Manwal sa Magtutudlo sa Institute sa Daang Tugon

Paghunahuna og mga paagi sa pagdapit, pag-awhag, ug pagtabang sa mga estudyante nga magtuon sa ilang mga kasulatan sa tibuok semana. Pananglitan, mahimong mopadala kamo og mga mensahe nga motabang sa mga estudyante nga magtuon sa gisangon nga hut-ong sa kasulatan alang sa semana ug moabot sa klase nga andam nga mopakigbahin og mga pangutana ug mga panabot. Ang mga ideya alang sa mga mensahe nga pwede nimong ipadala sa mga estudyante anaa sa sinugdanan sa matag latid sa leksiyon.

Pwede usab nimong susihon ang mga panginahanglan sa mga estudyante pinaagi sa pagdapit kanila nga ipadala nimo ang ilang mga pangutana bahin sa hut-ong sa kasulatan. Sa ubang paagi sa komunikasyon, pwede nimong dapiton ang mga estudyante nga sugdan paghisgot ang usa ka hilisgotan uban sa mga classmate o mga higala ug mga sakop sa pamilya sa dili pa ang klase. Paghunahuna og mga paagi sa pagtabang sa mga estudyante nga makab-ot ang ilang mga tumong sa pagtuon ug makaangkon og mas lawom nga gugma alang sa ilang personal nga pagtuon sa kasulatan.

Hatagi og panahon ang mga estudyante sa pagpangutana ug pagpakigbahin og mga panabot ug mga kasinatian. Makatabang kini nila nga makonektar ang mga kasulatan ngadto sa ilang mga kinabuhi. Makahimo usab kini nimo nga mas makasusi sa mga panginahanglan ug mga tinguha sa mga estudyante. Maayo pod tingali ni nga panahon sa pag-follow up sa mga pagdapit ug mga kasinatian gikan sa miaging mga klase.

Ang paghatag og panahon sa mga estudyante sa pagpangutana ug pagpakigbahin og mga panabot mahitungod sa hut-ong sa kasulatan magtugot usab nila sa pag-impluwensya sa direksiyon sa panaghisgotan. Ang gidugayon sa panahon sa pagpakigbahin kinahanglan nga mausab-usab. Kinahanglan nimong mailhan kon kanus-a tabangan ang mga estudyante nga mopadayon ngadto sa usa sa mga kalihokan sa pagkat-on, nga motabang nila nga magamit ang ilang gihisgotan.

Aron makaaghat og mga pangutana ug pagpakigbahin, ikonsiderar ang mosunod nga mga paagi sa pagsugod sa kalihokan:

• Rebyoha ang mga mensahe nga imong gipadala ngadto sa mga estudyante atol sa semana o sa bisan unsa nga mga pangutana nga ilang gipadala kanimo.

• Ipakita ang mga litrato o mga pulong nga naghulagway sa mga panghitabo o importante nga mga pagtulun-an diha sa hut-ong sa kasulatan.

• Pangutan-a ang mga estudyante unsa nga mga pangutana o mga panabot nga gusto nilang hisgotan.

Mahimo nimong dapiton ang mga estudyante sa pagpangutana ug pagpakigbahin og mga panabot isip usa ka klase, sa gagmay nga mga grupo, uban sa usa ka kapares, o sa ubang mamugnaon nga mga paagi, sama sa paggamit sa social media. Ikonsiderar ang paghatag sa mga estudyante og oras sa pagrebyo o pagtuon sa hut-ong sa kasulatan sa dili pa sila mopakigbahin.

Pahinumdom: Kon wala sa hilisgotan ang usa ka pihong pangutana o panabot, pangita og mga paagi nga mabalik ang panaghisgot ngadto sa importanteng mga kamatuoran sa mga kasulatan. Mas maayo usab nga tubagon ang pipila ka pangutana human sa klase o human sa dugang nga pagtuon. OK ra nga moingon og, “Wala ko kahibalo. Tun-an nato kini og mas maayo sa personal ug tan-awon nato kon unsay atong makat-onan sa dili pa ang sunod klase.”

Kini nga kurso nagtabang sa mga estudyante sa pagpalambo og mga kahanas nga magdugang sa ilang kapasidad sa pagsabot ug pagpakigsulti mahitungod sa mga kasulatan. Sagad kini nga mga kahanas naapil diha sa mga kalihokan sa pagkat-on. Para sa dugang nga tabang sa paggamit niining gisugyot nga mga kahanas diha sa mga kalihokan sa pagkat-on, pwedeng tan-awon sa mga magtutudlo ug mga estudyante ang Mga Kahanas sa Pagtuon sa Kasulatan diha sa Librarya sa Ebanghelyo. Kini nga kapanguhaan naghatag og giya unsaon sa paghulagway, pagpakita, ug pagbansay ang matag kahanas.

Samtang balik-balikon sa pagbansay sa mga estudyante kini nga mga kahanas sa kinatibuk-an sa kurso, mabati nila ang mas dako nga pagsalig sa ilang abilidad sa pagkat-on gikan sa mga kasulatan. Pangita og panahon sa pag-follow up ug pagdapit sa mga estudyante sa pagpakigbahin sa ilang mga kasinatian sa paggamit niini nga mga kahanas.

Ang matag leksiyon maglakip sa daghang opsiyon sa kalihokan sa pagkat-on. Dili nimo kinahanglang gamiton ang tanang opsiyon sa kalihokan sa pagkat-on sa usa lang ka sesyon sa klase. Pagpunting sa pagkakabig sa mga estudyante, dili sa paghurot og tudlo sa tibuok leksiyon. Susiha ang mga panginahanglan sa mga sakop sa imong klase, ug tinguhaa ang giya sa Espiritu Santo samtang ikaw magpili sa mga kalihokan sa pagkat-on nga imong gamiton. Mahimo usab ka nga mangutana sa mga sakop sa klase asa nga mga leksiyon ug mga kalihokan sa pagkat-on nga sila mas makabenepisyo.