Vajtswv Xav Kom Coj Nej Los Tsev

Kuv xav ua nej tsaug vim nej thov Vajtswv pab kuv thaum kuv pib hloov los ua li Vajtswv hu kuv ua, dhau los ntawm Thawj Tswj Hwm Nelson, los ua tus Tswv Yexus Khetos ib tug Thwj Tim. Nyaj nej paub hais tias ua rau kuv txo hwj chim npaum li cas, thiab yeej yog ib lub sij hawm uas kuv ntxhov siab thiab ntsuam xyuas kuv tus kheej. Tiam sis yeej yog ib lub sam xeeb kom ua hauj lwm rau tus Cawm Seej, tsis hais kuv ua hauj lwm dab tsi los yog, thiab koom nrog nej qhia txog Nws txoj moo zoo uas ua rau neeg muaj kev cia siab.

Tsis tas li ntawd, muaj neeg hais tias nrog txhua tus Thwj Tim tshiab los muaj ib tug niam tais uas xav tsis thoob. Xyov puas muaj neeg hais li ntawd tiag tiag, tiam sis zaum no los ntshe cov lus ntawd muaj tseeb. Thiab kuv xav tias txawm yog kuv tus poj niam niam tsis nrog peb nyob hauv lub ntiaj teb no lawm los nws tseem xav tsis thoob.

Ob peb lub hlis tas los, thaum kuv tus poj niam thiab kuv wb mus xyuas lwm lub teb chaws ua hauj lwm rau lub Koom Txoos, kuv tau tsim los thiab saib nraum zoov ntawm lub qhov rais hauv wb lub tsev pw. Nyob ntawm txoj kev, kuv pom ib yam khoom tav kev uas ib tug tub ceev xwm tau tsa kom cov tsheb lem mus thaum txog qhov uas tav kev ntawd. Thaum xub thawj, tsuas muaj ob peb lub tsheb ntawm txoj kev ces twb piav tes kom lawv rov qab mus. Thaum sij hawm dhau mus thiab muaj tsheb ntau ntxiv, ces pib muaj cov tsheb ua ib kab ntev lawm.

Los ntawm qhov rais uas kuv saib tej no, kuv pom zoo li tus tub ceev xwm nyiam qhov uas nws muaj hwj chim tav kev tsis pub cov tsheb mus thiab hais kom tib neeg tig mus. Zoo li nws dhia cev me ntsis vim nws zoo siab, thaum txhua lub tsheb los txog qhov chaw tav kev. Yog ib tug neeg tsav tsheb tsis zoo siab txog qhov tav kev ntawd, tus tub ceev xwm tsis tau pab thiab tsis txawj xav. Nws tsuas co hau thiab taw tes kom lawv tig rov qab mus.

Kuv cov phooj ywg zoo, cov uas nrog kuv ua thwj tim uas taug txoj kev ntawm lub neej no, peb Leej Txiv txoj hau kev zoo nkauj, yeej yog Nws txoj hau kev “zoo kawg nkaus,”¹ twb tau tsim kom coj nej mus tsev, tsis yog kom tav nej kev tsis pub nej nkag haud.² Tsis muaj leej twg tsa khoom tav kev thiab txib neeg nyob ntawd kom nej tig rov qab mus thiab xa nej tawm mus. Qho no los tsis muaj hlo li. Vajtswv yeej yog tus uas raws nej tsis tu tsis tseg. Nws xav kom tag nrho Nws cov me nyuam xaiv rov qab los cuag Nws,³ thiab Nws siv txhua yam uas Nws muaj kom coj nej rov qab los.

Peb Leej txiv twb saib xyuas txoj Kev Tsim lub ntiaj teb no kom nej thiab kuv muaj cib fim hauv lub neej no hloov thiab sim peb, lub sij hawm siv txoj kev ywj siab xaiv uas Vajtswv muab rau peb kom xaiv Nws,⁴ kom peb kawm tau, loj hlob tuaj, ua yuam kev, hloov siab lees txim, hlub Vajtswv thiab peb cov neeg zej zog, thiab muaj ib hnub rov qab mus cuag Nws.

Nws tau txib Nws Leej Tub uas Nws hlub rau lub ntiaj teb uas tau poob lawm kom ua neej li lwm tus, kom coj yam ntxwv rau Nws lwm tus me nyuam xyaum, thiab kom theej peb lub txhoj thiab txhiv peb dim. Yexus Khetos lub txiaj ntsim theej txhoj tshem txhua yam uas tav kev ntawm kev tuag sab cev nqaij daim tawv thiab sab ntsuj plig uas yuav ua rau peb nyob nrug peb lub tsev mus ib txhis li.

Txhua yam ntawm Leej Txiv txoj hau kev rau Nws cov me nyuam yeej yog tsim kom coj txhua tus los tsev.

Vajtswv cov tub xa xov, Nws cov yaj saub, hu txoj hau kev hauv cov vaj lug kub li cas? Lawv hu txoj hau kev no ua txoj hau kev txhiv dim,⁵ txoj hau kev hlub tshua,⁶ txoj hau kev zoo siab uas tseem ceeb,⁷ thiab txoj hau kev cawm seej uas pub rau txhua tus, “los ntawm kuv Tib Leeg Tub cov ntshav.”⁸

Lub hom phiaj ntawm Leej Txiv txoj hau kev zoo siab uas tseem ceeb yog nej txoj kev zoo siab, nyob no, tam sim no, thiab mus ib txhis li. Tsis yog kom tab kaum nej txoj kev zoo siab thiab ua rau nej txhawj thiab ntshai.

Lub hom phiaj ntawm Leej Txiv txoj hau kev txhiv dim yeej yog nej txoj kev txhiv dim, kev cawm peb dim dhau los ntawm Yexus Khetos txoj kev raug txom nyem thiab kev tuag,⁹ kom peb dim kev txhaum thiab kev tuag. Tsis yog kom nej nyob li nej yog tam sim no xwb.

Lub hom phiaj ntawm Leej Txiv txoj hau kev hlub tshua yeej yog kom muab kev hlub tshua thaum nej tig rov qab mus cuag Nws thiab ua raws li nej tau khi lus tias nej yuav hwm Nws. Tsis yog kom txwv nej tsis txais kev hlub tshua thiab ua rau nej raug mob thiab raug kev tu siab.

Lub hom phiaj ntawm Leej Txiv txoj hau kev cawm seej yeej yog nej txoj kev cawm seej nyob hauv lub ntuj xilethi-aus uas muaj yeeb koob thaum nej txais “tej lus tim khawv txog Yexus”¹⁰ thiab muab tag nrho nej lub siab rau Nws.¹¹ Tsis yog kom nej tsis txhob mus haud.

Qhov no puas hloov dab tsi ntawm peb txoj kev ua neej? Peb txoj kev siv peb txoj kev ywj siab xaiv tsis muaj nqis dab tsi li lo? Peb ua los tsis ua raws li Vajtswv cov lus txib tsis ua li cas los? Yeej tsis yog li ntawd. Raws li hais nyob hauv plaub phau txoj moo zoo, nyob hauv Nws txoj hauj lwm qhuab qhia, ib yam uas Yexus pheej caw tas li thiab thov kom peb ua yog kom peb hloov siab lees txim thiab los cuag Nws.¹² Lub ntsiab ntawm tag nrho Nws tej lus qhia yog qhov uas peb yuav tsum ua neej raws li kev ncaj ncees uas siab dua¹³ hu peb los hloov ua neeg zoo zuj zus, muaj kev ntseeg Yexus Khetos uas hloov peb lub siab loj heev.¹⁴

Vajtswv xav kom peb hloov peb txoj kev muab hlob thiab kev khav theeb, xav kom peb tshem tawm tus neeg ntawm sab nqaij daim tawv,¹⁵ kom peb “cia li mus … thiab tsis txhob ua txhaum ntxiv.”¹⁶

Yog tias peb ntseeg lub hom phiaj ntawm Leej Txiv txoj hau kev yog kom cawm peb, txhiv peb dim, muab kev hlub tshua rau peb, thiaj li ua rau peb zoo siab, ces lub hom phiaj ntawm Leej Tub uas ua kom muaj raws li txoj hau kev tseem ceb no yog dab tsi?

Nws Leej Tub hais tias: “Rau qhov kuv los saum ntuj los tsis yog los ua raws li kuv lub siab, tiam sis kuv los ua raws li tus uas txib kuv los lub siab nyiam.”¹⁷

Yexus lub siab nyiam yeej yog Nws Leej Txiv uas muaj siab dawb siab zoo lub siab nyiam! Nws xav kom tag nrho Nws Txiv cov me nyuam txais raws li lub hom phiaj ntawm Nws txoj hau kev—uas yog kev txoj sia nyob mus ib txhis nrog Nkawd. Tsis muaj leej twg uas txwv tsis pub nws sim hloov ua neeg zoo li Vajtswv.

Yog nej txhawj tias nej yuav tsis zoo txaus, los sis Yexus Khetos txoj Kev Theej Txhoj uas kav mus ib txhis li yeej pab txhua tus, tiam sis tsis pab nej li, ces nej tsis to taub. Mus ib txhis txhais tias mus ib txhis li. Mus ib txhis txhais tias yuav theej txhoj rau nej thaib cov uas nej hlub.¹⁸

Nifais piav txog qhov tseeb zoo kawg no: “Nws tsis ua ib yam dab tsi tsuas yog ua tej yam uas pab neeg ntiaj teb xwb; vim nws hlub neeg ntiaj teb, nws thiaj tso nws txoj sia xwv kom nws yuav coj tau neeg txhua tus los cuag nws. Yog li ntawd, nws tsis txwv ib tug twg kom tsis txhob los txais yuav nws txoj kev cawm seej.”¹⁹

Tus Cawm Seej, tus Tswv Yug Yaj Zoo, mus nrhiav Nws cov yaj uas poob zoo mus txog thaum Nws nrhiav tau lawv.²⁰ Nws “tsis kam leej twg yuav piam sij.”²¹

“Kuv txhais npab hlub tshua twb muab cev tuaj rau nej, thiab tus uas yuav los, kuv yuav txais yuav tus ntawd.”²²

Nej puas muaj neeg mob nyob hauv nej? Coj lawv los ntawm no. Nej puas muaj neeg ceg tawv, los sis dig muag, los sis neeg khoov duav, los sis neeg tu ceg tu npab, los sis neeg mob ruas, los sis cov uas qhuav tes qhuav taw, los sis cov uas lag ntseg, los sis cov uas raug txom nyem ib yam dab tsi? Coj lawv los ntawm no thiab kuv yuav kho kom lawv zoo, vim kuv muaj kev khuv leej rau nej; kuv lub siab muaj kev hlub tshua puv npo.”²³

Nws tsis tau tso tus poj niam uas los ntshav tseg, Nws tsis tau thim ntawm tus neeg mob ruas mus; Nws tsis tau xyeej tus poj niam uas deev luag txiv; Nws tsis tau txwv tsis pub cov neeg lees txhaum los—txawm yog lawv ua txhaum dab tsi los yog. Thiab Nws yeej yuav tsis xyeej nej los sis cov uas nej hlub thaum nej muab nej lub siab mob thiab lub siab xav ua zoo rau Nws. Yeej tsis yog Nws lub siab nyiam los sis Nws txoj hau kev, tsis yog Nws lub hom phiaj, los sis kev cia siab kom tso nej tseg.

Tsis yog li ntawd, Nws tsis tsa tej yam kom tav nej kev; Nws muab tej ntawd tshem xwb. Nws tsis thaiv kom nej tsis txhob nkag haud; Nws zoo siab tos txais mus haud.²⁴ Nws txoj hauj lwm qhuab qhia yeej qhia tias Nws xav kom muaj li no.

Ces kuj muaj Nws txoj kev txi theej txhoj, uas nyuaj dhau rau peb to taub, peb cov neeg uas txawj tuag tsis muaj peev xwm to taub li. Tiam sis, thiab qhov no yeej yog ib lo lus tseem ceeb, “tiam sis” peb yeej txawj to taub, lub hom phiaj dawb huv Nws txoj kev txi theej txhoj kom cawm peb dim.

Daim ntaub thaiv ntawm lub tuam tsev los twb muab ntuag rhe ua ob sab thaum Yexus tuag saum tus ntoo khaub lig, ua ib lub cim hais tias twb qhib txoj kev rov qab mus cuag Leej Txiv lawm—rau txhua tus uas yuav tig mus rau Nws, tso siab rau Nws, muab lawv tej nra rau Nws ris, thiab kwv Nws tus quab rau lawv thaum lawv nrog Nws khi lus.²⁵

Los yog hais tias, Leej Txiv txoj hau kev tsis tav peb kev. Ib txwm tsis yog li ntawd, yeej yuav tsis yog li ntawd. Puas muaj tej yam uas peb yuav ua, cov lus txib uas peb yuav tsum coj, tej yam uas peb yuav tsum hloov hauv peb lub siab? Muaj. Tiam sis vim muaj Nws txoj kev tshav ntuj, peb muaj peev xwm ua tej ntawd, tsis yog peb ncav tsis cuag li.

Nov yog txoj moo zoo! Kuv zoo siab ua Vajtswv tsaug vim kuv paub tej lus tseeb no. Leej Txiv txoj kev npaj, Nws txoj hau kev, Nws lub hom phiaj, Nws lub siab nyiam, thiab Nws txoj kev cia siab yog kom kho nej zoo, ua rau nej nyob kaj siab lug, thiab coj nej, thiab cov uas nej hlub, los tsev. Kuv ua tim khawv txog qhov no los ntawm Yexus Khetos, Nws Leej Tub, lub npe, amees.