Mga Ideya Alang sa Unang Adlaw sa Klase

Dapita ang mga estudyante nga maghunahuna og higayon nga dihang ang usa ka tawo nagpakitag Kristohanon nga gugma, o dihang sila ang nagpakitag Kristohanon nga gugma ngadto sa uban. Pwede usab silang magpakita og hulagway sa ilang mga smartphone o uban pang device nga nagpakita og Kristohanon nga gugma.

Usaha ninyog basa ang Levitico 19:18 ug Deuteronomio 10:19. Dapita ang mga estudyante nga hisgotan ang mga baroganan nga gitudlo sa Ginoo bahin sa gugma diha sa Daang Tugon. (Pwedeng ilhon sa mga estudyante ang mga kamatuoran nga sama niini: Gisugo kita sa Ginoo nga higugmaon ang uban sama sa atong kaugalingon. Gidapit kita sa Ginoo nga ipakita ang gugma niadtong mga dili nato kaila.)

• Sa inyong hunahuna, sa unsang paagi kini nga mga kamatuoran konektado sa inyong kasinatian niini nga klase? (Ingon nga bahin sa inyong panaghisgot, ikonsiderar ang pagdapit sa mga estudyante nga ipakigbahin ang pipila ka mga hagit nga mahimong giatubang tingali sa usa ka tawo kon motambong sila sa klase sa institute sa unang higayon.)

• Unsang pihon nga butang ang inyong mahimo aron makatabang sa klase nga mahimong palibot sa pagkat-on nga adunay pagtahod, nahisakop, ug Kristohanon nga gugma?

Pwede ninyong tan-awon ang bidyo nga “Personal Invitation to Attend Institute” (2:45). Samtang magtan-aw, dapita ang mga estudyante nga maghunahuna kon kinsay ilang dapiton nga moapil niini nga klase. (Pwedeng magpadalag mensahe sa usa ka tawo ang mga estudyante samtang anaa sa klase o ikonsiderar ang pagkontak sa maong tawo sa dili pa ang sunod nga klase.)

2:51

Ikonsiderar ang pagdapit sa kada estudyante nga pamalandongan ug irekord ang pihong aksiyon nga ilang himoon aron makatabang sa paghimo og palibot sa pagkat-on nga adunay pagtahod, nahisakop, ug Kristohanon nga gugma diha sa klase.

Balik ngadto sa “Mga Opsiyon nga Kalihokan sa Pagkat-on.”

Ikonsiderar ang dungan nga pagbasa sa pahayag ni Presidente Russell M. Nelson. Dayon dapita ang mga estudyante nga hisgotan ang nagsunod nga mga pangutana uban ang usa ka pares:

Ako mangamuyo kaninyo sa pag-ako sa responsibilidad sa inyong pagpamatuod. Trabahoa kini. Angkona kini. Atimana kini. Amumaha kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye ug dayon matingala nganong nagkahuyang ang inyong pagpamatuod. (“Mga Pagpili alang sa Kahangtoran” [tibuok kalibotan nga debosyonal para sa mga young adults, Mayo 15, 2022], Librarya sa Ebanghelyo)

• Sa inyong hunahuna, unsa kahay ipasabot sa “pag-ako sa responsibilidad sa inyong pagpamatuod”? Sa inyong hunahuna, nganong importante kini?

Ikonsiderar ang pagdapit sa mga estudyante sa pagpamalandong kon sa unsang paagi sila mahimong responsable sa ilang mga pamatuod. Samtang magtuon, dapita sila nga pangitaon ang mga kamatuoran nga makatabang nila sa pag-ila sa ilang mga pag-uswag.

Ikonsiderar ang pagsulat sa pisara sa mosunod nga ulohan: Sa unsang paagi ko mahimong responsable sa akong pamatuod? Dapita ang mga estudyante nga pangitaon ang mga kamatuoran gikan sa mga kasulatan o mga pahayag gikan sa mga lider sa Simbahan nga motabang sa pagtubag niining pangutanaha. Pwede nilang gamiton ang Librarya sa Ebanghelyo aron pangitaon ang mga kapanguhaan nga silasila ra, o pwede nilang tun-an ang pipila sa mosunod nga mga tudling:

• Deuteronomio 4:29; 6:4–7

• Josue 1:8

• Salmo 119:10–16

• Mga Panultihon 2:2–6

Dapita ang mga estudyante nga ipakigbahin sa usa ka partner o gamayng grupo ang nakita nilang mga tubag sa pangutana diha sa pisara. Pwede usab nimong dapiton ang mga estudyante nga isulat diha sa pisara ang pipila sa mga tubag nga ilang nakita. Kon kinahanglan, pwede usab nimong ipakigbahin ang mosunod nga pahayag ni Presidente Nelson aron tabangan ang mga estudyante nga mailhan ang dugang mga paagi nga mahimo silang responsable sa ilang mga pamatuod:

Buhata ang inadlaw, sinsero, mapainubsanon nga pag-ampo. Amumaha ang inyong kaugalingon gamit ang mga pulong sa karaan ug sa modernong panahon nga mga propeta. Hangyoa ang Ginoo sa pagtudlo kaninyo kon unsaon nga mas maayong makapaminaw Kaniya. Paggahin og dugang nga panahon sulod sa templo ug sa buhat sa family history.

Samtang inyong himoon ang inyong pagpamatuod nga inyong kinatas-an nga prayoridad, bantayi ang mga milagro nga mahitabo sa inyong kinabuhi. (“Mga Pagpili alang sa Kahangtoran”)

Ikonsiderar ang pagpangutana sa mosunod aron tabangan ang mga estudyante nga magamit sa personal ang mga kamtuoran nga ilang gitun-an:

• Sa inyong hunahuna, sa unsang paagi ang bug-os nga pagkahimong responsable sa inyong pamatuod makaimpluwensiya sa:

  • Inyong paagi sa paghunahuna ug pagpakiglabot niini nga klase?

  • Inyong pagtuon sa kasulatan?

  • Inyong mga pag-ampo?

• Unsang mga paningkamot ang inyong gihimo aron mahimong responsable sa inyong pamatuod? Sa unsang paagi kamo gipanalanginan sa Ginoo?

Dapita ang mga estudyante mga nga ikonsiderar ang ilang mga aksiyon aron tabangan silang mas bug-os nga mahimong responsable sa ilang mga pamatuod. Awhaga silang irekord ang piho nga mga paagi nga ilang paningkamotan aron makab-ot ang ilang mga tumong. Pwede kang regular nga mag-follow up sa tibuok semester ug dapita ang mga estudyante nga ireport ang ilang pag-uswag.

Balik ngadto sa “Mga Opsiyon nga Kalihokan sa Pagkat-on.”

Konsideraha ang pagpakita sa mosunod nga mga pangutana ug dapita ang mga estudyante nga hisgotan kini uban sa usa ka kapares:

• Unsa nga istorya o kinsay inyong mahinumdoman dihang hunahunaon ninyo ang Daang Tugon? Ngano man?

• Sa inyong hunahuna, unsa ang pipila ka katuyoan sa Daang Tugon?

Dapita ang pipila ka estudyante nga ipakigbahin sa klase ang ilang mga tubag niining mga pangutanaha. Dayon ipakigbahin ang mosunod nga pahayag ni Presidente M. Russell Ballard:

Ang unang tugon ni Kristo mao ang Daang Tugon sa Biblia, nga nagtagna ug nanagna sa pag-abot sa Manluluwas, sa Iyang talagsaong kinabuhi, ug sa Iyang makapalingkawas nga Pag-ula. (“The Miracle of the Holy Bible,” Liahona, Mayo 2007, 82)

• Unsay gitudlo niini nga pahayag bahin sa usa sa mga katuyoan sa Daang Tugon? (Pwedeng ilhon sa mga estudyante ang kamatuoran nga sama niini: Ang Daang Tugon nagpamatuod kang Jesukristo. Pwede usab nimong tabangan ang mga estudyante nga mangitag suporta alang niini nga kamatuoran sa mosunod nga mga tudling: Juan 5:39; 1 Nephi 19:23; ug 2 Nephi 11:4.)

Ipasabot nga ang gigamit sa mga manunulat sa Daang Tugon ang lainlaing paagi sa pagtabang sa mga tawo nga makakat-on bahin ni Jesukristo, apil ang mga butang o simbolo, propetikanhong mga pagtulun-an, ug bisan mga kasinatian sa mga tawo.

Dapita ang mga estudyante nga magpraktis sa pagpangita ni Jesukristo diha sa Daang Tugon pinaagi sa pagpili og bisan usa sa mga kalihokan diha sa handout nga “Pagpangita ni Jesukristo diha sa Daang Tugon.” Pwedeng kompletohon sa mga estudyante ang handout uban sa usa ka kapares o gamayng grupo. (Para sa dugang impormasyon ug pagpraktis, tan-awa ang “Pagpunting kang Jesukristo diha sa mga Kasulatan,” diha sa Mga Kahanas sa Pagtuon sa Kasulatan.)

Hatagig panahon ang mga estudyante nga hisgotan uban sa klase unsa ang ilang nakat-onan sa ilang pagtuon. Pwede usab nimong ikonsiderar ang pangutana og parehas sa mosunod:

• Sa unsang paagi ang pagpangita kang Jesukristo diha sa Daang Tugon makapaduol kanimo Kaniya?

Dapita ang mga estudyante nga maningkamot pag-ayo sa pagpangita sa Manluluwas samtang magtuon sila sa Daang Tugon.

Balik ngadto sa “Mga Opsiyon nga Kalihokan sa Pagkat-on.”

Ipakigbahin ang mosunod nga pahayag gikan ni Sister Emily Belle Freeman ug dapita ang mga estudyante nga hisgotan ang mga pangutana sa ubos uban ang usa ka kapares.

Ang usa ka pakigsaad dili lamang mahitungod sa usa ka kontrata, bisan kon kini importante. Kini mahitungod sa relasyon. (“Paglakaw diha sa Relasyon sa Pakigsaad uban ni Kristo,” Liahona, Nob. 2023, 77)

• Sa unang paagi ang paghimog pakigsaad sa Dios ikatandi sa usa ka relasyon?

• Unsay nakapahimo sa relasyon nga maayo?

Ipasabot nga sa tibuok Daang Tugon, mahigugmaong gitinguha sa Dios nga palig-onon ang Iyang relasyon ngadto sa Iyang mga anak pinaagi sa paghimog mga pakigsaad uban nila. Sagad natong tawgon og pakigsaad ni Abraham ang pakigsaad nga gihimo sa Dios uban ni Abraham ug sa iyang kaliwatan. Ang mga Israelita sa Daang Tugon nagtan-aw sa ilang kaugalingon ingon nga katawhan sa pakigsaad sa Ginoo.

Dapita ang mga estudyante nga tun-an ang Genesis 12:1–3; 17:4–8; ug Exodo 19:5–6, nga pangitaon ang pipila sa mga panalangin nga gisaad sa Dios ni Abraham ug sa iyang kaliwatan ingon nga bahin sa Iyang pakigsaad kanila. Dapita ang mga estudyante sa pagpakigbahin sa ilang nakaplagan. Pwedeng kang mangutana og parehas sa mosunod:

• Unsay inyong masabtan bahin sa Dios sa tabang niini nga mga bersikulo? (Pwedeng ilhon sa mga estudyante ang mga kamatuoran nga sama niini: Gusto sa Dios nga mohimo og mga pakigsaad uban sa Iyang mga anak. Samtang makigsaad kita sa Dios, gisaaran kita Niya og daghang panalangin nga modala kanato paduol Kaniya.)

Ikonsiderar ang dungan nga paghisgot sa mosunod nga pahayag gikan kang Presidente Russell M. Nelson:

Sa higayon nga kita mohimo og usa ka pakigsaad uban sa Dios, kita mobiya na sa nyutral nga kahimtang hangtod sa kahangtoran. Ang Dios dili mobiya sa Iyang relasyon niadtong kinsa mimugna sa ingon nga bugkos uban Kaniya. Sa pagkatinuod, ang tanan niadtong kinsa mihimo og usa ka pakigsaad sa Dios adunay agianan ngadto sa usa ka espesyal nga matang sa gugma ug kaluoy. Diha sa Hebreo nga pinulongan, kana nga masaaron nga gugma gitawag og hesed (חֶסֶד). …

Hesed usa ka espesyal nga matang sa gugma ug kaluoy nga gibati sa Dios alang ug gipadangat ngadto niadtong kinsa mohimo og usa ka pakigsaad uban Kaniya. Ug kita mobalos og hesed alang Kaniya. …

Tungod kay ang Dios adunay hesed alang niadtong nagbaton og pakigsaad uban Kaniya, Siya mohigugma kanila. Siya mopadayon sa pakigtambayayong kanila ug motanyag kanila og mga oportunidad sa pag-usab. Siya mopasaylo kanila kon sila maghinulsol. Ug kon mahisalaag man sila, Siya motabang kanila nga makatultol og balik ngadto Kaniya.

Sa higayon nga kamo ug ako makahimo na og pakigsaad uban sa Dios, ang atong relasyon ngadto Kaniya mamahimong mas suod kay sa wala pa ang atong pakigsaad. Karon kita mag-uban nga gihugpong. Tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maluluy-on nga pailob ngari kanato. Ang matag usa kanato adunay usa ka espesyal nga dapit sa kasingkasing sa Dios. Siya adunay taas nga pangandoy alang kanato. (“Ang Walay Kataposan nga Pakigsaad,” Liahona, Okt. 2022, 5, 6)

• Unsay makahuloganon para ninyo niini nga pahayag?

• Sa inyong hunahuna, unsay ipasabot sa “mobalos og hesed” para sa Dios?

Taangi ang mga estudyante nga masabtan nga ang Daang Tugon puno sa mga ehemplo sa pagpakita sa Dios sa Iyang gugma nga binase sa pakigsaad (hesed) ngadto sa Iyang katawhan. Dapita ang mga estudyante sa pagpili og pipila sa mosunod nga mga tudling sa kasulatan (o uban pa nga ilang makaplagan nga silasila ra), nga mangitag mga ebidensiya sa gugma sa Dios nga gibase sa pakigsaad.

• Mga Maghuhukom 2:1

• Salmo 105:7–11

• Isaias 49:14–16; 54:7–10

• Jeremias 29:11–14; 31:31–34

• Ezequiel 34:11–16, 25

Human ang igong panahon, dapita ang mga estudyante nga ipakigbahin ngadto sa usa ka partner o gamayng grupo ang ilang nakat-onan o gibati bahin sa Dios gikan sa ilang pagtuon. Pwede usab ninyong hisgotan sa klase ang mga pangutana nga parehas sa mosunod:

• Unsay inyong nakat-onan bahin sa paghimo ug pagtuman sa mga pakigsaad nga gusto ninyong hinumdoman?

• Unsang mga kasinatian ang nakatabang ninyo nga mailhan ang espesyal nga gugma ug kaluoy sa Dios para ninyo?

Dapita ang mga estudyante nga mangitag mga relasyon sa pakigsaad samtang ilang tun-an ang Daang Tugon. Pwede usab nga irekord sa mga estudyante ang mga impresyon nga nadawat nila gikan sa Espiritu Santo bahin sa ilang relasyon sa pakigsaad uban sa Langitnong Amahan ug kon unsaon nila aron mas mapalalom ug mas mahimong makahuloganon ang ilang relasyon Kaniya.

Balik ngadto sa “Mga Opsiyon nga Kalihokan sa Pagkat-on.”