Deuteronomio 6–8; 15; 18; 29–30; 34

Pwede nimong ipakigbahin ang mosunod nga senaryo ngadto sa imong mga estudyante ug dapiton sila nga ikonsiderar kon ingon ani usab ang ilang hunahuna:

Usa ka hapon sa Dominggo, mitambong si Isla og miting sa sakramento. Samtang naminaw siya sa mga pag-ampo sa sakramento, mipatigbabaw kaniya ang hugpong nga “kanunay mahinumdom Kaniya.” Siya naghunahuna kon nakasabot ba gayod siya kon unsay ipasabot sa paghinumdom kanunay kang Jesukristo ug kon unsaon kini niya paghimo bisan pa sa ka-busy sa iyang kinabuhi.

Pwede nimong dapiton ang mga estudyante nga hunahunaon kon unsa ka maayo ang ilang pagtuman sa sugo nga hinumdoman kanunay si Jesukristo. Awhaga sila nga isulat kon unsay nadasig sila nga himoon aron hinumdoman Siya kanunay samtang magtuon sa Deuteronomio 6–8.

Pwede nimong pahinumdoman ang mga estudyante nga human sa 40 ka tuig nga paglatagaw sa kamingawan, ang mga anak ni Israel hapit nang mosulod sa gisaad nga yuta. Ang basahon sa Deuteronomio naglangkob sa kataposang tambag ni Moises sa iyang katawhan. Kadaghanan sa iyang tambag nakatutok sa importanteng mga hitabo gikan sa kamingawan nga gusto niyang mahinumdoman sa iyang katawhan.

Aron tabangan ang mga estudyante sa pagtuon sa tambag ni Moises, paresparesa ang klase o bahina kini sa gagmayng grupo. Ipakita ang mosunod nga mga tudling sa kasulatan ug mga instruksiyon, ug hatagig igong panahon ang mga estudyante nga magtuon ug adunay diskusyon:

• Deuteronomio 6:3–13, 20–25

• Deuteronomio 8:1–18

1. Tun-i ang bisan hain sa Deuteronomio 6:3–13, 20–25 o Deuteronomio 8:1–18 sa indibidwal nga paagi.

2. Pangitaa kon unsay gitambag ni Moises nga hinumdoman sa katawhan. Ikonsiderar ang pagmarka sa imong mga nakaplagan.

3. Ipakigbahin ang tambag nga imong nakaplagan. Ipasabot kon nganong mibati ka sa kaimportante niini nga tambag sa mga anak sa Israel niadtong panahona.

Human maghisgot ang mga estudyante, dapita silang ipakigbahin ang pipila sa ilang mga panabot diha sa klase. Pwede usab nimong ipangutana:

• Unsay inyong nakaplagan sa mga pagtulun-an ni Moises nga makatabang nato karon? (Ipakigbahin tingali sa mga estudyante ang lainlaing mga kamatuoran, lakip sa: Gihangyo kita sa Ginoo nga hinumdoman Siya ug ang Iyang impluwensiya sa atong mga kinabuhi.)

Aron tabangan ang mga estudyante nga mas masabtan kon sa unsang paagi makabenepisyo kita sa paghinumdom sa Ginoo, ikonsiderar ang pagpakigbahin sa mosunod nga pamahayag ni Elder Dale G. Renlund:

Ang atong Langitnong Amahan gusto nga kita mahinumdom sa pagkamayo Niya ug sa Iyang Hinigugmang Anak, dili alang sa Ilang kaugalingon nga katagbawan apan sa impluwensiya niana nga paghinumdom diri kanato. Pinaagi sa pagkonsiderar sa Ilang pagkamabination, molapad ang atong panglantaw ug panabot. Pinaagi sa pagpamalandong sa Ilang kamanggiluy-on, mas mapaubsanon na kita, mainampoon, ug makanunayon. (“Hunahunaa ang Pagkamaayo ug Pagkahalangdon sa Dios,” Liahona, Mayo 2020, 41)

Ikonsiderar ang paghisgot sa pipila o sa tanan sa mosunod nga mga pangutana:

• Unsay makapugong sa mga tawo sa paghinumdom sa Ginoo karon?

• Unsa ang pihong mga butang ang makatabang nato sa paghinumdom sa Ginoo ug sa Iyang impluwensiya sa atong kinabuhi? (Ikonsiderar ang paglista sa tubag sa mga estudyante diha sa pisara. Ingon nga bahin sa panaghisgot, pwede usab ninyong tan-awon ang mga bidyo nga “O Remember, Remember” [1:28] o “Mga Espirituhanong Panumduman nga Angay Hinumduman” [1:19].)

  

  1:28
  

  1:19

Pwede nimong dapiton ang mga estudyante sa paggahin og panahon nga hinumdoman ang kaayo sa Langitnong Amahan ug ni Jesukristo. Pwede silang mogahin og panahon sa pagrekord sa ilang mga tubag sa usa o duha sa mosunod nga mga pangutana:

• Unsay mosulod sa inyong hunahuna dihang mahunahunaan kamo sa pagkamaayo sa Langitnong Amahan ug ni Jesukristo sa inyong kinabuhi o sa kinabuhi sa uban?

• Unsang mga panalangin ang inyong nasinati samtang naningkamot kamo sa paghinumdom sa impluwensiya sa Langitnong Amahan ug ni Jesukristo sa inyong kinabuhi?

Dapita ang mga estudyante sa paghunahuna og usa ka paagi nga nadasig sila nga mas hinumdoman ang Ginoo diha sa ilang kinabuhi, ug dasiga sila sa pagrekord sa ilang mga hunahuna. Pwede usab silang maghimog pahinumdom para sa ilang kaugalingon nga pwedeng ibutang sa usa ka dapit nga kanunay nilang makita.

Balik ngadto sa “Mga Opsiyon sa Kalihokan sa Pagkat-on.”

Dapita ang mga estudyante sa paghunahuna og usa ka tawo nga ilang gimahal. Pwede silang magpakitag hulagway sa maong tawo ngadto sa klase o sa kapares. Awhaga sila sa paghunahuna kon sa unsang paagi milambo o nausab ang ilang relasyon sa maong tawo paglabay sa panahon. Pwede nga ipakigbahin sa mga estudyante kon nganong mahal nila ang maong tawo o kon unsay ilang gihimo aron mas modako ang ilang pagmahal kaniya.

Ipasabot nga sama nga mogahin kitag panahon ug maningkaamot sa pagpalig-on sa atong relasyon sa atong mga minahal, importante usab nga atong tutokan ang pagpalig-on sa atong relasyon ug gugma alang sa Dios. Awhaga ang mga estudyante nga tinguhaon ang paggiya sa Espiritu Santo samtang sila magtuon karon aron matabangan sila sa pag-ila kon unsaon nila pagpalig-on ang ilang gugma sa Dios.

Pahinumdomi ang mga estudyante nga anaa sa basahon sa Deuteronomio ang kataposang tambag ni Moises sa mga Israelihanon sa wala pa mangulo si Josue aron dad-on sila sa gisaad nga yuta. Dapita ang mga estudyante sa pagbasa sa Deuteronomio 6:1–6 ug 30:15–20, nga pangitaon ang pipila sa tambag ni Moises sa katawhan. Ikonsiderar ang pagsukna sa mga pangutana nga sama sa mosunod aron tabangan sila sa pagpakigbahin sa ilang nakat-onan:

• Unsay mipatigbabaw kaninyo diha sa tambag ni Moises?

• Unsaon ninyo pag-summarize kini nga tambag ingon nga pamahayag sa kamatuoran? (Ilhon tingali sa mga estudyante ang kamatuoran nga sama sa mosunod: Gimandoan kita sa Ginoo nga higugmaon Siya sa tibuok natong kasingkasing, kalag, ug kusog.)

Hisgoti nga panahon sa Iyang mortal nga pagpangalagad, si Jesukristo mitudlo nga ang paghigugma sa Dios mao ang “labing dako ug labing importanteng sugo” (Mateo 22:38). Pwede nimong isugyot nga i-link o i-cross reference sa mga estudyante ang Deuteronomio 6:5 ngadto sa Mateo 22:35–40.

Aron tabangan ang mga estudyante nga mas masabtan kini nga sugo, ikonsiderar ang pagpakita sa mosunod nga mga pangutana ug dapita sila sa pagpili og usa o sobra pa aron ilang tutokan. (Pwede usab nimong ipaila ang “Pagsukna og mga Pangutana nga Nagdapit og Makugihon nga Pagkat-on” diha sa Mga Kahanas sa Pagtuon sa Kasulatan ug pahimoa ang mga estudyante og kaugalingon nilang mga pangutana.) Hatagig panahon ang mga estudyante sa pagpangitag mga kasulatan, mga mensahe gikan sa mga lider sa Simbahan, o uban pang kapanguhaan diha sa Librarya sa Ebanghelyo aron mangitag mga panabot nga may kalabotan niining mga pangutanaha.

• Unsay ipasabot sa paghigugma sa Dios sa tibuok nakong kasingkasing, kalag, ug kusog?

• Panahon sa Iyang mortal nga pagpangalagad, giunsa pagpakita ni Jesukristo nga Iyang gihigugma ang Langitnong Amahan?

• Unsang kalahian ang mahitabo sa akong kinabuhi sa paghigugma sa Dios sa tibuok nakong kasingkasing, kalag, ug kusog?

• Unsay makapugong nako sa paghigugma sa Dios sa tibuok nakong kasingkasing, kalag, ug kusog?

• Unsay makatabang aron mas modako ang akong gugma alang sa Dios?

Kon kinahanglan og tabang ang mga estudyante sa pagpangitag mga kapanguhaan, pwede nimong isugyot ang mosunod: Giya ngadto sa mga Kasulatan, “Gugma,” Librarya sa Ebanghelyo; D. Todd Christofferson, “Unahon ang Unang Sugo” (digital lamang nga artikulo), Liahona, Peb. 2023, (Librarya sa Ebanghelyo); “Higugmaa ang Dios, higugmaa ang inyong silingan,” diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022), 10–12.

Kon mahuman na ang mga estudyante, dapita sila nga ipakigbahin ang ilang mga panabot ngadto sa gagmayng mga grupo. Ikonsiderar ang pagdapit sa pipila ka andam nga estudyante nga ipakigbahin ang pipila sa ilang mga panabot ngadto sa klase. Pwede pod ninyong hisgotan ang pipila ka pangutana sama sa mosunod:

• Unsay nakatabang ninyo sa pagpalawom sa inyong gugma sa Dios?

• Unsang kausaban sa imong kinabuhi ang resulta sa imong gugma sa Dios?

Balik ngadto sa “Mga Opsiyon sa Kalihokan sa Pagkat-on.”

Isulat ang mga pulong nga kabos ug nanginahanglan diha sa pisara. Hangyoa ang mga estudyante sa pagpakigbahin og mga butang nga gikinahanglan tingali sa usa ka tawo—sa pisikal, emosyonal, o espirituwal man. Pwedeng ilista nimo o sa usa ka sakop sa klase ang ilang mga tubag diha sa pisara. Samtang magtuon ang mga estudyante sa Deuteronomio 15, awhaga sila nga bantayan kon sa unsang paagi ang Ginoo motudlo nato sa pag-atiman sa mga nanginahanglan.

Ipasabot nga gisugo sa Dios ang mga anak ni Israel nga tumanon ang tuig sa Igpapahulay kada pito ka tuig. Ingon nga bahin sa ilang pagtuman sa tuig sa Igpapahulay, ilang pasayloon ang mga utang, buhian ang mga tawo sa pagkaulipon, ug tangtangon ang mga palas-anon sa uban. (Para sa dugang impormasyon, tan-awa ang “Deuteronomio 15:1–18. Unsa ang tuig sa pagbuhi?” diha sa Mga Tabang sa Kasulatan: Daang Tugon.)

Dapita ang mga estudyante nga basahon ang Deuteronomio 15:1–11, nga pangitaon ang mga instruksiyon sa Ginoo para sa tuig sa Igpapahulay. Dapita ang klase sa pagtubag sa mosunod:

• Unsay inyong nakat-onan bahin sa kinaiya ug mga hiyas sa Dios gikan niini nga mga bersikulo?

• Sa inyong hunahuna, unsay ipasabot sa “pahulama siyag igo sa iyang gikinahanglan” dihang mohatag ta sa uban? Kanus-a gipakita sa Ginoo ang iyang pag-atiman nimo nga “igo sa [imong] panginahanglan”?

• Unsa nga mga saad ang imong nakaplagan niini nga mga bersikulo nga magamit sa atong mga paningkamot aron sa pagserbisyo sa mga nanginahanglan? (Ilhon tingali sa mga estudyante ang kamatuoran nga sama niini: Samtang andam kitang motabang sa mga nanginahanglan, panalanginan kita sa Ginoo sa tanan natong himoon.)

Ikonsiderar ang paggamit sa usa o kapin pa sa mosunod nga mga kalihokan aron tabangan ang mga estudyante nga mas mailhan ang mga paagi nga ilang matuman ang sugo sa Ginoo nga atimanon ang mga kabos ug nanginahanglan:

1. Praktisa ang “Pagsiksik diha sa mga Kasulatan ug sa Librarya sa Ebanghelyo” diha sa Mga Kahanas sa Pagtuon sa Kasulatan. Pwedeng ilhon sa mga estudyante ang pipila ka mahinungdanong mga pulong gikan sa panaghisgot, sama sa “kabos,” “nanginahanglan,” “pagserbisyo,” “pag-atiman sa uban,” ug uban pa. Hatagig panahon ang mga estudyante sa pagpraktis sa pagpangita niini nga mga pulong o hugpong sa mga pulong diha sa Librarya sa Ebanghelyo. Pwede nilang ilhon ang mga kasulatan, mga pamahayag gikan sa mga lider sa Simbahan, o uban pang kapanguhaan nga nagtudlo nila bahin sa kon sa unsang paagi giatiman sa Ginoo ug sa Iyang Simbahan ang Iyang katawhan karon.

2. Pangitag mga ehemplo gikan sa kinabuhi ni Jesukristo diin gipanalanginan Niya ang mga nanginahanglan. Pwede nimong dapiton ang mga estudyante nga ipakigbahin sa klase sa ilang nadiskobrehan.

3. Ilista ang mosunod nga mga kategoriya diha sa pisara: pinansyal, pisikal, espirituwal, sosyal, emosyonal. Dapita ang mga estudyante sa paghisgot og mga paagi nga ilang masunod ang sugo sa Ginoo nga atimanon ang mga tawo nga aduna niini nga mga matang sa mga panginahanglan.

Pwede usab nimong hisgotan ang pipila ka pangutana nga sama ani:

• Sa unsang paagi kamo gipanalanginan sa Langitnong Amahan sa kaandam ninyo sa pagserbisyo sa Iyang mga anak?

• Kanus-a nga adunay miatiman ninyo sama sa pag-atiman ni Kristo?

Ikonsiderar ang pagdapit sa mga estudyante sa pag-ampo sa Langitnong Amahan aron masayod sila kon unsaon nila pag-atiman ang nanginahanglan nga anaa sa ilang palibot. Dasiga sila sa pagrekord ug paglihok uyon sa impresyon nga ilang nadawat.

Balik ngadto sa “Mga Opsiyon sa Kalihokan sa Pagkat-on.”