Genesis 1–2; Moises 2–3; Abraham 4–5

Ikonsiderar ang pagpakita sa litrato sa usa ka matahom nga talan-awon o lain pa nga mga nilalang sa Dios samtang mosulod ang mga estudyante sa klase. Ang mga estudyante mahimong mopakigbahin usab uban sa kapares sa litrato o deskripsiyon sa usa sa mga nilalang sa Dios nga makahuloganon ngadto kanila.

Ipasabot nga ang pagtuon sa Paglalang makapalawom sa atong mga pagabati sa paghigugma ug balaang pagtahod alang ni Jesukristo, kinsa milalang sa yuta, ug alang sa Dios nga Amahan, kinsa milalang sa mga babaye ug mga lalaki diha sa Iyang panagway. Ikonsiderar ang pagpakita sa table sama sa mosunod ug dapiton ang mga estudyante sa paghimo og usa ka kopya sa ilang kaugalingon. Dapita sila sa pagtuon sa Genesis 1; Moises 2; o Abraham 4, nga mangita sa lahilahi nga mga tubag nga ilang malakip sa matag kolum sa table. (Aron matabangan ang mga estudyante sa ilang mga pangutana mahitungod sa Paglalang, mahimo nimo silang awhagon sa pagtuon sa sa mga entry nga may kalabotan niini nga mga kapitulo sa Mga Tabang sa Pagtuon sa Kasulatan: Daang Tugon.)

Sunod, bahina ang klase ngadto sa mga pares o sa gagmay nga mga grupo. Dapita ang mga estudyante sa pagpakigbahin sa usag usa sa pipila sa ilang mga tubag. Mahimong ipakigbahin usab sa mga estudyante ang pipila sa ilang mga panabot ngadto sa klase. (Gamit ang ilang kaugalingong mga pulong, mahimo tingali nilang mailhan ang mga kamatuoran sama sa mosunod: Ubos sa direksiyon sa Langitnong Amahan, si Jesukristo milalang sa yuta. Adunay daan nga paghunahuna ug kahusay sa Paglalang. Gilalang kita diha sa panagway sa Dios. Ang Dios mideklarar sa Iyang mga nilalang nga maayo kaayo.)

• Sa unsang paagi ang paghinumdom niini nga mga kamatuoran makaapektar sa inyong mga pagbati mahitungod sa Dios, ni Jesukristo, ug sa tanang nilalang sa Dios?

Ikonsiderar ang pagdapit sa mga estudyante sa pagpangita og mga kasulatan nga makapalawom sa ilang pagsabot ug pagdayeg alang sa tahas ni Jesukristo isip Tiglalang. Mahimo nilang gamiton ang mga himan sa Librarya sa Ebanghelyo aron sa pagpangita sa mga tudling (tan-awa sa “Pagsiksik diha sa mga Kasulatan ug sa Librarya sa Ebanghelyo” sa Mga Kahanas sa Pagtuon sa Kasulatan). Mahimo usab nimong isugyot nga sila magtuon sa pipila sa mosunod nga mga tudling:

• Alma 30:43–44

• 3 Nephi 9:15

• Doktrina ug mga Pakigsaad 38:1–3; 59:18–21; 76:22–24

• Moises 1:33, 39; 3:5

Human sa igong panahon, ikonsiderar ang padapit sa mga estudyante sa pagpakigbahin unsa ang ilang nakat-onan uban sa kapares, sa gagmay nga mga grupo, o dungan isip usa ka klase. Pwede usab nimong ikonsiderar ang pagpangutana sama sa mosunod:

• Unsa ang nakatabang sa tahas sa Manluluwas isip usa ka Tiglalang kaninyo sa pagsabot mahitungod Kaniya ug sa Iyang mga kapabilidad?

• Unsa ang inyong nakat-onan o gibati mahitungod sa mga motibo sa Manluluwas, sa Iyang gugma, o sa Iyang gahom sa pagtabang kaninyo?

Ikonsiderar ang pagpasalida sa bidyo nga “We Lived with God” (4:00), ug sa pagdapit sa mga estudyante sa pagpamalandong sa ilang mga pagbati alang ni Jesukristo. Mahimo usab nga irekord sa mga estudyante ang bisan unsa nga mga pagbati o mga impresyon nga ilang madawat gikan sa Espiritu Santo.

4:6

Balik ngadto sa “Mga Opsiyon sa Kalihokan sa Pagkat-on.”

Dapita ang mga estudyante sa pagpamalandong ug paghisgot sa usa ka aspeto sa lawas sa tawo nga nakapahingangha kanila. Pwede usab nimong ipasalida ang bidyo nga “God’s Greatest Creation” (2:51).

2:48

Ikonsiderar ang dungan nga panaghisgot sa usa ka pangutana sama sa mosunod:

• Unsa nga mga hunahuna ug mga pagbati ang inyong naangkon mahitungod sa Dios samtang inyong gikonsiderar ang lawas sa tawo ug ang daghang buluhaton niini?

Dapita ang mga estudyante sa pagtuon sa Genesis 1:26–27; Moises 2:26–27; o Abraham 4:26–27, uban sa mosunod nga pamahayag sa“Ang Pamilya: Usa ka Pamahayag ngadto sa Kalibotan.” Awhaga sila sa paghunahuna mahitungod kon unsa ang gipahayag niini nga mga pagtulun-an mahitungod sa kamahinungdanon sa paglalang niini.

Ang tanan nga tawo—lalaki ug babaye—gilalang sumala sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon niana, ang matag usa adunay balaanon nga kinaiya ug kalagmitan nga mahimong usa ka dios. (“Ang Pamilya: Usa ka Pamahayag ngadto sa Kalibotan,” Librarya sa Ebanghelyo)

• Unsa ang matabang niini nga mga pagtulun-an nga masabtan ninyo ang inyong kaugalingon? (Mahimong mailhan sa mga estudyante ang usa ka kamatuoran nga sama niini: Tungod kay kita gilalang diha sa panagway sa Dios, kita adunay diosnong kinaiya ug padulngan.)

Aron sa pagtabang sa mga estudyante nga mas makasabot sa kamahinungdanon sa ilang diosnong kinaiya ug padulngan, iapud-apod ang handout nga giulohan og “Atong Pagkatawo ug Padulngan.” Dapita ang mga estudyante nga dungang maghisgot niini diha sa mga grupo. Pagkahuman, mahimo nimong hangyoon ang mga estudyante sa pagpakigbahin diha sa klase sa pipila sa ilang panabot.

Ikonsiderar ang pagdapit sa pipila ka estudyante sa pagpakigbahin kon sa unsang paagi ang pagkasayod mahitungod sa ilang balaanong pagkatawo ug padulgan nakaapektar kanila. Mahimo usab ninyong tan-awon ang bidyo nga “Running Toward the Light” (time code 11:00 hangtod 15:19). Dapita ang mga estudyante sa paghatag og pagtagad kon sa unsang paagi ang kinabuhi ni Elder Peter M. Johnson nausab sa dihang siya nakakat-on nga siya anak sa Dios.

17:34

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakigbahin sa mosunod nga pamahayag gikan sa “Ang Pamilya: Usa ka Pamahayag ngadto sa Kalibotan” uban sa senaryo sa ubos. (Pwede nimong ipahiuyon ang mga detalye sa senaryo aron mas mohaom sa mga panginahanglan sa imong mga estudyante.)

Kami, ang Unang Kapangulohan ug Konseho sa Napulog Duha ka Apostoles sa Ang Simbahan ni Jesukristo sa mga Santos sa Ulahing mga Adlaw, sa maligdong nga paagi mopahayag nga ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay kataposan nga destinasyon sa Iyang mga anak. (“Ang Pamilya: Usa ka Pamahayag ngadto sa Kalibotan,” Librarya sa Ebanghelyo)

Si Gideon nakadungog og daghang mensahe diha sa simbahan ug sa ubang mga sitwasyon sa ebanghelyo mahitungod sa kaimportante sa kaminyoon ug pamilya. Sa sinugdanan wala kini makahasol kaniya, apan sa dihang siya nagkahamtong na, nagsugod na siya pagkapuol sa sige og paminaw mahitungod niini. Wala gayod niya makita ang iyang kaugalingon nga maminyo o makabaton og mga anak. Sa dihang nadungog ni Gideon ang mga mensahe diha sa simbahan mahitungod sa pamilya nga mahinungdanon ngadto sa plano sa Langitnong Amahan sa kaluwasan, siya naghunahuna kon unsa ang gipasabot niana alang kaniya.

• Unsa ang pipila ka rason ngano kaha nga mibati siya og pagduhaduha nga magminyo ug makabaton og mga anak?

Dapita ang mga estudyante sa paghunahuna mahitungod sa ilang mga pangutana mahitungod sa kaminyoon ug pamilya. Ipasabot nga ang gihimo sa Langitnong Amahan human sa Paglalang makatabang nato nga mas makasabot sa kamahinungdanon sa tahas sa kaminyoon ug pamilya diha sa Iyang plano. Awhaga ang mga estudyante samtang sila magtuon nga tinguhaon ang giya gikan sa Espiritu Santo alang sa tabang uban sa ilang mga pangutana.

Dungan nga magtuon sa Moises 2:27–28; 3:18–24; ug Doktrina ug mga Pakigsaad 49:15–17. Awhaga ang mga estudyante nga mangita sa mga kamatuoran nga nagpakita sa importanteng papel sa kaminyoon ug sa pamilya diha sa plano sa Langitnong Amahan sa kaluwasan. (Mahimo usab nga gamiton sa mga estudyante ang Mga Tabang sa Kasulatan: Daang Tugon aron sa pagtabang nila nga mas makasabot sa mga bersikulo nga ilang gitun-an sa Moises 2–3.)

Hangyoa ang mga estudyante sa pagpakigbahin sa pipila ka kamatuoran nga ilang nakat-onan mahitungod sa kaminyoon ug pamilya gikan sa ilang pagtuon. Ikonsiderar ang pagsulat diha sa pisara niining mga kamatuoran. Gamit ang ilang kaugalingon nga mga pulong, mahimo nilang mailhan ang mga kamatuoran nga susama niini:

• Gisugo sa Dios ang mga bana ug mga asawa nga makabaton og mga anak (Moises 2:28).

• Ang mga bana ug mga asawa kinahanglan nga mahimong usa ug molihok isip patas nga magkauban (Moises 3:18, 24).

• Giorden sa Dios ang kaminyoon tali sa usa ka lalaki ug usa ka babaye (Doktrina ug mga Pakigsaad 49:15).

• Gihimo ang yuta aron kapuy-an sa mga anak sa Dios nga matawo ngadto sa mga pamilya ug dungan nga mag-uswag (Doktrina ug mga Pakigsaad 49:16–17).

Isip kabahin sa inyong panaghisgotan alang niini nga mga kamatuoran, ikonsiderar ang pagpasalida sa mga bidyo nga “Today’s Family: Elder Andersen on Children” (2:35) o “Renaissance of Marriage” (2:36).

2:35

2:36

Mahimo usab kang mangutana nga sama niini:

• Sa unsang paagi ang paghinumdom sa mahinungdanong papel sa kaminyoon ug pamilya diha sa plano sa Langitnong Amahan makaapektar sa inyong mga pagpili?

• Sa inyong hunahuna sa unsang paagi ang pagsunod sa mga sumbanan sa Langitnong Amahan kalabot sa kaminyoon ug pamilya makatabang ninyo nga mas mahisama Kaniya?

Ilha nga sa nagkalainlaing rason, daghan sa mga tawo ang wala makasinati sa sulundon nga mga sitwasyon sa kaminyon ug pamilya. Mahimo kining hinungdan sa kasubo, kahigawad, kalibog, o kabalaka. Aron sa pagtabang niini nga mga kabalaka, mahimo nimong ipangutana:

• Unsa ang inyong ipakigbahin sa usa ka tawo kinsa adunay dili maayo nga mga kasinatian sa kaminyoon ug pamilya? (Kon gikinahanglan, ikonsiderar ang paggamit sa mosunod nga pamahayag ni Elder D. Todd Christofferson:)

Sa pagpahayag sa sukaranang mga kamatuoran kalabot sa kaminyoon ug pamilya mao ang dili pagbaliwala o pagpaubos sa sakripisyo ug kalamposan niadtong kansang ideyal [labing nindot] dili maoy kasamtangang kamatuoran. Ang uban ninyo nahikawan sa panalangin sa kaminyoon sa mga rason nga naglakip sa kakulang sa takos nga kaminyoan, pagkaibog sa sama nga sekso, pisikal o mental nga kakulangan, o kahadlok nga mapakyas nga, sa pagkakaron, nakababag sa pagtuo. O tingali naminyo mo, apan kana nga kaminyoon natapos, ug nahabilin mong nagdumala nga nag-inusara sa unsay lisod ipatunhay sa duha. Ang uban ninyo nga naminyo dili makaanak bisan pa sa dakong tinguha ug sa mga pangamuyo sa pag-ampo.

Bisan pa man, ang tanan dunay gasa; mga talento; ang tanan makatampo sa pagpadayag sa balaang plano sa matag henerasyon. Ang daghan nga maayo, gikinahanglan—bisan usahay ang tanan nga gikinahanglan karon—makab-ot sa kahimtang nga dili ideyal. Daghan kaayo ninyo ang naghimo sa inyong pinakamaayo. Ug kon magdala mo sa kinabug-atan nga palas-anon sa mortalidad mobarog agig pagdepensa sa plano sa Dios sa paghimaya sa Iyang mga anak, andam kami nga mosuporta ninyo. Uban sa pagsalig kami mopamatuod nga ang Pag-ula ni Jesukristo nagpaabot ug, sa kataposan, mobayad sa tanang paghikaw ug nawala alang niadtong modangop ngadto Kaniya. Walay usa nga gitakda nang daan nga makadawat og minos pa kay sa tanan nga aduna ang Amahan alang sa Iyang mga anak. (“Nganong Kaminyoon, Nganong Pamilya,” Liahona, Mayo 2015, 52)

Dapita ang mga estudyante sa pagpamalandong mahitungod kon unsaon nila paglihok sa mga kamatuoran nga ilang gitun-an. Awhaga sila sa pagtinguha sa inspirasyon gikan sa Langitnong Amahan o irekord ang espirituhanong mga impresyon nga ilang nadawat gikan sa Espiritu Santo. Pagpamatuod sa mahinungdanong tahas sa pamilya diha sa plano sa Langitnong Amahan.

Balik ngadto sa “Mga Opsiyon sa Kalihokan sa Pagkat-on.”