Genesis 24–33

Ikonsiderar ang pagpakigbahin sa mosunod nga senaryo ngadto sa klase:

Dapita ang mga estudyante sa paghunahuna kon unsaon kaha pagtubag ni Maria sa pagtabang sa mga kabalaka ni Lucia. Mahimo usab nimo silang awhagon nga ikonsiderar sa hilom ang ilang mga tubag sa mosunod nga mga pangutana:

• Unsa kaimportante alang kanako ang mahangtorong kaminyoon?

• Unsa nga mga babag ang akong sagubangon sa pag-angkon og mahangtorong kaminyoon?

Ikonsiderar ang pagpakita sa mosunod nga mapa samtang imong ipasabot nga si Abraham ug ang iyang pamilya nagpuyo sa Canaan, diin ang mga tawo nagsimba sa dios-dios. Si Abraham adunay mga sakop sa pamilya nga nagpuyo sa Haran, diin sobra sa 400 ka milya (650 ka kilometro) ang gilay-on.

Dapita ang mga estudyante sa pagbasa sa Genesis 24:1–9, nga mangita sa mga instruksiyon nga gihatag ni Abraham ngadto sa iyang sulogoon. (Tingali makatabang ang pagpasabot nga ang Hubad ni Joseph Smith mipuli sa pulong nga “paa” ngadto sa “kamot” sa bersikulo 2 ug 9).

• Kon kamo ang sulogoon ni Abraham, unsa kaha ang inyong mga pangutana o mga kabalaka mahitungod niini nga mga instruksiyon?

• Ngano kaha sa inyong hunahuna nga si Abraham nagpakabana pag-ayo kon si kinsa ang minyoan sa iyang anak? (Ikonsiderar usab ang dungan nga pagtuon sa “Genesis 24:2–9. Nganong dili gusto si Abraham nga si Isaac maminyo og usa ka Canaanhon?” sa Mga Tabang sa Kasulatan: Daang Tugon.)

Kon gikinahanglan, tabangi ang mga estudyante nga makasabot nga si Abraham nagtinguha nga si Isaac maminyo sa usa ka babaye nga nagtuman sa pakigsaad. Mao kini ang paagi nga maangkon ni Isaac ang mga panalangin nga nag-uban sa pakigsaad ni Abraham alang sa iyang kaugalingon ug sa iyang kaliwatan. Ang desisyon ni Isaac nga magminyo diha sa pakigsaad susama sa atong pagpili karon mahitungod kon magminyo ba diha sa templo.

Ipasabot nga ang sulugoon ni Abraham mibiyahe ngadto sa Haran, diin mao ang kanhi gipuy-an ni Abraham. Didto ang Ginoo migiya niya nadto sa usa ka matinud-anong babaye nga ginganlan og Rebecca. Ang sulugoon nakighimamat sa pamilya ni Rebecca aron hisgotan ang pagkuyog uban niya ngadto sa Canaan aron maminyo ni Isaac.

Dapita ang mga estudyante sa pagbasa sa Genesis 24:50–67, nga mangita kon sa unsang paagi mitubag si Rebecca niini nga sitwasyon ug ang mga sakripisyo nga iyang gihimo aron maminyo ni Isaac. Dayon ipangutana ang sama sa mosunod:

• Unsay mipatigbabaw diha kaninyo gikan niining mga bersikulo? Ngano man?

• Unsa ang inyong nakat-onan mahitungod sa mahangtorong kaminyoon gikan niini nga asoy? (Tingali mailhan sa mga estudyante ang lainlaing mga kamatuoran, lakip niini: Takos kini sa dakong paningkamot ug sakripisyo aron maangkon ang mga panalangin sa mahangtorong kaminyoon.)

• Nagno kaha sa inyong hunahuna ang mahangtorong kaminyoon takos sa dakong sakripisyo? (Ikonsiderar ang pagdapit sa mga estudyante sa pagpangita ug sa pagpakigbahin sa mga kasulatan o mga pamahayag gikan sa mga lider sa Simbahan nga makatabang sa pagtubag niini nga pangutana. Usa ka ehemplo sa kasulatan nga ilang magamit mao ang Doktrina ug mga Pakigsaad 131:1–4.)

Atol sa inyong panaghisgot, tingali importante ang pag-ila nga dili tanan nga nagtinguha sa pagsubay sa dalan sa pakigsaad adunay kahigayonan nga makasulod sa mahangtorong kaminyoon niini nga kinabuhi. Mahimong sensitibo sa mga panginahanglan ug mga sitwasyon sa mga tawo. Tingali makatabang ang pagpahinumdom sa mga estudyante nga “walay usa nga gitakda nang daan nga makadawat og minus pa kay sa tanan nga aduna ang Amahan alang sa Iyang mga anak” (D. Todd Christofferson, “Nganong Kaminyoon, Nagong Pamilya,” Liahona, Mayo 2015, 52). Ang Ginoo mohatag og oportunidad sa sunod kinabuhi alang sa mga tawo kinsa walay oportunidad nga maminyo niini nga kinabuhi (tan-awa sa Neil L. Andersen, “Ang Kadaugan sa Paglaom,” Liahona, Nob. 2024, 5). Pagpamatuod nga kita karon makasinati og kalipay pinaagi ni Jesukristo, dili igsapayan kon kita minyo man o dili minyo.

Dapita ang mga estudyante sa pagsulat unsa ang ilang mahimo aron maprayoridad ang mahangtorong kaminyoon, bisan unsa pa ang ilang kasamtangang kahimtang sa kinabuhi.

Balik ngadto sa “Mga Opsiyon sa Kalihokan sa Pagkat-on.”

Mahimo nimong dapiton ang mga estudyante sa pagpamalandong ug sa pagsulat kon sa unsang paagi ang matag usa sa mosunod nga mga pamahayag magamit nila gamit ang mga tubag nga “segurado,” “kasagaran,” “gamay,” ug “dili gayod.”

1. Andam akong mosakripisyo sa kalibotanong mga tinguha alang sa mahangtorong mga panalangin.

2. Nakasabot ko kon nganong ang Ginoo naghangyo kanako nga hatagan og bili ang Iyang mahangtorong mga panalangin kaysa mga butang nga akong gusto karon.

3. Akong mailhan ang mga panalangin nga moabot kon akong unahon ang Langitnong Amahan ug si Jesukristo kaysa kalibotanong mga butang.

Dapita ang mga estudyante sa pagtinguha og inspirasyon samtang magtuon sila karon mahitungod kon unsaon sa pagprayoridad ang mahangtorong mga panalangin kaysa kalibotanong mga tinguha.

Ipsabot nga si Rebecca ug Isaac wala makabaton og mga anak sa daghang katuigan. Sa kataposan sila napanalanginan og kaluha nga mga lalaki nga ginganlan og Jacob ug Esau. Atol sa pagsabak ni Rebecca, ang Ginoo mitabang niya nga makasabot nga si Jacob, ang manghod sa duha ka magsoong lalaki, sa kataposan nahimong anak nga lalaki sa katungod sa pagkamagulang—bisan tuod ang kinamagulangang anak nga lalaki tradisyonal nga makapanunod sa katungod sa pagkamagulang (tan-awa sa Genesis 25:23). Ang anak nga lalaki kinsa naghupot sa katungod sa pagkamagulang makapanunod dili lamang sa mga yuta ug mga kabtangan sa iyang amahan, apan sa katungdanan usab sa iyang amahan isip ang espiritwal nga lider sa pamilya ug sa “awtoridad sa pagpangulo” (tan-awa sa Bible Dictionary, “Birthright”).

Dapita ang mga estudyante sa pagtuon sa Genesis 25:27–34 ug 26:34–35, sa pagpangita kon unsa ang gibati ni Esau mahitungod sa katungod sa pagkamagulang. (Mahimo usab nimong dapiton ang mga estudyante sa pagtuon sa“Genesis 25:29–34. Nganong gibaligya ni Esau ang iyang katungod sa pagkamagulang?” sa Mga Tabang sa Kasulatan: Daang Tugon.)

• Unsa kaha ang ipasabot sa mga lihok ni Esau mahitungod kon unsa ang iyang gibati bahin sa iyang katungod sa pagkamagulang?

• Unsa nga mga kamatuoran ang atong makat-onan gikan sa mga kasinatian nila ni Jacob ug Esau? (Tingali mailhan sa mga estudyante ang usa ka kamatuoran nga sama niini: Ang pagtutok sa dihadiha nga mga tinguha makapasimang kanato gikan sa mga butang nga adunay mahangtorong importansiya.)

Aron matabangan ang mga estudyante nga makita kon sa unsang paagi kini nga kamatuoran mahimong may kalabotan sa mga sitwasyon nga ilang gisagubang, ikonsiderar ang dungan nga paghisgot sa mosunod nga mga pamahayag nila ni Elder David A. Bednar ug Brother Bradley R. Wilcox:

Sa kabisi sa atong inadlaw-adlaw nga mga kinabuhi ug sa kaguliyang sa kasamtangang kalibotan diin kita nagpuyo, mahimong malinga kita gikan sa mahangtoron nga mga butang nga labing mahinungdanon pinaagi sa paghimo sa kalipay, kabulahan, kasikat, ug kabantogan nga maoy atong una nga mga prayoridad. Ang atong kadiyot nga pagkalinga “sa mga butang niini nga kalibotan” ug “sa mga pasidungog sa mga tawo” mahimong modala kanato sa pagsalikway sa atong espirituhanong katungod sa pagkamagulang alang sa menos ra kaayo nga linat-ang mga liso. (“Isul-ob ang Imong Kusog, O Zion,” Liahona, Nob. 2022, 94)

Ayaw ibaligya ang inyong bililhon nga katungod sa pagkatawo alang sa usa ka panaksan nga sinabaw. Ayaw ibaylo ang tanang butang sa walay kapuslanan. (“O Batan-on nga Bililhon,” Liahona, Nob. 2024, 95)

Ikonsiderar ang pagpakita sa mosunod nga mga pangutana ug sa pagdapit sa mga estudyante sa paghisgot niini uban sa usa kapares o sa gamay nga grupo:

• Unsa ang pipila ka ehemplo kon sa unsang paagi ang mga tawo karon iprayoridad tingali ang dihadiha o kalibotanon nga mga tinguha kaysa mahangtorong mga panalangin sa Ginoo?

• Giunsa ni Jesukristo pagprayoridad ang mahangtorong mga panalangin kay sa dihadiha nga mga tinguha?

• Unsa ang nakatabang ninyo nga iprayoridad ang mahangtorong mga panalangin kaysa dihadiha o kalibotanon nga mga tinguha?

Dapita ang mga estudyante sa pagpamalandong kon unsaon nila paggamit ang mga kamatuoran nga ilang gihisgotan karon ngadto sa ilang mga kinabuhi. Hatagi sila og panahon sa pagrekord sa usa ka plano ug sa ubang espirituhanong mga impresyon nga tingali ilang naangkon.

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagkontak sa pipila ka estudyante sa dili pa ang klase ug sa pagdapit nila sa pag-apil sa mubo nga panaghisgot diha sa klase mahitungod sa mga pakigsaad. Pwede nimong ipadala nila ang mosunod nga mga pangutana sa sayo pa ug hangyoa sila nga mopili og usa nga tubagon atol sa klase.

• Unsaon ninyo pagpasabot ang kaimportante sa mga pakigsaad ngadto sa usa ka tawo nga bag-o pa sa atong tinuohan?

• Sa unsang paagi ang pagtuman sa inyong mga pakigsaad diha sa atong inadlaw nga panginabuhi nakapalig-on sa atong relasyon sa Dios?

• Nganong tumanon man ninyo ang inyong mga pakigsaad sa Dios bisan paman sa pagdani nga supakon kini?

Pagpahimotang og pipila ka lingkoranan sa atubangan sa lawak, ug palingkora niini ang mga estudyante nga gikontak na nimo daan. Ipakita ang nag-unang mga pangutana ug patubaga ang mga estudyante sa usa nga ilang napili.

Ipasabot nga si Esau mihukom nga patyon si Jacob human ang duha nagkabikil bahin sa katungod sa pagkamagulang ug sa kinatibuk-ang panalangin ni Isaac (tan-awa sa Genesis 27:36-41). Si Rebecca ug Isaac misugo ni Jacob sa pagbiyahe sa sobra 400 ka milya (650 ka kilometro) padulong sa Haran, diin siya mahimong luwas gikan ni Esau ug makapangita og asawa nga minyoan diha sa pakigsaad. Atol sa pagbiyahe ni Jacob padulong sa Haran, aduna siyay kasinatian nga nagpakita sa kaimportante sa paghimo ug pagtuman sa mga pakigsaad sa Dios.

Aron matabangan ang mga estudyante nga makat-on mahitungod sa kasinatian ni Jacob, dapita sila sa pagtuon sa Genesis 28:10–15 ug “Genesis 28:10–15. Unsa ang kahulogan sa damgo ni Jacob kabahin sa usa ka hagdan?” sa Mga Tabang sa Kasulatan: Daang Tugon. Dayon ipangutana ang sama sa mosunod:

• Unsay inyong nakat-onan mahitungod sa mga pakigsaad gikan sa kasinatian ni Jacob?

• Ngano kaha sa inyong hunahuna nga ang gihimo nga mga saad sa Dios ngadto ni Jacob mahimong makahuloganon kaayo ngadto kaniya niana nga punto sa iyang kinabuhi?

• Base sa unsay inyong nakat-onan sa bersikulo 15, unsa ang pipila ka panalangin nga atong madawat kon kita mohimo ug motuman sa mga pakigsaad uban sa Dios? (Ang mga estudyante mahimong mopakigbahin og usa ka baroganan nga sama niini: Samtang kita mohimo ug motuman sa mga pakigsaad uban sa Dios, Siya maanaa kanato, manalipod ug moatiman kanato, ug dili mobiya kanato.)

Ikonsiderar ang pagdapit sa usa ka estudyante sa pagbasa sa mosunod nga pamahayag ni Presidente Emily Belle Freeman:

Ang Ginoo mibarog tupad ni Jacob, mipaila sa Iyang Kaugalingon isip ang Dios sa amahan ni Jacob, ug dayon misaad:

• Ako nag-uban kanimo.

• Panalipdan ko ikaw.

• Dad-on ko ikaw pagbalik niining yutaa.

• Dili ko ikaw biyaan.

• Matuman ang gisaad ko kanimo.

Si Jacob kinahanglan nga mopili. Makapili siya nga mopuyo sa iyang kinabuhi nga makaila lang sa Dios sa iyang amahan, o siya makapili nga mopuyo sa kinabuhi sa mapasaligon nga relasyon sa pakigsaad uban Niya. Mga tuig ang milabay, si Jacob mipamatuod sa kinabuhi nga gipuy-an sulod sa mga saad sa pakigsaad sa Ginoo: “Ang Dios …nagtubag kanako sa adlaw sa akong kagul-anan, ug nag-uban siya kanako sa dalan nga akong gilaktan” [Genesis 35:3]. (“Paglakaw diha sa Relasyon sa Pakigsaad uban ni Kristo,” Liahona, Nob. 2023, 77)

Mahimo nimong dapiton ang mga estudyante sa pagpakigbahin kon unsay mipatigbabaw kanila gikan niini nga pamahayag.

Ipasabot nga human sa iyang sagrado nga kasinatian uban sa Dios, si Jacob namahayag sa iyang mga pagbati. Dapita ang mga estudyante sa pagtuon sa Genesis 28:16–22, nga mangita sa mga ekspresyon gikan ni Jacob nga mopatigbabaw kanila. Dapita ang mga estudyante sa pagpakigbahin sa unsay ilang nakaplagan.

Mahimo nimong taposon pinaagi sa pagdapit sa mga estudyante sa pagkanta o pagbasa sa mga pulong sa himno nga “Mas Magpaduol Ko Dios Kanimo” (Mga Himno), lakip ang mga bersikulo 4 ug 5. Ang mga estudyante mahimong mopakigbahin og usa ka paborito nga linya o hugpong sa mga pulong. Mahimo kang makapangutana:

• Unsa ang mga koneksiyon ang inyong nakita tali niini nga himno ug sa kasinatian ni Jacob?

• Sa unsa nga paagi ang pagtuman sa inyong mga pakigsaad makatabang sa inyong pagbati nga mapaduol ngadto sa Dios?

Balik ngadto sa “Mga Opsiyon sa Kalihokan sa Pagkat-on.”

Ikonsiderar ang pagpakita sa mosunod nga pagsukod sa kaugalingon o pagprinta niini alang sa mga estudyante. Hatagi og panahon ang mga estudyante sa pagkompleto niini sa ilang kaugalingon.

Alang sa matag usa sa mosunod nga mga opsiyon, i-rate ang inyong kaugalingon gamit ang sukdanan gikan sa 1 (panagsa ra tinuod alang kanako) hangtod 5 (kanunay nga tinuod alang kanako).

1. Ako gayod nga seguradohon nga ang Dios mao ang labing importanteng impluwensiya sa akong kinabuhi.

2. Ako nagsunod sa Dios tungod kay ako gusto—dili kay tungod sa gipaabot sa uban.

3. Ako adunay hugot nga pagtuo sa saktong panahon ug mga katuyoan sa Dios, bisan kon ako wala makasabot niini.

4. Kon ako adunay mga pangutana nga may kalabotan sa ebanghelyo, akong tinguhaon nga ang Dios mogiya nako ngadto sa mahangtoron nga kamatuoran.

Ipasabot nga niini nga kalihokan sa pagkat-on, ang mga estudyante magtuon sa sagradong kasinatian ni Jacob. Dapita sila samtang sila magtuon sa pagpangita sa mga kamatuoran nga makatabang nila nga molambo ang ilang pagtuo ug pagsalig ngadto sa Ginoo.

Aron matabangan ang mga estudyante nga makasabot sa konteksto sa Genesis 32, ipasabot nga human sa pagtrabaho diha sa iyang ugangan nga lalaki, nga si Laban, sulod sa 20 ka tuig, si Jacob gimandoan sa Dios nga mobalik ngadto sa yuta sa Canaan. Sa dihang si Jacob nagpuyo kaniadto didto, gusto siyang patyon sa iyang igsoon nga si Esau tungod sa wala pagkasinabtanay sa katungod sa pagkamagulang (tan-awa sa Genesis 27:41). Atol sa panahon sa iyang paghawa, si Jacob adunay daghang kasinatian nga nagdala niya paduol sa Dios. Apan siya “nahadlok sa hilabihan gayod ug nagsubo siya” (Genesis 32:7) mahitungod sa pakig-uban balik sa iyang igsoon.

Dapita ang mga estudyante sa pagbasa sa Genesis 32:9–12, 24–30 aron makat-on mahitungod sa mga pagbati ni Jacob ug sa iyang kasinatian uban sa Dios atol niini nga panahon. (Alang sa tabang sa pagsabot niini nga mga bersikulo, dapita ang mga estudyante sa pagbasa sa “Genesis 32:24–32. Unsa ang ipasabot sa pakigbisog ni Jacob?” sa Mga Tabang sa Kasulatan: Daang Tugon.)

Hatagi ang mga estudyante og oportunidad sa pahisgot kon unsa ang ilang nakat-onan pinaagi sa pagpangutana sama sa mosunod:

• Unsa ang mipatigbabaw nganha kaninyo mahitungod sa tinguha ni Jacob nga gihulagway diha sa mga bersikulo 9–12?

• Unsa ang gitudlo sa Ginoo ngadto ni Jacob sa bersikulo 28 mahitungod kon nganong Iyang giusab ang ngalan ni Jacob ngadto sa Israel?

Aron matabangan ang mga estudyante nga makasabot sa kahulogan sa bag-ong ngalan ni Jacob, ipakigbahin ang mosunod nga pamahayag ni Presidente Russell M. Nelson:

Si Jacob nakigdumog og seryuso nga hagit. Ang iyang kabubut-on gisulayan. Pinaagi niini nga pakigdumog, gipamatud-an ni Jacob kon unsa ang labing importante kaniya. Iyang gipakita nga andam niyang ipatigbabaw ang Dios labaw sa tanan diha sa iyang kinabuhi. Agig tubag, giusab sa Dios ang ngalan ni Jacob ngadto sa Israel, nga nagpasabot nga “ipatigbabaw ang Dios labaw sa tanan.” Ang Dios dayon misaad kang Israel nga ang tanan nga mga panalangin nga gisaad kang Abraham maiya usab. (“Ipatigbabaw ang Dios Labaw sa Tanan,” Liahona, Nob. 2020, 92)

• Base sa unsay inyong nakat-onan gikan sa kasinatian ni Jacob, unsa ang mahitabo kon atong ipatigbabaw ang Dios labaw sa tanan sa atong mga kinabuhi? (Mahimong mailhan sa mga estudyante ang usa ka kamatuoran nga sama nini: Samtang kita andam nga ipatigbabaw ang Dios labaw sa tanan diha sa atong mga kinabuhi, atong madawat ang Iyang gisaad nga mga panalangin.)

Dapita ang mga estudyante sa paghunahuna sa kahulogan sa hugpong sa mga pulong nga “Ipatigbabaw ang Dios labaw sa tanan.” Mahimo nimong hatagan ang mga estudyante og pipila ka minuto aron tun-an ang mga porsiyon sa pakigpulong ni Presidente Russell M. Nelson nga “Ipatigbabaw ang Dios Labaw sa Tanan” (Liahona, Nob. 2020, 92–95). Sila dayon mahimong mopakigbahin kauban sa kapares kon unsa ang ilang nakat-onan mahitungod sa pagpatigbabaw sa Dios labaw sa tanan. Pwede usab ninyong hisgotan ang mga pangutana sama sa mosunod:

• Unsa kaha ang resulta kon ipatigbabaw ang Dios labaw sa tanan diha sa inyong kinabuhi?

• Unsa ang makatabang sa pagdugang sa inyong kaandam nga ipatigbabaw ang Dios labaw sa tanan?

• Unsay inyong mga kasinatian sa pagpatigbabaw sa Dios labaw sa tanan? Unsa ang kalainan nga nahimo niini alang kaninyo?

Dapita ang mga estudyante sa pagkonsiderar og mga paagi nga mas mahimo nilang ipatigbabaw ang Dios labaw sa tanan diha sa ilang mga kinabuhi. Dapita sila sa pagrekord sa ilang mga tumong.

Balik ngadto sa “Mga Opsiyon sa Kalihokan sa Pagkat-on.”