Numeros 11–14; 20–24; 27

Ikonsiderar ang pagpakigbahin sa mosunod nga senaryo ug ang paghisgot sa kauban nga mga pangutana:

Niining bag-ohay lang, naglisod si Rachel sa pipila ka pagtulun-an sa mga lider sa Simbahan. Masaligon siya nga makadawat siyag personal nga pagpadayag para sa iyang mga desisyon ug mga pangutana. Tungod niini, nakapangutana siya kon nganong importante ang giya gikan sa mga propeta.

• Unsa kahay kinahanglang masabtan ni Rachel bahin sa personal nga pagpadayag?

• Unsay kahay kinahanglang masabtan ni Rachel bahin sa kon nganong magtawag og mga propeta ang Dios?

Niini nga kalihokan sa pagkat-on, awhaga ang mga estudyante nga hunahunaon kon sa unsang paagi makigsulti ang Dios kanila pinaagi sa personal nga pagpadayag ug pinaagi sa mga pulong sa Iyang mga propeta.

Ipasabot nga human ang usa ka tuig nga panaw latas sa kamingawan, ang mga Israelihanon nagbagulbol kang Moises kay gikapoy na silag kaon og mana. Gikapoy si Moises sa ilang pagbagulbol ug gitinguha ang tabang sa Ginoo. Agig resulta, mipili ang Ginoo og 70 ka lider nga motabang kang Moises sa pagdumala sa Israel (tan-awa ang Numeros 11:1–17).

Dapita ang mga estudyante nga basahon ang Numeros 11:24–29, nga pangitaon kon unsay nahitabo human pilia ni Moises ang 70 ka elder. Pwede usab nimong ikonsiderar ang pagpangutana og sama niini:

• Unsa kaha ang gipasabot ni Moises sa dihang miingon siya nga nanghinaot siya ang tanang katawhan “mahimo nga mga propeta”? (Numeros 11:29).

Hisgoti nga wala magsulti si Moises nga gusto sa tanang tawo mahimong lider ug makadawat og pagpadayag para sa kampo sa Israel. Hinuon, lagmit gipahayag niya ang tinguha nga ang tanan niyang katawhan magkinabuhi nga takos makadawat og pagpadayag para sa ilang kinabuhi (tana-awa ang “Numeros 11:24–29; 12:1–15. Unsay ipasabot ni Moises dihang miingon siya nga nanghinaot siya nga ang tanang katawhan mga propeta?” diha sa Mga Tabang sa Kasulatan: Daang Tugon).

Aron matabangan ang mga estudyante nga mas masabtan nga kinahanglan ang paggiya sa personal nga pagpadayag ug pagpadayag sa mga propeta, ikonsiderar ang pagpakita sa mosunod nga pamahayag ni Elder Dale G. Renlund:

Sama sa mga piloto sa eroplano, kinahanglan natong masabtan ang sistema sa mga lagda diin molihok ang Espiritu Santo aron sa paghatag og personal nga pagpadayag. Kon molihok kita sulod sa sistema sa mga lagda, ang Espiritu Santo makapagawas og makapahibulong nga panabot, direksiyon, ug kahupayan. Gawas niana nga sistema sa mga lagda, bisan unsa pa kita ka maalamon o matalento, mahimo kitang mailad ug mapakyas sa paagi nga makapasakit ug makadaot. …

Ang doktrina, mga sugo, ug mga pagpadayag alang sa Simbahan mao ang eksklusibo nga katungod sa buhi nga propeta, kinsa nagdawat niini gikan ni Ginoong Jesukristo. Kana mao ang tugpahanan sa propeta. …

Ang personal nga pagpadayag husto nga ilaha sa mga indibidwal. Kamo makadawat og pagpadayag, sama pananglit, mahitungod kon asa mopuyo, unsa nga dalan sa panarbaho ang sundon, o kinsa ang minyoan. Ang mga lider sa Simbahan mahimong motudlo og doktrina ug mopakigbahin og dinasig nga tambag, apan ang responsibilidad alang niini nga mga desisyon anaa kaninyo. Kana mao ang inyong pagpadayag nga madawat; kana mao ang inyong tugpahanan. (“Usa ka Sistema sa mga Lagda alang sa Personal nga Pagpadayag,” Liahona, Nob. 2022, 16, 17)

• Unsa ang pipila ka kamatuoran nga atong makat-onan bahin sa pagpadayag gikan sa Numeros 11 ug sa mga pagtulun-an ni Elder Renlund? (Pwedeng ilhon sa mga estudyante ang mga kamatuoran nga sama niini: Matag miyembro sa Simbahan makadawat og pagpadayag pinaagi sa Espiritu Santo. Ang Ginoo naggiya sa Iyang Simbahan pinaagi sa Iyang pinili nga propeta.)

Ikonsiderar ang paggamit sa usa o duha sa mosunod nga mga kalihokan aron matabangan ang mga estudyante nga mas masabtan kini nga mga kamatuoran:

1. Dapita ang mga estudyante nga pangitaon ang kalainan sa mga gihimo ni Aaron ug Miriam diha sa Numeros 12:1–8 ngadto sa mga anak nga babaye ni Selofehad diha sa Numeros 27:1–7. Ipasabot nga sagad moadto ni Moises ang mga indibidwal kon naa silay mga problema aron ‘magpakisayod sa Dios’ ug tabangan silang mahibalo sa ‘iyang mga sugo ug mga balaod’ (tan-awa ang Exodo 18:15-16). Pwedeng hisgotan sa mga estudyante kon unsay gitudlo niini nga mga asoy bahin sa koneksyon sa personal nga pagpadayag ug pagsunod sa mga propeta sa Ginoo.

2. Hatagig panahon ang mga estudyante sa pagtuon kon sa unsang paagi kita napanalanginan sa personal nga pagpadayag ug sa pagpadayag pinaagi sa Iyang mga propeta. Pwede nimo silang hatagan og panahon sa pagtuon sa mga bahin sa usa sa mosunod nga mga mensahe: Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 93–96 o Dallin H. Oaks, “Duha ka Linya sa Komunikasyon,” Liahona, Nob. 2010, 83–86.

Human sa panahon sa pagtuon sa mga estudyante, dapita sila sa pagtudlo sa usag usa sa ilang nakat-onan ngadto sa ilang pares o gamayng grupo. Pwede usab nimong ikonsiderar ang paghisgot sa mga pangutana nga sama sa mosunod ingon nga usa ka klase:

• Unsay gitudlo sa sundanan sa Ginoo para sa personal nga pagpadayag ug pagpadayag sa mga propeta bahin Kaniya?

• Sa unsang paagi napanalanginan ang imong kinabuhi tungod sa personal nga pagpadayag ug pagpadayag pinaagi sa mga propeta sa Ginoo?

Pagpamatuod sa mga kamatuoran nga inyong nahisgotan karon. Awhaga ang mga estudyante nga tinguhaon ang giya gikan sa Ginoo pinaagi sa pagsunod sa Iyang mga propeta ug pagtinguha sa personal nga pagpadayag.

Balik ngadto sa “Mga Opsiyon sa Kalihokan sa Pagkat-on.”

Pwede nimong dapiton ang mga estudyante sa pagpamalandong ug pagrekord sa ilang mga hunahuna mahitungod sa mosunod nga mga pangutana:

• Sa unsang paagi makaapektar sa akong relasyon sa Dios ang kahadlok?

• Unsa kahay akong mahimo kon mas dako ang akong pagtuo kang Jesukristo?

Pwede nimong ipabilin kining mga pangutanaha diha sa pisara panahon sa tibuok kalihokan ug dapita ang mga estudyante nga pamalandongan ug dugangan ang ilang mga tubag samtang magtuon sa Numeros 13–14.

Ipasabot nga human milatas sa kamingawan ang mga anak ni Israel, ang Ginoo midala kanila ngadto sa utlanan sa Canaan, nga mao ang yutang saad. Ang Ginoo misulti kanila nga kinahanglan nilang buntogon ang yuta aron mapanag-iya ni. Iyang gihatagan og instruksiyon si Moises nga magpili og usa ka sakop gikan sa dose ka tribo aron susihon ang yuta ug ireport kon unsay ilang nakita (tan-awa ang Numeros 13:1–25).

Ikonsiderar ang pagpakita sa mosunod nga table diha sa pisara ug pagpakopya niini sa mga estudyante. Dapita ang mga estudyante sa pagtuon sa mga bersikulo ug sa pagsulat sa mga pulong o hugpong sa mga pulong gikan sa mga kasulatan nga pwede nilang ibutang sa ikaduhang kolum.

Human ang igong panahon, dapita ang mga estudyante sa pagpakigbahin sa mga pulong o hugpong sa mga pulong nga ilang nasulat. Ikonsiderar ang paghangyo sa usa ka estudyante nga ilista ang mga tubag sa klase diha sa pisara. Pwede usab nimong ipangutana:

• Unsay mipatigbabaw nimo sa tubag ni Josue ug Caleb?

• Unsay imong makat-onan gikan sa mga tubag nga makatabang nimo sa pag-atubang og lisod nga mga sitwasyon? (Apil tingali sa mga tubag sa mga estudyante ang kamatuoran nga parehas sa mosunod: Ang pagsalig sa Ginoo makatabang nato sa pagtan-aw sa atong mga hagit uban ang hugot nga pagtuo imbes sa kahadlok.)

Ikonsiderar ang pagpakita sa mosunod nga mga instruksiyon. Dapita ang mga estudyante sa pagkompleto niini nga kalihokan uban sa ilang pares.

1. Pangitag ehemplo gikan sa kinabuhi ni Jesukristo nga nagpakita kon giunsa Niya pagtubag ang usa ka sitwasyon nga sagad moresulta sa kahadlok.

2. Hisgoti unsa ang inyong nakat-onan bahin ni Jesukristo gikan niini nga mga ehemplo. Sa unsang paagi nga ang Iyang ehemplo motabang ninyo sa dihang mahadlok kamo?

Pagkahuman sa mga estudyante, ikonsiderar ang pagdapit og pipila aron ipakigbahin ang ilang mga panabot ngadto sa klase. Pwede usab nimong dapiton ang pipila ka estudyante nga gustong mopakigbahin og kasinatian diin ilang nabuntog ang makahadlok nga sitwasyon tungod sa ilang pagsalig sa Manluluwas. (Ingon nga bahin niini nga panaghisgot, ikonsiderar ang pagpasalida sa bidyo nga “Be Not Troubled” [4:30].)

4:31

Awhaga ang mga estudyante nga hilom nga pamalandongan ang ilang kasamtangang mga kahimtang ug ang mga butang nga tingali ilang gikahadlokan. Pwede nimong ipakita ang mosunod nga mga instruksiyon ug dapita ang mga estudyante sa pagrekord sa ilang mga tubag:

• Ilha ang usa ka bahin sa imong kinabuhi nga maoy hinungdan sa imong kahadlok.

• Pagdesisyon kon unsaon ninyo pag-atubang kini nga bahin sa inyong kinabuhi uban ang mas dakong pagtuo sa Manluluwas.

• Irekord ang inyong plano.

Balik ngadto sa “Mga Opsiyon sa Kalihokan sa Pagkat-on.”

Sugdi pinaagi sa pagpakigbahin ang mosunod nga pamahayag ni Elder Neil L. Andersen:

Nangita kita og kalipay. Naghandom kita og kalinaw. Nangandoy kita og gugma. Ug ang Ginoo nagbubo kanato sa makapatingalang kaabunda sa mga panalangin. Apan sagol niana nga kamaya ug kalipay, usa ka butang ang sigurado: dunay mga gutlo, mga oras, mga adlaw, usahay mga tuig nga ang inyong kalag masamdan. (“Nasamdan,” Liahona, Nob. 2018, 84)

Pwede nimong pangutan-on ang mga estudyante sa mosunod ug dapiton ang mga usa ka estudyante nga ilista ang tubag sa ilang mga classmate diha sa pisara.

• Unsang mga pagpamugos o mga hagit ang makapahimo sa usa ka young adult nga mobati nga nasamdan sa emosyonal ug sa espirituwal?

Dapita ang mga estudyante sa paghunahuna kon asa sila sagad mangayog tabang dihang masamdan ang ilang mga kalag. Samtang magtuon karon, awhaga sila nga mahimong sensitibo sa mga impresyon gikan sa Espiritu Santo nga makatabang sa ilang mga kahimtang.

Ipasabot nga samtang naglatagaw sa kamingawan ang mga Israelihanon, nagbagulbol sila batok sa Dios ug napul-an na sa mana nga Iyang gihatag. Dapita ang mga estudyante nga basahon ang Numeros 21:4–9, nga pangitaon ang mga tubag sa Ginoo ngadto sa pagbagulbol sa mga Israelihanon. Dapita ang mga estudyante sa pagpakigbahin sa unsay ilang nakit-an.

Hisgoti nga ang ubang mga tudling sa kasulatan naghatag og importanteng dugang nga mga detalye bahin niini nga asoy. Ipakita ang mosunod nga mga pakisayran sa kasulatan. Dapita ang mga estudyante nga basahon ang matag tudling ug magsulat og usa ka kapahayag [sentence] nga summary kon unsay ilang ikadugang sa ilang pagsabot sa asoy sa Numeros 21. (Para mapraktisan ang kahanas nga “Pagkonektar sa mga Kasulatan,” diha sa Mga Kahanas sa Pagtuon sa Kasulatan, pwede nimong awhagon ang mga estudyante nga digital nga ikonektar kini nga mga kasulatan ngadto sa Numeros 21:4–9 diha sa Librarya sa Ebanghelyo o isulat ang mga pakisayran diha sa mga margin sa ilang kasulatan ingon nga mga cross-reference.)

• Juan 3:14–16

• 1 Nephi 17:41

• 2 Nephi 25:20

• Alma 33:18–23

• Helaman 8:14–15

Human makabaton og igong panahon sa pagtuon ang mga estudyante, dapita sila sa pagpakigbahin sa ilang nakat-onan ngadto sa ilang pares o gagmayng grupo. Pwede nimong ipakita ang mosunod nga hulagway panahon sa ilang panaghisgot.

Dapita ang estudyante sa pagpakigbahin sa klase sa pipila ka kamatuoran nga ilang nakat-onan gikan sa ilang pagtuon ug panaghisgot. Mailhan tingali sa mga estudyante ang pipila ka baroganan, lakip ang mosunod: Kon motan-aw kita ngadto ni Jesukristo uban ang hugot nga pagtuo, mamaayo ta.

Ikonsiderar ang pagpangutana sa mosunod aron tabangan ang mga estudyante nga mas masabtan kini nga kamatuoran:

• Unsa ang pihong mga paagi nga makatan-aw kita ngadto ni Jesukristo para mamaayo? (Pwede nimong ipapangita ug ipapakigbahin sa mga estudyante ang mga kasulatan o mga pamahag gikan sa mga lider sa Simbahan nga makatabang sa pagtubag niini nga pangutana.)

• Unsay nakapalisod sa paglantaw kang Jesukristo? Sa unsang paagi kita makabuntog niini nga mga hagit?

Dapita ang mga estudyante sa paghunahuna og kasinatian diin gipili nila nga motan-aw ngadto ni Jesukristo aron mamaayo. Pwede nimong dapiton ang pipila ka estudyante sa pagpakigbahin sa ilang mga kasinatian kon dili kaayo kini personal.

Ikonsiderar ang pagpakigbahin sa mosunod nga pamahayag ni Presidente Russell M. Nelson:

Ako mohangyo kaninyo sa pagduol ngadto Kaniya aron Siya makaayo kaninyo! Siya moayo kaninyo gikan sa sala samtang kamo maghinulsol. Siya moayo kaninyo gikan sa kaguol ug kahadlok. Siya moayo kaninyo gikan sa mga pag-antos dinhi niini nga kalibotan. (“Ang Tubag sa Kanunay Mao si Jesukristo,” Liahona, Mayo 2023, 127)

Hatagig panahon ang mga estudyante nga ikonsiderar kon sa unsang paagi nadasig sila nga gamiton sa ilang mga kinabuhi ang ilang nakat-onan karon. Awhaga sila nga isulat ang bisan unsang plano ug espirituwal nga mga impresyon nga nadawat nila gikan sa Espiritu Santo.

Balik ngadto sa “Mga Opsiyon sa Kalihokan sa Pagkat-on.”