Exodo 1–6

Ikonsiderar ang pagpakigbahin sa mosunod nga pamahayag ni Presidente Russell M. Nelson:

Ang tinuod nga mga disipulo ni Jesukristo andam nga magpabantang, motingog, ug magpalahi gikan sa mga tawo sa kalibotan. Sila walay kahadlok, maunongon, ug maisogon. (“Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 40)

Dapita ang mga estudyante nga mopakigbahin og mga ehemplo sa mga sitwasyon nga maatubang nila o sa ubang young adult diin kinahanglan nilang “mobarog, motingog, ug magpalahi” sa ubang tawo. Awhaga sila nga hunahunaon ang ilang tubag sa mga sitwasyon nga parehas ani sa nangagi. Samtang magtuon karon, dapita sila nga pangitaon ang mga kamatuoran nga makatabang nila nga mahimong maisogon nga mga sumusunod ni Jesukristo.

Dapita ang pipila ka sakop sa klase nga ipakigbahin ang ilang nahibaloan bahin sa nahitabo sa mga Israelita human mamatay si Jose sa Ehipto. Kon kinahanglan, ipasabot nga human mamatay si Jose, midaghan ang mga Israelita (gitawag pod nga mga Hebreohanon) didto sa Ehipto. Kay nahadlok nga basin mahimong gamhanan kaayo ang mga Israelita, giulipon sila sa bag-ong paraon (tan-awa ang Exodo 1:6–14).

Dapita ang mga estudyante nga tun-an ang Exodo 1:15–19 ug ilhon ang sitwasyon diin gisuklan sa mga indibidwal ang dili matarong nga mga impluwensiya ug milihok uban ang kaisog. Pwede ninyong hisgotan ang mosunod nga mga pangutana:

• Unsay nakapalisod para ni Pua ug Shipra nga supakon ang sugo sa Paraon?

• Sa inyong hunahuna, unsay ipasabot nga ang mga mananabang “nahadlok sa Dios”? (Exodo 1:17). Kon kinahanglan, i-refer ang entry para sa Exodo 1:17 diha sa Mga Tabang sa Kasulatan: Daang Tugon.

Dapita ang mga estudyante sa pagbasa sa Exodo 1:20–21, nga pangitaon kon sa unsang paagi gipanalanginan sa Ginoo si Pua ug Shipra para sa ilang kaisog. Dayon pwede nimong hangyoon ang mga estudyante nga ipakigbahin ang mga kamatuoran nga ilang nakat-onan gikan niini nga asoy nga motabang nato dihang mag-atubang kitag dili matarong nga mga impluwensiya. Usa ka kamatuoran nga mailhan tingali sa mga estudyante mao ang: Trataron kita sa maayong paagi sa Ginoo dihang mahadlok kita Niya ug suklan ang dili matarong nga mga impluwensiya.

• Unsay nakapalisod sa pagpakigbatok sa dili matarong nga mga impluwensiya karon?

Ipahanduraw sa mga estudyante nga aduna silay kaila nga naglisod sa pagpakigbatok sa dili matarong nga mga impluwensiya nga ilang giatubang. Hatagi silag pipila ka minuto nga mangitag usa o kapin pa sa mosunod nga mga kapanguhaan nga makatabang tingali:

1. Usa ka kasulatan

2. Usa ka pahayag gikan sa lider sa Simbahan

3. Usa ka ehemplo gikan sa kinabuhi sa Manluluwas

Dapita ang mga estudyante nga ipakigbahin ang kapanguhaan nga ilang nakita ngadto sa gamayng grupo ug ipasabot kon sa unsang paagi kini makatabang sa usa ka tawo aron masuklan ang dili matarong nga mga impluwensiya.

Ikonsiderar ang pagdapit sa mga estudyante nga ipakigbahin sa klase kon sa unsang paagi sila gipanalanginan sa Ginoo tungod sa paghimo sa hustong butang bisan pa og gipugos sila.

Awhaga ang mga estudyante nga pamalandongan ug irekord kon unsaon nila paggamit diha sa ilang kinabuhi ang mga kamatuoran nga ilang nakat-onan.

Balik ngadto sa “Mga Opsiyon nga Kalihokan sa Pagkat-on.”

Pwede kang magpakita og listahan nga parehas sa mosunod:

• Pag-ambit sa sakramento

• Pag-adto sa templo

• Pagdawat og panalangin sa pagkapari

• Personal nga pag-ampo

• Pagtuon sa kasulatan

• Pagtambong sa institute

Dapita ang mga estudyante nga ipakigbahin ang ilang himoon sa dili pa o panahon sa mga kasinatian nga gilista aron mahimo kining mas makahuloganon. Mahimo dayon kang mangutana:

• Sa inyong hunahuna, nganong makatabang kining mga butanga aron makabaton tag mas balaan nga mga kasinatian?

Samtang tun-an nila ang mosunod nga kasinatian sa kinabuhi ni Moises, awhaga ang mga estudyante nga pangitaon ang mga kamatuoran nga motabang nila nga tahoron ang balaang mga panahon ug mga lugar.

Ikonsiderar ang pagpasabot nga human milayas sa Ehipto si Moises, nagpuyo siya sa yuta sa Midian. Didto siya naminyo kang Sefora ug giatiman ang mga karnero sa amahan ni Sefora nga si Jetro. Niining panahona, nakabaton si Moises og sagrado nga kasinatian diin mipakita niya ang Ginoo ug gitawag siya sa pagluwas sa Israel gikan sa pagkaulipon sa Ehipto. Sa wala pa gihatag sa Ginoo kang Moises ang iyang calling, gipakigbahin una Niya ang importanteng mga instruksiyon.

Dapita ang mga estudyante nga basahon ang Exodo 3:1–6, nga pangitaon kon unsay nasinati ni Moises diha sa presensiya sa Dios. Makatabang tingali ang pagpasabot nga sa Hubad ni Joseph Smith sa Exodo 3:2, giilisan niini ang “anghel sa Ginoo” og “presensiya sa Ginoo” (diha sa Exodo 3:2, footnote a).

Ikonsiderar ang pagsukna sa mga pangutana nga parehas sa mosunod aron tabangan ang mga estudyante nga ipakigbahin ang ilang nakat-onan:

• Unsay gibuhat ni Moises sa pagpakita og balaang pagtahod alang sa Dios?

• Unsay atong makat-onan bahin sa pagtahod gikan sa kasinatian ni Moises uban ang Ginoo? (Ipakigbahin tingali sa mga estudyante ang mga kamatuoran nga parehas ani: Gitinguha sa Ginoo nga magpakita kitag pagtahod Niya ug sa Iyang balaang mga dapit. Ang pagpakitag pagtahod sa Ginoo nag-andam nato nga matudloan Niya.)

Aron tabangan ang mga estudyante nga masabtan ang kaimportante sa pagtahod, ikonsiderar ang pagpakita sa mosunod nga mugbong pahayag ug pagdapit sa mga estudyante nga hilom kining basahon. (Para sa dugang ideya bahin sa paggamit sa mga pagtulun-an sa mga lider sa Simbahan, tan-awa ang “Using Teachings of Church Leaders to Understand the Scriptures” diha sa Mga Kahanas sa Pagtuon sa Kasulatan.)

Ang balaang pagtahod nagdapit og pagpadayag (Boyd K. Packer, “Reverence Invites Revelation,” Ensign, Nob. 1991, 22)

Hingpit nga kalipay diha sa balaang pagtahod? ‘Tinuod ba kana?’ tingali mangutana kamo. Aw, oo, tinuod na! Atong gimahal pag-ayo, gipasidunggan, ug girespeto ang atong Dios, ug ang atong balaan nga pagtahod nagagikan sa kalag nga nagmaya sa abunda nga gugma, kaluoy, ug kaluwasan ni Kristo! (Patrick Kearon, “Welcome sa Simbahan sa Hingpit nga Kalipay,” Liahona, Nob. 2024, 36).

Dihang maugmad nimo ang lawom nga pagtahod para sa balaang mga butang, ang Espiritu Santo mahimong inyong kanunay nga makauban. Molawom ang imong pagsabot ug kamatuoran. (D. Todd Christofferson, “A Sense of the Sacred,” New Era, Hun. 2006, 31).

Dapita ang mga estudyante nga ipakigbahin ang mga panglantaw nga ilang nakuha gikan niini nga mga pahayag. Pwede pod nimong ipangutana ang parehas sa mosunod:

• Unsang mga ehemplo ang gipakita ni Jesukristo sa pagpakitag pagtahod sa balaang mga butang o dapit atol sa Iyang mortal nga pangalagad?

• Unsa ang pipila ka paagi nga inyong ikapakita ang pagtahod sa Langitnong Amahan sa lainlaing aspeto sa inyong kinabuhi?

• Sa unsang paagi ang pagpakitag pagtahod sa Langitnong Amahan makatabang aron maandam kamo nga makadawat og mensahe gikan Niya?

Dapita ang mga estudyante nga maghunahunag mga paagi aron mapakita nila ang mas lawom nga pagtahod para sa Langitnong Amahan ug kang Jesukristo diha sa ilang kinabuhi. Dapita sila nga irekord ang mga hunahuna o impresyon nga ilang madawat gikan sa Espiritu Santo.

Balik ngadto sa “Mga Opsiyon nga Kalihokan sa Pagkat-on.”

Ikonsiderar ang pagpakigbahin og senaryo bahin sa usa ka young adult nga mibating dili angayan sa paghimo sa buluhaton sa Ginoo. Pwede nimong gamiton ang mosunod o ang imong gihimo.

Nakurat si Nyla dihang gihatag sa iyang bishop ang calling nga moserbisyo isip magtatambag sa kapangulohan sa Relief Society. Baynte anyos lang siya, bag-o pa lang siya sa iyang ward, ug maulawon. Gibati niya nga nabug-atan sa iyang mga kakulangan ug limitasyon. Naghunahuna siya, Nganong ako man ang tawagon sa Ginoo?

Ikonsiderar ang pagsulat sa pisara sa mosunod nga hugpong sa mga pulong gikan sa Exodo 3:11:

• Kinsa man ako nga … ?

Hangyoa ang mga estudyante nga tiwason kini nga kapahayag pinaagi sa pagpakigbahin sa mga butang nga ipahimo nato sa Ginoo nga morag labaw kay sa atong mga abilidad. Pwede nimong ilista ang ilang mga tubag tupad sa hugpong sa mga pulong nga anaa sa pisara. Samtang magtuon karon, awhaga ang mga estudyante nga tinguhaon ang mga kamatuoran nga makatabang nila dihang mobati silang dili angayan sa paghimo sa buluhaton nga gipabuhat kanila sa Ginoo.

Ikonsiderar ang pagpakita og hulagway ni Moises. Pahinumdomi ang mga estudyante nga bisan og sa ngadto-ngadto nahimong bantogang propeta si Moises nga naghimog dagkong mga milagro sa tabang sa Ginoo, mibati siyang dili angayan dihang gitawag siya sa Dios sa sinugdan.

Dapita ang mga estudyante nga basahon ang Exodo 3:7–11, nga pangitaon kon unsay sanong ni Moises dihang gitawag siya sa Ginoo nga luwason ang Israel gikan sa pagkabihag sa Ehipto. Dapita ang mga estudyante nga markahan ang pangutana ni Moises sa Ginoo diha sa bersikulo 11.

Aron matabangan ang mga estudyante nga makita kon sa unsang paagi gitubag sa Ginoo ang mga kabalaka ni Moises, ikonsiderar ang pagpakita sa mosunod nga table. Dapita ang mga estudyante nga tun-an ang konektadong mga kasulatan ug hunahunaon ang bahin sa mga pagtulun-an sa Ginoo nga makatabang nila dihang mobati silang dili angayan sa paghimo sa buluhaton sa Dios.

Human sa igong panahon sa pagtuon sa mga estudyante, dapita sila sa pagpakigbahin sa ilang mga hunahuna ngadto sa usa kakapares o gagmayng grupo. Pwede pod ninyong hisgotan ang mosunod nga pangutana ingon nga usa ka klase:

• Unsay inyong nakaplagan gikan niini nga mga bersikulo nga makatabang ninyo dihang mobati kamo nga dili angayan o dili kwalipikado sa paghimo sa buluhaton sa Ginoo? (Ang mosunod maoy usa ka ehemplo sa kamatuoran nga mailhan tingali sa mga estudyante: Dihang tawgon kita sa Dios para sa Iyang buluhaton, gihatagan ta Niyag gahom nga tumanon kini.)

Aron tabangan ang mga estudyante nga mas masabtan kini nga kamatuoran, ikonsiderar ang pagpakigbahin sa pahayag ni Presidente Henry B. Eyring ug sa paghisgot sa nagsunod nga mga pangutana:

Naay mga panahon nga mibati kamo nga nabug-atan. Usa sa mga paagi nga atakehon komo mao ang pagbati nga kamo dili angayan. Aw, dili kamo angayan sa mosanong sa tawag nga mahimong representante sa Dios nga kamokamo ra. Apan kamo adunay akses sa paggamit sa labaw pa sa inyong natural nga mga kapasidad, ug kamo wala mag-inusara sa pagbuhat.

Ang Ginoo mopadako sa inyong isulti ug unsay inyong buhaton diha sa mga mata sa mga tawo nga inyong gialagaran. (“Rise to Your Call,” Liahona, Nov. 2002, 76–77)

• Unsay inyong nakat-onan bahin sa Ginoo pinaagi sa inyong mga paningkamot nga moalagad Niya?

• Kanus-a ninyo nakita ang Dios nga mihatag kaninyo o sa uban og gahom sa pagbuhat sa Iyang buluhaton?

  (Ingon nga bahin niini nga panaghisgot, ikonsiderar ang pagpasalida sa “Do You Want to Be Happy?” gikan sa mga time code 4:02 hangtod 5:36.)

  

  10:21

Awhaga ang mga estudyante nga isulat ang bisan unsang impresyon nga gusto nilang mahinumdoman gikan sa ilang mga kasinatian sa klase. Pwede pod nimong ipakigbahin ang kaugalingon nimong pamatuod sa abilidad sa Ginoo nga tabangan tang matuman ang Iyang buluhaton.

Balik ngadto sa “Mga Opsiyon nga Kalihokan sa Pagkat-on.”

Pwede nimong sugdan pinaagi sa pagpakigbahin sa mosunod nga pahayag ni Presidente Jeffrey R. Holland.

Ang Kristiyanidad [Relihiyon] makahupay, apan sa kasagaran dili komportable. Ang dalan sa pagkabalaan ug kalipay dinhi ug human dinhi layo ug usahay batoon. Nagkinahanglan og panahon ug determinasyon ang pagsubay niini. Apan siyempre, ang ganti sa paghimo niini dako ug mahinungdanon kaayo. (“Naghulat sa Ginoo,” Liahona, Nob. 2020, 116–17)

Dapita ang mga estudyante sa paghisgot sa mosunod nga mga pangutana uban ang usa ka partner:

• Unsay nakapalisod nga mahimong sumusunod ni Jesukristo karon?

• Sa inyong hunahuna, nganong takos sa inyong mga paningkamot ang pagsunod sa Manluluwas?

Pahinumdomi ang mga estudyante nga gitawag sa Ginoo si Moises aron luwason ang mga Israelita gikan sa pagkabihag sa Ehipto. Bisag sa kataposan ang Ginoo maoy miluwas sa mga Israelita, nakasinati og daghang kalisdanan si Moises ug ang iyang katawhan. Samtang magtuon karon, awhaga ang mga estudyante nga pangitaon ang mga panglantaw nga makatabang nila dihang makasinati silag mga hagit sa pagsunod sa Manluluwas.

Dapita ang mga estudyante nga basahon ang Exodo 5:1–2, nga pangitaon ang tubag sa Paraon sa hangyo ni Moises ug Aaron nga buhian ang mga Israelita. Human ipakigbahin sa mga estudyante ang ilang nakaplagan, ipasabot nga dili lang basta mibalibad ang Paraon nga buhian ang mga anak sa Israel, apan mas gipalisod pa gyod niya ang ilang kinabuhi pinaagi sa pagdugang sa ilang buluhaton (tan-awa ang Exodo 5:4–19).

Dapita ang mga estudyante nga tun-an ang Exodo 5:20–23, nga pangitaon kon unsay tubag ni Moises ug sa mga anak sa Israel sa gidugang nga kabug-at sa ilang kalisdanan. Hangyoa ang pipila ka mga estudyante sa pagpakigbahin sa unsay ilang makit-an. Mahimo usab nimong hisgotan ang mosunod nga mga pangutana:

• Unsay ang pipila ka ehemplo sa mga panahon dihang wala ninyo nakita dayon ang mga panalangin , bisag gibati ninyo nga nagmatinumanon kamo sa Ginoo?

• Sa inyong hunahuna, ngano kahang tugotan man sa Ginoo nga makasinati kitag mga pagsulay o kapakyasan samtang nagsunod kita Kaniya?

Dapita ang mga estudyante nga basahon ang Exodo 6:1–8 ug 7:1–6, nga pangitaon kon unsay tubag sa Ginoo sa mga pagsulay ni Moises ug sa mga anak sa Israel. Hangyoa sila nga ilista ang dili moubos sa tulo ka kamatuoran nga gitudlo kanila niini nga mga bersikulo bahin sa Ginoo. Ipasabot nga aduna silay kahigayonan nga ipakigbahin ang ilang gisulat human sa ilang pagtuon.

Ipakita ang mosunod nga mga pangutana, ug dapita ang mga estudyante nga hisgotan kini uban sa usa ka kapares o sa gamayng grupo:

• Unsay inyong nakat-onan mahitungod sa Ginoo gikan niini nga mga bersikulo?

• Sa unsang paagi ang paghinumdom niining mga butanga bahin sa Ginoo makatabang ninyo dihang makasinati kamo og mga kalisdanan sa pagsunod Kaniya?

Pagkahuman sa panaghisgot sa mga estudyante, ikonsiderar ang pagdapit og pipila aron ipakigbahin ang ilang mga panglantaw ngadto sa klase. Mailhan tingali nila ang mga kamatuoran nga parehas ani: Labing gamhanan ang Ginoo sa tanan. Hinumdoman ug tumanon sa Ginoo ang Iyang mga saad. Dihang motuo kita sa Ginoo ug sa Iyang mga saad, makasalig ug mosunod kita Niya bisan pag dili dayon nato makita ang mga resulta.

Pwede nimong ipakigbahin kini nga pahayag ni Elder Jörg Klebingat ug hisgotan ang nagsunod nga mga pangutana:

Dawata ang mga pagsulay, kapakyasan, ug “mga surprisa” isip kabahin sa inyong mortal nga kasinatian. … Kon kining mga pagsulay moabut, ang mga sumusunod sa kaaway magsugod sa pagsibya nga duna kamoy nabuhat nga sayop, nga kini usa ka silot, timailhan nga ang Langitnong Amahan wala mahigugma kaninyo. Ibaliwala kana! Hinoon, paningkamot sa pagpahiyom, hangad ngadto sa langit, ug moingon, “Nakasabut ako, Ginoo. Nasayod ako kon unsa kini. Usa ka panahon sa pagprubar sa akong kaugalingon, dili ba?” Dayon pakigtambayayong Kaniya sa paglahutay hangtud sa katapusan. Ang espirituhanong pagsalig molambo kon inyong dawaton nga “kasagaran ang mga pagsulay ug kalisdanan tugutan sa pagsulod sa [inyong kinabuhi] tungod sa unsay [inyong] gihimo nga matarung” (Glenn L. Pace, “Crying with the Saints” [debosyonal sa Brigham Young University, Dis. 13, 1987], 2; speeches.byu.edu). (“Masaligon nga Moduol sa Trono sa Dios,” Liahona, Nob. 2014, 36–37)

• Kanus-a kamo nakasinatig mga kapakyasan samtang naningkamot kamo sa pagsunod sa Dios?

• Unsay inyong nahibalon bahin ni Jesukristo nga motabang ninyo sa pagsalig Niya bisag nakasinati kag mga hagit?

Dapita ang mga estudyante sa pagpamalandong sa ilang nakat-onan o gibati gikan sa Espiritu Santo nga makatabang nila diha sa ilang kinabuhi. Awhaga sila nga irekord ang ilang mga hunahuna ug espirituwal nga mga impresyon.

Balik ngadto sa “Mga Opsiyon nga Kalihokan sa Pagkat-on.”