Genesis 12–17; Abraham 1–2

Ikonsiderar ang pagpakigbahin sa mosunod nga pamahayag ni Elder Dieter F. Uchtdorf:

Si Jesus mitudlo, “Pangita, ug kamo makakaplag” [Mateo 7:7].

Nagtuo ako nga dili lamang espirituhanong saad kini nga pulong, usa kini ka pulong sa kamatuoran. …

Talagsa ra natong makit-an ang butang nga wala nato pangitaa. (“Mas Labaw nga Kalipay,” Liahona, Mayo 2024, 68)

• Sa unsang paagi ang atong pagpangita modeterminar sa dagan sa atong kinabuhi? (Ikonsiderar ang paghangyo sa mga estudyante sa pagpakigbahin sa pipila ka ehemplo nga gihulagway niini.)

Ipasabot nga ang mga kasulatan naglangkob sa daghang pagtulun-an mahitungod kon unsa ang gusto sa Ginoo nga atong tinguhaon ug unsa ang Iyang gusto nga atong likayan. Ikonsiderar ang pagpakita sa mosunod nga mga instruksiyon ug mga tudling sa kasulatan.

Gamit ang sukod nga gikan sa 1 (dili gayod) hangtod 5 (labihan kaayo), timbang-timbanga kon unsa kaduol ang inyong pagbati sa matag usa sa mosunod nga mga tudling sa kasulatan nga nagpakita sa inyong inadlaw nga mga pagpili:

• “Sa dili pa kamo mangita og mga katigayunan, pangitaa ninyo ang gingharian sa Dios” (Jacob 2:18).

• “Imong isalikway ang mga butang niini nga kalibotan, ug tinguhaa ang mga butang nga maayo” (Doktrina ug mga Pakigsaad 25:10).

• “Nagtinguha kamo … nianang dili ninyo maangkon; ug kamo nangita sa kalipay pinaagi sa pagbuhat og kadaotan” (Helaman 13:38).

• “Paduol kamo kanako, ug ako mopaduol kaninyo; pagkugi kamo sa pagpangita kanako ug kamo makakaplag kanako” (Doktrina ug mga Pakigsaad 88:63).

Ipasabot nga kita mahimong makakat-on og importanteng mga leksiyon mahitungod sa pagpangita sa Ginoo gikan sa asoy diha sa basahon ni Abraham. (Kon ang mga estudyante dili pamilyar sa basahon ni Abraham, ikonsiderar ang dungan nga pagbasa sa “Abraham 3. Unsa ang basahon ni Abraham?” sa Mga Tabang sa Kasulatan: Daang Tugon.)

Dapita ang mga estudyante sa pagtuon sa Abraham 1:1–7, nga mangita unsa ang gipangita ni Abraham ug sa mga babag nga iyang nasugatan. Aron matabangan ang mga estudyante sa pagpakigbahin kon unsa ang ilang nakat-onan, ikonsiderar ang pagpangutana og sama sa mosunod:

• Nganong gikinahanglan ni Abraham nga “[mo]kuha og lain nga dapit nga kapuy-an?”

• Unsa ang piho nga gipangita ni Abraham ug gitinguha nga maangkon sa iyang kinabuhi?

Dapita ang mga estudyante sa pagtuon bisan asa sa Abraham 1:15–20 o Abraham 2:8–13, nga mangita kon unsa ka bulahan si Abraham tungod sa pagpangita sa Ginoo ug sa Iyang mga panalangin. (Kini tingali makatabang sa pagpasabot nga ang Abraham 2:8–13 naghulagway sa kasinatian ni Abraham sa ulahing bahin sa iyang kinabuhi.)

Human ang mga estudyante matapos sa pagtuon, dapita sila nga maghisgot sa mosunod nga mga pangutana uban sa usa ka pares kinsa nagtuon sa laing hut-ong sa mga bersikulo:

• Sa unsang paagi ang Ginoo nagpanalangin ni Abraham sa mga bersikulo nga inyong natun-an? Unsa ang gipahayag niini nga mga panalangin mahitungod sa kinaiya sa Ginoo?

• Unsa ang inyong nakat-onan o nabati gikan niini nga asoy nga mahimong makatabang sa mga young adult karon?

Dapita ang pipila ka estudyante sa pagpakigbahin sa unsay ilang nakat-onan atol sa ilang panaghisgot uban sa ilang kapares. Mahimong ilhon sa mga estudyante ang usa ka kamatuoran nga sama sa mosunod: Kon kita kinasingkasing nga magtinguha sa Ginoo, kita makakita Kaniya. Ikonsiderar ang pagdapit sa mga estudyante sa pagmarka sa mga pulong ni Abraham sa Abraham 2:12 nga nagpakita niini nga kamatuoran.

• Unsa ang pipila ka ehemplo kon unsaon nga mahimong kinasingkasing ang atong pagpangita sa Ginoo? (Isip bahin niini nga panaghisgot, ikonsiderar ang pagpasalida sa bidyo nga “Nourish Your Own Faith” [2:08].)

  

  2:7

• Unsa nga tambag ang inyong mahatag sa usa ka tawo kinsa kasamtangang wala mobati og dakong tinguha sa pagpangita sa Ginoo?

Ikonsiderar ang pagdapit sa mga estudyante sa pagpakigbahin og usa ka kasinatian sa dihang kinasingkasing nilang gipangita ang Ginoo ug giunsa nila pagkaplag Kaniya.

Aron matabangan ang mga estudyante nga magamit kon unsa ang ilang nakat-onan, mahimo nimong ipakita ang mosunod nga mga pangutana ug hatagi ang mga estudaynte og panahon sa pagrekord sa ilang mga tubag.

• Unsa ang inyong nakat-onan o gibati karon mahitungod sa pagpangita sa Ginoo nga gusto ninyong mahinumdoman?

• Unsa ang usa ka tumong nga inyong matakda aron tabangan mo nga mas hingpit ang pagpangita sa Ginoo? Unsaon ninyo pagseguro nga kamo naglihok sa unsay inyong gibati nga giaghat nga buhaton?

Mahimo nimong dapiton ang pipila ka estudyante sa pagpakigbahin sa ilang mga tubag ngadto sa klase kon kini dili kaayo personal. Pagpamatuod sa mga kamatuoran nga inyong nahisgotan karon.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakita sa hulagway ni Abraham nga makita sa sinugdanan sa leksiyon. Dapita ang usa ka estudyante sa pagbasa sa mosunod nga pamahayag ni Presidente Russell M. Nelson:

Alang kanato ang pinasidunggang ngalan ni Abraham importante. Gihisgutan kini sa daghan pang mga bersikulo sa mga kasulatan kabahin sa Pagpahiuli kay sa tanang mga bersikulo diha sa Biblia. Si Abraham gilambigit sa tanang mga miyembro sa Ang Simbahan ni Jesukristo sa mga Santos sa Ulahing mga Adlaw. (“Ang Pagpundok sa Nagkatibulaag nga Israel,” Liahona, Nob. 2006, 80)

• Sa unsang paagi gilambigit si Abraham ngadto sa tanang miyembro sa Simbahan? (Kon gikinahanglan, hatagig gibug-aton nga kita naghisgot ni Abraham kon nagpasabot kini sa pakigsaad ni Abraham. Mahimong tun-an sa mga estudyante ang Abraham 1:1–7, 15–19 aron makat-on mahitungod sa mga sirkumstansiya nga mitultol ngadto sa Dios sa paghimo sa Iyang pakigsaad uban ni Abraham.)

Dapita ang mga estudyante sa paghimo og kopya sa mosunod nga table. Sila mahimong mokompleto sa table samtang sila magtuon sa Abraham 2:6–11. Mahimo usab nimo silang ipatuon sa “Genesis 12:1–3; Abraham 2:6–11. Unsa ang pakigsaad nga gihimo sa Dios uban ni Abraham?” sa Mga Tabang sa Kasulatan: Daang Tugon.

Ang mga estudyante mahimong mo-summarize kon unsa ang ilang nakat-onan bahin sa pakigsaad ni Abraham kauban sa kapares. Mahimo usab kang mangutana nga sama niini:

• Unsa ang matudlo niini nga mga saad kaninyo mahitungod sa mga hiyas sa Langitnong Amahan ug ni Jesukristo?

• Unsa ang matudlo niini nga mga bersikulo mahitungod sa inyong mga responsibilidad isip usa ka miyembro sa Simbahan karon? (Gamit ang ilang kaugalingong mga pulong, ang mga estudyante mahimong makaila og usa ka kamatuoran nga sama sa mosunod: Isip ang binhi ni Abraham, kita adunay responsibilidad sa pagdala sa mga panalangin sa ebanghelyo ngadto sa tanang katawhan.)

• Unsa ang pipila ka paagi nga inyong matuman ang inyong mga responsibilidad nga may kalabotan sa pakigsaad ni Abraham? (Ang mosunod nga pamahayag ni Presidente Russell M. Nelson mahimong makatabang sa panaghisgotan.)

Ang Ginoo misugo nga kita mosabwag sa ebanghelyo ug mopaambit sa pakigsaad. Mao kana nganong kita adunay mga misyonaryo. Siya nangandoy alang sa matag usa sa Iyang mga anak nga makabaton og oportunidad sa pagpili sa ebanghelyo sa Manluluwas ug mosugod sa dalan sa pakigsaad. Ang Dios gusto nga ikonektar ang tanang katawhan ngadto sa pakigsaad nga Iyang gihimo sa karaang panahon uban ni Abraham.

Mao nga, ang misyonaryo nga buhat usa ka mahinungdanon nga bahin sa dakong panagpundok sa Israel. Kana nga panagpundok mao ang labing importanteng buhat nga nahitabo sa yuta karon. Walay laing ikatandi sa kadako niini. Walay laing ikatandi ang kaimportante niini. Ang mga misyonaryo sa Ginoo—Iyang mga disipulo—nalambigit diha sa labing dakong hagit, sa labing dakong kawsa, sa labing dakong buhat dinhi sa yuta karon.

Apan aduna pay mas labaw pa—mas labaw pa. Adunay dakong panginahanglan sa pagsangyaw sa ebanghelyo ngadto sa mga tawo sa pikas habig sa tabil. Gusto sa Dios nga ang tanan, sa duha ka habig sa tabil, nga matagamtam ang mga panalangin sa Iyang pakigsaad. (“Ang Walay Kataposan nga Pakigsaad,” Liahona, Okt. 2022, 9)

Ikonsiderar ang pagdapit sa mga estudyante sa pagpakigbahin sa mga kasinatian nga ilang nasinati uban sa Ginoo diha sa pagpundok sa Israel. Awhaga sila sa pagpakigbahin kon sa unsang paagi ang Ginoo mipanalangin kanila o sa uban pinaagi niini nga mga paningkamot. Mahimo usab nga mopakigbahin ka sa imong kaugalingon nga mga kasinatian.

Hatagi ang mga estudyante og panahon sa paghimo og usa ka plano aron sa pagtuman sa ilang responsibilidad sa pagpundok sa Israel ug pagpakigbahin sa mga panalangin sa ebanghelyo ngadto sa uban. Awhaga sila sa pagrekord sa ilang plano. Mahimo nimong i-follow up ang mga estudyante bahin sa ilang pag-uswag sa umaabot nga leksiyon.

Balik ngadto sa “Mga Opsiyon sa Kalihokan sa Pagkat-on.”

Dapita ang mga estudyante sa paghunahuna og usa ka higayon dihang wala sila magkauyon sa usa ka tawo sa personal o sa online. Ipakita ang mosunod nga pagtimbang-timbang sa kaugalingon, ug dapita ang mga estudyante nga hilom nga mosukod kon sila ba nahimong mga tigpasiugda og kalinaw atol sa ilang mga pakighinabi.

Hatagig gibug-aton nga human magpuyo sa Ehipto sa mubong panahon, si Abram (sa ulahi gitawag og Abraham) ug ang iyang pamilya mibalik ngadto sa yuta sa Canaan. Dapita ang mga estudyante sa pagtuon sa Genesis 13:1–12 ug sa pag-ila nganong ang panag-away nagsugod sulod sa katawhan ni Abram.

• Unsa ang mipatigbabaw kaninyo mahitungod sa tubag ni Abram ngadto sa panagbangi ni Lot? (tan-awa sa mga bersikulo 8–11).

Ipakigbahin ang mosunod nga pamahayag ni Elder Quentin L. Cook:

Aron sa pagbaton og malinawon nga mga relasyon, ang leksiyon klaro; nga angay gayod nga kita andam nga moreglo ug mopaundang sa panagbingkil kon hisgotan ang mga butang nga naglakip sa pagkamatarong. Sama sa gitudlo ni Hari Benjamin, “Dili kamo maghunahuna nga pasakitan ang usag usa, apan magpakabuhi nga malinawon.” [Mosiah 4:13]. Apan bahin sa kinaiya nga may kalabotan sa pagkamatarong ug doktrinal nga panginahanglan, kita kinahanglan nga magpabiling lig-on ug dili matarog. (“Personal nga Kalinaw sa mga Panahon nga Mahagiton,” Liahona, Nob. 2021, 91)

Dapita ang mga estudyante sa pagpakigbahin og usa ka kamatuoran nga ilang nakat-onan gikan sa Genesis 13 ug gikan sa pamahayag ni Elder Cook. Ang mga estudyante mahimong makaila og usa ka kamatuoran sama niini: Mahimo kitang mga tigpasiugda og kalinaw pinaagi sa pagkaandam nga moareglo sa mga butang nga wala maglangkob sa pagkamatarong.

• Unsa ang makapalisod aron mahimong usa ka tigpasiugda og kalinaw?

• Unsa ang inyong mahimo aron mas mahimong usa ka tigpasiugda og kalinaw ngadto sa mga tawo sa inyong palibot?

Tingali makatabang ang pagpasaot nga ang pagkahimong usa ka tigpasiugda og kalinaw wala nagpasabot nga likayan ang panagbangi bisan unsa pa ang mahitabo, ug kini wala nagpasabot nga tugotan ang uban sa pagpahimulos kanato o pagdaot kanato. Aron sa pagtabang sa mga estudyante nga mas makasabot kon sa unsang paagi nga sila makasunod sa ehemplo sa Manluluwas nga mahimong usa ka tigpasiugda og kalinaw, ikonsiderar ang pagpasalida sa “Blessed Are the Peacemakers” (2:17) o “Peacemakers in Contentious Times” (2:42). Ang laing pamaagi, pwede nimong hatagan og higayon ang mga estudyante sa pagtuon sa bahin sa pakigpulong ni Presidente Russell M. Nelson “Gikinahanglan ang mga Tigpasiugda og Kalinaw” (Liahona, Mayo 2023, 98–101). Ang mga estudyante mahimong mopakigbahin sa unsay ilang nadiskobrehan uban sa kapares o magdungan isip usa ka klase.

2:18

2:42

Ikonsiderar ang pagdapit sa pipila ka estudyante sa pagpakigbahin sa ilang mga tubag ngadto sa usa o duha sa mosunod nga mga pangutana uban sa kapares o gagmay nga grupo:

• Unsa ang positibong mga resulta ang inyong nakita samtang kamo naghimo og mga paningkamot nga mahimong tigpasiugda og kalinaw?

• Sa unsa nga paagi kamo napanalanginan gumikan sa mga paningkamot sa uban nga mahimong tigpasiugda og kalinaw?

Sa pagtapos, ikonsiderar ang pagpakita sa mosunod nga mga pangutana. Hatagi ang mga estudyante og panahon sa pagrekord sa ilang mga tubag:

• Unsa ang pipila ka sitwasyon sa inyong kinabuhi diin kamo nahimong maayong tigpasiugda og kalinaw?

• Unsa ang usa ka butang nga inyong sugdan sa pagbuhat karon aron mahimong tigpasiugda og kalinaw?

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagsulat sa mga pulong sama sa mosunod diha sa pisara: nag-inusara, gibiyaan, wala makit-i, dili masabtan, gibaliwala. Dasiga ang mga estudyante sa paghunahuna sa kataposang higayon nga nakasinati sila og usa niini nga mga pagbati.

Dapita sila sa pagtuon sa mga kasinatian ni Hagar ug Sarai sa Genesis 16 ug ikonsiderar kon sa unsang paagi sila midangop sa Ginoo alang sa tabang dihang gibati nila nga nag-inusara o wala makit-i.

Ipasabot nga bisan og si Abram ug Sarai (kansang mga ngalan sa kaulahian giusab sa Dios ngadto sa Abraham ug Sara) nga gisaaran sa Dios nga sila makabaton og daghang kaliwatan, si Sarai nakaabot sa gulang nga edad nga wala makabaton og mga anak. Si Sarai mihatag sa iyang ulipon nga babaye nga si Hagar ngadto ni Abram isip dinaghang asawa aron sa pagtabang nga matuman ang gisaad sa Ginoo nga kaliwatan. Tingali makatabang ang paghatag og gibug-aton nga ang Dios mimando ni Abram ug Sarai sa pagbuhat niini (tan-awa sa Doktrina ug mga Pakigsaad 132:34; Genesis 16:1–3; Tan-awa usab sa “Genesis 16:1–3. Nagnong gihatag ni Sarai si Hagar ngadto ni Abram isip asawa?” sa Mga Tabang sa Kasulatan: Daang Tugon).

Dapita ang mga estudyante sa pagbasa nga magdungan sa Genesis 16:4–6 nga mangita kon unsa ang nahitabo tali ni Hagar ug Sarai.

• Unsa kaha ang inyong bation kon kamo anaa pa sa posisyon ni Hagar? Unsa kaha sa bahin ni Sarai?

Dapita ang mga estudyante sa pagtuon sa Genesis 16:7–16, nga mangita kon unsa ang nahitabo human sa pagbiya ni Hagar.

• Unsa ang inyong nakat-onan mahitungod sa Dios gikan sa kasinatian ni Hagar? (Makatabang tingali ang pagpasabot nga ang ngalan ni Ismael nagpasabot nga “gipatalinghugan sa Dios” [tan-awa sa Genesis 16:11], ug ang ngalan nga Beer-lahai-roi, nga gihisgotan sa Genesis 16:14, nagpasabot nga “Ang atabay nga buhi nga nagtan-aw kanako [tan-awa sa Genesis 16:14].)

Mahimong mailhan sa mga estudyante ang usa ka kamatuoran nga sama niini: Ang Ginoo nakadungog ug nakakita kanato sa atong mga pagsulay ug motabang kanato pinaagi kanila.

• Unsa ang pipila ka paagi nga gipakita sa Dios nga Siya nakakita ug nakadungog kanato?

Ikonsiderar ang pagpakigbahin sa mosunod nga pamahayag ni Elder Dieter F. Uchtdorf:

Wala kamo mag-inusara niini nga biyahe. Ang inyong Langitnong Amahan nakaila kaninyo. Bisan kon walay nakabati kaninyo, Siya nakabati kaninyo. Kon nagmaya kamo sa pagkamatarong, Siya nagmaya uban kaninyo. Kon nabug-atan kamo sa pagsulay, Siya nagsubo uban kaninyo. (“Ang Inyong Talagsaong Biyahe sa Pagpauli,” Liahona, Mayo 2013, 127–28)

Dapita ang mga estudyante sa pagpamalandong sa mga panahon dihang sila mibati nga ang Dios nakahibalo kanila ug nasayod kon unsa ang ilang giagian. Mahimo kang mohangyo sa pipila ka estudyante sa pagpakigbahin og mga kasinatian nga dili kaayo personal diha sa klase.

Mahimo nimong taposon ang kalihokan sa pagkat-on pinaagi sa pagpamatuod nga ang Dios nakakita ug nakadungog sa tanan Niyang mga anak diha sa ilang mga pagsulay ug mopanalangin kanila.

Balik ngadto sa “Mga Opsiyon sa Kalihokan sa Pagkat-on.”