Genesis 1–2; Moises 2–3; Abraham 4–5

Ang Genesis mao ang una sa lima ka basahon ni Moises diha sa Daang Tugon. Ang pulong nga genesis nagpasabot og “gigikanan” o “pagkatawo.” Ang Genesis maoy usa ka basahon sa mga sinugdanan. Kini nga basahon naghulagway sa Paglalang sa yuta ug sa tanang kinabuhi diha niini, sa Pagkapukan ni Adan ug Eva, ug sa pagsugod sa sala diha sa kalibotan. Naghulagway pod ni sa kagikan sa panimalay sa Israel ug ang pagkatukod sa mga pakigsaad sa Dios ngadto sa Iyang mga anak.

Kadaghanang bahin sa Genesis nagpunting sa kinabuhi ni Abraham, Isaac, Jacob, ug sa 12 ka anak nga lalaki ni Jacob. Kini nga paghatag og gibug-aton nagtudlo sa mga anak sa Israel bahin sa mga pakigsaad nga gihimo sa Ginoo ngadto sa ilang mga katigulangan. Pinaagi niini nga pakigsaad, moapil Kaniya ang Israel diha sa buhat sa pagpanalangin sa tanang nasod ug pamilya sa yuta.

Dihang magtuon sa Paglalang, importanteng hinumdoman nga wala gihatag sa mga kasulatan ang mga detalye bahin sa kon giunsa o kanus-a nalalang ang yuta. Pero nagpamatuod kini sa kon nganong gilalang ang yuta ug kon kinsa ang Tiglalang. Ang Paglalang maoy importanteng bahin sa plano sa kaluwasan sa Langitnong Amahan. Tungod sa Paglalang, kita makaanhi sa kalibotan, makadawat og pisikal nga lawas, mahimo ang atong kabubut-on, ug makasinati og kalipay samtang naghimo kita og mahangtorong mga relasyon.

Si Presidente Russell M. Nelson mitudlo: “Mopamatuod ko nga ang yuta ug ang tanang kinabuhi nga ania niini balaan ang sinugdan. Ang Paglalang dili sulagma ang pagkahitabo. … Ang Dios ang mihimo nato ug dili kay kita-kita lang. Katawhan kita Niya! Ang Paglalang mismo nagpamatuod bahin sa usa ka Tiglalang. Dili nato mabaliwala ang kabalaan sa Paglalang. Kon wala ang atong mapasalamaton nga pagkaamgo sa gahom sa kamot sa Dios diha sa Paglalang, ingon kita og wala makaila Kaniya nga nagtabang kanato sama sa goldfish nga naglangoy-langoy sa panaksan.”

Misaad ang Ginoo nga moabot ang adlaw nga ipadayag ra ang pihong mga detalye bahin sa Paglalang niining yutaa.

Gamit ang atong pangsukod sa panahon, wala kita mahibalo kon unsa ka dugay nga gihimo sa Dios ang yuta. Si Presidente Russell M. Nelson mipasabot: “Ang pisikal nga Paglalang mismo gipahiluna na pinaagi sa mga yugto sa panahon. Sa Genesis ug sa Moises, kadtong mga yugto gitawag og mga adlaw. Pero sa basahon ni Abraham, ang kada yugto gitawag og panahon. Gitawag man kini og adlaw, usa ka panahon, o katuigan, ang matag ang-ang mao ang usa ka yugto tali sa duha ka mailhan nga mga hitabo—usa ka dibisyon sa kahangtoran.”

Gituohan sa tradisyonal nga Kristiyanismo nga gilalang sa Dios ang tanang butang ex nihilo, nga nagpasabot “gikan sa wala.” Sa paghisgot bahin sa Paglalang sa yuta, si Propeta Joseph Smith mitudlo nga ang “paglalang … wala magpasabot nga paglalang gikan sa wala, nagpasabot kini sa pag-organisar; sama sa usa ka tawo nga moorganisar og mga materyal ug mobuhat og barko.”

Ang asoy ni Abraham sa Paglalang nagtudlo nato nga giorganisar ni Jesukristo ang yuta gikan sa naglungtad na nga “mga butang.” Gigamit usab sa asoy ni Abraham ang hugpong sa mga pulong nga “walay sulod ug awaaw” sa paghulagway sa yuta sa pinakaunang mga hugna niini, kay sa “walay panagway ug walay sulod.”

Ang hugpong sa mga pulong nga “Buhaton nato ang tawo sama sa atong dagway” nagpasabot nga wala nag-inusara ang Dios sa proseso sa Paglalang. Giklaro sa basahon ni Moises nga nakig-istorya ang Langitnong Amahan kang Jesukristo niini nga bersikulo. Gikan sa asoy ni Abraham ug uban pang propetikanhong mga kapanguhaan, aduna kitay rason nga motuo nga ang uban mahimong mitabang ni Jesukristo sa Paglalang.

Si Presidente Thomas S. Monson mitudlo: “Ang Dios nga atong Amahan adunay mga dunggan nga makadungog sa atong mga pag-ampo. Siya adunay mga mata nga makakita sa atong mga lihok. Siya adunay ba-ba nga makasulti kanato. Siya adunay kasingkasing nga mobati og kalooy ug gugma. Siya tinuod. Siya buhi. Kita iyang mga anak, nga gihimo sama sa iyang panagway. Ang atong hitsura sama kaniya ug ang iyang hitsura sama kanato.”

Isip mga anak sa Dios, kita dunay potensyal nga mahimong sama Kaniya. Sa “Ang Pamilya: Usa ka Pamahayag ngadto sa Kalibotan,” atong mabasa: “Ang tanan nga tawo—lalaki ug babaye—gilalang sumala sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon niana, ang matag usa adunay balaanon nga kinaiya ug kalagmitan nga mahimong usa ka dios.”

Si Presidente Lorenzo Snow mitudlo: “Natawo kita diha sa panagway sa Dios nga atong Amahan; kita iyang gilalang nga sama sa iyang kaugalingon. Anaa ang kinaiya sa pagka-dios nga nasagol sa atong espirituhanong paglalang; diha sa atong espirituhanon nga pagkatawo ang atong Amahan mihatag kanato sa mga kapabilidad, gahum ug mga abilidad nga siya mismo aduna, ingon nga ang usa ka bata diha sa sabakan sa iyang inahan, bisan diha sa wala pa mapalambo nga kahimtang, nakaangkon sa mga kinaiya, mga gahum ug mga pagbati sa iyang ginikanan.”

Sa “Ang Pamilya: Usa ka Pamahayag ngadto sa Kalibotan,” ang Unang Kapangulohan ug ang Napulog Duha ka Apostoles misulat, “Ang unang sugo nga gihatag sa Dios ngadto ni Adan ug Eva mao ang mahitungod sa posibilidad alang kanila isip bana ug asawa nga mahimong mga ginikanan. Kami mopahayag nga ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman. Kami sa dugang mopahayag nga ang Dios misugo nga ang sagrado nga mga gahom sa paglalang pagagamiton lamang tali sa lalaki ug babaye, kinsa legal nga naminyo isip bana ug asawa.”

Ingon nga mga anak sa Dios nga gilalang sa Iyang dagway, naghupot og talagsaong posisyon ang mga lalaki ug mga babaye taliwala sa mga gilalang sa Dios. Ang pagbaton og kamandoan nagpasabot og “pagmando.” Apil sa atong pagmando ibabaw sa mga gilalang sa Dios mao ang pagkahimong responsable niini ingon nga maayong mga tinugyanan. Si Elder Marcus B. Nash mitudlo, “Ang kinabuhi dinhi sa yuta usa ka panalangin ug responsibilidad. Ang Ginoo namahayag, ‘Kay, tan-awa, ang mga kahayopan sa umahan ug mga mananap sa kahanginan, ug kana nga gikan sa yuta, gi-orden alang sa paggamit sa tawo alang sa pagkaon ug alang sa panapot, ug aron siya unta makaangkon og kabuhong’ (Doktrina ug mga Pakigsaad 49:19). Hinoon, tungod kay ang yuta ug ang tanan nga anaa niini mao ang mga ‘binuhat sa [Iyang] kamot’ (Doktrina ug mga Pakigsaad 29:25), kining tanang gipanag-iya Niya. Isip temporaryo nga mga lumulupyo niining yuta, kita mao ang mga tinugyanan—dili mga tag-iya. Busa, manubag ta sa Dios—ang tag-iya—sa unsay atong buhaton sa Iyang nilalang.”

Ang pagpahulay sa Ginoo sa ikapitong adlaw naghatag natog sumbanan nga kinahanglang sundon. Ngadto ni Moises, Siya misugo, “Hinumdomi ang Adlaw nga Igpapahulay ug ilha kini nga balaan. Makatrabaho kamo sulod sa unom ka adlaw, ug buhaton mo ang tanan nimong bulohaton: Apan ang ikapitong adlaw mao ang adlaw nga Igpapahulay sa Ginoo nga imong Dios: ayaw kamo pagtrabaho nianang adlawa … Kay sa unom ka adlaw gibuhat sa Ginoo ang langit ug ang yuta, ang kadagatan, ug ang tanan nga anaa niini, ug mipahulay sa ikapitong adlaw: busa gipanalanginan sa Ginoo ang adlaw nga Igpapahulay, ug gibalaan kini.”

Ang pagpahulay sa Igpapahulay wala nagpasabot nga walay himoon. Diha sa asoy sa Paglalang, ang Ginoo mitudlo nga Siya “mipanalangin” sa ikapitong adlaw. Ang Hebreohanong pulong nga gihubad nga “mipanalangin” nagpasabot nga “gihimong balaan” o “gipahinungod” o “gipanag-iya sa Dios.” Si Elder David A. Bednar mitudlo: “Ang Igpapahulay mao ang adlaw sa Dios, usa ka sagrado nga panahon nga gipahinungod sa paghinumdom ug pagsimba sa Amahan diha sa ngalan sa Iyang Anak, sa pag-apil diha sa mga ordinansa sa pagkapari, ug sa pagdawat ug pagbag-o sa sagrado nga mga pakigsaad. … Sa Iyang balaang adlaw, ang atong mga hunahuna, mga binuhatan, ug kinaiya maoy mga timailhan nga atong gihatag sa Dios ug usa ka timailhan sa atong gugma alang Kaniya.”

Gitudlo sa mga kasulatan nga si Adan ang unang tawo. Daghan ang nahibulong kon unsaon pagkonektar niini nga kamatuoran diha sa teyorya sa ebolusyon. Walay opisyal nga posisyon ang Simbahan bahin sa teorya sa ebolusyon.

“Bisag wala gipadayag ang mga detalye kon unsay nahitabo sa yuta sa wala pa si Adan ug Eva, apil ang kon giunsa paglalang ang ilang mga lawas, ang atong mga pagtulon-an bahin sa sinugdanan sa tawo maoy klaro ug naggikan sa pagpadayag.

“Sa wala pa kita matawo sa yuta, kita espiritu nga mga anak sa langitnong mga ginikanan, nga naay mga lawas nga sama sa ilang dagway. Gidumala sa Dios ang paglalang kang Adan ug Eva ug gibutang ang ilang mga espiritu diha sa ilang mga lawas. Kitang tanan mga kaliwat ni Adan ug Eva, ang atong unang mga ginikanan, nga gilalang sa dagway sa Dios. Walay espiritu nga mga anak sa Langitnong Amahan dinhi sa yuta sa wala pa gilalang si Adan ug Eva.”

Si Presidente Jeffrey R. Holland mitudlo, “Wala ko masayud sa mga detalye unsay nahitabo sa kalibutan sa wala pa kana [ang Pagkapukan ni Adan ug Eva], apan nasayud ko nga silang duha gilalang sa Dios, nga nakapuyo sila nga sila ra sa paraisohanong dapit diin walay tawhanong kamatayon ni umaabut nga pamilya, ug nga pinaagi sa sunod-sunod nga mga pagpili sila nakalapas sa sugo sa Dios nga kinahanglang mobiya sila sa tanamang dapit apan nagtugot kanila sa pagbaton og mga anak sa dili pa mamatay.”

Tan-awa ang “Genesis 3:1–5; Moises 4:5–11. Naghatag ba ang Dios og managsumpaki nga mga sugo kang Adan ug Eva diha sa Tanaman sa Eden?”

Ang mga pulong nga gihubad sa Maayong Balita Biblia nga “katabang” naggikan sa duha ka Hebreohanong pulong nga nagpasabot nga tigtabang, kaalyado, o tigluwas nga naay patas nga relasyon o tahas. Kini nga termino wala magpasabot nga mas ubos ang katabang, nagpasabot ni nga matabangan ni Adan ug Eva ang usag usa labaw sa ilang indibidwal nga abilidad. Si Elder Ulisses Soares mitudlo nga “diha sa plano sa Ginoo, ang usa ka ‘katabang’ mao ang usa ka kompanyon nga mounong ni Adan diha sa hingpit nga panag-uban.”

Ingon nga magka-partner sa kaminyoon, naay kahigayonan si Adan ug Eva nga masinati ang labing dakong katagbawan ug kalipay nga posible sa mortalidad. Gihulagway ni Elder David A. Bednar kon sa unsang paagi ang mga hiyas sa mga lalaki ug babaye nakapahimo nila nga tmagtinabangay: “Ang talagsaong kombinasyon sa espirituhanon, pisikal, mental, ug emosyonal nga mga kapasidad sa mga lalaki ug mga babaye gikinahanglan aron sa pagpatuman sa plano sa kalipay. Mag-inusara, ang lalaki o babaye dili makatuman sa mga katuyoan sa iyang pagkalalang.”

Si Presidente Spencer W. Kimball mitudlo nga si Eva dili literal nga gilalang gikan sa gusok ni Adan. Siya miingon, “Siyempre ang istorya bahin sa gusok maoy sambingay lang.”

Si Presidente Russell M. Nelson naghulagway kon unsay atong makat-unan gikan niini nga simbolo: “Ang gusok, nga naggikan sa kilid, ingon nagpasabot nga panag-uban. Ang gusok wala magpasabot sa kamandoan o sa pagpasakop, apan pareha nga relasyon isip managkauban, sa pagtrabaho ug sa pagpuyo, nga magtambayayong.”

Human malalang si Eva, gihiusa sila sa Dios diha sa kaminyoon. Si Presidente Spencer W. Kimball mitudlo, “Ang Ginoo … [mipahiusa] nila ni Adan ug ni Eva, nga iyang unang lalaki ug unang babaye dinhi sa yuta, ug [mi]pahigayon sa balaang seremonya sa kaminyoon aron sa paghimo kanila nga bana ug asawa.”

Si Presidente Jeffrey R. Holland mitudlo, “Gikan sa Tanaman sa Eden hangtod karon, ang kaminyoon gituyo nga nagpasabot sa hingpit nga panaghiusa sa usa ka lalaki ug sa usa ka babaye—sa ilang mga kasingkasing, mga paglaom, kinabuhi, gugma, pamilya, umaabot, sa tanang butang. Misulti si Adan kang Eva nga siya ang bukog sa iyang mga bukog ug unod sa iyang unod, ug kinahanglan nga sila ‘mausa’ sa ilang panag-uban sa kinabuhi. Pagkahiusa kini sa ingon niana kahingpit mao nga atong gigamit ang pulong nga silyo sa pagpahayag sa mahangturong saad niini. Si Propeta Joseph Smith kausa miingon nga tingali kita makahatag sa ingon niana nga sagradong pagkabugkos isip ‘sumpay’ [Doktrina ug mga Pakigsaad 128:18] sa usag usa.”

• Russell M. Nelson, “The Creation,” Ensign, Mayo 2000, 84–86

• “A Harmony of the Creation Accounts,” diha sa The Pearl of Great Price Student Manual (2017), 82–92

• Gérald Caussé, “Atong Pagkatinugyanan sa Yuta,” Liahona, Nob. 2022, 57–59

• D. Todd Christoffersen, “Nganong Kaminyoon, Nganong Pamilya,” Liahona, Mayo 2015, 50–53

• Ulisses Soares, “Diha sa Panag-uban sa Ginoo,” Liahona, Nob. 2022, 42–45