang Ako diha sa pisara sa tunga sa siklo. Dapita ang mga estudyante sa pagpamalandong kon asa nga bahin sa siklo sila maanaa karon ug sa paghunahuna og mga sitwasyon sa ilang kinabuhi diin kinahanglan nila ang pagluwas sa Manluluwas. Awhaga sila nga irekord ang mga aksiyon nga pwede nilang himoon aron madapit ang gahom sa Manluluwas sa pagluwas diha sa ilang kinabuhi.

Balik ngadto sa “Mga Opsiyon sa Kalihokan sa Pagkat-on.”

Dapita ang mga estudyante sa paghimo og listahan sa mga indibidwal nga dako kaayo og impluwensiya sa ilang hugot nga pagtuo kang Jesukristo. Pwede nilang iapil ang piho nga mga hiyas, mga kinaiya, o mga aksiyon niini nga mga indibidwal nga nakapadasig kanila. Ikonsiderar ang pagdapit sa mga estudyante nga mopakigbahin og pipila ka pananglitan ngadto sa klase.

Pahinumdomi ang mga estudyante nga ang basahon sa Mga Maghuhukom naghulagway sa daghang higayon diin nagpakasala ang mga Israelinhon human makasulod sa gisaad nga yuta. Kini miresulta nga ang Ginoo wala na manalipod kanila gikan sa ilang mga kaaway. Dihang naghinulsol ang mga Israelinhon, ang Ginoo mitagana og mga maghuhukom aron luwason sila. Usa niini nga mga maghuhukom mao si Deborah, usa ka babaye nga may talagsaong hugot nga pagtuo. Dapita ang mga estudyante sa paghunahuna og mga pamaagi samtang magtuon sila sa asoy ni Deborah nga mahimo silang ehemplo sa hugot nga pagtuo ngadto sa ilang mga higala, pamilya, o sa uban.

Dapita ang mga estudyante sa pagbasa sa Mga Maghuhukom 4:4; 5:7 aron pangitaon ang duha sa mga titulo ni Deborah. Mahimong makatabang ang pagpasabot nga ang propeta nga babaye mao ang “usa ka babaye kinsa nakadawat sa pagpamatuod ni Jesus ug nagpahimulos sa espiritu sa pagpadayag” (Giya ngadto sa mga Kasulatan, “Propeta nga babaye,” Librarya sa Ebanghelyo).

Hangyoa ang mga estudyante nga tun-an ang Mga Maghuhukom 4:1–15, nga pangitaon ang impluwensiya ni Deborah sa mga tawo nag naglibot niya. Dayon ikonsiderar ang pagpangutana sama sa mosunod:

• Unsa ang pipila sa mga pulong o buhat ni Deborah nga nagpakita sa iyang hugot nga pagtuo sa Ginoo?

• Sa unsang paagi ang hugot nga pagtuo ni Deborah nakaimpluwensiya kang Barak ug sa uban? (Isip kabahin niini nga panaghisgot, ikonsiderar ang pagsulat sa mosunod nga kamatuoran diha sa pisara: Samtang molihok kita uban ang hugot nga pagtuo sa Ginoo, makatabang kita sa uban nga makaangkon og kalig-on nga mosunod Kaniya.)

Tabangi ang mga estudyante sa paghunahuna kon unsaon nila nga makasunod sa ehemplo sa hugot nga pagtuo ni Deborah. Ang usa ka paagi nga mahimo nimo kini mao ang pagpakita sa mosunod nga mga pamahayag ug sa mga pangutana ug mga pagdapit nga uban niini. Dapita ang mga estudyante nga irekord ang ilang mga tubag sa usa o kapin pa sa naka-bullet nga mga aytem.

• Ang hugot nga pagtuo ni Deborah sa Ginoo nakatabang niya sa paglihok nga maisogon. Unsa ang lisod nga mga butang nga maisogon ninyong mahimo tungod sa inyong hugot nga pagtuo kang Jesukristo? Unsay inyong mahimo aron mapalambo ang inyong pagtuo kang Jesukristo?

• Si Deborah misalig sa Ginoo samtang iyang gipangulohan ang Israel panahon sa dakong kalisod. Sa unsang paagi ang pagsalig kang Jesukristo nakahatag nimo og kusog? Sa unsang paagi ang imong hugot nga pagtuo makapalig-on sa uban atol sa kalisod nga panahon?

• Ang hugot nga pagtuo ni Deborah sa Ginoo nakapalig-on sa uban. Ilista ang mga butang nga imong nahibaloan bahin kang Jesukristo—gikan sa mga kasulatan, mga pulong sa buhing mga propeta, o sa imong kaugalingong mga kasinatian. Kinsa ang kinahanglan nga mahibalo niini? Unsaon nimo sa pagpakigbahin niini?

Dapita ang pipila ka estudyante nga ipakigbahin ang pipila ka ideya nga ilang girekord. Pagpamatuod sa mga kamatuoran nga inyong nahisgotan karon.

Balik ngadto sa “Mga Opsiyon sa Kalihokan sa Pagkat-on.”

Ipakita ang mosunod nga diagram:

Dapita ang mga estudyante nga hilom nga ikonsiderar kon asa nila ibutang ang ilang kaugalingon diha sa linya sa matag usa sa mosunod nga mga situwasyon. Pwede usab nimong dapiton ang mga estudyante nga mosugyot og dugang situwasyon.

1. Pagpili og karera

2. Pagkuha og edukasyon

3. Pag-atubang og mga hagit o mga pagsulay

4. Pag-uswag isip usa ka tawo

5. Pagtubag sa mga pangutana bahin sa ebanghelyo

Ipasabot nga gihulagway sa Mga Maghuhukom 6 ang panahon dihang nalimot sa Ginoo ang mga Israelinhon ug nawala nila ang Iyang mga panalangin. Sulod sa pito ka tuig, gidaogdaog sa mga Midianhon ang mga Israelinhon. Kay desperado na, midangop sila sa Ginoo alang sa tabang sa kataposan (tan-awa sa Mga Maghuhukom 6:1–7). Human makahinumdom ang mga Israelinhon sa Ginoo ug mituaw ngadto Kaniya, nagpadala Siya og matarong nga tawo nga ginganlan og Gideon aron luwason sila gikan sa ilang mga kaaway. Dapita ang mga estudyante sa pagpangita sa mga kamatuoran nga makatabang nila nga mas mosalig pa sa Ginoo samtang ilang tun-an ang asoy ni Gideon.

Dapita ang mga estudyante nga basahon ang Mga Maghuhukom 6:11–16, 24–27, nga pangitaon ang instruksiyon sa Ginoo kang Gideon. Hangyoa ang mga estudyante sa pagpakigbahin kon unsay mipatigbabaw ngadto kanila niini nga mga bersikulo. Mahimo usab kang mangutana nga sama sa mosunod:

• Unsa ang gitudlo kanimo niini nga mga bersikulo mahitungod sa Ginoo?

• Unsa kaha ang gitudlo sa Ginoo kang Gideon ug sa mga tawo gamit ang iyang mga instruksiyon diha sa mga bersikulo 25–27?

Ipasabot nga gidawat ni Gideon ang tawag sa Ginoo nga mangulo sa Israel batok sa mga Midianhon. Makatabang tingali ang pagpasabot nga sa sinugdan naa sa 32,000 ang kasundalohan sa Israel (tan-awa ang Mga Maghuhukom 7:3), samtang naa sa 135,000 ang mga sundalong Midianhon (tan-awa sa Mga Maghuhukom 8:10).

Dapita ang mga estudyante sa pagbasa sa mosunod nga mga bersikulo ug sa paghisgot sa nag-uban nga mga pangutana ngadto sa usa ka kapares.

• Sa wala pa ang gubat: Mga Maghuhukom 7:2–7

• Panahon sa gubat: Mga Maghuhukom 7:15–21; 8:28

• Kon kamo pa sa sitwasyon ni Gideon, unsa kaha ang inyong pipila ka pangutana o mga gikabalak-an sa wala pa ug panahon sa gubat?

• Unsay inyong nakat-onan bahin sa kaimportante sa pagsalig sa Ginoo gikan sa asoy ni Gideon?

Dapita ang pipila ka estudyante nga ipakigbahin ang mga panabot gikan sa ilang mga panaghisgot uban sa klase. Samtang mopakigbahin ang mga estudyante, pwede nilang isulti ang kamatuoran nga sama niini: Samtang mosalig kita sa Ginoo, panalanginan kita Niya sa Iyang kusog.

Aron tabangan ang mga estudyante nga mas masabtan kini nga kamatuoran, ikonsiderar ang pagpahimo nila og kopya sa mosunod nga chart. Dapita sila nga hisgotan uban sa usa ka kapares o gagmayng grupo ang lainlaing paagi nga ilang makompleto ang kada kahon diha sa chart.

Dapita ang mga estudyante sa pagpakigbahin sa pipila ka butang nga ilang gisulat sa ilang mga tsart. Pwede usab kang mangutana og sama niini:

• Unsa nga mga bersikulo o mga asoy sa kasulatan ang nakapadasig nimo sa pagsalig sa Ginoo? (Kon kinahanglan, pwede kang mosugyot og pipila ka pananglitan, sama sa Mga Panultihon 3:5–6; Mga Taga-Filipos 4:13; Alma 26:12; Ether 12:27.)

• Kanus-a ang Ginoo mipalig-on kanimo lapas sa imong kaugalingong mga abilidad?

Pwede usab nimong ipakigbahin ang mosunod nga pamahayag ni Presidente Russell M. Nelson:

Pinaagi sa Iyang Pag-ula, si Ginoong Jesukristo nakabuntog sa kalibotan. Busa, Siya “gamhanan sa … paglimpyo [kaninyo] gikan sa tanan nga dili matarong” (Alma 7:14). Siya moluwas kaninyo gikan sa inyong kinalisoran nga mga kahimtang sa Iyang kaugalingon nga paagi ug panahon. Samtang kamo moduol ngadto Kaniya sa hugot nga pagtuo, Siya mogiya, mopreserbar, ug mopanalipod kaninyo. Siya moayo sa inyong masulub-on nga kasingkasing ug mohupay kaninyo sa inyong kaugtas. Siya mohatag kaninyo og pagtugot nga makagamit sa Iyang gahom. Ug Siya mohimo sa imposible sa inyong kinabuhi nga mahimong posible. (“Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022], Librarya sa Ebanghelyo)

Hisgoti pag-usab ang arrow diagram sa sinugdanan sa kalihokan sa pagkat-on. Hangyoa ang mga estudyante sa paghunahuna og usa ka bahin sa ilang kinabuhi diin posibleng mopili sila nga mosalig pag-ayo sa kaugalingon nilang mga abilidad. Awhaga sila nga isulat ang bisan unsang hunahuna o espirituwal nga mga impresyon nga ilang nabatonan bahin kon unsaon nila nga mas mosalig sa Ginoo.

Balik ngadto sa “Mga Opsiyon sa Kalihokan sa Pagkat-on.”