2 Samuel 11–12; 1 Mga Hari 3; 6–9; 11

Ikonsiderar ang pagsugod pinaagi sa paghisgot sa mosunod nga pamahayag ni Presidente Dieter F. Uchtdorf, kanhi sa Unang Kapangulohan:

Pananglitan kamo mosakay og eroplano gikan sa usa ka airport diha sa ekwador, ang tuyo aron sa pagliyok sa kalibotan, apan ang inyong tumong naligas lamang og usa ka gutling. Sa higayon nga kamo mobalik sa sama nga gilay-on, unsa kaha kini kalayo gikan sa inyong tumong? May pipila ka milya? Usa ka gatos ka milya? Ang tubag makapahingangha kaninyo. Ang sayop nga usa lamang ka gutling modala kaninyo hapit 500 ka mga milya (800 km) palayo sa tumong, o usa ka oras nga biyahe sa usa ka jet. (“Ang Kalainan sa Gamay nga mga Sayop,” Liahona, Mayo 2008, 59)

• Unsa ang morag gagmayng mga desisyon nga himoon tingali nato sa atong kinabuhi nga sa kadugayan makapatipas nato sa hustong dalan pag-abot sa panahon?

Dapita ang mga estudyante sa paghunahuna og mga tentasyon nga mahimo nilang atubangon nga makapatipas, bisan gamay, sa mga sugo sa Dios. Samtang magtuon karon, awhaga sila nga pangitaon ang mga kamatuoran nga makatabang nila dihang mag-atubang og tentasyon.

Pahinumdomi ang mga estudyante nga tungod sa tabang sa Ginoo, napildi ni David si Goliat, gitabangan ang mga Israelihanon nga pildihon ang ilang mga kaaway sa gubat, ug gihiusa ang mga tribo sa Israel isip ilang hari. Pero, sa kadugayan mihimo og sunod-sunod nga mga pagpili si David nga nakapatipas niya sa espirituhanong paagi. Dapita ang mga estudyante sa pagbasa sa 2 Samuel 11:1–17, 26–27, nga pangitaon ang piho nga mga pagpili nga gihimo ni David.

Pwede kang mangutana sama sa mosunod aron tabangan ang mga estudyante nga ipakigbahin ang ilang mga panabot:

• Unsa ang pipila sa mga desisyon nga gihimo ni David nga miresulta sa mas dagkong sala?

• Unsa ang matarong nga mga pagpili nga pwede untang himoon ni David aron malikay sa direksiyon nga iyang gipadulngan?

• Unsang mga kamatuoran ang atong makat-onan gikan sa pagpili ni David nga magpadala sa iyang seksuwal nga mga tinguha? (Usa ka kamatuoran nga mailhan tingali sa mga estudyante mao kini: Ang pagpadala sa seksuwal ug dili maayo nga mga hunahuna moresulta sa seryosong sala.)

Ikonsiderar ang mga panginahanglan sa imong mga estudyante samtang imong hunahunaon kon unsaon sa pagpadayon niini nga kalihokan sa pagkat-on. Pwede nimong gamiton ang usa o kapin pa sa mosunod nga mga ideya:

1. Hatagi og panahon ang mga estudyante sa pagpangita og mga kapanguhaan nga makatabang nila sa paglikay sa seksuwal nga sala. Ang mga pananglitan sa mga kapanguhaan nga mahimo nilang tun-an naglakip sa “Ang Pagpaningkamot nga Mahimong Putli Magdala og Talagsaong mga Panalangin” diha sa Mga Hilisgotan ug mga Pangutana, “Kaputli” (Giya sa Pagtuon sa Ebanghelyo); o sa mga seksiyon nga nag-ulohan og “Unsay buhaton diha sa higayon” ug “Ang inyong lawas sagrado” diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022). Dapita sila nga ipakigbahin ang ilang mga panabot ngadto sa usa ka pares, gamayng grupo, o sa tibuok klase.

2. Tan-awa ang usa sa mosunod nga mga bidyo: “Watch Your Step” (2:35); “Why Do I Feel So Bad About Myself?” (3:45); o “Can I Do This On My Own?” (3:19). Dapita ang mga estudyante nga hisgotan ang ilang mga panabot.

   

   2:36
   

   3:45
   

   3:19

3. Tun-i ang mensahe ni Natan ngadto ni David diha sa 2 Samuel 12:1–10, ug ipapakigbahin sa mga estudyante ang mga kamatuoran nga ilang nakat-onan gikan niini. Pwede usab hisgotan sa mga estudyante kon sa unsang paagi kini usa ka panalangin nga dili nato matago sa Dios ang atong mga sala.

4. Hangyoa ang mga estudyante nga hunahunaon ang usa ka tawo nga nakahimog seksuwal nga mga sala ug mibati nga dili na takos sa gugma ug pagpasaylo sa Dios. Dapita sila nga mangita ug ipakigbahin ang mga kasulatan o mga pamahayag gikan sa mga lider sa Simbahan nga mahimong makatabang niini nga sitwasyon. Ang mga pananglitan sa makatabang nga mga kapanguhaan maglakip sa Isaias 1:18; Doktrina ug mga Pakigsaad 58:42–43; o ang mosunod nga pamahayag ni Elder Dale G. Renlund:

Kon kita sinsero nga maghinulsol, walay espirituwal nga ulat ang magpabilin, bisan unsa pa ang atong nabuhat, kon unsa ka bug-at kadto, o kapila ka higayon nga ato kining nabuhat. Kon kanunay kitang maghinulsol ug mangayo og kapasayloan uban sa tinuod nga katuyoan, kita mapasaylo. Pagkadalaygon nga gasa gikan sa atong Manluluwas, si Jesukristo! Ang Espiritu Santo makasiguro kanato nga kita napasaylo. Samtang kita mobati sa kalipay ug kalinaw, ang kasaypanan nakuha sa hingpit, ug kita dili na hasolon sa atong mga sala. (“Ang Inyong Diosnong Kinaiya ug Mahangtorong Padulngan,” Liahona, Mayo 2022, 76)

Sa pagtapos, dapita ang mga estudynate nga ikonsiderar kon unsay ilang nakat-onan ug gibati nga gusto nilang hinumdoman. Pwede nimo silang hangyoon nga magsulat og piho ug sayon monitoron nga plano sa pagbuhat sa unsay ilang nakat-onan.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagdapit sa mga estudyante sa pagpakigbahin og hulagway sa templo nga ilang ganahan ug ipasabot kon nganong makahuloganon kaayo kini ngadto nila. O pwede nilang hisgotan ang usa ka templo nga gianunsyo na nga sila mahinamon ug ipasabot kon ngano. Dayon ikonsiderar ang pagpakigbahin sa mosunod nga pamahayag ni Presidente Russell M. Nelson:

Si Jesukristo mao ang rason nga kita nagtukod og mga templo. Ang matag usa Iyang balaan nga balay. Ang paghimo og mga pakigsaad ug pagdawat sa gikinahanglan nga mga ordinansa diha sa templo, ingon man ang pagtinguha sa pagpaduol ngadto Kaniya didto, makapanalangin sa inyong kinabuhi sa mga paagi nga walay bisan unsa nga matang sa pagsimba ang makahimo. Tungod niini nga rason, among gibuhat ang tanan namong mahimo aron sa paghimo sa mga panalangin sa templo nga mas sayon ngadto sa atong mga miyembro sa tibuok kalibotan. (“Ang Tubag sa Kanunay Mao si Jesukristo,” Liahona, Mayo 2023, 127–28)

• Sa imong hunahuna, sa unsang paagi ang pagsimba diha sa templo makapanalangin sa inyong kinabuhi sa mga paagi sa dili mahimo sa ubang klase sa pagsimba?

Ipasabot nga human mahimong hari sa Israel si Solomon, gitinguha niya nga tumanon ang tinguha sa iyang amahan nga si David nga magtukod og permanenteng balay para sa Ginoo (tan-awa sa 2 Samuel 7:12–13). Kini nga kalihokan sa pagkat-on magtutok sa mga paningkamot ni Solomon sa pagtukod ug sa pagpahinungod sa templo sa Jerusalem. Samtang magtuon karon, awhaga ang mga estudyante nga pangitaon ang mga kamatuoran nga makatabang aron madugangan ang ilang pagpamatuod sa kaimportante sa pagsimba diha sa balay sa Ginoo.

Dapita ang mga estudyante sa pagtuon sa 1 Mga Hari 5:2–5 ug 6:11–14, nga pangitaon ang mga kamatuoran nga gitudlo niining mga bersikulo bahin sa templo. Hangyoa ang mga estudyante sa pagpakigbahin sa unsay ilang nakaplagan. Ang mga pananglitan sa mga kamatuoran nga pwede nilang mailhan maglakip niini: Ang templo mao ang balay sa Ginoo ug Kon molakaw ta sa mga dalan sa Ginoo, tumanon Niya ang Iyang mga saad ug mopuyo uban nato diha sa Iyang templo.

• Sa imong hunahuna, sa unsang paagi ang paghinumdom niini nga mga kamatuoran makaapektar sa imong pagsimba diha sa templo?

Ikonsiderar ang pagpakita sa mosunod nga mga hulagway:

Ipasabot nga human matapos ang pagtukod sa templo, gipundok ni Solomon ang daghang Israelihanon aron moapil sa pagpahinungod niini. Dihang gibutang nila ang arka sa pakigsaad diha sa Labing Balaan nga mga Dapit, ang himaya sa Ginoo nagpakita isip sa usa ka panganod nga mipuno sa templo. Dayon mitanyag og pag-ampo si Solomon aron ipahinungod ang templo ngadto sa Ginoo (tan-awa sa 1 Mga Hari 8:12–53).

Dapita ang mga estudyante nga tun-an ang 1 Mga Hari 8:29–40, diin naglangkob og usa ka bahin sa pagpahinungod nga pag-ampo ni Solomon. Hangyoa sila nga pangitaon ang mga panalangin nga gipangayo ni Solomon sa Ginoo nga ihatag ngadto sa katawhan samtang magsimba sila diha sa templo. Aron tabangan ang mga estudyante nga ipakigbahin ang ilang nakat-onan, konsideraha ang pagpangutana:

• Para nimo, unsa ang labing mahinungdanon gikan niini nga pag-ampo?

Ipasabot nga parehas sa karaang panahon, gisaaran kita sa Ginoo og dagkong mga panalangin tungod sa pagsimba diha sa templo. Aron tabangan ang mga estudyante nga makakat-on og dugang bahin niini nga mga panalangin, ikonsiderar ang pagdapit nila sa pagpili og usa sa mosunod nga mga opsiyon, og hatagi sila og pipila ka minuto aron:

1. Tun-an ang mga bahin sa “The Holy Temple—the House of the Lord” diha sa Teachings of Presidents of the Church: Russell M. Nelson. Pangitaa ang mga gisaad nga mga panalangin tungod sa pagsimba diha sa templo nga makahuloganon kaayo para nimo.

2. Tun-i ang pag-ampo sa pagpahinungod para sa usa ka templo diha sa inyong dapit. Makapangita ka og pag-ampo sa pagpahinungod pinaagi sa pagpili og usa ka templo gikan sa “Lista sa Templo” diha sa ChurchofJesusChrist.org/temples.

3. Tun-i ang mga bahin sa pag-ampo sa pagpahinungod sa unang templo sa atong dispensasyon—ang Templo sa Kirtland—pinaagi sa pagbasa sa pipila sa mosunod nga mga bersikulo: Doktrina ug mga Pakigsaad 109:10–19, 22–26, 54–59, 72–80. Pangitaa ang mga panalangin nga giampo ni Propeta Joseph Smith nga gitinguha nimo sa imong kinabuhi.

Human ang mga estudyante adunay igong panahon sa pagtuon, dapita sila sa pagpakigbahin sa ilang mga panabot ngadto sa kapares o sa gagmayng grupo. Dayon dapita ang pipila ka estudyante sa pagpakigbahin sa unsay ilang nakat-onan ngadto sa klase. Pwede usab nimong hisgotan ang mga pangutana sama sa mosunod:

• Unsay matudlo sa pagbaton og mga templo sa yuta bahin sa gugma ug kaluoy sa Dios?

• Unsay kalainan nga mahimo sa pagsimba diha sa templo sa imong relasyon sa Langitnong Amahan ug kang Jesukristo?

Pagpamatuod sa mga kamatuoran nga inyong nahisgotan karon. Awhaga ang mga estudyante nga ikonsiderar kon unsay ilang mahimo aron mapauswag ang ilang pagsimba diha sa templo. Dapita sila nga irekord ang ilang mga plano o ang mga pag-aghat nga ilang nadawat gikan sa Espiritu Santo.

Balik ngadto sa “Mga Opsiyon sa Kalihokan sa Pagkat-on.”

Pwede nimong ipakita ang mosunod nga mga pangutana ug dapita ang mga estudyante nga pamalandongon ug isulat ang ilang mga hunahuna.

• Unsa ang pipila ka kalihokan nga nakahurot sa imong panahon ug kusog sa karon?

• Giunsa nimo pagpili kon unsay hatagan og labing pagtagad sa imong kinabuhi?

Pahinumdomi ang mga estudyante nga human sa pagkamatay ni David, ang iyang anak nga si Solomon ang nahimong hari sa Israel. Sa sinugdanan sa pagmando ni Solomon, mapaubsanon niyang gitinguha ang tabang sa Ginoo ug gipanalanginan siya pag-ayo tungod niini (tan-awa sa 1 Mga Hari 3:5–14, 28). Gibisita pa gani siya og kaduha sa Ginoo panahon sa iyang pagmando (tan-awa sa 1 Mga Hari 9:1–3). Pero, paglabay sa panahon, nausab ang mga prayoridad ni Solomon, ug mibiya sa Ginoo ang iyang kasingkasing. Samtang tun-an sa mga estudyante ang asoy ni Solomon, awhaga sila nga hunahunaon kon unsay ipahimo sa Ginoo kanila aron maprotektahan ang ilang mga kaugalingon gikan sa susama nga kapalaran.

Dapita ang mga estudyante nga basahon ang 1 Mga Hari 11:1–13, nga pangitaon ang mga detalye bahin sa ulahing bahin sa kinabuhi ni Solomon. (Ipasabot nga ang “mga babayeng langyaw” diha sa 1 Mga Hari 11:1 nagtumong sa mga babaye nga dili bahin sa balay ni Israel.) Awhaga ang mga estudyante nga markahan ang mga pulong o hugpong sa mga pulong nga nakadani nila. (Kini mahimong usa ka dapit sa pagpraktis sa kahanas nga “Pagpangita alang sa Hinungdan ug Epekto nga mga Relasyon diha sa mga Kasulatan” diha sa Mga Kahanas sa Pagtuon sa Kasulatan.)

Ikonsiderar ang pagpangutana sama sa mosunod aron tabangan ang mga estudyante nga ipakigbahin ang ilang nakat-onan:

• Unsay nakatampo sa pagkausab sa kasingkasing ni Solomon?

• Unsang mga kamatuoran ang inyong nakat-onan gikan sa espirituwal nga pagkapukan ni Solomon? (Mailhan tingali sa mga estudyante ang kamatuoran nga sama sa mosunod: Kon ipahilayo nato ang atong kasingkasing gikan sa Dios ug dili tumanon ang Iyang mga sugo, mawala nato ang Iyang gisaad nga mga panalangin.)

• Unsay makatabang nato aron mailhan kon ang atong kaugalingong kasingkasing nag-anam nag palayo sa Dios?

Ikonsiderar ang paghangyo sa klase nga ilista diha sa pisara ang mga impluwensiya o mga kahimtang nga mahimong mopahilayo sa kasingkasing sa usa ka young adult gikan sa Dios.

Dapita ang mga estudyante nga makigtinabangay uban sa kapares o gamayng grupo sa paghimo ug pagsulat og usa ka senaryo base sa aytem nga naa sa lista. Pwedeng ipasa sa mga estudyante ang ilang senaryo ngadto sa laing grupo o tipigan ang ilang gihimo ug dayon hisgotan ang mosunod nga mga pangutana:

• Sa unsang paagi ang mga desisyon sa tawo diha sa senaryo nakaapektar sa iyang abilidad sa pagdawat sa mga panalangin sa Ginoo diha sa iyang kinabuhi?

• Unsay imong ikatambag, o unsang mga kasulatan ang imong ipakigbahin, aron tabangan ang tawo diha sa senaryo?

Pwede nimong dapiton ang pipila ka estudyante nga ipakigbahin ang ilang senaryo ngadto sa klase, apil ang pipila sa ilang mga panabot gikan sa ilang panaghisgot.

Dapita ang mga estudyante sa pagpamalandong kon sa unsang paagi ang mga kamatuoran nga ilang gitun-an magamit sa ilang sa personal nga kahimtang. Pwede ninyong dungan nga kantahon ang himno nga “Dugang Kabalaan Hatagi Ako” (Mga Himbo, 77) aron tabangan silang pamalandongon ang ilang espirituwal nga mga prayoridad karon.

Pwede sab nimong ipakigbahin ang mosunod nga pamahayag ni Elder David A. Bednar:

Ang matag usa kanato kinahanglang motimbang-timbang sa atong temporal ug espirituhanon nga mga prayoridad sa sinsero ug mainampoon nga paagi aron sa pagtino sa mga butang sa atong mga kinabuhi nga mahimong mobabag sa buhong nga mga panalangin nga andam nga itugyan kanato sa Langitnong Amahan ug sa Manluluwas. Ang Espiritu Santo seguradong motabang kanato nga makakita sa atong mga kaugalingon kon kinsa gayod kita. (“Isul-ob ang Imong Kusog, O Zion,” Liahona, Nob. 2022, 94)

Dapita ang mga estudyante nga irekord ang bisan unsang kausaban nga gibati nilang kinahanglan nilang himoon sa ilang kinabuhi aron mas makatutok sa ilang kasingkasing ngadto sa Langitnong Amahan ug kang Jesukristo.

Balik ngadto sa “Mga Opsiyon sa Kalihokan sa Pagkat-on.”