Josue 1–8; 23–24

Ang basahon ni Josue nag-istorya sa pagsulod sa mga Israelihanon ngadto sa gisaad nga yuta ubos sa pagpangulo ni propeta Josue. Gipakita niini nga basahon ang pagkamatinud-anon sa Ginoo sa pagtuman sa Iyang pakigsaad kang Abraham aron ihatag sa mga Israelihanon ang gisaad nga yuta. Naghulagway usab kini sa responsibilidad sa Israel nga hinumdoman ang Ginoo ug tumanon ang Iyang mga sugo. Ang basahon pwedeng bahinon base sa mosunod:

• Josue 1–12: Pagsulod ug pag-angkon sa mga Israelihanon sa gisaad nga yuta.

• Josue 13–22: Pagpuyo sa gisaad nga yuta.

• Josue 23–24: Kataposang pamulong ni Josue ug ang pagbag-o sa pakigsaad.

Tan-awa ang “Deuteronomio 34:5–6. Unsay nahitabo kang Moises sa hinapos sa iyang kinabuhi?”

Sa hugpong sa mga pulong nga “basahon sa balaod,” ang pulong “balaod” gihubad gikan sa Hebreohanong pulong nga torah. Ang torah sagad nagtumong sa unang lima ka basahon sa Daang Tugon, nga naglakip sa balaod nga gihatag sa Dios kang Moises sa Bukid sa Sinai. Sa konteksto sa Josue 1:8, ang “basahon sa balaod” posibleng nagtumong lamang sa pagsubli ni Moises sa balaod diha sa Deuteronomio.

Gisugo sa Ginoo si Josue nga pamalandongan ang basahon sa balaod “adlaw ug gabii.” Ang Hebreohanong pulong sa pagpamalandong niini nga konteksto nagpasabot og hilom nga pagsulti o paghunahuna pag-ayo sa mga kasulatan.

Gihulagway ni Elder D. Todd Christofferson kon unsaon pagpamalandong sa mga kasulatan: “Makita ko kamo usahay nga nagbasa og pipila ka mga bersikulo, mohunong sa pagpamalandong niini, mainampingon nga nagbasa sa mga bersikulo pag-usab, ug samtang kamo naghunahuna mahitungod sa unsay gipasabot niini, nag-ampo alang sa pagsabot, nagpangutana sa inyong hunahuna, naghulat sa espirituhanong mga impresyon, ug nagsulat sa mga impresyon ug mga panabot nga miabot aron ikaw makahinumdom ug makakat-on pa. Sa pagtuon niining paagiha, … makahatag kamo og luna sa inyong kasingkasing alang sa pulong sa Dios, ug Siya makigsulti kaninyo.”

Si Rahab dili katuohan nga nahimong manluluwas sa Israel, ilabina kay nagbaligya siya sa iyang dungog didto sa Jerico. Giila siya sa mga magsusulat sa Bag-ong Tugon ingon nga panig-ingnan sa pagtuo ug maayong mga buhat. Human tabangi ni Rahab ang Israelihanon nga mga espiya nga makaikyas, iyang gipahayag ang iyang pagtuo nga ang Ginoo mao ang Dios ug nga Iyang gihatag sa mga Israelihanon ang yuta.

Ang kasinatian ni Rahab adunay pagkasusama sa kagawasan sa mga anak ni Israel gikan sa Ehipto. Sama sa mga Israelihanon, nga wala patya sa milaglag nga anghel human nila butangi og dugo sa nati nga karnero ang haligi sa ilang mga pultahan, naluwas si Rahab ug ang iyang pamilya sa kalaglagan sa Jerico pinaagi sa pagbutang og pula nga pisi sa ilang bintana.

Si Rahab ug ang iyang pamilya nahimong bahin sa Israelihanong nasod sa gisaad nga yuta. Bisag wala na hisgoti si Rahab diha sa Daang Tugon, gihisgotan siya diha sa Mateo ingon nga katigulangan ni Jesukristo.

Wala madugay human nahimong lider sa mga anak ni Israel si Josue, ang Ginoo misaad kaniya, “Mag-uban ako kanimo ingon sa pag-uban ko kang Moises.” Usa ka paagi nga gituman sa Ginoo kini nga saad mao ang pagtabang sa mga Israelihanon sa pagtabok sa Suba sa Jordan diha sa uga nga yuta, parehas sa ilang pagtabok sa Pula nga Dagat. Human sa milagro, ang teksto nag-ingon nga “gipasidunggan sa katawhan sa Israel si Josue ingon nga bayani tungod sa gibuhat sa Ginoo niadtong adlawa. Gipasidunggan nila siya sa tibuok niyang kinabuhi sama sa pagpasidungog nila kang Moises.”

Ang milagro sa Suba sa Jordan nagpunting usab kang Jesukristo. Sa Hebreohanon, ang Josue nagkahulogang “Si Jehova mao ang kaluwasan, ug sa kataposan ang ngalan nausab pinaagi sa Greyego ug Latin ug ngadto sa English ingon nga Jesus. Ang pagpanguna ni Josue sa Israel paingon sa gisaad nga yuta magpahinumdom nato sa pagpanguna ni Jesukristo sa tanang matinud-anon ngadto sa kataposang gisaad nga yuta, ang celestial nga gingharian. Ginatos ka katuigan human ang milagro sa mga Israelihanon sa Jordan, gibunyagan si Jesukristo sa maong suba ug gisugdan ang Iyang mortal nga pagpangalagad.

Si Elder David A. Bednar mitudlog: “Makapaikag kaayo nga, ang katubigan wala mabahin sa dihang ang mga anak ni Israel nagbarog sa daplin sa suba nga naghulat nga adunay mahitabo; kondili, nabasâ una ang tikod sa ilang mga tiil sa wala pa mabahin ang tubig. Ang hugot nga pagtuo sa mga Israelihanon nakita sa pagkatinuod nga sila naglakaw na sa tubig sa wala pa kini mabahin.”

Sa nagpaingon na si Josue ug ang mga anak ni Israel sa siyudad sa Jerico, natagboan nila ang usa ka tawo nga nagpaila ingon nga “pangulo sa kasundalohan sa Ginoo.” Mihapa si Josue ingon nga pagsimba ug gihangyo ang kapitan nga ipahibalo ang kabubut-on sa Ginoo. Kini nga tubag nagpakita nga tingali langitnon ang kapitan, nga posibleng si Jehova Msmo. Kini nga panag-istorya uban sa kapitan sa kasundalohan sa Ginoo lagmit nagpahinumdom kang Josue ug sa mga Israelihanon nga ang Ginoo makig-away para sa Israel samtang gitinguha nilang mapanag-iya ang gisaad nga yuta.

Ang mga instruksiyon sa Ginoo sa pagpildi sa Jerico mas nagpunting sa simbolikanhong mga ritwal ug hugot nga pagtuo sa mga Israelihanon kay sa mga diskarte sa panggubatan. Ang pagdala sa arka sa pakigsaad palibot sa siyudad nagpaila nga ang gahom sa Ginoo mag-uban sa Israel. Ang numero nga syete, nga kadaghang gihisgotan diha sa mga instruksiyon sa Ginoo, sagad gigamit sa mga kasulatan ingon nga simbolo sa pagkabug-os, pagkakompleto, o kahingpitan. Ang paggamit niini nga numero diha sa mga instruksiyon sa Ginoo nakatabang tingali sa mga Israelihanon nga masabtan nga ang ilang pagpildi sa Jerico maoy bahin sa mas dakong espirituwal nga pagsulay ug sinugdanan sa usa ka bag-ong yugto sa panahon.

Madawat lamang sa mga Israelihanon ang gahom sa Dios kon motuman sila sa Iyang mga instruksiyon. Si Presidente Howard W. Hunter mitudlo, “Ang pasalig [ni Josue] mao ang hingpit nga pagkamasulundon. Ang iyang kabalaka mao ang pagbuhat sa eksakto ingon nga siya gisugo, nga ang saad sa Ginoo matuman. Ang mga sugo sa walay pagduhaduha ingon og katingad-an, apan ang iyang hugot nga pagtuo diha sa resulta miaghat kaniya sa pagpadayon.”

Ang pulong laglagonon sa Maayong Balita Biblia gihubad gikan sa Hebreohanong pulong nga nagkahulogan usab og gidili o gilain para sa kalaglagan. Tanang butang, hayop, ug tawo diha sa Jerico—gawas kang Rahab ug sa iyang pamilya—isipon nga laglagonon. Walay bisan unsa nga kuhaon ang mga Israelihanon gikan sa siyudad, ila hinuon nga ihatag kang Josue ang tanang kabtangan sa siyudad aron ipahinungod alang sa Ginoo.

Tan-awa usab ang “Deuteronomio 7:1–6, 16–24. Nganong gisugo sa Ginoo ang Israel nga laglagon ang mga Canaanhon?”

Gibalewala ni Acan ang sugo sa Ginoo nga dili magkuha og inilog gikan sa Jerico. Gipasidan-an sa Ginoo ang mga Israelihanon nga mahimo silang mga laglagonon kon kuhaon nila ang “bisan unsa nga laglagonon.” Kay ang tanang butang gikan sa Jerico ipahinungod man para sa Ginoo, sama og gikawatan ni Acan ang Ginoo. Bisag si Acan lang ang mihimo niadto, ang tibuok Israel ang gipapas-an sa Ginoo sa maong sala. Ingon nga resulta, nawala nila ang proteksiyon sa Ginoo ug napildi sila sa gamayng kasundalohan sa Ai. Giingnan sa Ginoo si Josue nga dili mabalik ang Iyang kusog ug proteksiyon hangtod nga dili matangtang sa ilang taliwala “ang bisan unsa nga laglagonon.” Kay laglagonon na man si Acan, siya, ang iyang panimalay, ug ang iyang mga katigayonan gilaglag, sama sa gihimo sa siyudad ug sa katawhan sa Jerico. Wala kaayo giklaro sa pagpasabot sa kasulatan kon nganong naapil ang pamilya ni Acan sa iyang silot.

Human mapildi sa mga Israelihanon ang katawhan sa Ai, gitigom sila ni Josue sa Siquem, nga nahimutang sa usa ka walog tali sa Bukid sa Gerisim ug Bukid sa Ebal. Dinhi gituman ni Josue ang mga instruksiyon ni Moises sa hinapos sa iyang mortal nga kinabuhi: nagtukod si Josue og halaran diha sa Bukid sa Ebal, mihalad og mga sakripisyo, ug misulat og kopya sa balaod ni Moises diha sa mga bato. Dayon katunga sa mga tribo sa Israel ang mibarog sa Bukid sa Gerizim ug ang laing katunga mibarog sa Bukid sa Ebal. Ang mga Levihanon, nga nagdala sa arka sa pakigsaad, nagtindog sa walog taliwala sa duha ka bukid. Dayon gilitok ni Josue ang mga buhat nga moresulta og mga panalangin ug kadtong moresulta og mga tunglo sumala sa gitakda sa Dios, ug mitubag ang mga Israelihanon pinaagi sa pag-ingon og, “Amen.”

Kini mao ang seremonya sa pagbag-o sa pakigsaad para sa mga Israelihanon diha sa gisaad nga yuta. Naa kini pagkasusama sa pag-establisar sa pakigsaad diha sa Bukid sa Sinai ug sa pakigsaad sa Ginoo ngadto kang Abraham. Sa makausa pa, miapil na usab ang mga Israelihanon sa susamang seremonya didto sa Siquem sa hinapos sa kinabuhi ni Josue. Kabahin niining ulahing seremonya, si Elder Neal A. Maxwell mitudlo: “Gibase niini nga konteksto sa dakong pagpasundayag … sa pagtudlo nga gihatag ni Josue ang pahayag nga makapainila niya: ‘ Pagpili karong adlawa kon kinsay alagaran ninyo’ (Josue 24:15). Pero una pa ani, ang mga alternatibo gihatag nga klaro, makita ug tin-aw nga madungog ug makita.”

Ang pulong nga gihubad og flood diha sa King James Version nagkahulogan og “suba.” Sa piho, kini nagtumong sa Suba sa Eufrates. Niini nga mga bersikulo, gipahinumdoman ni Josue ang mga Israelihanon sa pagsimba og dios-dios nga gihimo sa ilang mga katigulangan nga nagpuyo sa pikas tampi sa Eufrates sa wala pa gihatag sa Dios ang gisaad nga yuta sa Canaan ngadto kang Abraham.

Migamit si Josue og bug-at nga mga pulong aron pasidan-an ang mga Israelihanon nga manubag sila sa Ginoo tungod sa pagsupak sa ilang pakigsaad ngadto Kaniya. Gipasabot sa iyang mga pulong ang kaseryoso sa pakigsaad sa Israel ngadto sa Ginoo. Samtang ang pagsupak sa mga pakigsaad kanunayng moresulta sa pagkawala sa mga panalangin, ang pihong mga pasidaan ni Josue sa mga Israelihanon dili magamit sa ubang konteksto.

Sa atong panahon, si Presidente Russell M. Nelson mitudlo:

“Ang tanan niadtong kinsa mihimo og usa ka pakigsaad sa Dios adunay akses sa usa ka espesyal nga matang sa gugma ug kaluoy. Diha sa Hebreo nga pinulongan, kana nga masaaron nga gugma gitawag og hesed (חֶסֶד). …

“Ang hesed mao ang usa ka espesyal nga matang sa gugma ug kaluoy nga gibati sa Dios alang ug gipadangat ngadto niadtong kinsa mohimo og usa ka pakigsaad uban Kaniya. Ug kita mobalos og hesed alang Kaniya.

“Tungod kay ang Dios adunay hesed alang niadtong nagbaton og pakigsaad uban Kaniya, Siya mohigugma kanila. Siya mopadayon sa pakigtambayayong kanila ug motanyag kanila og mga oportunidad sa pag-usab. Siya mopasaylo kanila kon sila maghinulsol. Ug kon mahisalaag man sila, Siya motabang kanila nga makatultol og balik ngadto Kaniya.”

• Ann M. Dibb, “Magmaisug,” Liahona, Mayo 2010, 114–16

• David A. Bednar, “Paningkamot sa Pagkat-on pinaagi sa Hugot nga Pagtuo,” Liahona, Sep. 2007, 17–24

• Christopher J. Morgan, “The Sin of Achan,” Ensign, Apr. 2002, 43–45

• Dale G. Renlund, “Magpili Kamo Niining Adlawa,” Liahona, Nob. 2018, 104–6