Waiting for the Promise [Naghulat sa Saad], ni Elspeth Young

Josue 1–8; 23–24

Si Josue ang misunod ni Moises ingon nga propeta ug lider sa mga Israelihanon. Gisugo sa Ginoo si Josue nga giyahan ang mga anak sa Israel padulong sa gisaad nga yuta. Mipadala si Josue og duha ka espiya ngadto sa Jerico. Didto, si Rahab miluwas sa mga espiya gikan sa pagkasikop, ug agig balos sila misaad sa pagtagana kaniya ug sa iyang pamilya gikan sa umaabot nga kalaglagan. Gipahunong sa Ginoo ang katubigan sa Suba sa Jordan aron makatabok sa uga nga yuta ang mga Israelihanon ug makasulod sa gisaad nga yuta. Dihang gituman sa kasundalohan sa Israel ang Ginoo, gipanalanginan Niya sila aron modaog sila sa gubat. Sa wala pa siya mamatay, gipahinumdoman ni Josue ang mga Israelihanon sa tanang gibuhat sa Ginoo para nila. Gidasig niya ang katawhan nga pilion ang pagserbisyo sa Ginoo.

Dugang nga mga Kapanguhaan

Mga Tabang sa Kasulatan: Daang Tugon, “Josue 1–8; 23–24”

Pahinumdom: Ang “Pasiuna alang sa Kurso” naghatag og giya kon unsaon sa paggamit ang sumbanan nga mga elemento sa leksiyon nga mosunod.

Pag-awhag og Personal nga Pagtuon

Sa dili pa ang klase, ikonsiderar ang pagpadala sa mga estudyante og usa o daghan pa sa mosunod nga mga mensahe o pipila sa imong kaugalingon:

Gisugo sa Ginoo si Josue nga “magmalig-on ka ug magmaisogon” (Josue 1:9). Samtang imong tun-an ang Josue 1, ikonsiderar kon unsaon ka pagtabang sa Ginoo nga magmaisogon sa inyong mga kahimtang.
Unsang mga kahimtang ang inyong giatubang diin kinahanglan kang magpakitag pagsalig ni Jesukristo? Pamalandonga kon unsaon nimo pagpalig-on ang pagtuo samtang imong tun-an ang Josue 2–3 ug 6.
Napresyur ba ka sa pagsunod sa dili matarong nga mga impluwensiya kay sa pagtuman sa Ginoo? Ikonsiderar kon unsay imong makat-onan gikan sa Josue 24 nga makatabang nimo o sa uban niining mga sitwasyona.

Mga Pangutana ug Pagpakigbahin

Hatagi og panahon ang mga estudyante sa pagpangutana ug sa pagpakigbahin og mga panabot ug mga kamatuoran nga ilang nadiskobrehan diha sa ilang personal nga pagtuon sa Josue 1–8; 23–24.

Pagbansay sa Kahanas

Makatabang tingali ang kalihokan sa pagkat-on sa Josue 2–3; 6 aron gamiton ang kahanas nga “Visualizing the Scriptures” diha sa Scripture Study Skills.

Mga Opsiyon sa Kalihokan sa Pagkat-on

Daghang mga opsiyon sa pagkat-on ang gihatag kanimo ug sa imong mga estudyante. Sa mainampoong paagi pagpili kon hain nga opsiyon o mga opsiyon ang mahimong labing makahuloganon alang sa imong klase. Pwede usab kang mangayo og input gikan sa imong mga estudyante.

Pagpalambo sa Atong Pagtudlo ug Pagkat-on

Awhaga ang mga tigkat-on sa pag-ila sa Manluluwas pinaagi sa pagtuon sa ebanghelyo sa matag adlaw. Ang pagtuon sa kasulatan maghatag nato og higayon nga madungog ang tingog sa Manluluwas. Ang pagdapit nga basahon ang mga kasulatan maoy usa ka imbitasyon aron mailhan si Jesukristo. Samtang imong tudloan ang imong mga estudyante bahin sa pagtuon sa kasulatan, awhaga sila nga dili lang basta pangitaon kon unsay gitudlo sa kasulatan bahin sa Manluluwas, kondili pangitaon Siya. Aron makakat-on og dugang, tan-awa ang “Ang Manluluwas Miawhag sa Uban nga Makaila Kaniya pinaagi sa Pagtuon sa Iyang Pulong” (Pagtudlo Sumala sa Pamaagi sa Manluluwas, 25).

Josue 1

Sa unsang paagi ko tabangan sa Ginoo nga magmaisogon?

Pwede nimong ipakita ang mga mosunod nga hugpong sa mga pulong ug dapiton ang mga estudyante nga isulat kon unsaon nila pagkompleto ang usa o kapin pa ka kapahayag [sentence].

Mobati ko nga nabug-atan sa …
Mobati ko nga kulang akong paningkamot dihang …
Nabalaka o nahadlok ko sa …

Awhaga ang mga estudyante nga hinumdoman ang ilang mga tubag samtang tun-an nila ang tambag sa Ginoo ni Josue. Dapita sila sa pagpangita sa mga kamatuoran nga makatabang nila dihang mobati silag ingon niini.

Ipasabot nga naay mga rason si Josue nga mobatig grabeng emosyon, makulangan sa iyang mga paningkamot, ug mabalaka. Naglatagaw ang mga anak ni Israel diha sa kamingawan sulod sa 40 ka tuig. Si Moises, ang halangdon nga tighatag og balaod ug propeta, wala na. Responsibilidad ug kahigayonan na ni Josue ang pagdumala sa mga anak ni Israel ngadto sa gisaad nga yuta ug sa pagpakiggubat batok sa mga tawo nga morag mas kusgan pa nila.

Dapita ang mga estudyante sa pagtuon sa Josue 1:1–9 ug pangitaa ang mga pulong o hugpong sa mga pulong nga nakahupay tingali kang Josue. Pwede nimong hisgotan nga giklaro sa Basahon ni Mormon nga wala namatay si Moises, kondili nabalhin sa pagkahimaya (tan-awa ang Giya ngadto sa mga Kasulatan, “Nabalhin sa Pagkahimaya nga mga Binuhat,” Librarya sa Ebanghelyo; tan-awa sab ang Alma 45:19). Pwedeng ipakigbahin sa mga estudyante ngadto sa ilang pares o sa klase kon unsay mipatigbabaw kanila sa mga bersikulo nga ilang gitun-an ug kon ngano. Pwede usab nimong ikonsiderar ang pagpangutana sa:

Sa imong hunahuna, unsa kahay nakat-onan ni Josue gikan sa tambag sa Ginoo? (Ilhon tingali sa mga estudyante ang lainlaing kamatuoran, lakip ang sama sa mosunod: Kon kita nasayod nga uban nato ang Ginoo, mahimo kitang lig-on ug magmaisogon.)

Ikonsiderar ang pagpakita sa mosunod nga mga instruksiyon ug paghatag og panahon sa mga estudyante nga kompletohon kini sa indibidwal nga paagi.

Isulat ang usa o kapin pang mga sitwasyon nga inyong giatubang diin nagkinahanglan nga kamo magmalig-on ug magmaisogon.
Pangita og mga kasulatan o pamahayag sa mga lider sa Simbahan nga makatabang nimo nga makadawat og kalig-on ug kaisog gikan sa Ginoo niini nga mga sitwasyon. Lakip sa ehemplo nga mga kasulatan nga pwede ninyong tun-an mao ang Josue 1:9; Salmo 27:1; Isaias 41:10; 2 Timoteo 1:7; ug Doktrina ug mga Pakigsaad 6:36.

Kon mahuman na ang mga estudyante, dapita sila sa pagpakigbahin sa pipila sa mga kasulatan o mga pamahayag nga ilang nakita ngadto sa ilang partner o gamayng grupo. Dayon ikonsiderar ang pagpangutana sa mosunod nga mga pangutana:

Kanus-a kamo gihatagan sa Ginoo og kusog ug kaisog? Unsay gitudlo niini nga kasinatian kaninyo bahin Kaniya?

Sa pagtapos, dapita ang mga estudyante nga hunahunaon kon unsaon nila paggamit ang ilang nakat-onan dih sa ilang kinabuhi. Dapita sila nga irekord ang ilang mga hunahuna o espirituwal nga mga impresyon.

Balik ngadto sa “Mga Opsiyon sa Kalihokan sa Pagkat-on.”

Josue 2–3; 6

Unsa ang kalahian sa akong kinabuhi ang resulta sa paglihok uban ang hugot nga pagtuo diha ni Jesukristo?

Ikonsiderar ang pagsulat sa mosunod nga pangutana diha sa pisara:

Unsang mga sitwasyon sa kinabuhi diin gikinahanglan natong molihok uban ang hugot nga pagtuo kang Jesukristo?

Ikonsiderar ang pagsulat sa mga tubag sa mga estudyante niining pangutanaha diha sa pisara. Pwede usab nimo silang dapiton nga hisgotan kon sa unsang paagi kita makabenepisyo gikan niining klaseha sa mga sitwasyon.

Ipasabot nga makat-onan nato sa basahon ni Josue ang pagsulod sa mga Israelihanon ngadto sa gisaad nga yuta human sa 40 ka tuig nga paglatagaw sa kamingawan. Kini nga basahon naghulagway sa daghang sitwasyon diin kinahanglang magpakitag hugot nga pagtuo sa Ginoo ang mga indibidwal. Awhaga ang mga estudyante nga ikonsiderar kon sa unsang paagi ang mga ehemplo nga ilang gitun-an karon makatabang aron makapakita silag dugang hugot nga pagtuo kang Jesukristo diha sa ilang kinabuhi.

Dapita ang mga estudyante sa paghimog tsart parehas sa mosunod:

Matinud-anon nga mga buhat	Resulta sa paglihok uban ang hugot nga pagtuo

Hatagi og panahon ang mga estudyante sa pagtuon sa usa o kapin pa sa mosunod nga mga asoy ug sa pagkompleto sa duha ka kolum diha sa tsart base sa ilang nakaplagan. Pwede usab kining mahimong kahigayonan nga ipaila ang kahanas nga “Paghanduraw sa mga Kasulatan” diha sa Mga Kahanas sa Pagtuon sa mga Kasulatan. Pwedeng handurawon sa mga estudyante nga naa sila sa asoy ug ikonsiderar kon unsa kaha ang ilang hunahunaon o bation.

Si Rahab ug ang mga espiya (Josue 2:1–21; 6:22–25)
Pagsulod sa mga Israelihanon sa gisaad nga yuta (Josue 3:1–17)
Ang gubat sa Jerico (Josue 6:1–20)

Kon mahuman og tuon ang mga estudyante, dapita sila nga ipakigbahin ang ilang gisulat diha sa tsart ngadto sa ilang pares o sa gagmayng grupo. Pwede usab nimong pahisgotan nila ang mosunod nga mga pangutana:

Unsay inyong nakat-onan bahin sa Ginoo gikan sa asoy nga imong gitun-an?
Sa unsang paagi makatabang kini nga asoy sa mga sitwasyon diin kinahanglan kang magpakitag hugot nga pagtuo kang Jesukristo?

Kon naay pangutana ang mga estudyante bahin sa sugo sa Dios nga laglagon ang katawhan sa Jerico, pwede nimo silang tultolan sa “Deuteronomio 7:1–6, 16–24. Nganong gisugo sa Ginoo ang Israel nga laglagon ang mga Canaanhon?” diha sa Mga Tabang sa Kasulatan: Daang Tugon.

Ikonsiderar ang pagpakita sa mosunod nga pamahayag ni Elder Dale G. Renlund:

Kadaghanan sa mga panalangin nga tinguhang ihatag sa Dios kanato nagkinahanglan og buhat sa atong bahin—lihok nga magbase sa atong [hugot nga] pagtuo kang Jesukristo. Ang [hugot nga] pagtuo diha sa Manluluwas usa ka baroganan sa paglihok ug gahom. Una molihok kita inubanan sa [hugot nga] pagtuo; dayon moabot ang gahom—sumala sa kabubut-on sa Dios ug panahon. Mahinungdanon kini nga paagi. Ang gikinahanglan nga lihok, bisan pa, kanunayng gamay kon itandi sa mga panalangin nga unya atong madawat. (“Magamadagayaon [Buhong] sa mga Panalangin,” Liahona, Mayo 2019, 70)

Ikonsiderar ang pagsulat sa mosunod nga kamatuoran diha sa pisara: Samtang molihok kita uban ang hugot nga pagtuo kang Jesukristo, madawat nato ang gahom ug mga panalangin sa Dios. Pwede dayon nimong ipangutana ang sama sa mosunod:

Sa imong hunahuna, nganong importante ang pagkasunod-sunod sa paglihok uban ang hugot nga pagtuo ug dayon pagkadawat sa gahom sa Dios?
Unsa ang mga ehemplo sa inyong kinabuhi diin nadawat ninyo ang gahom o mga panalangin sa Dios kay milihok kamo uban ang hugot nga pagtuo kang Jesukristo?

Pwede nimong ipakigbahin ang mosunod nga pamahayag gikan kang Presidente Russell M. Nelson:

Unsay inyong buhaton kon kamo adunay dugang nga hugot nga pagtuo? Hunahunaa kini. Isulat kini. Dayon dawata ang dugang pa nga hugot nga pagtuo pinaagi sa paghimo og butang nga nagkinahanglan og dugang nga hugot nga pagtuo. …

Ang hugot nga pagtuo diha kang Jesukristo mao ang kinadak-ang gahom nga atong magamit niini nga kinabuhi. Ang tanan nga butang mahimo ngadto kanila nga magatuo.

Ang inyong nagtubo nga hugot nga pagtuo Kaniya makabalhin og mga bukid—dili mga bukid nga bato nga pangpatahom sa yuta—apan mga bukid sa kasub-anan sa inyong kinabuhi. Ang inyong nagmalamboon nga hugot nga pagtuo makatabang kaninyo sa pagbalhin sa inyong mga hagit ngadto sa dili hitopngan nga kalamboan ug oportunidad. (“Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 103, 104)

Hatagig panahon ang mga estudyante nga maghimo og plano aron makapalambo ug makapakita sa ilang hugot nga pagtuo. Kon dili ra personal kaayo, dapita ang mga estudyante sa pagpakigbahin sa ilang plano ngadto sa ilang pares o sa klase.

Balik ngadto sa “Mga Opsiyon sa Kalihokan sa Pagkat-on.”

Josue 24

Unsay makatabang nako sa pagpili nga moserbisyo sa Ginoo?

Ang mosunod nga senaryo makatabang sa mga estudyante sa pag-ila sa kaimportante sa paggamit sa ilang kagawasan sa pagpili sa paghimog maayo. Ikonsiderar ang pagpakigbahin niini o paghimog laing senaryo nga mas nahiuyon sa mga panginahanglan sa imong mga estudyante:

Bag-o lang mibulag og puyo sa iyang mga ginikanan si Walter. Karon nga siya na lang usa, naglisod siya sa paghimo sa mga butang nga giawhag sa iyang mga ginikanan nga iyang buhaton, sama sa pag-adto sa simbahan, pagtuon sa mga kasulatan, ug pagtuman sa mga pagtulun-an ug sumbanan sa Manluluwas. Buotan ang mga bag-ong roommate ni Walter ug lingaw silang kauban, pero nabantayan niya nga dili nila prayoridad ang pagsunod kang Jesukristo.

Unsay imong ipangutana kang Walter nga importante tingali nga miyang ikondiderar?

Ipasabot nga sa hinapos sa kinabuhi ni Josue, mihatag siyag kataposang mensahe sa mga Israelihanon. Bisan og naningkamot ang mga Israelihanon nga tangtangon ang mga impluwensiya sa daotan sa ilang palibot human sila mosulod sa gisaad nga yuta, nabalaka gihapon si Josue bahin sa mga tentasyon nga giatubang sa iyang katawhan.

Dapita ang mga estudyante nga tun-an ang Josue 24:1–18, nga mangita sa mga kamatuoran gikan sa tambag ni Josue nga makatabang sa senaryo bahin kang Walter ug sa mga sitwasyon nga ilang giatubang sa ilang kaugalingong mga kinabuhi.

Pagkahuman og tuon sa mga estudyante, ikonsiderar ang pagdapit nila nga ipakigbahin sa ilang partner ang mga pulong o hugpong sa mga pulong gikan niini nga mga bersikulo nga makatabang sa sitwasyon ni Walter. Pwede dayon nimong ipangutana ang sama sa mosunod:

Unsaon nimo pag-summarize ang mensahe ni Josue ingon nga pamahayag sa kamatuoran? (Mahimo tingaling ilhon sa mga estudyante ang kamatuoran nga sama niini: Kita makapili sa pagserbisyo sa Ginoo bisan unsa pay pilion sa uban.)
Unsa ang pipila ka ehemplo sa mga sitwasyon nga giatubang sa mga young adult diin makatabang tingali ang pagsunod niini nga baroganan?

Ikonsiderar ang pagpakigbahin sa mosunod nga pamahayag ni Elder Dale G. Renlund, ug dayon hisgoti ang mga pangutana sa ubos:

Ang tumong sa atong Langitnong Amahan sa pagkaginikanan dili ang pagbuhat sa Iyang mga anak sa unsay matarong; kini ang pagpili sa Iyang mga anak sa pagbuhat sa matarong ug sa kataposan mahimong sama Kaniya. …

Sa pagkatinuod, ang Dios nagtinguha, naglaum, ug naggiya aron ang matag usa sa Iyang mga anak mopili alang sa iyang kaugalingon. Dili Siya mopugos kanato. Pinaagi sa gasa sa kabubut-on, ang Dios nagtugot sa Iyang mga anak “sa pagbuhat alang sa ilang mga kaugalingon ug nga dili pagaaghaton” [2 Nephi 2:27]. Ang kabubut-on nagtugot kanato sa pagpili nga maanaa sa dalan sa pakigsaad, o dili. Nagtugot kini kanato sa pagpalayo, o dili. Sama nga dili kita mapugos sa pagsunod, dili usab kita mapugos sa pagsupak. Walay usa, kon wala ang atong pag-uyon, nga makapalayo kanato sa dalan. …

Kinahanglang pilion nato kon kinsa ang atong serbisyohan. Ang gidak-on sa atong mahangtorong kalipay mag-agad sa pagpili sa buhi nga Dios ug sa pag-apil Kaniya sa Iyang buhat. (“Magpili Kamo Niining Adlawa,” Liahona, Nob. 2018, 104–6)

Unsa ang mipatigbabaw kaninyo gikan niini nga pamahayag?
Unsay inyong nahibaloan bahin kang Jesukristo nga makatabang kaninyo sa pagpili Kaniya imbes ang ubang impluwensiya?

Sa pagtapos, dapita ang mga estudyante nga hunahunaon ang ilang kasamtangang mga pagpamugos nga sundon ang dili matarong nga mga impluwensiya imbes ang Ginoo. Dapita sila nga ikonsiderar kon unsaon nila pagpahiuyon ang ilang kinabuhi aron mas mapakita nga gipili nilang magserbisyo sa Ginoo. Awhaga sila nga irekord ang ilang plano ug ang bisan unsang impresyon nga nadawat nila gikan sa Espiritu Santo.

Balik ngadto sa “Mga Opsiyon sa Kalihokan sa Pagkat-on.”