1 Mga Hari 12–13; 17–22

Human mamatay si Solomon, ang iyang anak nga si Rehoboam ang nahimong hari sa tibuok Israel. Gidugangan ni Rehoboam ang mga palas-anon sa katawhan, nga maoy rason kon nganong nagrebelde kaniya ang napulo ka tribo sa amihanan. Ilang gihimong hari si Jeroboam ug naporma ang nailhan nga Amihanan nga Gingharian sa Israel. Ang Amihanan nga Gingharian milungtad sulod sa duha ka siglo sa wala pa kini gipildi sa mga Asiryanhon ug gibihag ang kadaghanan sa katawhan. Sa kataposan, kini nga mga tribo nagkatibulaag sa tibuok nasod sa yuta. Sukad niadto nailhan na sila isip ang nawala nga napulo ka tribo sa Israel.

Ang Habagatan nga Gingharian gilangkoban sa teritoryo nga gipanag-iya sa mga tribo sa Juda ug Benjamin. Gitawag kini og ang Gingharian sa Juda ug ang punoang buhatan anaa sa Jerusalem. Kini nga gingharian natapos dihang gilaglag sa mga Babilonyanhon ang Jerusalem niadtong 586 BC.

Si Jeroboam nahadlok nga ang iyang katawhan mobiyahe sa habagatan aron mosimba sa templo sa Jerusalem ug moapil sa Habagatan nga Gingharian. Aron mapugngan kini, nagpahimo siya og duha ka bulawan nga nating baka, naghimo og bag-ong mga dapit sa pagsimba, nagpahigayon og alternatibong mga pista, ug nagtudlo og kaugalingon niyang mga pari. Tingali gituyo ni Jeroboam nga ipuli ang mga bulawan nga nating baka sa arka sa kasabotan. Bisag unsa pay tumong ni Jeroboam, ang iyang mga gibuhat migiya sa iyang katawhan ngadto sa apostasiya.

Ang Ginoo mipadala og propeta gikan sa Juda aron sa pagpasidaan ni Jeroboam mahitungod sa iyang pagkadaotan ug pagsimba og dios-dios. Bisan pa sa pagsaksi og milagroso nga mga timailhan sa gahom sa Ginoo, si Jeroboam wala maghinulsol ug nagpadayon sa pagpasiugda og pagsimba og dios-dios.

Gamay ra ang nahibaloan bahin sa biyuda sa wala pa sila magkita ni Elias. Nagpuyo siya sa Sarefat, usa ka siyudad sa Fenicia diin ang mga tawo nagsimba kang Baal ug uban pang bakak nga mga dios. Bisan tuod dili siya Israelihanon, nagpakita siya og hugot nga pagtuo kang Jehova ug sa Iyang propeta nga si Elias. Panahon sa Iyang mortal nga pagpangalagad, gigamit sa Manluluwas ang ehemplo sa biyuda aron sawayon ang Iyang kaugalingong katawhan tungod sa ilang kawalay pagtuo Kaniya.

Si Elder Lynn G. Robbins, usa ka emeritus sa General Authority sa Seventy, mitudlo:

“Ang usa ka kumkom nga pagkaon gamay ra gyod kaayo, tingali igo lang para sa usa ka kan-anan, maoy rason kon nganong makapainteres ang tubag ni Elias … : ‘Ug miingon kaniya si Elias, Ayaw kabalaka. Buhata ang giingon mo apan himoi una akog gagmayng torta’ [1 Mga Hari 17:13]. …

“Nasabtan ni Elias ang doktrina nga ang mga panalangin moabot human ang pagsulay sa atong hugot nga pagtuo [tan-awa sa Ether 12:6; Doktrina ug mga Pakigsaad 132:5]. Wala siya maghinakog. Isip sulugoon sa Ginoo, didto si Elias aron mohatag, dili sa pagkuha.”

Ang hubad sa pangutana ni Elias diha sa Maayong Balita Biblia sa Daang Tugon gibase sa usa ka Hebreohanon nga panultihon nga lagmit nagtumong sa usa ka langgam nga nagbalhin-balhin sa duha ka sanga. Sa panahon ni Elias, daghang Israelihanon ang misulay sa pagsimba sa daghang dios dungan kang Jehova. Ang mensahe ni Elias maoy usa ka panawagan sa katawhan nga ihunong na ang pagduhaduha ug bug-os nga moalagad kang Jehova.

Si Elder D. Todd Christofferson mitudlo:

“Sa dihang ang mga tawo nagpundok na, si Elijah miingon ngadto kanila, ‘Nganong dili man kamo makahukom? [o sa laing mga pulong, ‘Kanus-a mo makahukom sa makausa ug alang sa tanan?’] Kon si Yahweh mao ang Dios, simbaha siya! Apan kon si Baal maoy Dios, siyay simbaha. Apan ang katawhan wala gayod motubag kaniya.’ …

“Karon, moingon tingali si Elias:

• Bisan ang Dios, ang atong Langitnong Amahan, anaa, o wala Siya, apan kon Siya anaa, simbaha Siya.

• Bisan si Jesukristo mao ang Anak sa Dios, ang nabanhaw nga Manunubos sa katawhan, o Siya dili, apan kon Siya mao, sunda Siya.”

“Si Baal mao ang Canaanhon nga dios sa bagyo, nga konektado sa kilat ug ulan.” Pero panahon sa sangka ngadto ni Elias, walay kalayo nga miabot dihang ang mga pari ni Baal mitawag sa ilang bakak nga dios. Ang mga pari ni Baal walay gahom usab aron pugngan si Elias sa pagpahinabo og hulaw pinaagi sa pagselyo sa mga langit. Sa kasukwahi, si Jehova mipadala og kalayo gikan sa langit aron ugdawon ang halad ug ang halaran, bisan pag nabasa kini pag-ayo sa tubig, nga maoy kulang kaayo panahon sa hulaw. Ang gahom ni Jehova tataw kaayo nga ang tanang anaa didto mihapa sa yuta ug mipahayag, “Si Yahweh mao ang Dios. Si Yahweh lamang maoy Dios!” Aron dugang nga ipaktia ang gahom ni Jehova ibabaw sa mga elemento, mitabang si Elias sa pagpatungha og unos nga nagtapos sa hulaw.

Human gireport ni Ahab kang Jezebel kon unsay nahitabo tali kang Elias ug sa mga pari ni Baal, nanumpa si Jezebel nga iyang ipapatay si Elias sulod sa 24 oras. Miikyas si Elias gikan sa yuta sa Israel ug mibiyahe og daghang adlaw hangtod nga naabot siya sa Bukid sa Horeb, o Sinai.

Ang kasinatian ni Elias uban sa Ginoo didto sa Bukid sa Horeb lahi kaayo sa iyang nag-unang kasinatian uban sa mga pari ni Baal, dihang gipakita sa Ginoo ang Iyang kaugalingon sa makapahingangha nga paagi. Sa Horeb, ang Ginoo wala diha sa hangin, kalayo, o linog, hinuon misulti siya pinaagi sa “hinay ug malumong tingog.”

Ang mga propeta ug apostoles sa modernong panahon mihatag og gibug-aton nga mas komon kaayo para sa Ginoo nga makig-istorya sa Iyang mga anak sa dili kaayo klaro nga paagi kaysa enggrande kaayo nga mga pagpakita. Si Presidente Dallin H. Oaks mipasidaan: “Kita kinahanglang masayod nga ang Dios panagsa mamulong nga dako og tingog. Iyang mga mensahe hapit kanunay moabot sa usa ka hunghong.” Si Presidente Boyd K Packer mitudlo: “Ang Espiritu dili mokuha sa atong pagtagad pinaagi sa pagsinggit o sa pag-uyog kanato sa bug-at nga kamot. Kondili mohunghong kini. Kini mohapuhap sa hinay nga paagi nga kon kita bisi, mahimong dili gayod nato kini mabati.”

Tan-awa sa “2 Mga Hari 2:12–13. Unsay importansiya sa pagbalhin sa kupo ni Elias ngadto kang Eliseo?”

Sa daghang karaan nga mga kultura, nagtuo ang mga tawo nga ang gahom sa usa ka dios limitado lang ngadto sa usa ka piho nga nasod, geograpikal nga lokasyon, o dapit. Nagtuo ang mga taga-Siria nga ang gahom sa Ginoo limitado lang ngadto sa mga bungtod ug mga bukid kay Iyang gibisita ang mga Israelihanon diha sa Sinai. Nakadasig kini nila nga dalhon ang away ngadto sa mga walog aron modaog sila sa gubat. Bisan pa sa gituohan sa mga taga-Siria, giklaro sa mga kasulatan nga si Jehova mao ang Dios “sa tibuok kalibotan.”

Ang asoy nga narekord sa 1 Mga Hari 22 makita usab diha sa 2 Cronicas 18. Giklaro sa Hubad ni Joseph Smith sa 2 Cronicas 18:20–22 nga nakakita ang Ginoo og bakakong espiritu taliwala sa mga propeta ni Ahab imbes nagpadala og bakakong espiritu ngadto kanila. Ang mini nga mga propeta ni Ahab midani ni Ahab sa pagpakiggubat batok sa mga taga-Siria bisan pa sa panagna ni Miqueas nga mapildi ang Israel ug mamatay si Ahab sa panggubatan. Miadto si Ahab sa gubat nga nagtakoban pero namatay gihapon siya.

• D. Todd Christofferson, “Ang Gahom sa Pagselyo,” Liahona, Nob. 2023, 19–22

• Jeffrey R. Holland, “A Handful of Meal and a Little Oil,” Ensign, May 1996, 29–31

• Carol F. McConkie, “Pagpuyo Sumala sa mga Pulong sa mga Propeta,” Liahona, Nob. 2014, 77–79

• D. Todd Christofferson, “Lig-on ug Makanunayon diha sa Hugot nga Pagtuo kang Kristo,” Liahona, Nob. 2018, 30–33

• Jorge F. Zeballos, “Let Us Not Fail to Feel,” Ensign, Hulyo 2018, 59–61